موقع يبين حجم الشورت على السهم

الموضوع في 'السوق الأمريكي للأوراق الماليه' بواسطة great-name, بتاريخ ‏2 يوليو 2004.

  1. great-name

    great-name عضو جديد

    التسجيل:
    ‏17 مارس 2004
    المشاركات:
    249
    عدد الإعجابات:
    0
    مكان الإقامة:
    kuwait
    السلام عليكم ورحمة الله وبركاته

    هذا موقع يبين حجم الشورت سل على السهم

    السؤال ما مدى تاثير حجم الشورت سل اذا كان كبير ام لا يذكر ياليت احد الاخوان الخبراء بالشورت سل يفيدنا انا حطيت رمز سهم وطلعت لي ارقام ما فهمتها

    http://www.nasdaqtrader.com/asp/sho...SettlementDate=06/15/2004&View.x=77&View.y=11
     

    الملفات المرفقة:

  2. ابو سعود

    ابو سعود عضو جديد

    التسجيل:
    ‏24 أغسطس 2003
    المشاركات:
    370
    عدد الإعجابات:
    0
    مكان الإقامة:
    الرياض

    سلااااااااااااام

    يا أخي زيادة السل شورت على سهم معين .. يدل على زيادة نسبة المتشائمين لحركة السهم المستقبليه .. وطبعا هذا يدل على أن السهم بينزل ..

    و لكن يقال أن العكس هو اللي يصير .. لأنه اذا نسبة الشورت سل على سهم عاليه .. فتعني أن عدد كبير من هالمتشائمين بيضطر أنه يشري عشان يغطي بيعه المسبق .. وهذا ما يسمى Buy to Cover ..وهذا يرفع السهم ..

    بالاضافه الى نظرية ( خالف السوق تربح ) يعني بالعربي خالف توقعات الناس وتصرف عكسهم حتى تجني الأرباح ..

    عموما هذه تظل نظريات نجحت أحيانا وفشلت في أحيان أخرى ..

    المعامل المعروف هو الناتج عن قسمة عدد الأسهم المباعه شورت على عدد الاسهم المتداوله .. فيكون الناتج مثلا 0.50 أو 1.00 أو 1.50 .. وهكذا .. وطبعا كلما ارتفع دل على ارتفاع البيع الشورت .. ..:)

    أتمنى أكون قدرت أفيدك ..:)
     
  3. great-name

    great-name عضو جديد

    التسجيل:
    ‏17 مارس 2004
    المشاركات:
    249
    عدد الإعجابات:
    0
    مكان الإقامة:
    kuwait
    حبيب والله بوسعود

    عرفتني على اشياء في الشورت لاول مره اعرفها

    مشكور طال عمرك على هالمعلومه
     
  4. النوووخذه

    النوووخذه إلغاء نهائي

    اممممممم بو سعود لو سمحت ... عندي شويه اسئله واستفسارات .... وكلي امل في الاجابه عليها :

    هل صحيح ان الشوت سل فقط للاسهم التي تكون في 5دولار واكثر

    عن الطريقه ... اول شي sell to cover بعدين buy to cover صح جذي.. اول شي تبيع بعدين تشتري

    وهل في حاله بعت الاسهم سوف يتم الحجز على مبلغ من رصيد... وكم مقدار المقبلغ هل هو موازي لمبلغ السهم المباع

    هل الوسيط يؤخذ على تلك العمليات نسبه او عموله


    هل يتم تطبيقها بالعكس .. الشراء عند كسر الدعم والبيع عند مقاومه او الدعم التالي

    هل يصح شراء السهم على الاخبار السيئه ... يعني هناك من يبيع على خبر السئ وبعد فتره يشتري ليغطي

    مدى جواز تلك النوعيه من التعامل من الناحيه الشرعيه ... في حاله عدم الجواز المسئله ... ارجو الاجابه على باقي الاسئله ...لاهميتها و لمعرفه كيفيه تداول والعمل في السوق ومدى تأثير ذلك على الاسهم حيث انني لم اتصور ان هناك تداول كبير بهذا الحجم على تلك النوعيه من التعامل.

    شاكر لك مسبقا الاجابه
     
  5. ابو سعود

    ابو سعود عضو جديد

    التسجيل:
    ‏24 أغسطس 2003
    المشاركات:
    370
    عدد الإعجابات:
    0
    مكان الإقامة:
    الرياض
    أخوي النوخذه ..:)

    برجع بحول الكريم أرد على استفساراتك :)

    بس خلني أروح أصلي المغرب .. واتقهوى مع أهلي .. لأن السوق اليوم فعلا ما يشجع ..:)
     
  6. ابو سعود

    ابو سعود عضو جديد

    التسجيل:
    ‏24 أغسطس 2003
    المشاركات:
    370
    عدد الإعجابات:
    0
    مكان الإقامة:
    الرياض

    أخوي النوخذه ..:)

    الفكره وما فيها أنك تشتغل على التحليل الفني أو الأخبار بطريقه عكسيه ..

