ما الحل مع النحافة؟

[Maxima]

السلام عليكم
ياشباب جسمي ضعيف جدا
وابي اسمن وازيد وزني ومحتاج تقريبا 20 كيلو
طولي 180 الوزن 57
شنو افضل واسرع وسيلة للسمنة؟ محتاج خبرتكم

 

[yoyo1983]

انصحك بمراجعة اخصائي اغذيه او دكتور مختصص بالاغذيه

والله اعلم

 

[عاشق سدني]

وعليكم السلام ....

اخوي دربالك تاخذ اي شي صناعي ولا من محلات كمال الاجسام وحبوبهم كله مضر للجسم وللجهاز الهضمي وعافيه على الطل كل مواد سامه ..
انصحك تروح مستشفى الصباح قسم التغذيه هناك يفتحولك ملف مجانا وكله دكاترة تغذيه ياخذون فصيلة دمك وطولك ويعطونك الاكل المناسب على حسب فصيلة الدم ...
او اي دكتور تغذيه خاص ...
عندك الاكل الي يزيد الوزن
المووز والحليب والتمر
الحلبه
النشويات البطاط واشياء وايد راح يعطونك

 

[الفايدة للجميع]

كم العمر يا Maxima

ومثل ما تفضلت الاخت sweet_laila وسبقتني بمراجعة أخصائي أغذيه أفضل وبطريقه صحيه ولا

تستعجل على زيادة الوزن

 

[سهم مرتاح]

اذا مافيك قرحه او قولون والله يبعدك عن هالامراض
استعمل فاتح شهيه طبيعي
داقوس مع الاكل
والبهارات والنكهات
دلع نفسك بالمطاعم
ابتعد عن التدخين تمتن
اهم شي لا تزيد وزنك بشكل غير طبيعي لانه راح يصير جسمك غير طبيعي بعد

 

[المرسومي]

احضر عندنا بالديوانية وأضمن لك الـ20 كيلو بغضون ثلاث شهور


عليك بالأكل المليء بالسعرات الحرارية


وكثر من برقر كنك وكنتاكي وعليك بالمفطح والحلويات

وسو رياضة على الخفيف حتى لا يصيبك تصلب شرايين من الدسم

بس سبحان الله أنا بسوي رجيم أبي أنزل وانت تبي تزيد

لله في خلقه شؤون​

 

[Maxima]

sweet_laila
المشكلة مواعيدهم بعيدة امس دقيت على دكتور عبدالله المطوع اقرب موعد 8/9 !!!!

عاشق سدني
اشكرك اخوي على النصيحة ماتدري متى مواعيدهم بالضبط بمستشفى الصباح؟

الفايدة للجميع
العمر 25

سهم مرتاح
اشكرك على النصايح

المرسومي
الله يعطيك العافية

 

[اطفـــائي محترق]

السلام عليكم
ياشباب جسمي ضعيف جدا
وابي اسمن وازيد وزني ومحتاج تقريبا 20 كيلو
طولي 180 الوزن 57
شنو افضل واسرع وسيلة للسمنة؟ محتاج خبرتكم

اخوي انا كانت مشكلتي نفس مشكلتك
طولي 180 وزني كان 60 وكنت اعاني من النحافه
وانصحوني الربع نفس ماتفضل اخوي عاشق سيدني
عليك الأكل اللي يسمن مثل الحليب والموز والتمر والنشويات بشكل عام
واستمريت على هالاكل لمده شهرين تقريبا
والحين ولله الحمد وزني مثالي
طولي180 ووزني79

 

[عاشق سدني]

sweet_laila
عاشق سدني
اشكرك اخوي على النصيحة ماتدري متى مواعيدهم بالضبط بمستشفى الصباح؟


الله يعطيك العافية

حياك الله الميكسي ..
اهم دوامهم عادي صباحي بمستشفى الصباح لم تروح هناك اسألهم وين قسم التغذيه ....

بس اخوي الاخوان الله يهداهم قاعدين يحرضونك على المطاعم ..
اكل المطاعم وخر عنه يخرب الجسم ومايعطيك عافيه كله شحم وترهلات على مرض وكرش ودهون وكوليسترول
انصحك بالاكل الي سعراته الحراريه مرتفعه و الصحي المفيد الي يقوي عظامك ويعطيك الوزن الصحي والقوي .
واذا تبي مطاعم ..شوفلك على المطاعم الصحيه
مثل (صبوي ) اكله كله مفيد من غير كوليسترول ودهون مضره
كله فريش وطازج وكل الخضروات المفيده
عندهم كل انواع الوجبات الصحيه
عندهم اكلات بحريه سي فوود مثل قباقب وتونه
و ديك رومي وستيكات وصدور الدجاج وكل انوع السندويشات الطازجه الغير مقليه بدهون الامراض وعندهم للريوق بيض يزيد الوزن لا يعلى عليه طبعا المجابيس معروفه بزياده الوزن والكرش ...

