(1)
بو بدر: يا ولدي ما يصير لازم تصلي بالمسجد ترى صلاة الجماعة أفضل من صلاة الفرد بـ 27 درجة
وأنت شوف جم صلاة تصليها .
بدر: يتحلطم في نفسة ( أستغفر الله ردينا على نفس السالفة ) إن شاء الله يبه إن شاء الله
بس إذا تقصد عن أمس ترى كنت تعبان وراحت علي نومة .
بعد ربع ساعة أذن العصر
بدر راح يتوضأ وبروح المسجد .. راح يشوف أبوة .. يبه يبه قووم أذن العصر .. مابتروح الصلاة .. قوووم يبه لا نتأخر .. وقام يحن ويون على أبوة
بو بدر: يا غبي ما تشوفيني نايم .. أذلف صج أنكم مو كفو أقوم من صباح الله أروح الدوام
مو عشانكم وماتبوني أنام إشووي أرتاح ..
بدر : !!!!!!!! عيل وين الـ 27 درجة ( بقلبة يقول ) خرطي خرطي ...
(2)
أسماء بتروح السوق مع أختها الكبيرة ..أووف أووف مالي خلقها تعور راسي حرام وحرام ومايجووز شرعاً ..
بالطقاق عاد مالي شغل فيها
مها : يلا يلا أسوومة خلصتي أنا ناطرتج بالسيارة .. لا تتأخرين ترى بروحه زحمة اليوم
أسماء : أوكي أوكي كاني وراج ورشت العطر على ملابسها وخذت جنها وإطلعت
مها : أسماااااائووو !!! شنو هذاا
أسماء : إخترعت .. إشفيج ؟؟ شنو صاير !!؟
مها : شلووون تحطيين عطر ؟؟؟ وإحنا بنروح السووق !!
أسماء : شكووو !!!
مها : يعني ما تعرفين حديث الرسول علية الصلاة والسلام إن كل وحدة تتعطر وتطلع من بيتها تعتبر زانية ..
أسماء : أستغفر الله .. إشفيج إنتي .. !!؟؟؟
ترى ما حطيت إلا شوويه وبعدين شراح يصيرلا تصيرين معقدة وتحبكينها ..
مها : أقول أقوول أنا بعلم أمي عليج وحسابج عندها
أسماء : حسااب شنوو !!؟؟ أنا ما طلبت من مطعم !!
مها : وااي شـ الملاقة !؟!
بعد ساعة ونص
أسماء : الله شوفي هالتنورة حلوه شكلي باخذها بس ياربي شنو يلوق معاها
مها كاشتة بأسماء وعينها على مجموعة من البنات بالصووب الثاني
أسماء : إشفييج تخززين البنات ..؟؟ تعرفينهم ؟؟
مها : إي معاي بالجامعة ..
أسماء: روحي سلمي عليهم ..
مها : لالا مالي خلقهم ..
أسماء : كييفج .. !!! يلا إمشي نروح نكمل تسوقنا
عند الكاشير ..
أسماء : رفيجاتج كاهم بيوون ورانا هههه خلصوا معانا ..
مها : وي وي من صجج !!! شكلي زين ؟؟ بسررعة قوولي ترى نوعهم تعلليق يلا اسوومة قوليلي بسرعة بسرعة
أسماء : إي إي زين .. الحمدلله والشكر
مها بطلت جنطتها طلعت العطر ورشت على ملابسها .. !!
وين !!؟؟
في السوق ..
عند الكاشير ..
وهو ريال مو مرة ..
والمحل .. فيه شباب وبنات ..
......
كثير من التناقضات نشوفها في حياتنا وهذه بعض الأمثلة ..
من كثير لكن أقرب ما تكون من الواقع ويمكن الواقع أمر منه ..
لكن ليش الإنسان يناقض نفسة .. !!
هل هو شعوور بالنقص أو شعوور للفت الإنتباة وتسليط الضوء على نفسة ..؟
أو أن يكون حديث الساعة .. !!
وشلووون الإنسان بكون قدوة لشخص ما وهو ما يسووي اللي يقولة .. قول بلا فعل ..
والتناقضات لها مستويات ..
وكل كان الإنسان له أمور يثبت عليها ويكون على مبادئة ممكن تزيد عنده التناقضات ..
لأنه السبب الوحيد لهذا الفعل إن الأمور هذه والمبادئ إنوجدت من العدم أو كانت هشة .. ومع أقل ضربة تتحرك ..
لكن مو المهم تكون القدوة وبداخلك تناقض كبير ..
لكن عليك أن ذو مبادئ قوية لا تهزها المتغيرات والمغريات ..
وإن كانت المغريات كثيرة من حولك .. لكن لا تكون متناقض .. تناقض الناس ..
فأنت تنافض نفسك أولاً وأخيراً ..
