منو يذكر شنو سوى نفس هاليوم قبل 18 سنه؟ (قبل الغزو بيوم)

[بو ذياب]

الشباب مغامرات مني انه ما استوعبت انه في غزو الي ليمن تحررنا ...
بس الي اذكره اني مارحت ثانية روضه على طول ابتدائيه
بس الي الي يسالني الحين اقوله كنت مقاومه كنت اوزع خبز مع عيال فريجنا ونحرق عزكم الله الخمام ...
ومحد عارف فينا شسالفه ماخذينها وناسه

 

[جورج المطيري]

ايام راحت الله لا يردها بس الواجب نعتبر من هالايام الحين خلصنا من العراق شيفكنا من ايران
مشكلة بلدنا انه تتصرف على اساس ردة الفعل يعنى ما ادارى خدي عن الناس الى تبي تطق لالا انطر واجهز خدى للطراق ليما يطقونى ارد اخذ طراقي هذى يسمونها سياسة ردة الفعل
ليش ما احتاط من البدايه ولا اسمح لاحد يتجرا يطقنى طراق احسن سياسة بالعالم بدون منازع سياسة السلطان قابوس بن سعيد لكن لللاسف الاعلان متجاهله لانه يحب يشتغل في صمت
من قبل الغزو الدول كلها اول سنه سياسه واهو حاط قاعده فرنسيه وقاعده بريطانيه وامريكيه لهم حقوق وعليهم واجبات وحاطهم مو قوه فعليه لا بس وجود وبس علم مرفوع
محد قدر يقرب صوبه والله انا معجب لحد الهيام بسياسه قابوس وياليت نسوي مثله بوقتنا الحالى شالى يمنع الحين ما اخلى قاعده فرنسيه او بريطانيه في بوبيان بشرط ماتكون امريكيه لان الامريكان موجودين فعلا لازم اشكل عشان اكسب اكثر تاييد وقتها خل العجمي يقدر يقرب صوبنا يحسب الف حساب

 

[dnyay]

ذكرى اول يوم من الغزو

السلام عليكم
اذكر اول يوم من الغزو قعدت الصبح بروح الدوام كالعاده لكن ابوى الله يرحمه كان قايلى من امس انى اجيب اخوى من بيت عمى اللى بالصليبيخات فقلت اجيبه الصبح مبجر واروح الدوام المهم مسكت الدائرى الرابع وقعدت افرفر بالراديو ابى اسمع شى ولا على ما اظن المذيع يوسف مصطفى يقول انقذونا ايها الشرفاء افر المحطه الثانيه وهم نفس الشى صكرت الرادو وانا ولا على بالى شى مع ان فى الطريج شفت اشياء غريبه اللى داش عكس السير وشفت جم دبابه وهم ولا على بالى قلت عادى لكن اللى موعادى لما وصلت دوار العظام ولا جنود واقفين على الدوار انا حسبالى كويتيين ولا منهم يقولى يلا ارجع من مكان ما جيت لفيت يمين ورحت من وراء مجمع الشؤون ولا الشارع مصكر يعنى بطلع بختصار ولا ادخل مواقف مستشفى الصباح ولا يوقفنى واحد اظن انه من موظفين الصباح ويقعد يصارخ على من قمة راسه : يلا انزل من السياره ويلا دش الملجأ واخذ السياره ووقفها بالمواقف ونزلنا الى الملجأ وهناك شفت اللى زادنى خوف على خوفى حريم ويهال وناس على السراير وصراخ واللى زاد الطين صوت الانفجارات لان الجيوان ورانا انا من الخوف الدمعه اشوى وبتنزل الحين ابى اللى اخذ مفتاح السياره وينه قمت ادوره ولا هذا اهو واقف على مدخل الملجأ قلتله يا معود اهلى بروحهم وانا اكبر اخوانى عطنى المفتاح خلنى اتوكل على الله وبعد مساحل وترجى فيه طلعلى خمطت مفاتيح وقالى دور فيهم اخذت السويش وغبه البيت اشلون وصلت ومن اى طريج ييت هذا اللى ودى اتذكره لكن اتذكر ان ما فى آيه حافظها الا قلتها لين وصلت البيتوذكريات ايام الغزو كثيره خاصه اننا كنا من الصامدين للاسف
لكن ردت الكويت غصبن على اللى مو راضى والحمد لله

 

[ابو سالم1]

تونى شارى عود وتونى متعلم ادق ياناس حبيت واحد واثرى المحبة صعيبة :D

 

[Master-Leo]

ماذكر شنو سويت بس يمكن نمت مبجر كالعاده ولما صار الغزو كنت أطالع التلفزيون وأسمع صوت قصف الدبابات بحكم قرب منطقة دسمان من منطقتنا

