افكار ممكن تفيدك ابرحلتك
تحتاج كيس حلويات...او اي جوائز فردية صغيرة غير مكلفة...
أ. لعبة الحروف..وفكرتها تعتمد على السرعة والبديهية...والطريقة انك اتقول لهم ...يا عيال نبدأ باسماء ذكور...يالله منو اسرع واحد منكم يعطيني اب حرف...حرف....حرف....اممم..........الـ هـ.....راح تشوفهم يتنافسون..واول واحد يجاوب تقوله انت حصلت درجه....وتخلي ام العيال اتسجل الدرجات ...تشغلها هم وياكم..وهم اتخليها مسؤولة الحلويات...
...وعلى نفس هالمنوال ..مثلا اتخلي اللعبة تنتهي حق الي يوصل 5 درجات ..وبعدها ام العيال تعطيه جائزة فورية...
ممكن انك تغير فيها لاشياء ثانية مثلا اتقول..يعيال الحين راح تعطوني اسماء نساء...وتكرر نفس العملية وتقول لهم ابسرعة حرف....وهلم جر...اسماء بلاد، حيوانات, جماد, نبات....الخ
ب- لعبة اضمر شخصية في بالك
الطريقة....
تقسم العيال مجموعتين او اكثر على حسب عددهم...ويمكن يكون كل واحد ابروحه..هم يصير
وتبدا اللعبة بانك تضمر في بالك شخصية وتقول لهم : يا عيال انا الحين حطيت في بالي شخصية
قد تكون انسان -نبات حيوان-جماد....وممكن انكم تتفقون من البداية انها صنف معين...خل نقول انسان
المهم..تقول لهم منو يقدر يعرف الشخصيةالي في بالي؟
طبعا لازم اتفهم العيال انهم يقدرون يسالون عن الشخصية هذه اي سؤال الا شي واحد ما يقدرون انهم يستخدمونه وهو انه ما يصير ان يقولك اول حرف من اسمه شذي ولا شذاك...مايصير
طبعا خل نفترض ان عدد العيال 3 فيصيرون 3 مجاميع...يعني كل واحد ابروحه...
فتقول يالله...الاول اسال سؤال....
فيقولك مثلا....هل هو حي ولاميت...
انت ردك بس " نعم او لا" ما تجاوب اي شي زيادة
خلص دور الاول ...يجي الثاني تقوله يالله دورك واسال...
فيقولك...مثلا...مدام عرفنا انه حي...هو كويتي؟
انت مثل ما اتفقنا راح اتقول "اي او لأ"....خل نقول مثلا انت قلت اي
ينتقل السؤال للثالث....فيسال...مثلا...ويكون طبعا عرف واستفاد من اجابات اخوانه (حي-كويتي)
فيسال مثلا...هو من العائلة؟...
فتمشي الاسئلة ...كلن على حسب دوره....ليمن يجيك واحد بايعها ويصرح باسمه...فاذا طلع صح يعتبر الفائز...واذا غلط..يخرج من اللعبة
ملاحظة: لازم الي يحط في باله شخصية لازم يضع في اعتباره ان الشخصية معروفة عند الي يسألون....مثلا مو يحط في باله جيفارا
نغزه على بو عمر...وتلقى العيال ضايعين...يسالونك ليمن توصل للطايف وما راح يعرفون الاجابة
ملاحظة ثانية: ممكن انك اتحدد الاسئلة اب عدد معين مثلا كل واحد 10 اسئلة...
3- لعبة الكروت الجاهزة:
هذه الكروت تلقاها تنباع في المكتبات وفيها اسئلة على مستويات...خذ الي يناسب اعيالك
والطريقة ان الكروت عندك او عند الحجية...وهم نفس الشي اذا كانوا العيال وايدين..قسمهم مجاميع حتى يصير تنافس...واذا اشوي..كل واحد ابروحه...
والطريقة : راح تلاحظ الكرت داخله فيه 4 او 5 اسئلة فتقول حق المجموعة الاولى او الشخص الاول..اختار سؤال...فيختار مثلا رقم 3...وهو وحظه..تساله السؤال...اذا جاوب تعطيه الكرت يخليه عنده
واذا ما جاوب يضل الكرت عندك وتحطه تحت الكروت...وينتقل السؤال المجموعة الثانية...وهلم جر...
بالاخير اتكون قايل لهم الي يحصل على 3 كروت ياخذ جائزة...
وحتى لايصير ملل...ممكن ما بين لعبة ولعبة يكون فيه اناشيد وصيحات وشيلات...جماعية او فردية...او اتخلي واحد يقرى قرآن..او واحد تعطيه جريدة او مقالة ويقراها من غير اي خطأ..هم تعتبر لعبة
الافكار كثيرة...كل الي كتبته لك سويناهم
وعسى الله يسهل عليك وعلى الاهل دربك وبالسلامة.. لاتنسى الخزرانه
الله ياو فقك يا bmw
