فلوس يتيمه انباقت

[aljod]

السلام عليكم عندي قضيتين ومشكورين مقدما على جهودكم

الاولى :
في بنت يتيمه وحده حطلتها باسمها 50 الف وكانت اللي مربيتها هي الوصيه عليها قبل لاتبلغ البنت 21 سنه قامت هالمره وحولت الفلوس باسمها وقالت لها ماعندي شي لك ... شتسوي بهالحاله علما ان سألت محامي وقالها اهي خذت الفلوس بشكل قانوني لانها كانت وصيه عليها .

الثانية :

نفس البنت كانت بتفتح مشروع مطعم وتبي تأجر رخصه المهم هذا اللي بتأجر منه رخصه قالها ان يحتاج 7 الف عشان يحطهم بالبنك وبستخرج الشهادة عطته الفلوس اللي حيلتها اللي كانت مخليتهم للمشروع وكتبت بينهم ورقة ووقع عليها بالدين لكن الريال نحاش المشكلة انه طلع بدون وعليه قضايا نصب وايد ... شتسوي

شكرا

 

[نوخذه]

الله يفك عوزها إن شاء الله

 

[fayoona74]

1. اول شي لازم نعرف الوصية اللي مربيتها على اي اساس وصية عليها هل في حكم من محكمة ولا شنو بالضبط وفي سؤال ثاني المتبرعة اللي حطت المبلغ هل كان لها شرط عدم التصرف فيه الا ببلوغ الصغيرة سن الرشد؟؟؟
تنص المادة 110 مدني (ولاية مال الصغير لأبيه ، ثم للوصي المختار من الاب ، ثم للجد لأب ، ثم للوصي الذي تعينه المحكمة ، وذلك مع مراعاة ما تقضي به المادة 112.
- ولا يجوز للأب او الجد ان يتنحى عن الولاية بغير عذر مقبول. )
مادة 113 ( لا يعتبر اختيار الاب وصيا لصغيره ، الا اذا جاء في ورقة رسمية ، او في ورقة مصدق فيها على توقيع الاب ، او في ورقة مكتوبة بخط الاب وممهورة بامضائه.
- وللأب في أي وقت ان يعدل عن اختياره وصيا لصغيره. ويعتد بعدوله ، ولو لم يأت في الشكل الذي رسمه القانون لحصول اختياره.
- ويعرض الوصي الذي اختاره الاب لصغيره على المحكمة لتثبيته. )

2. مشكلة البنت اللي نصب عليها البدون مو مشكلة استصدار حكم بالمبلغ لان هذا امره سهل امر اداء بالمبلغ وينحكم فيه لكن المشكلة بالتنفيذ عليه خاصة اذا كان مايملك رصيد يعني يبيله واحد متفرغ وشاطر بس يتبع امواله هذا اذا كان عنده اموال وماطلعهم برا البلد اتوقع الريال راح تلقينه في السجن قريب وعليه 600 الف قضية ومليون دائن اول خطوة استصدري ضده امر اداء والله كريم بالتنفيذ

 

[fayoona74]

امس بجريدة الوطن د. ابراهيم دسوقي ابو الليل كاتب مقالة حلوة عن سلطات الولي والوصي الشرعي انصحج تطلعين عليها

 

[aljod]

هلا حبيبتي فيونه
الموضوع معقد بقولج اياه من الاول

المره اللي توفت اهي متبينه البنت لكن حاطتها باسم بنتها يعني كأن البنت اهي اللي متبينه وهي كانت وصيه على فلوسها من البنك مافي وصاية مكتوبة عرفتي

 

[fayoona74]

بس ميخالف تحملي اسالتي عشان اجاوبج مضبوط
طريقة التبني من الشئون ولا شلون وشلون حاطتها باسم بنتها مكن توضيح اكثر
والوصاية بهالطريقة تفقد الصفة على المرة اللي تصرفت بفلوس اليتيمة
بس بعرف منو كان المسئول الرسمي عن البنت في متابعة معاملاتها وتسجيلها بالمدرسة وتمثيلها امام الجهات الرسمية

 

[aljod]

