انـت كــويــتــي لــيــش عــايــش ؟!!

الموضوع في 'إستراحة المنتدى' بواسطة coooool2, بتاريخ ‏22 أكتوبر 2008.

حالة الموضوع:
مغلق
  1. coooool2

    coooool2 موقوف

    التسجيل:
    ‏10 فبراير 2008
    المشاركات:
    3,367
    عدد الإعجابات:
    0
    مكان الإقامة:
    K.W.T + مـجـلـس الأمــة
    مقال منشور بجريدة الشاهد بتاريخ 5\12\2007

    إنت كويتي... ليش عايش! للكاتب الصحفي / خالد صالح العبيدي





    ديرتنا حبيبتنا, عرفتي شصار بعيالك, شفتي الذل والمهانة إللي وصلنا لها, أبشرك يا ديره قمنا نوقف على باب بيت الزكاة, أبشرك يا ديره قمنا ناخذ صدقات, أبشرك يا ديره ربع عيالك بالسجن وربعهم منحاش, مساكين عليهم إلقاء قبض, يا ديرة الكويتي صار ماله قيمة الشرطة قاموا ياخذون مكافآت عن كل راس يصيدونه, لأن عندنا نائب يشجع (القادسية) إنتخبناه ولما نجح وصار وزير حط بكل دورية كمبيوتر وسجلوا فيه أسامي عيالك المديونين, بس مو كل المديونين, لأن المديونين نوعين, نوع بايق ملايين بس محد يتعرض له, لأن الكمبيوتر ما يستوعب الرقم إللي بايقه, ونوع متسلف ألفين وما قدر يردهم أو متعسره أموره, هذا النوع إللي (يتكلبج) ويجرجرونه ويلعنون إبو خامسه, والمشكلة ياديره ماقاموا يفرقون بين ريال وبنيه (حرمه) الكل سوا, والصيد بالجملة, والله ياديره آنا ما أتغشمر هذا إللي حاصل, وأزيدك من الشعر بيت, الكويتي إذا مديون بعشر دنانير يمنعونه من السفر, يخافون ينحاش وما يرد لأن قيمة الكويتي عندهم عشر دنانير, وإلا ليش مانعينه من السفر, شنو ماعنده بيت وأهل يرد لهم إذا سافر أو حتى معاش يقصون منه الدين, لكن لا يبون يذلونه.

    يا ديره حتى البنوك قاموا يتاجرون فينا وبقيادة البنك المركزي, قصوا علينا وأغرونا بالقروض علشان نشتري بيوت, شنسوي يا ناخذ قرض يا نقعد بشقة (15 سنة) ننطر دورنا, ولا ندري وين يقطونا, وإللي صار ريال وخذا قرض, طلعوه من خشمه, ولا خلوه يتهنى فيه لأنه يوم راح بيته إللي إشتراه إكتشف إنه مو قادر يعيش, ما عندنه فلوس علشان يصرف وياكل لأن معاشه طاير حق البنك والأقساط, وحتى درايش البيت مغطيهم بجرايد ... ما تسوى علينا هذا مو بيت هذا قبر ... يا ديره حتى الجمعيات التعاونية إللي بفلوسنا فتحناها قامت تقص علينا وإللي بدينار تبيعه لنا بدينارين, والله قاموا الكويتيين يحسبون الأغراض إللي يشترونها بالفلس, ولما يوصل الواحد عند الكاشير يقول له تكفه رد هذا وهذا لأن فلوسه قاصره, ماتكفي والله فشله وقهر, وإللي بيدفع بالإكسبرس وتطلع له مرفوضة... يه.. شهالحاله, والوظايف ماكو, وإذا واحد من عيالج يبي وظيفة علشان يساعد أهله أو يتزوج يقولون له ماكوا روح إقعد عند أمك لين يسافر واحد من إخوانا الوافدين ونشغلك بداله, والطلاق واصل حده واليهال ظايعين وبعض البيوت إتسكرت, والعنوسه زايده حيل.. حيل.

    وإللي يقهر يا ديره مجلسنا إللي كان مجلس نخوة صار مجلس جمبازيه, وقاعدين يتاجرون فينا, ياديره قمنا ناكل بعض, واحدنا يحط على الثاني, وكل واحد فينا لازم يكون محسوب على واحد عود وبطران وإلا صار من صيد أمس, ما يدري منو طقاقه, وعُلية القوم صاروا واطيها, ياديره الجامعة إللي خبرك ترى للحين ماكو غيرها, والحكومة مو عيزانه تبني غيرها, بس علشان تنفع كم واحد عنده جامعة خاصة, وعيال الكبار ما قاموا يدرسون مع عيالنا, لا يبا قاموا يودونهم مدارس خاصة لأنهم يدرون إن التعليم بوزارة التربية رايح فيها.

