يا اخوان انتبهوا يا عالم اصحوا

[هموم وكدر]

يا اخواني وخواتي

اقسم بالله ابتدت حرب الاشاعات المدمره الاقتصاد الوطني انتبهوا

ترا الشغله ماهي سهله نزول ... نعم هناك نزول للسوق بس فيه

للى يبي الشر لديره فيه المستفيد فيه الحاقد فيه وفيه وفيه

لا تعطونهم فرصه كل من يكره الكويت الحين يستغل الفرصه لبث

الاشاعات والمعلومات المضلله يعني شي اكبر مما تتصورون اتمنى من

الاخوه المشرفين التصدي لهذي الفئه من اجل الكويت

الحـل سهـل جـدا

ادري راح تاخذ من الوقت والجهد بس من اجل عيون الكويت نتحمل

اي عضو يكتب موضوع بلا مصدر واضح ومؤكد يتم شطبه باسرع وقت

اخواني الاعضا مو بس المشرفين هم انتم لكم دور تصحيح المعلومه وابلاغ المشرف

يد واحده من اجل الكويت

القال والقيل اهو مصدرهم

 

[Advanced Diver]

والله كنت بقول هذا الكلام بس حضرتك سبقتني...على العموم أنا أضم صوتي معاك وأوجه رساله للإداره ضروي يتم شطب أي واحد يصدر إشاعه من غير مصدر موثوق به ...مثل ما وقفتوا التسجيل بالمنتدى ...ليش ماتشطبون هذه (( الحثاله )) من أجل المنتدى ومن أجل الكويت...تحياتي​

 

[هموم وكدر]

والله كنت بقول هذا الكلام بس حضرتك سبقتني...على العموم أنا أضم صوتي معاك وأوجه رساله للإداره ضروي يتم شطب أي واحد يصدر إشاعه من غير مصدر موثوق به ...مثل ما وقفتوا التسجيل بالمنتدى ...ليش ماتشطبون هذه (( الحثاله )) من أجل المنتدى ومن أجل الكويت...تحياتي​

تسلم اخوي

انا او انت كلنا واحد المهم نحذر مما يحدث

 

[ولد البورصة]

صدقت , هالايام الناس شغاله بالاشاعات .

 

[KUWAIT- STOCK]

فعلا كلامك منطقى كلش مو ناقصين و نتمنى شطب المواضيع الجانبية و للأسف المنتدى اصبح فية مشاركات جدا هابطة و سب علنى و شماتة وهذا لا احد يرضى بة

 

[mans1234]

طيب انا متفق معاكم بس لا بد فيه معايير فأكثر الذين يتكلمون يأتون من باب آخر وهو أعتقد و أرى و الشارت يقول أما الإشاعه اللي تقول تاجر عود يبي يسوي كذا و ان السوق متجه الى كذا أو في كم شركه أفلست و ان الا شاعات التي تصيب الشخص بخوف و قلق منها مهذي مرفوضه ويجب شطبه انزين أبي أتكلم عن السوق و في بالي ان السوق ممتاز و ان الشكل العام بالسوق أغلبه نفسي و أكو شي مو واضح بس متصبر لأن المنطق يقول ما تصير الشغلات عندنا لان سوق افضل سوق و الدايم الله يجي واحد ويقول جدي يقول او واحد واصل و الا عضو اهني تشتغل عندك بعد ايام من الاشاعه الحقيقيه حتى تصير معلومه حقيقيه و تنهار الاسهم وتقول لو سامع هالكلام بس أنا فيني منطق هو لا تصدق كل شي الا اذا كان رسمي فأغلب المعلومات التي نتداولها غير رسميه اذا لا نصدق الا الرسمي الحكومه تكلمت بعد صمت و نطقت ...... ! الله يحاسب اللي كان السبب لانه خذل الجميع و الناس اتعبت راح اتكلم و الناس ما تسكت و اذا قالت خربطت وايد وايد

 

[اللافي 22]

انا اايد كلامك 100 فى100

فى ناس وظيفتهم وماعندهم الا الشاعات والظلالة

واللة العظيم الامير الشيخ صباح حفظة اللة كان فى ديوان العيسى بتاريخ 27 رمضان واحد اسئلة الامير

اشلون اقتصادنا طال عمرك
رد علية الامير اقتصادنا متين وقوى وعندنا فائض مالى ماندرى شنسوى فية



وانا اقولكم خلكم متفئلون انشاءاللة ماكوا الا عافية

 

[رذاذ المطر]

الله يرضى عليك
بس لو تغير اسمك ..!!

للمرء نصيب من اسمه

 

[الصامد.م]

كلامك صح اخوي ولو لاحظت الاشاعات اليوم عن خسارة بنك الخليج من مشكلته
اللي يقول 200 مليون دينار يعني اكثر من راسماله واللي يقول حلوا مجلس الادارة واللي يقول هم بيت التمويل عنده نفس المشكلة، وفيه شغلة صارت اليوم حق واحد من الشباب عنده معامله في بنك الوطني
جان تقوله الموظفه إذا عندك حساب بالخليج لحق عليه عنده مشكله عوده وراح يفلس.

شفتوا شلون الاشاعات تنتشر ويتم استغلالها للمصلحة الخاصة، نسأل الله ان يحفظ الكويت وشعبها من كل مكروه.