و أخوي كان في معسكر الجيوان ونحاتيه ومارجع الا بليل بعدما ما لبس بدلته العسكريه بالمقلوب فصار لونها أبيض وقدر يمشي بالسياره ويوصل البيت

إيييه أيااااااااااااااااااااااااااااااااااااااااااام الله لايعودها بس أذكر من ضيقة الخلق حطيت حرتي باللعب في جهاز نيتندو للألعاب مال الزمن الحجري

 

[الأرستقراطي]

اختبار للذاكره منو فيكم يذكر شنو الأشياء اللي سواها قبل الغزو العراقي الغاشم بيوم؟ انا الصبح كان عندي امتحان رياضيات كورس صيفي بالثانويه وبالليل كنت مزهب الجنطه بروح منتزه الخيران عقب ما أقدم آخر امتحان يوم الخميس الصبح بس مانبي نتطرق للموضوع سياسيا احتراما لقوانين المنتدى بس ودنا نختبر ذاكرة الاعضاء.

نفس السالفة ،،، آخر امتحان كورس صيفي بثانوية كيفان ،،، وأقول للناس اللي اطلعت بالغزو ،،، الصمود الصمود الصمود

( آنا صامد ،،، صامد ،،، خمس أيام و صرت بيب بيب دزيناه دبي فندق المطار )[/LEFT​

]​

 

[Abo Fahad]

الخميس
2-8-1990
الفجر سهران بخيمة عرس مع الربع ونبي نتهاوش مع شلة قطعة 2

الله ياحلو الكويت قبل الغزو كان عمري 16 سنه صار الغزو والله العظيم

بدون مبالغه رايح المخفر الساعه 8 الصبح انا ومجموعه نبي سلاح منهم

جان يطلع لنا الظابط قال روحو بيوتكم وكان عدد الموجودين بالمخفر اكثر من

500 شخص تقريبا كلهم شباب طبعا حاطين مكبر صوت الراديو اعتقد الشيخ

سعد الله يرحمه كان يتكلم واحنا نسمع توجيهاته وكان المذيع يوسف

مصطفى هم يتكلم واحنا مو عارفين شنو نسوي رديت للبيت لقيت الوضع

مو اوكي وابوي الله يرحمه كان يرتب الامور عشان نسكن بمزرعه بالوفره

لان موقع بيتنا جدام المخفر والعراقيين كانو يبون ياخذون البيت يخلونه قياده

لهم وفعلا......خذو البيت من عندنا وطلعنا بكل قهــر

الله لايعيدها من ايام​

 

[boalons]

سافرت مع الاهل يوم الاربعاء 1-8-1990

 

[alreksa]

الاربعاء 1-8 الساعه 8 بالليل تقريبا نزلنا الطراد وعلى طول عوهه ومر الليل وحنا نسمع الانفجارات كان اعنقادنا انها ندريبات للجيش الكويتي الخميس الصبح رجعنا 7 صباحا لقينا واحد سألناه شسالفه قال العراق ضربت الحدود الشماليه ولكن لما مشينا في الخط السريع والساعه تقريبا صارت 9 عرفنا انهم داخل الديره و سلامتكم

 

[InUrEyEs]

الغزو ماشفته ولا ابى اشوفه الحمدالله قبل الغزو بيوم سافرنا كلنا مع الوالد والوالده الى سنغافورا ماعدا اختى الصغير عمرها سنه ماحصلنا لها تذكره مع الخدامه جان ارجعهم على اساس باجر ايون بطياره ثانبه تونا واصلين ماصار الخميس الفير الى اخبار سنغفورا كلها عن الكويت والخبر اتصلنا فى بيت يدى الفير اقولون ماعندنا شى توه ماوصلهم الخبر بعد 3 اايام من الغزو ابوى دش الكويت وطلع اختى

عاد انا الحين يااتنى عقده من سنغافورا كرهتها احسها شئم وفقر

 

[nabeels8]

اختبار للذاكره منو فيكم يذكر شنو الأشياء اللي سواها قبل الغزو العراقي الغاشم بيوم؟ انا الصبح كان عندي امتحان رياضيات كورس صيفي بالثانويه وبالليل كنت مزهب الجنطه بروح منتزه الخيران عقب ما أقدم آخر امتحان يوم الخميس الصبح بس مانبي نتطرق للموضوع سياسيا احتراما لقوانين المنتدى بس ودنا نختبر ذاكرة الاعضاء.