    ويقولون يبون يحطون علينا ضرايب والكهربا يا الله حده حده, وكل يوم يهددونا ترى بنقطعها عليكم, والأسعار ما يقدر عليها إلا وزير أوعضو أوحرامي عود, محد ملحق, ناخذ المعاش منيه ونسدد أقساط منيه, والصافي من المعاش عشرين دينار حق البانزين, والغريب يا ديره أكو ناس عندهم فلوس وايد ويشترون كل شي حتى إحنا يبون يشترونا, وبعضهم قام يبوق منك يا ديره حيل وما يرحم أحد وصارت لهم مناصب وصيت وكل هذا مو مكفيهم, شكلهم بينتقمون منك ومنا.

    تدرين ياديره شِقولون إللي يسمون نفسهم تجار, يقولون شحقه هذا المنتف راكب مثل سيارتنا وساكن بمنطقتنا ولابس مثلنا و يسافر مثلنا وعايش مثلنا, ليش ما يموت أحسن له..... !!!

    وتجار العقار ياديره ما يبون يأجرون حق كويتيين بس يبون أجانب, لأنهم يقولون الكويتي ما يدفع أجار ما عنده, زين عيل الأجنبي شلون يدفع من وين له, وليش صاير وضعه المادي أحسن من الكويتي وساكن أحسن منه ولابس أحسن منه وسيارته أحسن من الكويتي, شلون؟!! ومن وين؟!! الحكومة أبخص!! يا ديرة لو تشوفين شوارعك صارت زحمه حيل, وإذا الواحد بِروح مشوار يبيله ساعتين عشان يوصل, وآخر الشهر تشوفين الشوارع فاضيه وماكو زحمه علشان كل الموظفين قاعدين ببيوتهم ينطرون المعاش.


    إنت تدرين يا ديره لما صار الغزو محد قام فيك إلا عيالك ومحد تعذب إلا عيالك ومحد مات علشانك إلا عيالك ومحد إنأسر إلا عيالك ومحد شاف الويل إلا عيالك, تكفين ياديره قولي لهم خل يرحمونا شويه ترى تعبنا وملينا ومتنا وحيينا ومتنا وكل يوم نموت, قولي لهم ياديره مو علشانا بس, وعلشانك بعد, علشان تظلين أمنا وعلشان ما نتشتت ونظيع وتظيعين ويتحكم فيك شرار القوم, تكفين ياديره, قولي لهم خل يطلعون عيالك من السجن وخل يوظفونا, ترى خيرك للحين يكفي القاصي والداني, والأقربون أولى بالمعروف.


    على فكرة ترى حتى الدكاتره يا ديره إنحاشو, راحوا الإمارات والسعودية ولندن, يقولون هناك وايد أرحم ويابو بدالهم (قصاصيب) بس مو حق الخرفان, حقنا إحنا, والشركات إللي خبرك يا ديره, إللي بدت من عدم, صارت شركات عالمية وقاموا يطلعون بره, شي راح البحرين وشي يفكر بالإمارات, ويقولون الديره مو عاجبتنا, الديره ما تشجع, نسو إللي خذوه منك يا ديره ونسو إللي سواهم كبار وخلاهم يوصلون حق العالمية إللي يفتخرون فيها.

    بقولك شي يا ديره راح يعور قلبك, ترى ماكو شي إسمه دول الضد, وحكومتك قامت توزع الملايين عليهم, هذيلا إللي إوقفو مع صدام, الفلسطن والأردنيين وربعهم, وقامو يجنسونهم بعد, ولا في شي إسمه غزو, والعراقيين داشين طالعين علينا, لا والعين قويه, وبطيحون عنهم الديون إللي غزونا عشانها, بس ميخالف هذا طبعنا دايماً ننسى ونسامح ونتجمل حق الغريب, بس هم إحنا نسأل نفسنا, ليش ما يعطونا مثلهم, شنو إحنا عيال ...... !!!
     
  2. (فزاع)

    (فزاع) عضو جديد

    التسجيل:
    ‏18 ديسمبر 2007
    المشاركات:
    4,473
    عدد الإعجابات:
    0
    مكان الإقامة:
    .. الكون ..
    على قولت بو عيده ..
    انت كويتي ..؟ ارفع راسك ..!
    رفعت راسي .. جان يطيح اعقالي ..
     
  3. yoyo1983

    yoyo1983 عضو نشط

    التسجيل:
    ‏22 ابريل 2007
    المشاركات:
    22,658
    عدد الإعجابات:
    22
    مكان الإقامة:
    DaMBy
    الله كريييم
     
  4. acton

    acton عضو نشط

    التسجيل:
    ‏22 فبراير 2008
    المشاركات:
    6,336
    عدد الإعجابات:
    3
    مكان الإقامة:
    UK-Acton-W3
    كلام صحيح وعلى الكويت السلام اذا استمرينا على هالحال
    وشي واحد ماقاله واحب اضيفه اهو الطائفيه والمحسوبيه وهذي قنبله موقوته والله يستر من اللي ياي
     