    يعني تلاحظ ان المحللين يتوقعون أحيانا هبوط سهم بناء على المؤشرات .. هذا فضلا عن الأخبار السيئه ..

    طيب وش اللي يصير بالضبط ؟

    اللي يصير أنك تتوقع هبوط سهم فتطلب بيعه شورت .. على السعر الحالي .. واذا فعلا نزل ترجع تشريه .. واذا حبيت تبيعه مباشره وتأخذ الفرق ..

    تفصيل العمليه كالآتي .. وبشرحها بمثال بسيط ..

    تذكر شركة NOK وش صار معها .. كان السهم تقريبا عند 21 $ نزل خبر سيء عليها بخصوص انخفاض المبيعات .. وفتحت قاب داون على 17 وكسور ..

    طيب لو فرضنا أنك على علم بهالخبر مسبقا ..

    تطلب من البروكر يدبرلك أسهم نوكيا ببيع مسبق قبل الهبوط .. والبروكر بدوره يقوم باقتراض هذه الأسهم من عميل آخر مستثمر ويعطيك قيمتها كامله .. ولك الحق بالتصرف بالمبلغ .. واذا نزلت نوكيا ترجع تشريها ب 17 مثلا Buy to Cover

    واذا بعتها مباشره فتصير انت أخذت الفرق بين العمليتين وهو 4000$

    و هذاك المستثمر يبلش بخسارة 4000$ .. هذا طبعا اذا كان شراها ب 21$

    طبعا فيه شروط وأحكام تختلف من بروكر لآخر .. لابد يكون حسابك مارجن .. ولابد من رأس مال معين .. لأن البروكر يخاف يطلع السهم عكس توقعك .. فمثلا لو وصل نوكيا ل 25$ .. بإمكانه يطلب منك أن توفر مبلغ من المال في حسابك يوازي قيمة نوكيا الجديده أو أن تشتريها فعليا .. ( يعني نفس اللي يصير اذا شريت سهم بالمارجن بفلوسهم وطاح السهم من حقهم يبيعون أسهمك من دون اذنك)

    طبعا في هالحاله بتتورط أنت لأنك بايع السهم ب 21000$ والحين تشريه ب 25000$ .. يعني خسارة 4000$ ما بيعوضها الا ان السهم يطلع الى 29$

    أكيد بتسألني وش ذنب المستثمر الأصلي ..

    بقولك ماله دخل وحقوقه محفوظه .. حتى لو كان فيه توزيع أرباح فبييأخذ نصيبه كاملا .. وأصلا ما يكون عنده أي علم .. ويقدر يبيع أسهمه متى ما بغى .. والوسيط وقتها بيدبر نفسه بأنه يدور نفس الاسهم عند عميل آخر ..

    بتسألني .. هل صارت معك ومعي ..

    بقولك يمكن ليش لا .. والسبب هو أن الأسهم ما تسجل فعليا بأسمائنا .. فلذلك الوسيط لديه المرونه في التحكم بالأسهم واقراضها على هواه ..

    ما تبيهم يقرضون أسهمك لأحد .. لازم تسجلها باسمك .. بس ترا ما لها داعي لأنها مهيب فارقه معك أبدا ..

    بالنسبه لأي أسهم تنطبق هالعمليه .. فحسب علمي موب لجميع الأسهم .. والسبب يكمن في توفرها عند الوسيط من عدمه .. هو طبعا يقدر يدبرها من وسيط آخر .. ولكن العمليه متعبه شوي ..

    ولا أتوقع أن لها علاقه بالسعر فمثلا NT و SUNW أقل من خمس دولار وتصير فيها هالعمليه .. ولكن يمكن أستصعب حدوثها مع أسهم البني المنتفه ..

    أما بالنسبه للحكم الشرعي .. فأنا طبعا منيب مفتي .. ولكن حسب علمي أن فيها شبهه كبيره .. لأنك تبيع ما لا تملك .. ودع ما يريبك الى ما لا يريبك .. :)

    وشخصيا لم أجربها اطلاقا .. ولا عندي أي نيه .. الا اذا صدرت فيها فتوى صريحه بإجازتها ..:)

    ما دفعني للقراءة عن هالعملية هو تساؤلي عن هل هناك من يستفيد من هبوط الأسهم .. وأخوي العطار يمكن يتذكر تساؤلي ..

    و بنزل ان شاء الله موضوع مفصل عن تأثير هالعمليه على السوق .. :)

    أرجو من الله اني أكون أفدتك ..