قصيدة عن المكياج !

[ابو سالم1]

يـا صانـع المكيـاج الله يجـازيـك
خليتني مخـدوع فـي شكـل خلـي

الله يحـرق مصنعـك مـع مبانيـك
والمعرض الموجـود في بيكاديلي

ادعي عسى تعمى وتنشـل رجليـك
هـذا دعائـي دوم لا جيـت اصلـي

خليتني اركـض ورا البنت هاذيـك
واشوفها اجمل غـرام ٍ حصـل لـي

قلبي عشقها يا(جيفنشي) توماتيك
وان شافها قلبـي يرحـب يهلـي

هي رحبت بـي وقالـت الله يحييـك
وقالت هلا باللي عشق زيـن شكلـي

وقالت انا اجمل بنت في اللي حواليك
شف حسني الاخاذ وروجي العسلّـي

طالعتها ثـم قلـت هالقلـب يبغيـك
ومن شاف حسنك خلى غيرك يولـي

ابغي اشوفـك دون مكيـاج يكسيـك
وابغـي اشوفـك بالجمـال المحلـي

قالت تبينـي افـرك الوجـه تفريـك
واشيل هالبـودر وروجـي وكحلـي
قلت أي نعم قومي عسى الروح تفديك
ابغـي جمالـك هالطبيعـي يهـلّـي

قالت دقايق راجعـه لـك واراويـك
ذاك الجمـال اللـي لعينـك يسـلّـي

ويوم رجعت لي شربكتني الشرابيـك
وحسيت الارض تدور وانـا بمحلـي

الخد كنه يا(جيفنشـي) سيراميـك
والوجه شارع مثـل شـارع حولـي

الوجـه كنـه بيـت كلـه شبابيـك
من هالحفر في وجهها اللـي يعلّـي

كلـه سبـب مكياجـك الله يجازيـك
خليتني مخـدوع فـي شكـل خلـي

ونصيحتي لكل شاب من غير تشكيك
لا لا اتسـرع ثـم تنغـش مثـلـي

اللـي بـلا مكيـاج خلهـا حواليـك
واللـي تحـط مكيـاج خلهـا تولـي
وسلامتكم
مابي اعرض هذى القصيدة عشان اراعي شعور صبايا المنتدى بس الاخ جورج ألح على وقالى لازم تعرضها اذا عصبتو ماوصيكم جورج المطيرى طلبها انا قلتلة لبية .

 

[جورج المطيري]

لووووووووووووول والله خوش قصيده صح لسانك ونبي زياده بعد بنشوف شنو رد البنات علي هالقصايد لا ترحمهم تكفه بوسالم لوووووووووول

 

[ابو سالم1]

جورج عيونى الخضر لك بس اذا صار شى امسك عقالى بنحاش
شرط ردود البنات يقولون احنا مانحط مكياج الا خفيف يعنى كلش مايعطونه اساس وبعدين يبدون الصبغ تقول يصبغون مدقر شفر
مع كل احترامي الشديد للبنات خواتنا وبناتنا وحبيباتنا وزوجاتنا وامهاتنا
مستحيل بنت تقول احط مكياج وايد كلهم يقولون خفيف والمشكلة الى اشوفهم بالاسواق او الجمعيات او سوق الجمعة اقول هذى حاطة اكثر من 12 لتر صبغ
الله اعلم

 

[جورج المطيري]

هلا

جورج عيونى الخضر لك بس اذا صار شى امسك عقالى بنحاش
شرط ردود البنات يقولون احنا مانحط مكياج الا خفيف يعنى كلش مايعطونه اساس وبعدين يبدون الصبغ تقول يصبغون مدقر شفر
مع كل احترامي الشديد للبنات خواتنا وبناتنا وحبيباتنا وزوجاتنا وامهاتنا
مستحيل بنت تقول احط مكياج وايد كلهم يقولون خفيف والمشكلة الى اشوفهم بالاسواق او الجمعيات او سوق الجمعة اقول هذى حاطة اكثر من 12 لتر صبغ
الله اعلم

والله مالى شغل فيك ربنا وربك الله اجرك على خدا
الحين بنات الكويت يحطون مكياج ما اصدق وليش اصلا المكياج الجمال ربانى
عاد تصدق يابوسالم البنات لما يحطون مكياج يصيرون يتشابهون العين نفس العين والخشم هم نفس الخشم من تغسل وجهها الله يجيرك تطلع الحلاوه المحليه ويبان المستخبي اعرف واحد من الربع الله يذكره بالخير تزوج على الطريقه القديمه ماشاف المره الا لمحه وكانت خطبه عائليه الظاهر كانت غاشته بالمكياج مامر اسبوع الا واهو مطلق افا عسي ماشر تدرى شنو رد علينا
قال الظاهر مضيعيين زوجونى اخو المره ههههههه

 

[بحريابحر]

:d صح لسانك وياحلات شى لى صار ربانى

 

[ابو سالم1]

اشكركم على المرور اخوانى

 

[مفتاح]

مع الاسف واحد من ربعي متزوج 2 بدويه وسوريه


البدويه تشتري المكياج بالكيلو والسوريه بالجرام

 

[ابو سالم1]

مشكورين على المرور اخوانى

 

[yoyo1983]

الحمدالله ماحط مكياج

شكرا

 

[zoya_y]

منو الي قال انه المكياج يغير 100 % !!
يعني المكياج اليومي مايغير شي من الويه
الحلوه بتظل حلوه والجيكره بتظل جيكره حتى مع المكياج
وشووووووكرا

 

[ابو سالم1]

شكرا اخوانى و خواتى على المرور وهذا القسم اسمة استراحة المنتدى يعنى الواحد جاي من قسم الاسهم او قسم البيع والشراء او العقار يمكن بايع بخسارة ويبي يرفه عن نفسة فى هذا القسم مع الناس الطيبة ارجو ان المواضيع الى فيها قشمرة لاحد يزعل منها ترا الدعوة نبي نستانس ونستفيد لاتاخذون السوالف الى فيها قشمر تقلبونها جد وزعل .
فديتكم كلكم

 

[الفايدة للجميع]

منو الي قال انه المكياج يغير 100 % !!
يعني المكياج اليومي مايغير شي من الويه
الحلوه بتظل حلوه والجيكره بتظل جيكره حتى مع المكياج
وشووووووكرا

حرام عليج المكياج زوج بنات وحريم كان حظهم متعوس بعد الله سبحانه

وتعالى