صباح الخير

أنا كان عندي أختبار رياضيات في ثانوية كيفان مقررات وقال لنا الناظر أن راح

يعلنون عن الأمتحان يوم الجمعه بعد صلاة الجمعه حتى الناظر كان ولد

الصقر​

 

[قاروه]

الغزو ماشفته ولا ابى اشوفه الحمدالله قبل الغزو بيوم سافرنا كلنا مع الوالد والوالده الى سنغافورا ماعدا اختى الصغير عمرها سنه ماحصلنا لها تذكره مع الخدامه جان ارجعهم على اساس باجر ايون بطياره ثانبه تونا واصلين ماصار الخميس الفير الى اخبار سنغفورا كلها عن الكويت والخبر اتصلنا فى بيت يدى الفير اقولون ماعندنا شى توه ماوصلهم الخبر بعد 3 اايام من الغزو ابوى دش الكويت وطلع اختى

عاد انا الحين يااتنى عقده من سنغافورا كرهتها احسها شئم وفقر

هاا تروحين سنغافووره

صباح الخير

أنا كان عندي أختبار رياضيات في ثانوية كيفان مقررات وقال لنا الناظر أن راح

يعلنون عن الأمتحان يوم الجمعه بعد صلاة الجمعه حتى الناظر كان ولد

الصقر​

بشر بوعادل عسى طلعت نتيجة الاختبار




--------------------------------


كنا في الشاليه ووصلنا الخبر بحدود الساعه 9 الصبح

وما وعينا الا البحر في طراريد (عسكريه) وسلامتكم

كان يوم اغبر عسى الله لا يعودها من ايام

ويحفظ الكويت وشعبها وحكومتها من كل مكروه

 

[عالم الابداع]

الله يعين الجميع قرأت جميع الردود والله الصراحه كانت مأساه فعلاً واصبت بحزن وانا اقرأ ماحصل لكم اخواني


اخواني واخواتي والله العظيم انها لعبرة لمن له سمع وعقل وقلب

اخواني ان الله اذا اراد امرا قال له كن فيكون

هذه وصيه لكم ولي ولكل اخواني

احذروا من المعاصي والذنوب قد يكون هذا انذار لنا ولكم

واعلموا ان الله اذا اخذ فإنه اخذر عزيز شديد

التوبه من الذنوب ياأخواني وتواصوا وناصحوا بعضكم البعض


فما اهلك الاقوام الاولى الا انهم قال تعال(( كانوا لايتناهون عن منكر فعلوه لبئس ما كانوا يفعلون )) (المائدة )
وقال تعالى (( هو الذي يسيركم في البر والبحر حتى إذا كنتم في الفلك وجرين بهم بريح طيبة وفرحوا بها جاءتها ريح عاصف وجاءهم الموج من كل مكان وظنوا أنهم أحيط بهم دعوا الله مخلصين له الدين لئن أنجيتنا من هذه لنكو نن من الشاكرين ))
وقال تعالى ((إن الله يمسك السماوات والأرض أن تزولا )).

 

[اليوفى]

اذكر كنا نقز بمنطقتنا بيان انا واخوى وواحد من الربع من شارع لى شارع تقريبا لى الساعه 3 الفجر ( كان اخوى توة ما صارله شهرين مطلع من الوكاله نيسان التيما هديه نجاحه من الثانويه ) وبعدين سرينا بيوتنا

اذكر قعدت من النوم المغرب جان اهلى يقولولى صار غزو

يمكن انا اخر واحد بالكويت درى بالغزو هههههههههه

 

[Fishta]

اختبار للذاكره منو فيكم يذكر شنو الأشياء اللي سواها قبل الغزو العراقي الغاشم بيوم؟ انا الصبح كان عندي امتحان رياضيات كورس صيفي بالثانويه وبالليل كنت مزهب الجنطه بروح منتزه الخيران عقب ما أقدم آخر امتحان يوم الخميس الصبح بس مانبي نتطرق للموضوع سياسيا احتراما لقوانين المنتدى بس ودنا نختبر ذاكرة الاعضاء.

انا كان عندي إختبار كيمياء 65 تخرج فقط مادة وحدة


والصبح قالي الوالد ترى العراقيين دشو علينا قتله أروح الإختبار ولا لأ


قالي روح شوف شنو السالفة


ورحت ولا الناظر واقف قدام الباب يقول حق الطلبة


تأجلت الأمتحانات إلى يوم السبت

وكان ذلك في ثانوية السرة

 

[تكانه]

اختبار للذاكره منو فيكم يذكر شنو الأشياء اللي سواها قبل الغزو العراقي الغاشم بيوم؟ انا الصبح كان عندي امتحان رياضيات كورس صيفي بالثانويه وبالليل كنت مزهب الجنطه بروح منتزه الخيران عقب ما أقدم آخر امتحان يوم الخميس الصبح بس مانبي نتطرق للموضوع سياسيا احتراما لقوانين المنتدى بس ودنا نختبر ذاكرة الاعضاء.

