مشروع مغسله ملابس

السلام عليكم اخوواني
ياخواان ودي اسالكم عن مشرووع قاعد يدوور برااسي
ودي افتح كواي ملابس بس انا عليمي بهل اشيااء
وطبعا ماعندي راس مال بس باخذ قرض اذا شفت السالفه سهالات
فه بغييت اعرف ماعليكم امر
جم تكلفتهاا تكلفني بالكاامل واتمناا تقولولي شغله شغله
وشنو الاجهزه المطلووبه واسعارهم
وجم عامل وجم معاشاتهم
والاجار
والمواد
واكوون شاكر لكم وماتقصروون معااي يااهل الخبره

 

لاتوهق نفسك المال موجود بس يبيلك موقع ممتاز وصعب تحصل المواقع الطيبه...

 

مرحبا اخوي كلام الاخ ترى عدل على العموم انا بعطيك بمعلومات بسيطه انشالله انها تفيدك
لاتوهق نفسك بمشروع بدايته بقرض لان الاستثمار شنو ماكان تكلفته *3 يعني 10 دنانير تكلفه المشروع ترصد مقابلها 30 دينار فائض كدعم لمشروعك بعدين المصبغه منشره بشكل موطبيعي والان اكثرهم يعانون من العمل والارزاق بيد الله وتكلفته عاليه جدا تجهيزها اذا معدات جديده بتكلفك اكثر من 10 الاف دينار واذا مستعمل تقريبا 5 الاف دينار هذا غير شراء المحل ويكون موقع مثل ماقال الاخ جزاه الله خير والعماله اقل شي اذا ورديه واحده عملهم بيكون عددهم 5 عمال مع السايق طبعا ورواتبهم مابين 80 دينار الى 120 دينار حد اقصى غير اجار السكن بحدود 150 دينار غير اجار المحل عندك من 250 دينار موقع داخلي بااايخ الى 1000 دينار افضل موقع هذا كل اللي اقدر اقوله + كلمه (( انحش))

 

اذا حبيت تفكر في مشروع يالغالي حاول تجيب فكره نادره او غير موجوده تكون افضل لك هذا مثل مايسووون في اوروبا والغرب عامه انا والله مو قاعد اكرهك بالتجاره بالعكس انا فرحان لان الشباب الكويتي اتجه الى التجاره هذا شي طيب بس ماترمي نفسك بالتهلكه حرام على العموم انا بعطيك فكره مشروع حلوه وخفيفه ولا لها تكاليف كبيره ولا تحتاج الى عماله كثيره حدها الاقصى 3 عمال ومتى تجيبهم اذا ضغط عليك الشغل في البدايه عامل واحد كافي ومعاشه 150 دينار اذا كثرت المشروع عباره عن محل زهووور النشاط هذا لو انا موفيه كان مانصحتك انت بتنقد عليه بس لما تتعمك فيه واعطيك اسرار المهنه والية العمل راح تندهش من الارباح الخياليه اللي تحققها بمعنى افضل ذهب مو ورد والله والله والله حبيت افيدك تشجيعا لك حدى لو تصير اكبر منافس لي الرزق عند الله اكره ماعندي اذا جاك الانسان خايف يفيد احد خوفا من تاثر عمله ومنافسته
حب لاخيك المسلم ماتحب الى نفسك لو كل واحد مشى على القاعده هذي كان الدنيا بخير
واذا تبي تستفسر من اي شي انا حاضر وبشوفه والله يوفق الجميع

 

مشكووور اخي الجبري على نصيحتك للرجل وبارك الله فيك

 

ماقصر الجبري

 

السلام عليكم ورحمة الله وبركاته


بالنسبه لمشروع المصبغة المشروع ناجح وانا اختلف مع الاخوان الموقع بالمصبغه ماهو شي اساسي اهم شي السمعه الزينه والتوصيل يعني لو كان محلك بشارع داخلي بس عندك خدمة توصيل راح توصل لزباين منو فينا مر المصبغة الى يتعامل معاها وشاف موقعها الله يخلي الاعلان الى تلقاه عند باب البيت والتوصيل اهم شي الخدمه لازم تكون ممتازه لان اذا خسرت زبون مستحيل يرجع لك ثاني فالسمعه مهمه بهالمهنه

بالنسبه للمعدات انت تحتاج الى :
1. مكينه دراي كلين <--------------- الجديده سعرها غالي دور على مستعمله نظيفه
2. غساله نوع جيد يجي شكلها مربع (( ستان ستيل )) <------------- تتراوح بين 300 الى 500 دينار
3. نشافه وكل ماكبر حجم النشافه من الداخل كل ماكان افضل <-------- تتراوح بين 1000 الى 1200
4. مكبس بخار <---------------- هناك مكبس سعودي رخيص سعره من 500 الى 700 دينار



بس انا ما أيد انك تشتري ،، انا اقول دور على مصبغه للبيع مع معداتها وعمالها يكون افضل

انا قبل فتره لقيت مصبغه كامله بمعداتها + 3 باصات نيسان + 7 عمال داخل المصبغه من غير السواويق يعني كلهم 10 بسعر 18 الف دينار