حلوو راح اقولج السالفة من طقطق لي سلام وعليكم السالفة طويله
==============
راح نخلي الاسامي رموز كالتالي _ البنت (س1) العجوز (س2) المره (س3)
الله يسلمج

الحين س1 يتيمه تمام ماعندها اهل الله يسلمج ظلت 11 سنه من عمرها بدون اوراق رسمية لان س2 كانت خاشتها وموعارفين ليليحين السبب لما وصلت س1 عمر 11 س2 قالت لازم نطلع لها اوراق رسمية مايصير جذي وكلموا الشؤون وحولوهم تحقيق الى امن الدوله ويمين يسار وفركبوا السالفة وطلعوهم وتبنت س3 .. س1 على اساس طلب س2 انها تتبناها وتحطها باسمها وهي تعطيها فلوس على جذي بعدها بسنه توفت س2 بعد ماطلعت اوراق للبنت وصل كلام لس1 ان اهي بنت س3 لكن يوم كانت حامل فيها كانت تبي تطلق من ريلها وماتبيه فاخفت انها حاملت وولدت البنت في البيت وخلتها بدون رحمة لا ورق ولا شي المهم ماعلينا نرجع لسالفتنا
الحين اهي س3 جدام القانون اهي متبنيه البنت من الشؤون وارواقها من هناك على هالاساس كانت وصيه عليها في البنك طبعا س1 كلمت الشؤون عن البوقه وكلمت مرشدتها ولا حياة لمن تنادي تقولها الله ياخذ بحقج والحين البنت نفسيتها وربي اكس

 

[fayoona74]

اهااا والله حرام طبعا اجابتي ماراح تكون دقيقة 100% لان مو مبين معاي شنو صلاحيات س 3 بمعاملات البنت مثل السحب والايداع ووو.
عموما من اللي كتبتيه مبين ان س3 عندها صلاحية سحب الاموال والتصرف فيها ولا ماكان البنك سمح بالتحويل
وبهالحالة ينتفي الشق الجنائي لان مافي توصيف للجريمة تحت اي بند من بنود قوانين الجزاء

لكن الشق المدني متحقق باثبات ان الاموال اودعت لصالح س1 من قبل س 2 بكافة طرق الاثبات

رايي ان س1 ترفع دعوى مدنية ضد س3 مختصمة وزارة الشئون و البنك (...) لتقديم ماتحت يده من معلومات ومستندات وتطالب بصحيفتها تقديم كشف حساب بنفقات س1 من تاريخ سحب المبلغ 50000حتي تاريخ بلوغها سن الرشد وتوقف الانفاق عنها وموضوعيا بالزام س3 بالمتبقي والتعويض والقاضي راح يحولها لخبير يقدر قيمة الماكل والمشرب وغيرها والمتبقي تطالب فيه س3 ويتم الاستناد الي احكام الولايه علي المال وباختصار تكون البدايه طلب ندب خبير لاحتساب المصاريف الفعلية والزام البنك بتقديم كشف حساب ثم يضاف بعد ذلك طلب موضوعي بالالزام والتعويض
اهم شي نصحي صديقتج بتجميع اوراقها وسرعة رفع قضية لان في تقادم ومواعيد .

وترا عزيزتي السند القانوني ل س3 بالسحب والتحويل والتصرف جدا مهم ويحول مجرى القضية ممكن يدش فيها شق جنائي لو ماكان فيه توكيل او سند بالتصرف او كانت الوديعة مشروطة الحل اللي كتبته فوق على فرض ان س 3 تمتلك توكيل او سند رسمي بالتصرف الكامل وان الوديعة كانت بدون شروط .
القضية غريبة وانسانية وتبين جشع الانسان وبالتوفيق وانشالله نسمع بعد مدة تفاصيل ربح س1 القضية بس ترا نطالبها بكيكة بالمنتدى اذا ربحتها باذن واحد احد

 

[نيويورك]