  5. قلم حر

    قلم حر عضو مميز

    التسجيل:
    ‏29 مايو 2004
    المشاركات:
    26,415
    عدد الإعجابات:
    3,380
    مكان الإقامة:
    الكويت بلد الاصدقاء
    دوله كلها ازقرت وكشيخه وماركات ويبون يصيرون تجار !!! كويتيين بكيفنا

    انا اناشد الحكومه تنزل جميع الماركات من ساعات و سيارات وملابس وولاعات وبواكه وجناط مادري جنط تنزلهم بالتموين ولا ترى بنعيش فقارى وانتي بكيفج ياحكومه المعاشات ماتكفي حق الكشخه ومطاعم الخمس نجوم
     
  6. coooool2

    coooool2 موقوف

    التسجيل:
    ‏10 فبراير 2008
    المشاركات:
    3,367
    عدد الإعجابات:
    0
    مكان الإقامة:
    K.W.T + مـجـلـس الأمــة

    ارفع راسك ..انت كويتي

    شامخ و نفسك عزيزه

    اهم شي الواحد يفتخر انه كويتي
     
  7. coooool2

    coooool2 موقوف

    التسجيل:
    ‏10 فبراير 2008
    المشاركات:
    3,367
    عدد الإعجابات:
    0
    مكان الإقامة:
    K.W.T + مـجـلـس الأمــة

    الشعب مسكين مغلوب امره
     
  8. coooool2

    coooool2 موقوف

    التسجيل:
    ‏10 فبراير 2008
    المشاركات:
    3,367
    عدد الإعجابات:
    0
    مكان الإقامة:
    K.W.T + مـجـلـس الأمــة

    و انا اضيف فيتامين ( واو )

    الواسطه ..!!
     
  9. coooool2

    coooool2 موقوف

    التسجيل:
    ‏10 فبراير 2008
    المشاركات:
    3,367
    عدد الإعجابات:
    0
    مكان الإقامة:
    K.W.T + مـجـلـس الأمــة

    بعد 10 سنين .. الشعب فقير 100%
     
  10. نصوري

    نصوري عضو جديد

    التسجيل:
    ‏2 يوليو 2008
    المشاركات:
    199
    عدد الإعجابات:
    0
    اولا انا كويتى وثانيا انا كويتى ووووووووووو
    وبعدين وش صااااااااااار هذا اللى صار

    يا اخوان اليوم انصدمت ان مدة قرضى لدى البنك الاهلى زادت من 15 لتصل 30 سنه وان المبلغ اللى سددته طوال مدة 8 سنوات هو 600 دينار فقط للقرض وان فوائد قرضى 200% مثال 30 قرض والفوائد 65 الف المجموع 95 لييييش شاري بيت
    وانهدم البيت على راسى
    والموظف يطلب منى تجديد قرضى لتقليص المده
    ولهذا لااعلم ماذا افعل غير الله لايوفق المتسبب
     
  11. rakan_yes

    rakan_yes عضو نشط

    التسجيل:
    ‏24 مايو 2007
    المشاركات:
    2,073
    عدد الإعجابات:
    0
    عندك باب البنك المركزي مفتوووووووح

    وعندك باب المحكمه مفتوح
    ليش ساكت؟​
     
  12. نصوري

    نصوري عضو جديد

    التسجيل:
    ‏2 يوليو 2008
    المشاركات:
    199
    عدد الإعجابات:
    0
    انا مانى ساكت بس اليوم تغير كل حسابى بالبنك
     
  13. حمود الفشقه

    حمود الفشقه عضو نشط

    التسجيل:
    ‏12 أكتوبر 2008
    المشاركات:
    378
    عدد الإعجابات:
    1
    مكان الإقامة:
    فوق الأرض تحت السماء.
    الله يـــــرحــم حـــــالك ياكــــويتي

    وهالتذمر من غالبية الشعب جاء من فراغ ؟ لا اعتقد !

    ومشكور ياكوووول ع النقل
     
  14. coooool2

    coooool2 موقوف

    التسجيل:
    ‏10 فبراير 2008
    المشاركات:
    3,367
    عدد الإعجابات:
    0
    مكان الإقامة:
    K.W.T + مـجـلـس الأمــة

    سبق و رديت عليك من موضوع ثاني و تعرف شنو قلتلك
    بس الحين بكررها
    لا توقع أي شي يقوله البنك لان مو من صالحك

    ارفع قضيه و يسقطون الفوايد و راح تكسبها ان شاء الله ..لان فيه مواطن كسب حكم ضد بنك

    www.chakbom.com
     
  15. coooool2

    coooool2 موقوف

    التسجيل:
    ‏10 فبراير 2008
    المشاركات:
    3,367
    عدد الإعجابات:
    0
    مكان الإقامة:
    K.W.T + مـجـلـس الأمــة


    العفو ..تسلم

    التذمر جاء بسبب تخبط الحكومه و المجلس في عرقله مشاريع التخطيط و التنميه..
     
حالة الموضوع:
مغلق