هل يوجد مكتب سيارات شريف ما يلعب بالعداد بالكويت ؟

[Q8i11]

ياخوان ابي مكتب سيارات امريكية بس ما يلعب بالعداد
كلهم يلعبون بالعداد
فر راسي منهم
كلها سيارات تاجير و فليت و عداداتها بالعالي و هني قاصين على الناس ينقصون العداد

معقوله محد عنده ضمير ؟

 

[مساهم11]

والله طلبك صعب
ويجب عليك التاني والحذر
وان قدرت اشتر جديد اضمن وافضل
والذمه هالايام اصبحت شحيحه

 

[VISION]

جزاك الله خير

انا عن نفسي افضل الوكاله فقط ادفع زياده واشتري راحتي

 

[core99]

فيه موقع إسمه www.carfax.com
دش وسجل بمبلغ بسيط ممكن 5 دنانير ...لمدة شهر
تاخذ رقم شاصي أي سياره وتحطه في مربع البحث في الموقع ويعطيك تاريخها وكم ماشيه لمن شحنوها للكويت ....

تبي مساعده في الشرح حاضر...بس لا يتشطرون عليك...

أنا كنت أدور سوبربان ولقيت واحد ماشي 44 ألف عند المكتب .. ولما رحت للموقع طلع مشحون للكويت ماشي 94 ألف .... شرايك

 

[sms 74]

يبه معظمهم نصابين كبااار وقليل جدا منهم اللي يخاف الله واللي يبي يرتاح لا يقرب المكاتب ,,,

 

[q8max]

الله يكفينا شرهم

 

[ابو سالم1]

المشكلة الناس الى تصدق العداد كل يومين طالع لنا واحد منزل سيارة موديلها 90 او اقدم ويوقلك ماشى 90 الف ويضرب سعر بالعالى والعداد مالها تحصلها ماشى اكثر من 900 الف بس لان الجو الى برا مثل المانيا او امريكا تغريبا جو ماعندهم حر يعنى لو السيارة تقعد 30 سنة بتشوفها مثل الجديدة لان ماتتاثر بالجو بتحصل الطبلون مافية شقوق مثل الجديد والاخوان ينزلون العداد ويقولك جديدة . اول شى استخدم العقل معقولة سيارة صارلها 20 سنة ماشية 90 الف ويقولك استخدام اليابان اليابانيين اصلا الى اكثرهم يستخدمون الموصلات ولاى يستخدم السيارة اقل شى يمشي فيها باليوم 200 كيلو يعنى مايشترى سيارة ويخليها عند بيتهم عشان يجي كويتى يشتريها بعد عشرين سنة .

وجهة نظرى الخاصة ولا تعم الجميع .
ارجو محد يزعل لانها وجهة نظر خاصة

 

[Q8i11]

هذا تاهو Z71 موديل 2005 كامل المواصفات في أحد مكاتب حولي
ماشي 54 ألف ميل و أنا أقول لصاحب المكتب انه ماشي واجد
و يقول لي انه سياراته كلها من تكساس او فلوريدا المناطق الحاره

هذا تقرير كار فاكس : http://www.carfax.com/viewEmailRepo...9bVx8IV7GD02hX6ndWRqzR9bDgDaCTSi3&language=EN

رقم الشاصي: 1GNEK13T85R129013
مستعمل 3 سنوات في نيويورك بالثلج ممكن يكون مصدي
ماشي 90 الف ميل
في قضية رقم Case #32595199 حادث مع سيارة أخرى
الحادث حصل بتاريخ 09/أبريل/2008
بعدها تم بيع السيارة و شحنها للكويت

اللي شفته بالمكتب فوق 40 سيارة
كلهم ملعوب فيهم

 

[alhilam]

السلام
ليش ماتشتكي لحماية المستهلك؟
او تحط اسم المكتب
وثانيا اهم شئ نظافة السيارة بغض النظر عن الممشى

 

[Q8i11]

وثانيا اهم شئ نظافة السيارة بغض النظر عن الممشى

اي نظافه الله يرحم والديك
اقول لك السيارة صار لها حادث تقول نظافه

 

[core99]

أنا يا خوي إشتكيت لحماية المستهلك....

وقالولي الموقع اللي جايب منه البيانات غير معتمد لدينا..نبي شي مادي وملومس ...

هذي حماية المستهلك..

وبالنسبه لللأخوان اللي طلبوا تفاصيل موقع carfax حاضر أعطيكم الطريقه بالتفصيل..

 

[Rap Soul]

لا حول ولا قوة الا بالله

 

[c_4]

بسيطة لما تروح للمكتب وتعجبك السيارة اطلب من صاحب المكتب يوريك التايتل اللي جاي مع السياره من امريكا ولا يقول انه مو موجود لأنه لازم يشوفونه الفحص الفني والا ما تتحول السياره والتايتل هذا اهو دفتر السياره مال امريكا يكون مسجل فيه العداد .

 

[alhilam]

اي نظافه الله يرحم والديك
اقول لك السيارة صار لها حادث تقول نظافه

السلام انت مافهمت قصدي
كلامي كان بشكل عام وليس السياره الي انت ذاكرها

 

[sahran]

صحيح هنا الكثير من المكاتب والشركات تتلاعب بالعداد ...وهنال شركة كبيرة ومشهورة بالري أغلب السيارات منزلين عداداتهم مع أن سياراتهم وارد الوكيل والمشكلة سياراتهم كلهم نفس العداد 60 الف مفضوحين .

بصراحه تعاملت مع أكثر من مكتب يستوردون سيارات من الخارج حقي وحق الربع .....والحمدلله طلعوا السيارات بحاله ممتازه وكنت أطلب دفتر السيرفس أو التايتل وفوق هذا أفحص ....نصيحه ابتعد عن السيارات الرخيصه واللي تشك فيها والله يوفقك لأنه اللي شاري سياره من بره عدادها عالي مستعد يبيعلك بأرخص من السوق لأنها طالعه عليه بسعر زهيد أما النظيفه ممكن توصل أعلى من سعر السوق ولها زبون مستعد يدفع .