انا بحاول اجاوب و بصراحه مو أكثر من اللي تفضلت فيه الاستاذه الكريمه fayoona74 باجتهاداتها المتميزه و المفيده جدا ..
بخصوص الشق الأول : ( السؤال الأول ) بخصوص اكل مال اليتيمه
الاختصاص يدخل ضمن دعوى الإقرار .. تقام الدعوى بطلب من س 1 و تتلخص في أنه كان هناك مبلغ من المال محول لها من س 2 المتوفاة مخول بحق التصرف ل س3 و لكن بحسب الاصل كان يجب ان يحفظ و يؤمن ل س 1 حتى تبلغ سن الرشد و استولت عليه المؤتمنه لنفسها .. و بموجب الدعوى يتم طلب حضور المرأه س 3 الى المحكمة و من ثم يطلب منها القاضي أن تؤدي اليمين و هو اشهاد الله سبحانه و تعالى على صدق الواقعة ..فإذا حلفت ترفض الدعوى .. و اذا نكلت يحكم للمدعي و هي س 1 بالحق محل الدعوى ..

بخصوص الشق الثاني : ( السؤال الثاني ) بخصوص مشروع المطعم
يعتمد على اعطاء المبلغ للشخص هل هو مقابل شيك ولا وصل امانه او ورقة عرفيه أو مقابل عقد مدني
اذا كان شيك فترفع عليه قضية شيك بدون رصيد و اذا مقابل وصل امانه او ورقه عرفه فترفع قضية خيانة أمانه استكمالا لما تفضلت فيه الاستاذه fayoona74 ..
بالاضافه الى ذلك واضح من الكلام ان فيه تدليس او نصب و احتيال ...و بعد صدور حكم في هذه الدعوى يتم رفع دعوى مدنيه للمطالبه بالتعويض ..

مادة (231):
يعد نصبًا كل تدليس قصد به فاعله إيقاع شخص في الغلط أو إبقاءه في الغلط الذي كان واقعًا فيه، لحمله على تسليم مال في حيازته وترتب عليه تسليم المال للفاعل أو لغيره، سواء كان التدليس بالقول أو بالكتابة أو بالإشارة.
ويعد تدليسًا استعمال طرق احتيالية من شأنها إيهام الناس بوجود واقعة غير موجودة، أو إخفاء واقعة موجودة، أو تشويه حقيقة الواقعة، وذلك كالإيهام بوجود مشروع كاذب أو تغيير حقيقة هذا المشروع أو إخفاء وجوده، أو إحداث الأمل بحصول ربح وهمي، أو إيجاد سند دين لا حقيقة له أو إخفاء سند دين موجود، أو التصرف في مال لا يملك المتصرف حق التصرف فيه، أو اتخاذ اسم كاذب أو انتحال صفة غير صحيحة.
مادة (232):
يعاقب على النصب بالحبس مدة لا تتجاوز ثلاث سنوات وبغرامة لا تجاوز ثلاثة آلاف روبية أو بإحدى هاتين العقوبتين.



و بطريقه اخرى : الاستيلاء على مبلغ اليتيمه لا احد يعلم الا الله سبحانه اذا كانت المتوفاة وصت بأن يكون المبلغ ل س 1 او س 3 ..فترفع س 1 دعوى اقرار و يحلفها القاضي .. اذا حلفت بالكذب ترفض الدعوى .. و اذا امتنعت عن الحلف يحكم ل س 1 .. يمكن تخاف الله عقب ما تعرف مدى خطورة اكل مال اليتيم .. و ترجع الى صوابها ..

و بخصوص الموضوع الثاني .. اذا بينهم شيك ترفع قضيه اصدار شيك بدون رصيد .. و اذا وصل امانه او محرر عرفي ترفع قضية خيانة امانه .. و فيها بعد نصب و احتيال .. و عقب ما تاخذ حكم بقضية النصب و الاحتيال تطالبه بالتعويض من خلال دعوى مدنيه ..


