شرايكم بالفولفو ؟!

[سراج الأقصى]

السلام عليكم ..
اخواني الأفاضل ..
الكل يعرف ان السيارات الاوروبية تتميز عن غيرها من السيارات ومنها الفولفو و انا شفت بعض سيارات الفولفو و سمعت عنها بعد، انه مواصفاتها شي خيال ويمكن أحسن من بعض أنواع المرسيدس او ال بي أم وكذلك سعرها بالوكالة معقول فمثلا فولفو s80 ال6 سلندر سعرها مقارب للأوريون ومواصفاتها طبعاً لاتقارن بالأوريون!
لكن يبقى الإستفسار الرئيسي على جميع السيارات الأوروبية ومنها الفولفو، وهو:
شلون أسعار قطع غيارها؟ ومدى توفرها؟
وخدمة الوكالة وأسعار السيرفس؟
وهل السيارة فيها مشاكل متكررة؟
فأرجوا من الأخوة ومن عندهم خبرة بهذه السيارة إفادتنا والإدلاء بدلوهم ..
وشكراً ..

 

[A.M.W]

هلا اخوي الصراحة انا عندي جم واحد من الربع عندهم فولفو

واحد عنده موديل 92 مخليها حق الطراد

وثلاثة من الربع موديل 2000 S70

وواحد عنده 2003 S60

وواحد عنده 2006 او 2007 s80

الصراحة يمدحون الموتر لأني سائلهم كان بخاطري اشتري فولفو بعدين هونت لأسباب مادية لأن قطعها نار حبتين ولأن السيارة اذا بتقارنها بالاوريون او الكامري اسمحلي ماكو مقارنة من جميع النواحي سواء اذا بتبيع او اذا تبي شي عملي او اذا تبي اي كراج ممكن يصلح او اذا تبي توفر القطع للاسف ماتجده بالفولفو

واذا تبي الكلام الصح انا اقولك انت شنو نظامك؟ اذا نظامك نفسي ماتحب الدوخة والعبالة ومشاكل الكراجات والروحات والسيارات اللي مو اي واحد يشتغل فيهم
فيبيلك شي عملي وقطعه بكل مكان وحق الكد والمد ما الك الا الفودر الفكتوريا او الماركيز او الكامري

واذا انت ريال تبي تكشخ وتحب البرستيج حتى لو كلفك شي من فلوسك وراحة بالك فأنا اقولك عند الفولفو الجاكوار الاودي والرنج ...الخ

 

[سراج الأقصى]

الله يعطيكم العافية ..
بس صراحة هذي كارثة مو سيارة اذا جذي علتها
بس انا سمعت ان خراباتها قليلة.
وبخصوص الأوريون أنا أتكلم عن المقارنة بالمواصفات فقط أما من النواحي الثانية فأكيد الأوريون أفضل كسعر وعملية و ... و ... و ... الخ

 

[finaltouch]

الله يعطيكم العافية ..
بس صراحة هذي كارثة مو سيارة اذا جذي علتها
بس انا سمعت ان خراباتها قليلة.
وبخصوص الأوريون أنا أتكلم عن المقارنة بالمواصفات فقط أما من النواحي الثانية فأكيد الأوريون أفضل كسعر وعملية و ... و ... و ... الخ

السيارة روعة بجميع النواحى وعمليه ومافيها اى مشاكل والاسعار حاليا فوق الممتازة مقارنة يمواصفاتها( فكر بنفسك والى يحبه قلبك ) -
اما اذا كنت من الاشخاص الى قبل ما يشترون السيارة يفكرون فى المستقبل تيبلهم سعر ولا لا .....فالله يعينك

والحين صدقنى معظم الوكالات قطع غياراها وسيرفسها نار ( ما عدا التويوتا ..نوعا ما ) - وكل سيارة لها رغاب .

والله يوفقك فى اى اختيار

 

[سراج الأقصى]

كلامك على متمة يالحبيب ..
بس بخصوص قطع غيار تويوتا فاسمح لي اهي نار بعد فمثلاً الجامة الأمامية لجيب البرادو سعرها بالوكالة 100 دينار وحق ال بي أم 850 بالوكالة ب 38 دينار، ودعامية البرادو الخلفية بالوكالة ب 60 دينار وهلم جره ..
فأنا مقتنع ان قطع الغيار في كل الوكالات غالي بس يفرق الخدمة و رسوم السيرفس.

 

[على قاسم على]

انا من مستعملين فولفو كان عندي 850 توربوموديل 1994 كان صاروخ وبعته قبل اربع سنين بالف دينار بعد ما اشتريتة بعشرة الاف كاش استعمال جدأ ممتازة وثابت والسيارة الاولى عالميا بالامان وليس الثبات وشتريت موديل2001 اس80 استعمالة ممتاز ايضا بس انصحك اذا تبي تشتريلك واحد دور مستعمل استعمال خفيف وشرط الفحص وما تتحسف لان المستعمل سعرة بالارض واتعب على اس 80 ووخر من اس 40 واس60 لانهم صغار وما فيهم فخامة ودمتم

 

[سراج الأقصى]

انا من مستعملين فولفو كان عندي 850 توربوموديل 1994 كان صاروخ وبعته قبل اربع سنين بالف دينار بعد ما اشتريتة بعشرة الاف كاش استعمال جدأ ممتازة وثابت والسيارة الاولى عالميا بالامان وليس الثبات وشتريت موديل2001 اس80 استعمالة ممتاز ايضا بس انصحك اذا تبي تشتريلك واحد دور مستعمل استعمال خفيف وشرط الفحص وما تتحسف لان المستعمل سعرة بالارض واتعب على اس 80 ووخر من اس 40 واس60 لانهم صغار وما فيهم فخامة ودمتم

يعطيك العافية على المشاركة
بس ما وضحت لنا شلون الخرابات وقطع الغيار من ناحية الأسعار والتوفر !
وبخصوص ال اس60 أنا أشوف انه مواصفاته حلوه بعد يعني موسهل.