شباب عندي سؤال؟

[بوالعيس بيك]

السلام عليكم..

شباب عندي سؤال ابي الإجابه ..

الموضوع وبإختصار..أولا انا مع اسقاط فوائد القروض ومع الزيادات ومع مطالبات المواطنين لأني واحد منهم ..

طبعا الكل سمع وشاف شكاوي وتذمر المواطنين سواء بالدواوين أو الجرايد

أو بعض القنوات الفضائيه..دائما الشكاوي من القروض وغلاء المعيشه

وان المعاش يطير من أول يوم ونص الشهر مولاقين ناكل والمصرف مايكفي

ومتنتفين ومن هالأمور..

طبعا هذا باختصار وكلكم عارفين هالموضوع.....لكن عندي ملاحظه وهي..

نبتدي بسم الله ..
لما نروح السوق نبي مصفط حق سياره وحده نقعد نفتر نص ساعه

ساعه إلاربع يالله تحصل مصفط وتصير هوشه عليه بعد..هذا بكل أسوقة
الكويت..
لماتروح الجمعيه أي جمعيه طلعة الروح تحصل مصفط وذا دخلت شوف الطابورعلي الكاشير..جنه فلم مصري..
وذا رحت عقب المغرب تلقي نص الأرفف فاضيه من بعض السلع..يعني لأزم
من الضحي ولا ماتحصل اللي تبي يخلص..

روح معارض السيارات وشوف الزحمه لدرجة بعض الشركات اذا شريت منهم
سياره يقولك انتظر 3أيام علي ماتوصل الميناء ..يعني ماعندهم بالمخازن خالصين..
وروح بعد مكاتب الخدم وشوف الطلبات صارت أكثر من أول .. مع ان زادت أسعارهم وزادت معاشاتهم وصارالطلب عليهم أكثر من أول..

روح شوف المطار بالعطل دورلك حجز اذا لقيت بنفس الوقت أعطيك اللي تبي لازم تحجز قبل اسبوع حق الويك اند..
وأيضا روح احجز شاليه...الحجوزات فل ماتحصل قبل شهرين..

روح البورصه ..اذا حصلت موقف حق السياره لك مني اسهم منحه..
واختارأي سهم بعد علي كيفك..

روح البنوك وشوف زحمة الإكتتاب ..كل الكويت تكتتب..

روح المستشفيات الخاصه ..وشوف العالم وعسي الله يشافي كل مريض يارب .. ولكن شوفو استقبالات الولاده وشوفو الزحمه ..علي الولاده لدرجة ماكو حجزغرف ولاده بنفس اليوم انت وحظك ..

طبعا ياجماعه لاحد يفهمني غلط ولاحد يزعل وعشان ماتتهموني بالحسد
بقول ماشالله تبارك الرحمن..

والحين السؤال وين اللي متنتفين ؟
وين اللي المعاش يخلص ثاني يوم؟
وين اللي القروض دامرتهم؟

لايطلعلي واحد ويقول متعففين ببيوتهم عيل هذيل اللي بالشوارع منو أشباح؟

وشكرا لكم..

 

[maha_Q8]

لايطلعلي واحد ويقول متعففين ببيوتهم عيل هذيل اللي بالشوارع منو أشباح؟
لووووووووووووووووووووول

 

[I T C]

اخوى كلامك صح بس تأكد اللى يروح الجمعيه مايقدر يروح مستشفى خاص واللى يكتتب تلقى بالمقابل ناس بايعين بطاقاتهم ..عشان لا اطولها عليك يعنى الاماكن اللى انت تشوفها مونفس الناس متكررين ....

 

[بترولي نشط]

كلامك صحيح اخوي

بس مهما يكون احنا بالكويت ديرة الخير و المفروض محد فيها يكون محتاج

وانت ما تكلمت عن وايد من الناس من الي عليهم ظبط واحضار وقضايا وفي ناس ماهي قادره تاكلها اكثر من وجبه باليوم هذيل موجودين وكويتين

واما بالنسبه للسوق وزحمتة مو كل الناس رايحه تتشري في شباب يتمشون وفي هم وافدين وباعداد كثيره و في وايد ناس مو شرط تشتري بعدين لو تلاحظ اكثر ايام الزحمه بالويك ايند وباوقات المناسبات ولا رحت هناك بتلاقي وايد ناس تمشي وتشوف المعروض يعني مو شرط كل هذي رايحين يشرون