انا انصحك اخي انك تبدئ المشروع بدون غرض لان اي مشروع فالعالم يحتمل الربح والخساره وانا وانت لانعلم الغيب فالاقدام على المشروع يعني الاقدام في مغامره والرزق عند الله ولاكن الافضل ان لاتبدئ بغرض وان كان المبلغ كبير فبحث عن شريك والله يوفقك

 

خالي انا عندي مصبغة

تاذيت اذية لها اول مالها تالي

روتين حكومي قاتل

قوانين اصعب من الصعب

والعمال والمواد ---- مشاكل لها اول مالها تالي واسعار فيها لعب وارقام فيها غلط

نصيحة والله من القلب الي القلب سولك عمل تجاري اخر والله العلي العظيم واذا تبي محلي تعال اخذه

 

السلام عليكم اخوواااني مشكوريين وماقصرتوو على المعلومات القيمه واخووي الجبري ماقصرت وكثر الله من امثالك ويجعلهاا بميزاان حسنااتك
وباجي الشبااب بعد ماقصرتوو قواكم الله
وان شاءالله اذا عزمت عليهاا اكييد برجع لكم
وفي اشيااء وايد فهمتهاا منكم والله يسهل
مشكووووريين جميعا

 

alm3na1001 ماقصرت اخووي وبارك الله فييك

 

stock-broker
حبييب ماقصرت اخووي على النصيحه وبارك الله فييك

 

تحيه طيبه اخي bahry_y


بالنسبه للمصبغه ..فأهم شي هو الموقع ثم تسوى دراسة جدوى وتشوف حاجة السوق
الى المصبغه وتحاول تحسب اجمالي مصاريفك مع الايرادات المتوقعه ..

حط في بالك مصاريف اجار المحل +اجار العمال+تكاليف شراء وصيانة مواد +مصاريف طارئه
ثم تشوف دخلك المتوقع من المصبغه وهذي تقدر تقيسها من خلال نظرتك لحاجة اهل المنطقه
لخدمات المصبغه وتشوف المصابغ اللى حولك كم تدخل ومستوى الشغل والمعدات اللى يملكونها

والاخوان ماقصروا اشرحو لك المعوقات والمميزات ..

عموما انا مااشجعك تبدأ مشروعك في ((قرض خصوصا اذا كان ربوي)) ...ابعد عن الربا ماوراه الا الخساره واتمنى ان هالنقاط تفيدك في اي مشروع قادم ..

وتقبل تحياتي

 

اخووي كوييت مشكوور وماقصرت وكثر الله من امثالك وان شاءالله الي الله كاتبه بيصير
بيض الله وجهك

 

غير 20 الى 25 الف لاتدخل لان بتخسر وما تقدر تدير المشروع
تكلفتك الشهريه اجار 600 موظفين 6 كل واحد 100 يعني 600 هذي 1200 و 300 مواد وغيره وصيانه هذي 1500 دينار كل شهر طبعا لازم يكون عندك رصيد يتحمل خساره سنه حط ببالك جذي

يعني 18 الف حطهم كخساره
وعندك 15 الف لتجهيز المكان والاجهزة
المجموع 33 الف

ومافي مشروع تدخل فيه ويقل راس ماله عن جذي
بعد السنه بترتاح انشاء الله وبيصير صافي الربح 500 كل شهر والله الرزاق وهم يعتمد على كفاءة الموظفين والخدمه والموقع اهم شي مع ان الكل مهم

الله يوفقك
لو عند فلوس دخلهم بشركتي مثلا تدخل 5 الاف ونحجزهم 5 سنوات كل شهر ينزل بحسابك 80 دينار يعني خلال 5 سنوات يصيرون دبل

 

بارك الله فيك

 

الله يعطيكم العافيه ياشباب ماقصرتوو بارك الله فيكم

 

مشـــــــــــــــروع الآنــــــــــــــــدري ناجح في الرياض لكن يبي له شويه تخطيط مضبوط نمتلك محلين والثالث قريب نفتتحه - بس تبي الصراحه الأرباح ذهب وخياليه - إذا لك نيه وجاد بها النشاط تحديداً راح ارسل لك
معلومات وافيه وكافيه يمكن تفيدك ---- تحيــــــــــاتي

 

ممكن تكتبها هني اخوي الهمس عشان يمكن نستفيد وبارك الله فيك

 

مشكورين ياخوان على الاراء بس عندي مداخله بسيطه جداا لتوضيح لبعض الاخوان مافيه شي يفشل الا من اداره صاحبه ولا فيه مشرووع يفتحه صاحبه وينتج مثل ماينتج بعد سنه بس المساله ياخوان الرجال يقول باخذ قرض وابي اشتغل هذا معناتها انه مبتدء يعني لا يشتغل في مشروووع إالاتزامه الشهري بسيط بغض النظر عن تكلفه المشرووع يعني لازم يكون إلتزامه من 700 وتحت يقدر يغطيه من راتبه ومن بيعه خلال بدايته بالمشرووع يعني بعد مايطوف السنه يقدر على الاقل يجمع بالارباح وشوي شوي يكبر ويستفيد اكثر واكثر مشرووع المصبغه تصلح لواحد عند مصادر دخل كثيره وعاليه ويشغلها على راحته

 

يعطييكم الف عاافيه ياا اخواان على الردوود
والله الجبري انت فااهمني عدل ماشاءالله عليك كلامك عدل انا ابي شي التزاامه مو عالي لاني على قولتك بالبدايه بغطيه من راتبي