بسم الله الرحمن الرحيم
رئاسة اتحاد الملاك يعني ترشح نفسك بالبنايه وتصير رئيس الاتحاد وتجمع مبلغ من كل شقه تقريبا 225 للصيانه ومعاش الحارس لانه طبيعي الشقق ملك الملاك مو شخص والحارس معاشه على الملاّك ويطلع كل سنه تقريبا 6000 دينار والي يزيد يكون من نصيبك واكيد يزيد لك اقل شي 2000 دينار وان شاءالله قدرت اوصل لك الفكره واي استفسار انا حاضر
لفت نظري اللي مكتوب فوق
وحبيت اعلق عشان الناس اللي قاعدين يقرون باعتباري حاليا عضوة في مجلس ادارة اتحاد ملاك احد المجمعات السكنية بالكويت
اول شي بالنسبة لنا كل ايرادات الاتحاد ومصروفاته تقيد بدفاتر معده لهذا الغرض
مثلا رسوم الخدمات تدفع ويتسلم كل مالك وصل
اجور التنظيف يتم التوقيع على استلام الرواتب من عمال التنظيف كل شهر
اي اصلاحات طارئة تكون بوصولات
اي عملية شراء تتم بايصالات وفواتير
بعد نهاية السنة تقيد كل هالمصروفات ويطلع تقرير سنوي بالميزانية للسنة يقيد فيها الايراد ومصدره والمصروف ووين راح والفائض يرحل للسنة اللي بعدها وهالتقرير يعتمد من الاتحاد ويعلن عنه واي مالك يبي نسخة نسلمه على طول
طبعا الكلام اللي كتبته فوق يسبقه عقد يتوثق بوزارة العدل مذكور فيه هالكلام ووايد غيره
واذا حب واحد من المجلس سواء رئيسه او احد الاعضاء انه يلعب بذيله
اي واحد من الملاك يقدر يلعن بوخامسه بالمحكمة ويعلمه شلون يتملين على حساب الاوادم اللي امنوه على ادارة املاكهم والحفاظ عليها
قبل ماختم نسيت اقولكم ان ممكن مدير الاتحاد يتقاضى اتعاب لكن اتعاب عن طريق راتب شهري يتحدد بجمعية عمومية من الملاك ويتوثق بمحضر يتوقع عليه منهم بمعنى ان العملية مو سبهللة ولعب
نصيحتي للاخوان اللي حابين يشترون شقق تمليك انهم يتأكدون قبل اي شي من حسن ادارة العقار وشرف واخلاص اعضاء الاتحاد
احنا عندنا نحط من جيبنا لو اخترب شي طارئ مو نشفط فلوس الناس واذا زادت فلوس نستغله بشي ينفع العقار لان المسئولية تحتاج لضمير حي وصاحي على الفلوس اللي الناس اوثقت فينا وسلمتنا اياها
والشقة اللي مافيها ادارة زينة صدقوني لو قصر وخرو عنها لان مشاكلها بتكون وايد واول المتضررين اللي شاريها استثمار يعني المستأجر بينحاش من يشوف سوء خدمات
اللي مقبل على الشراء باختصار
احرص على الحصول على صورة من العقد
تعرف على رئيس الاتحاد والاعضاء واسمع منهم
فر عالمجمع او العمارة وشوف نضافته وخدماته يبين على طول اذا مهمل او لا
واذا الادارة مبدئها خذ وحط بجيبك اترك الشقة ولاتشتريها لو شنو ماكانت