وبالنسبه للجمعيه هم مو للكويتين وبس في وايد وافدين وبعدين ياخوك والحمد لله احنا بالكويت ديرة الخير وماتبي تشوف ناس بالجمعيات لا مايصير يعني الجمعيه شي اساسي و بعدين وانا اخوك مو كل يوم تلاقي الجمعيات زحمه في اوقات مثل رمضان يكثر الطلب علي الجمعيات .. والناس تبي تشيل حق بيتها ومو كل الموجودين شارين لهم اغراض بعربانه ول ثنتين في ناس غرض معين فعلشان جذي تلاقي الزحمة بالجمعيات ... وبالنسبه للارف الفاضيه اكيد مو كل الارفف بس بالنسبه للارفف الي عليها طلب في هذا الشهر الكريم .. شي طبيعي جدا

وبالنسبه حق وكالات السيارات يمكن بعض الوكلات المشهوره يكون عليها طلب ولاتنسي ان اغلبهم اقصاد مثل منت عارف

وبالنسبه للصيف اغلب الناس تجمع لسفرت الصيف قبل مو عد السفر بجم شهر واذا يا الصيف يروح يغير جو بره

وبالنسبه للبورصه فمن وجهت نظري مكان للربح واكيد بكون مزدحم الناس تبي تشوف رزقها

وهم الاكتتاب الناس تبي ترزق وفي ناس تتسلف وبعضهم يقترض علشان يكتتب

وبالنسبه للمستشقيات وانا اخوك الناس مو كل يوم يايهم مولود بالسنه والسنتين والثلاث ف ماكو مانع الريال يدخل مرته مستشفي خاص والعتب هني علي الحكومه مو المواطنين عيل شنو الي خلا المواطنين يخلون الحكومه ويروحون الخاص غير الاهتمام بالمريض وحسن المعامله و الخدمه المريحه للمريض وانت اكيد سامع كثير قصص عن سوء مستشفيات الحكومه

عزيزي انا كل الي ابي اوصله هذا شي طبيعي في كل دول الخليج وشوف باجي دول الخليج شلون مدلعين مواطنينهم بالنسبه للمعاشات و غيره .....

والله الكويتي يستاهل كل خير ..... وهم مايصير تخلون الكويتي يوصل لدرجه ماعنده يشتريله شي من الجمعيه ول يتسوق وعقبها تقولون لا المواطن محتاج وتطيحون عنه قروضه المفروض ما ننطر نوصل الي هالدرجه

وصدقني في مواطنين عندنا قامو يطرون وفي بعض قام يرز ويه حق الي يسوه والي ما يسوه علشان يسلفه ويعطيه

اشكرك اخي الفاضل علي موضوعك .... وأسف علي الإطاله بالرد



اللهم اجعل لي من كل هم وغم اصبحت او امسيت فيه فرجا ومخرجا ، انك على كا شيء قدير، اللهم اني اسالك مستانسا لا خائفا ، ولا وجلا لانك انت المحسن الي و انا المسيء الى نفسي ، فيما بيني وبينك ،تتود د الي بالنعم مع غناك عني ، واببغض اليك بالمعاصي مع فقري اليك، فاسالك بجودك وكرمك واحسانك ان تفتح لي باب الفرج بطولك وتحبس عني باب الهم بقرتك يا رحيم احفظ لي وطني الكويت واهلي واحبابي وكل مسلم على وجه هذه الارض

آميييييين​

 

[بوالعيس بيك]

السلام عليكم

maha1980>>ITC>> بترولي نشط...,

اشكر مروركم الكريم ..

والأخ بترولي نشط ..شرحك مفصل وماقصرت بارك الله فيك..

والخلاصه ..الحمدلله لازلنا بخير ونعمه ..واللهم بارك..

شكرا اخواني..