واضافه على هذا نسيت لا اقولك عن العصاير الي تزيد الوزن
عندك المانجو والفرغلي
والافوكادو بالعسل
وطبعا الموز بالحليب مثل ماقلتلك

 

[مغامرجي]

في مطعم مندي بالرقعي توه فاتح روح اكل منه بظرف اسبوع راح يزيد وزنك

 

[Maxima]

اطفائي محترق
اشكرك اخوي على ذكر تجربتك الناجحة وان شاءالله اطبقها

عاشق سدني
الف شكر على معلوماتك القيّمة

مغامرجي
يالله نحطها باللستة

 

[zoya_y]

اوخيي تعال بيتنا اسبوعين ويصير وزنك 90 انا مبتليه فيهم ​

 

[(فزاع)]

في مطعم مندي بالرقعي توه فاتح روح اكل منه بظرف اسبوع راح يزيد وزنك

وينه هالطعم بالضبط ..؟ اوصفلي اياه

 

[بوسعود66666]

عليك بالوجبات السريعه تراها وحده بوحده

 

[مغامرجي]

وينه هالطعم بالضبط ..؟ اوصفلي اياه

مطعم اسمة وادي ريدان

رقم تلفونه 4884606

والله ما اعرف صاحبة لا من قريب ولا من بعيد بس بوجهه نظري احلى مكتوم دجاج كليتة بالكويت

 

[Madridi]

حجي سجل معاي

السبت: الغدا: مغل محل - العشا : هارديز
الأحد: الغدا: فريج صويلح - العشا : ماكدونالدز
الاثنين: الغدا: مندي المملكة الرقعي - العشا : كنتاكي
الثلاثاء: الغدا : مندي الجنوب - أبو حليفة علشان تغير جو - العشا : صاب وي
الأربعاء: الغدا : مطعم صيني شكثرهم بالسالمية - العشا: ملك الكباب (كباب عراقي) الي بشرق
الخميس: الغدا: كنتاكي - العشا: فريج صويلح
الجمعة: الغدا : صب وي - العشا: مندي المملكة الرقعي


اعطيك شهر واحد وشوف الفرق

لكن مع ممارسة رياضة خفيفة اذا كنت ما تمشي كله ورا مكتب قاعد أو ديوانية

 

[Madridi]

احب اضيف

اذا تبي اضبط من جذي وجسم متناسق وصحي

نفس الوجبات الي عطيتك اياهم + تضيف كل يوم عليهم أربع وجبات

يعني باليوم الواحد 6 وجبات ايه لا تستغر ست وجبات

واذا منت من النوع الي أكله خفيف انصحك تاخذ فاتح شهية ويفضل يكون من المكونات الطبيعية يعني من العسل وغيره

بالإضافة ملعقتين عسل على الصبح

وسجل بنادي حديد وتقعد فيه ست اشهر

وادعيلي

لا تنسى 6 وجبات + نادي حديد + ست اشهر = جسم متناسق

 

[سهم فسفوري]

اهم شيء الراحـــه نفسيــــه وبعدها اتبع نظام (الاكل بين الوجبات الرئيسيه)... من مكسرات ونشويات والعصائر الطبيعيه خصوصا موز بالحليب والرياضه مهمه للجسم تخليك تشعر بالجوع المستمر خصوصا السباحه( اشترك بنادي) واشرب حليب كامل دسم + اكل موزه قبل التمرن بربع ساعه تقريبا ........(حسب التجربـــه إلى مريت فيها ) والله يسمنك ويكبر خدودك

 

[Madridi]

الموز يشبع وينفخ المعدة ما أنصح فيه الا بالليل آخر الوجبات

 

[zoya_y]

حجي سجل معاي

السبت: الغدا: مغل محل - العشا : هارديز
الأحد: الغدا: فريج صويلح - العشا : ماكدونالدز
الاثنين: الغدا: مندي المملكة الرقعي - العشا : كنتاكي
الثلاثاء: الغدا : مندي الجنوب - أبو حليفة علشان تغير جو - العشا : صاب وي
الأربعاء: الغدا : مطعم صيني شكثرهم بالسالمية - العشا: ملك الكباب (كباب عراقي) الي بشرق
الخميس: الغدا: كنتاكي - العشا: فريج صويلح
الجمعة: الغدا : صب وي - العشا: مندي المملكة الرقعي


اعطيك شهر واحد وشوف الفرق

لكن مع ممارسة رياضة خفيفة اذا كنت ما تمشي كله ورا مكتب قاعد أو ديوانية

شنو هالمخـــــــــاسيــر الله يهدااااااك شسالفه خلص معاش الريال جذي بأول أسبوع ​