هذا مجرد اجتهاد يحتمل الصواب و الخطأ .. و الله تعالى أعلم

 

[aljod]

شكرا والله يااخواني على وقتكم ماقصرتوا كفيتوا ووفيتوا

بالنسبة للوديعة كانت بدون شروط ... وبقولها عن الدعوة المدنية مع ان البنت عمرها الحين 26 سنه يعني على مايخصمون كل هذول راحت الفلوس كلها علما ان س3 ماتصرف عليها ولا دينار البنت مطلقة وتاخذ من الشئوون

وبالنسبة لاداء القسم هي بدون شي تحلف وتكفر ان ماخذت شي هالمره قاضي هاذي المره بدون ضمير وممثله لابعد درجة هي وزوجها وربي لو مو اني شايفة الاوراق بعيني ورايحة البنك ومطلعين كشوف الحساب كان ماصدقت س1 من كثر س3 ممثله

عموما ربكم خذا حقها وجازاهم بجزاء شديد خسروا 400 الف دينار وباعوا بيتهم الزين وشرو بيت يديد على ابو انه احسن طلع البيت تجاري وكل شي فيه يتكسر بسرعه ولاهم متوفقين

سبحانك ربي تمهل ولاتهمل

 

[fayoona74]

يعطيك العافية نيويورك بس انا اختلف معاك بالشق الثاني من سؤالك لان من اجابة الجود يبين ان س3 لها صلاحية التصرف وبهالحالة ينتفي الشق الجنائي جرب طبق المادة على الحالة راح تلقاها ماتنطبق كللش هذا على فرض ان س 3 تملك الصلاحية مثل ماقلت لك لان لو العكس يتغير اكيد

 

[خدمة الشعب]

الله يكون بعونها يارب

و بعد أذن الأخوه القانونيين .. وبعيد عن القانون أقول :

هذي اللي أكلت حلال اليتيمه وين تبي تروح من عقوبة الله

لا حول ولا قوة الا بالله​

 

[نيويورك]

يعطيك العافية نيويورك بس انا اختلف معاك بالشق الثاني من سؤالك لان من اجابة الجود يبين ان س3 لها صلاحية التصرف وبهالحالة ينتفي الشق الجنائي جرب طبق المادة على الحالة راح تلقاها ماتنطبق كللش هذا على فرض ان س 3 تملك الصلاحية مثل ماقلت لك لان لو العكس يتغير اكيد

كلامج سليم يا استاذه ..و اتفق معاج 100 % .. و عدلت في شرح الرد و شكرا على التنبيه ..انا قصدت بالشق الثاني من السؤال اللي تتضمن رغبتها في فتح مطعم و سلمت شخص مبلغ 7000 الاف دينار الرد كان عن الجزئيه اللي تتضمن واقعه منفصله عن الموضوع الأول : و كان السؤال :
الثانية :

نفس البنت كانت بتفتح مشروع مطعم وتبي تأجر رخصه المهم هذا اللي بتأجر منه رخصه قالها ان يحتاج 7 الف عشان يحطهم بالبنك وبستخرج الشهادة عطته الفلوس اللي حيلتها اللي كانت مخليتهم للمشروع وكتبت بينهم ورقة ووقع عليها بالدين لكن الريال نحاش المشكلة انه طلع بدون وعليه قضايا نصب وايد ... شتسوي

 

[fayoona74]

كلامج سليم يا استاذه ..و اتفق معاج 100 % .. انا قصدت بالشق الثاني من السؤال اللي تتضمن رغبتها في فتح مطعم و سلمت شخص مبلغ 7000 الاف دينار الرد كان عن الجزئيه اللي تتضمن واقعه منفصله عن الموضوع الأول : و كان السؤال :
الثانية :

نفس البنت كانت بتفتح مشروع مطعم وتبي تأجر رخصه المهم هذا اللي بتأجر منه رخصه قالها ان يحتاج 7 الف عشان يحطهم بالبنك وبستخرج الشهادة عطته الفلوس اللي حيلتها اللي كانت مخليتهم للمشروع وكتبت بينهم ورقة ووقع عليها بالدين لكن الريال نحاش المشكلة انه طلع بدون وعليه قضايا نصب وايد ... شتسوي

اسفة خطأ فني العتب على النظر

 

[نيويورك]

اسفة خطأ فني العتب على النظر

لا بالعكس و كلامج سليم ..شكرا يا استاذه .. و عدلت على الرد للتوضيح ..