نفس السالفة ،،، آخر امتحان كورس صيفي بثانوية كيفان ،،، وأقول للناس اللي اطلعت بالغزو ،،، الصمود الصمود الصمود

( آنا صامد ،،، صامد ،،، خمس أيام و صرت بيب بيب دزيناه دبي فندق المطار )

نفس سالفتكم وثانوية كيفان .. عاشوا عيال ثانويتنا الارستقراطي شكلك يا دفعة 85 ولا 84... طبعا كان امتحان رياضة ماليه وانا وصاحبي ياييبين مدرس تالي الليل.. خوش مدرس اللي رايحين معاه انتعشى في بيتزا هت يوم مجمع زهرة .. الشاهد واصلنا لي الفير سمعنا الاخبار طلعنا اذكر رحنا صوب الدائري السادس ولا هالارتااااااال .. دبابات اليهد .. طبعا ما ندري شالسالفة نحسب تبعنا (الكويت) وفي الواقع كلهم عراقيين @@ شوفوا السنع بس رايحيين الثانوية هههههههههه بنتأكد يعني ان ماكو امتحان هههههه تالي رحت البيت طبعا خبصة .. سمعت صوت طيران رحت السطح ولا اشوف 20 هيلوكبتر .. جأن أحيييهم بغترتي .. يوم مروا فوقي ولا علم العرااااااااق هههههههههههه ... وطاحت وحدة منهم في محطة التناكر في حولي جبال النزهة والقادسية .. ذاك اليوم اللي اذكره اني كنت عايش بدون مشاااعر .. ماكووووو احساس
بعد يومين رحت تطوعت في مطبخ مستشفى الصباح بالسرداب .. نحضر وجبات طبعا لازم انلقلق .. غزو ويواعه .. تالي رقوني ودوني فوق الدور الارضى كاتب افتح ملفات للمرضى.. كنت كل يوم ارجع بيتنا الساعة 8 بالليل ارد بروحي وكل سيطرة اقولهم اشتغل بالمستشفى .. ما ادري شلون اهلي ما فكروا فيني .. 18 سنة فطفوط حرام .. بعدها باسبوعين كشوني ناس لابسين بدلات سفاري تالي عرفت انهم من حزب البعث .. قالوا لي انت تشتغل اهنانا قلت له لا والله متطوع .. قالي يالله زين لا عاد ترجع @@ ههههههههه .. ايااااام الله لا يعوووووودها

 

[Fishta]

اذكر كنا نقز بمنطقتنا بيان انا واخوى وواحد من الربع من شارع لى شارع تقريبا لى الساعه 3 الفجر ( كان اخوى توة ما صارله شهرين مطلع من الوكاله نيسان التيما هديه نجاحه من الثانويه ) وبعدين سرينا بيوتنا

اذكر قعدت من النوم المغرب جان اهلى يقولولى صار غزو

يمكن انا اخر واحد بالكويت درى بالغزو هههههههههه

إسلم وسلم
هههههههههههههههههه

 

[نوط بو 1000]

رحت تطوعت في مطبخ مستشفى الصباح بالسرداب .. نحضر وجبات طبعا لازم انلقلق .. غزو ويواعه .. تالي رقوني ودوني فوق الدور الارضى كاتب افتح ملفات للمرضى

أنا خابر إذا بيرقونك بالمطبخ تصير شيف مو كاتب..!!

الظاهر لا ترقيه ولا شي شكلك خلصت الماجله علبو تلقلق و طاحو عليك

نتعشى في بيتزا هت يوم مجمع زهرة

يا سلام والله أيام كنا نقعد ننطر دورنا بره من الزحمه .. راحت أيام السالميه

 

[نوط بو 1000]

ورحت ولا الناظر واقف قدام الباب يقول حق الطلبة


تأجلت الأمتحانات إلى يوم السبت

عاد الله يهداه الناظر كان لازم يحدد كلامه المفروض يقول يوم السبت بعد ٧ شهور..!!

حده واثق الناظر يعطي مواعيد عباله شوارزكوف

 

[Fishta]

عاد الله يهداه الناظر كان لازم يحدد كلامه المفروض يقول يوم السبت بعد ٧ شهور..!! :d

حده واثق الناظر يعطي مواعيد عباله شوارزكوف

خخخخخخخخخخخخخ



بوطلال دمووووووووووووووووووووووووووووووووووووووووووع ههههههههه