 

[العوضى]

صحيح الغالبيه اذا مو الكل خسران , لكن للأسف الشديد , فيه ناس للحين مو راضيه تقتنع بالواقع , حسبتهم للأمور غلط , يبون المؤشر يخضر عشان يدشون , عندهم بصر ولكن للاسف يفتقدون للبصيره , وهذول للأسف سهل جدا على صناع السوق والمضاربين اصطيادهم , شوية حركات على شوية كلام حلو بالمنتديات هذا غير مروجى الإشاعات بالسوق , ما تسمع غير (سمعتوا اخر خبر , او جالى مسج من ريال ثقه , أو يقولون وما ادراك ما يقولون , او معلومه من ديوانيه عروقها بالماى .... الخ)
فيه مثل يقول خلى عقلك براسك تعرف خلاصك , لازم تعرف بالأول شالمشكله و تقيمها , وغالبية اللى عرفوا ساس المشكله طلعوا من السوق من فتره , الفرق بينا و بينهم انهم يشوفون ويحسبون حساب لكل شى وهذا الصح , وضع السوق والوضع العام والوضع الدولى ومتابعة اخبار الإقتصاد العالميه اول بأول و رأى المحللين الدوليين واحتمالات الكساد والفتره المتوقعه ومستوى الضرر ...... , للأسف من قبل رمضان والمحللين يتكلمون عن الرهن العقارى الأمريكى وبالتدريج المشاكل اللى ترتبت بعدها ثم الأسواق الأوربيه وبعدها الآسيويه .... وقت طويل شهرين واكثر , والحبايب اللى يقولك مالنا تأثير بمشاكلهم واللى يقولك النزول سببها اكتتاب الإتصالات الثالثه واللى يقولك حركه محافظ ..... يا جماعه المشكله كبيره وايد , التسرع مو زين , لازم تتابع جميع الأخبار اول بأول سواء بالمنتديات او القنوات الفضائيه والكثير منها مالها شغل غير الوضع الأقتصادى وكل شوى جايبيلك محلل من عمالقة التحليل بس وين اللى يسمع , الأمريكان والأوربيين يقولولك الكساد جاى ماله مفر , متوقعين حدوثه بنسبه كبيره , ليش العناد يا الربع , يا جماعه وصلنا مرحله حتى ببعض المنتديات يقولولك ما نبى تخويف , لا وبعض المواضيع تنمسح , علبو فيه تشائم , سامحونى على الإطاله , لكن شى يعز بالنفس اللى قاعد يصير , فلوس العالم تبخرت , واحد والله اليوم قالى انا جددت الأجل بعد تصريح الوزير (آن وقت الدخول) وخسرت كل حلالى ومطلوب بعد , ومنى للوزير , انت عندك مستشارين وفطاحله والعالم كلها قاعده تنهار , كلامك كانت رصاصة الرحمه لباقى الشعب (باقى لأن الغالبيه خسرانه وطالعه وتصريحه كمل على اللى صمدوا ) , المشكله مو باستقالة الوزير او فلاح او غلق السوق , المشكله حلها ..... فكروا وتابعوا وانتوا تعرفون ؟

 

[دعاء كميل]

" رذاذ المطر " اسم جميل

والصوره أجمل ...

موفقين لكل خير في الدنيا والآخرة .​

 

[صايدها]

كلامك عدل ميه ميه

 

[ياسر الروقي]

الله يرضى عليك
بس لو تغير اسمك ..!!

للمرء نصيب من اسمه

لوووووووووووووووووول الله يضحك سنك

اللي ماعاصر انهيارات البورصات خاصه 2001 2006 وانهيار السوق السعودي من 20 الف الى 6 نفطه يقول هالكلام

انت في سوق هابط لازم تسمع مثل هالامور عكس السوق الصاعد كنت كل يوم تسمع كلام حلوو عن الاقتصاد وعن ارباح الشركات ومستقبلها ولا ما نسيت سالفة زين الى 8 دنانير وراح تدرج في بورصة لندن وين راح هالكلام الحلوو اتمنى ان الرساله وصلت

 

[رذاذ المطر]

" رذاذ المطر " اسم جميل

والصوره أجمل ...

موفقين لكل خير في الدنيا والآخرة .​

لوووووووووووووووووول الله يضحك سنك

الله يرضى عليكم....

 

[Bo_Ahmad]

بارك الله فيك

 

[اساهيم]

ماكو اشاعات الاقتصاد يدعو الى التشاؤم ..

اذا بتقصون على بعض شى ثانى مثل ما يقص علينا الشمالى وباقر ..

 

[تفائلوا بالخير]

يا اخواني وخواتي

اقسم بالله ابتدت حرب الاشاعات المدمره الاقتصاد الوطني انتبهوا

ترا الشغله ماهي سهله نزول ... نعم هناك نزول للسوق بس فيه

للى يبي الشر لديره فيه المستفيد فيه الحاقد فيه وفيه وفيه

لا تعطونهم فرصه كل من يكره الكويت الحين يستغل الفرصه لبث

الاشاعات والمعلومات المضلله يعني شي اكبر مما تتصورون اتمنى من

الاخوه المشرفين التصدي لهذي الفئه من اجل الكويت

الحـل سهـل جـدا

ادري راح تاخذ من الوقت والجهد بس من اجل عيون الكويت نتحمل

اي عضو يكتب موضوع بلا مصدر واضح ومؤكد يتم شطبه باسرع وقت
اخواني الاعضا مو بس المشرفين هم انتم لكم دور تصحيح المعلومه وابلاغ المشرف

يد واحده من اجل الكويت

القال والقيل اهو مصدرهم

اضم صوتي لصوتك خصوصا اذا تم التاكد ان الموضوع كاذب