 

[maha_Q8]

مع احترامي لوجهة نظرك ....
المجتمع الكويتي يتكون من ثلاث طبقات
طبقة التجار واصحاب الاملاك
والطبقه الوسطى وعادة ما تكون الطبقه المرتاحه ماديا
والطبقه الكادحه اللي على قدها (الله يكون بعونهم )
وانت اللي تتكلم عنهم هؤلاء لا يمثلون الا الطبقه الوسطى والطبقه
الغنيه...هذولا ما عندهم مشاكل ماديه ....ولكن باقي الشعب ظروفهم صعبه
وهالايام بصراحه المعيشه تعتبر غاليه بالكويت .....والله يكون بالعون
والكويت بلد الخير والعطاء
وشاكره لكم

 

[RomanticLove]

نفس الي صارلي اليوم لووووووووووووووووووول رحت فندق شيرتون الصبح بالديره لقيت امة لا اله الا الله عالم وزحمه والسير واقف لووووووووووووووووووووووووول ياه اروح مناك هم السير واقف رحت كل مكان السير واقف خلصت شغلي بالديره قلت اروح سيتي سنتر بشويخ اتمشى واشتري اغراض لقيت زحممممممممممه وعااااااالم .. اروح حولي اشوف عالم .. اقول لهدرجه عدد سكان الكويت وايد شلون بكل مكان سيارات وعالم .. بس بصراحه وناسه الجو الشمس خفيفه ورطوبه خفيفه وانشالله ابشركم على نهاية هالشهر راح يدلق سهيل والنسمه البارده بليل اتيينا

 

[بوالعيس بيك]

السلام عليكم

رومانتك..

شكرا علي مرورك الطيب.

 

[RomanticLove]

مع احترامي لوجهة نظرك ....
المجتمع الكويتي يتكون من ثلاث طبقات
طبقة التجار واصحاب الاملاك
والطبقه الوسطى وعادة ما تكون الطبقه المرتاحه ماديا
والطبقه الكادحه اللي على قدها (الله يكون بعونهم )
وانت اللي تتكلم عنهم هؤلاء لا يمثلون الا الطبقه الوسطى والطبقه
الغنيه...هذولا ما عندهم مشاكل ماديه ....ولكن باقي الشعب ظروفهم صعبه
وهالايام بصراحه المعيشه تعتبر غاليه بالكويت .....والله يكون بالعون
والكويت بلد الخير والعطاء
وشاكره لكم

ياريت تقوليلي شلون قسمتي الكويتيين الى طبقات . ؟
مافي كويتيين طبقة كادحه منو هذول شنو عوايلهم شنو اصولهم ؟

 

[(فزاع)]

ياريت تقوليلي شلون قسمتي الكويتيين الى طبقات . ؟
مافي كويتيين طبقة كادحه منو هذول شنو عوايلهم شنو اصولهم ؟

يمكن اختنا مها تقصد الطبقه الكادحه اهي الطبقه اللي شفناها واقفه طابور جدام بيت الزكاة ايام عطية الشيخ سالم العلي .

الطبقه الوسطى اهي الطبقه اللي - كانت - موجوده بنسبة 80% من الشعب الكويي ..


الطبقه الغنيه او الارستقراطيين معروفين بالكويت وعوايلهم معروفه ولبسهم معروف وابيوتهم معروفه ..​

 

[zoya_y]

 

[maha_Q8]

يمكن اختنا مها تقصد الطبقه الكادحه اهي الطبقه اللي شفناها واقفه طابور جدام بيت الزكاة ايام عطية الشيخ سالم العلي .

الطبقه الوسطى اهي الطبقه اللي - كانت - موجوده بنسبة 80% من الشعب الكويي ..


الطبقه الغنيه او الارستقراطيين معروفين بالكويت وعوايلهم معروفه ولبسهم معروف وابيوتهم معروفه ..​

انا اتكلم من واقع دخل الفرد او الاسره
يعني الاسره اللي دخلها بالشهر 1000 دينار مثل الاسره اللي دخلها
بالشهر 4000 دينار
انت احسبها وتعرف الفرق في المعيشه
وشكرا لك

 

[ابو ريتاج]

اخوى كلامك صح بس تأكد اللى يروح الجمعيه مايقدر يروح مستشفى خاص واللى يكتتب تلقى بالمقابل ناس بايعين بطاقاتهم ..عشان لا اطولها عليك يعنى الاماكن اللى انت تشوفها مونفس الناس متكررين ....

كلامك 100% صح... واضم كلامى مع كلامك

 

[بوالعيس بيك]

السلام عليكم

كلامك 100% صح... واضم كلامى مع كلامك

شكرا علي ابداء رأيك اخوي بوريتاج.