السلام عليكم ما عليكم امر بس ودي لو تنصحوني, ودي اشتري جهاز للمشي ما غيره اللي انشوف دعاياته بالتلفزيون لكني بصراحة مو عارف شنو النوعية الزينة وجم سعرها ؟! وهل الاجهزة الصينية جيدة و ثقة ؟ وشكرا
في ورى الافينيو بشويخ محل ادوات رياضة واجهزة مشي وغيرها اعتقد اسمه النصر الرياضي شريت منهم مجموعة اجهزة وبصراحة اجهزتهم ممتازة ويعطون كفالة على جهاز المشي بعد مر عليهم وخذ فكرة
مشكور يا خوي ويعطيك العافية.. بس وين مكانهم بالضبط ... ؟ النصر الرياضي جني سامع عنهم والله بس مو متاكد من مكانهم ..!
حاضرين بعد اذن اخوي اللي رد اول واحد , بوصفلك مكان النصر الرياضي. اذا انت على الدائري الرابع , جاي من الجهراء باتجاه السالمية, الدخلة اللي قبل صفاة الغانم بالضبط (اللفة تكون بعد الساير والبابطين) . اذا لفيت تمشي لي اخر الشارع في دوار , اهوا على الدوار بالضبط على ايدك اليسار. واذا تبي اوديك انا حاضر. هذا بالنسبة للوصف... بس انا عندي لك نصحية , وشاور الاخوان بالمنتدى يمكن يعرفون اكثر مني. لا تشتري جهاز جري, اغلب اللي عندهم اجهزة جري, يستعملونها فترة ويكسلون (على الاقل اكثر اللي انا اعرفهم). اذا تبي جهاز زين, في جهاز اسمه skywalker ماني عارف شنو اسمه بالعربي, بس اهوا مثل جهاز المشي ولكن تحس انك ماشي على الهوا, مثل قاعدتين للرجلين توقف عليهم وتمشي (ان شاء الله وضحت الصورة) *** وفي نصيحة لك ولكل اللي يقرى: اذا تبي تمشي مسافة اكبر بمجهود اقل, شغل موسيقى او فيلم او برنامج كل واحد وميوله , راح تحس ان الوقت مشى اسرع وفقدت سعرات اكثر ( طبعا هذا مو اختراعي بس من باب الفائدة للاخوان) وشاكرك طولت بالك
السلام ازيد علي النصيحه نصيحه بالنسبه لي جهاز الدراجه افضل بكثير من جهاز المشي بسبب الملل من جهاز المشي ويفضل تشغيل القراءن الكريم افضل بكثير من الموسيقى وشكرا
مشكورين يا اخوان على هالمشاركات القيمة. اخوي pirateee: مشكور على الوصف, واضح الطريق الحين. الاخ الهيلام: مشكور على النصيحة القيمة. الحقيقة انا الجهاز ابيه لأم العيال, بعد الولادة بعملية قيصرية, تبي تخفف وزنها بالرياضة لكنها خايفة من مضاعفات قد تحصل لها لو انها عملت رياضة "طبيعية". فقلت اجيب لها جهاز جري , بس مادري الحين بعد سماع نصايحكم شنو اللي يناسبها من الامثلة اللي ذكرتوها ( الدراجة او SKYWALKER) شكلي بسال مختص افضل واضمن.
إذا تبي جهاز مشي أهم شي السير الأسود للجهاز يكون عريض علشان تاخذ راحتك بالمشي .وآنا خذيت جهاز (سير الجهاز عريض ) من حولي مقابل مطعم الديك الرومي بسعر 170 دينار تقريبا والجهاز مكفول سنه كاملة مع خدمة الصيانة على الجهاز لأي طارئ أعتقد اسم المحل (مركز العائلة الرياضي). وإذا تبي جهاز على مستوى عالي (بس غالي شوي) أخذ ماركة لايف فتنس معرضهم آخر شارع محطة الدبوس اللي بشويخ قبل الجسر على إيدك اليمين أسم المحل الخالدية للأدوات الرياضية وهالجهاز كد ومد وتقدر تسألهم عن أي جهاز يصلح مثل حالتك لأنهم خبرة بالهموضوع وهم تقريبا اللي يزودون المعهد الصحية بهالأجهزة . وشكرا
نسيت أقولك شغلة عن الدعايات التلفزيونية . أجهزة الدعايات التلفزيونية أجهزة تجارية 100% وسريعة التلف ( دير بالك منهم)
الله يطولي بعمرك ... جنك تدري اللي في بالي توني قاعد اشوف دعاية تلفزيونية ودشت في بالي لكني طول عمري ما ارتاح لهم لله في لله مشكور يا خوي على هالنصايح
نسيتوا الوزن يا شباب...ترى بعض الأجهزة مخصصة حق الرشاقة فقط وبعضها لأصحاب الأوزان الثقيلة فحبيت أنبه فقط أخونا صاحب الموضوع
