تحربتي مع البناء .. البسيطه !!!

[طارق55]

السلام عليكم

اول شئ .. أنا قاعد ابني الحين في منطقه جابر الاحمد .. ولازلت في معمعه البنيان والله يعين ويعين الجميع .. سألني الاخ الفاضل بوحمود1 عن البنيان وتجربتي معاه .. ورديت عليه يأني سأكتب عنها .. ولكني فضلت ان اكتبها بموضوع مستقل لتعم الفائده للجميع .. ونتشارك الاراء

هناك اسأله مهمه جدا لازم يسأل الشخص الي يبي يبني نفسه عنها ويحددها قبل البناء ..

في البدايه .. اول شئ انت تبي تبني بيت من اموالك الخاصه او ارض وقرض من الاسكان ؟؟ فيها فرق .. اشياء كثيره لاتعد ولاتحصي .. ثانيا .. هل انت مقتنع بالمنطقه 100% او عند اول فرصه راح نبيعه وتدخل داخل المنطقه ؟؟ ثانيا كم ميزانيتك ؟؟ كم عدد اولادك ؟؟ متي الوقت المناسب للبناء ؟؟

خلونا اول شئ نتكلم عن الوقت المناسب للبناء .. احسن شئ للبناء انك تبلش شهر 9 او 10 لان هذا الوقت احسن شئ للبناء من ناحيه الجو .. وبعدين الجو بارد تقدر تروح انت يالمالك وتقعد عندهم وتجابلهم .. حتي العامل له خلق يشتفل ولايمشي عليك اي شئ بسبب الحراره .. وبعدين بعد الاسود الي تقريبا يقعد ثلاث شهور او اربعه تخلي البيت يريح له طيله الصيف وتبين عيوبه وترييحته ..
خلاص خلصنا من الوقت المناسب .. نجي الان للسؤال الثاني ..
لو انك تبي تبني بيت عن طريق ارض وقرض .. الفرق بينه وبين اموالك الخاصه .. طبعا ارض وقرض انته محكوم بنظام الدفعات .. والمستحسن ان يكون عندك بيدك قبل البنيان مبلغ كاش من 7 الي 10 الالاف دينار تمشي امورك علشان لاتتأخر علي مايطلع الشيك .. وراح تتعب بدون هالمبلغ ولكن مو مستحيل .. طبعا اذا انت ماعندك يبيلك تنسيق قوي بين مختلف الاطراف الي الكل فيهم يبي حلاله منك .. فتصبر هذا وتواعد هذا .. وأنطر علي علي مايطلع الشيك .. ومن ةهالكلام .. وخاصه اذا اهمه شافوك رجل تفي بوعدك وتعطيهم بعدين .. مو لعاب تضحك عليهم .. وياما شفنا ناس يعتقدون انهم فهلويه يضحكون علي العمال او المقاول او مندوب الخرسانه وكاهو بيتهم واقف وعليهم قضايا صار لها اسنين ..
( الخلاصه .. مبلغ 7 الاف دينار ضروري قبل البنيان .. لكن اذا ماعندك مو مشكله تهون اذا لسانك حلو )
وللموضوع بقيه ..وفيه تشعبات كثيره .. وأسمحولنا الحين .. لانه تأخر الوقت ..

 

[شلون نبني؟]

شكرا لك على نقل تجربتك


و الله يوفقك ان شاء الله


عاد احنا ناوين ان شاء الله نبلش عالصيف ..


الله يعين الجميع

ياليت تكمل الموضوع

 

[ودي اربح]

هلا بالغالي طارق

الله يعطيك العافية فعلا موضوع اكثر من رائع ومفيد ونستفيد من خبرتك ونحن بالانتظار وياريت تذكر كلشي بالتفصيل الممل .

 

[محمدأبوعبدالله]

بصراحة فكرة الطرح حلوه وبعد اذنك لو اساهم بتجربتي

طبعا اهم شي بعد اتخاذ قرار البنيان
المخطط هو شي متعب لازم مراجعته اكثر من مره واعتماده علشان ما تدخل بمتاهات مع المقاول
للأٍسف سقفل الأغلب عن بعض الامور او يتساهلها
يا جماعه السانتي الواحد يفرق فتأكد من المساحات الداخلية البنيان على الورق غير ومختلف عن الواقع
وعلشان لا تندم راجع واستشير
انا حاليا قاعد ابني وطحت بالخطئ والاكيد سبب ليه خسراه
لاني طلبت تغير مثل توسيع ممر داخلي من متر 20سانتي لمتر ونص
بتقولون شدعوه فرق 30 سانتي ماله داعي بقولكم يفرق بالبنيان
المطلوب من الواحد بعد اتخاذ القرار
مراجعة المخطط اكثر من مره والتدقيق عدل قبل لا يعتمده ويدفع رسوم المخطط والترخيص
اي استشارات حاضريني
​

 

[شلون نبني؟]

شكراا عالنصايح ابو عبدالله

البنيان متعب جدا و يبيله تفكير وااايد ..


وين وصلت بالبنيان ؟؟

 

[بوحمود1]

فكرة حلوة انك فتحت موضوع يديد وعشان الكل يستفيد ،،،، ونبى اكثر منك ومن الاخوان اللى قاعدين يبنون ألحين ،،

وأشكرك اخوى طارق على ردك وان شاء الله تتوفّق بالبنيان وكذلك باقى الاخوان ،،

 

[محمدأبوعبدالله]

شكراا عالنصايح ابو عبدالله

البنيان متعب جدا و يبيله تفكير وااايد ..


وين وصلت بالبنيان ؟؟

العفووو أخوي
للأسف البعض تاخذه العزه ولا يستعين بالاستشارات والنصائح
بالنسبة لوين وصلنا
الحمدلله اليوم خلصنا نجارة السقف الثالث وان شاء الله من باجر يبلش الحداد يعني يومين ونصب السقف الاخير

 

[fawaz69]

الله يجزاك خير اخوي طارق55 على هالموضوع والله يجزى خير كل من شارك فيه
واللي عنده خبره بالبنيان لايبخل علينا ومشكورين.

 

[MUSAED77]

مشكور لصاحب الموضوع مفيد جدا

 

[شلون نبني؟]

العفووو أخوي
للأسف البعض تاخذه العزه ولا يستعين بالاستشارات والنصائح
بالنسبة لوين وصلنا
الحمدلله اليوم خلصنا نجارة السقف الثالث وان شاء الله من باجر يبلش الحداد يعني يومين ونصب السقف الاخير

ما خاب من استشار ..

و اغلب اللي يبنون .. يبنون لأول مره ... ما يصير ما يستشيرون و يسـألون


الله يتمم عليكم البيت على خير ان شاء الله

احنا توونا بالبداية

نسوي المخطط ..

و ناوين باذن الله نبني 3 ادوار ..

و الله يسهل

اتمنى تسولف لنا عن كل اللي تتذكره و يخطر ببالك عن البنيان

و الامنية موصوله للاخ طارق ... نبي تجاربكم .. فيدونا واخذو فينا اجر :d

 

[AL_nasser]

انا سبق اني بنيت من قبل حوالي سنه ونصف ومررت بأخطاء تحصل مع كل واحد يبني اول مــره

ممكن اذكر بعض منها بدايتا عند عمل المخطط الهندسي كثيرا من المهندسين المعمارين لا يعرف

حاجتك في التصميم وحاجتك في السكن إلا من خلال اخذ طلباتك من اول زياره للمكتب الهندسي ومن ثم يعمل تصميم

مبدئي ومن ثم تعمل عليه تغير عشرات المرات لاكن نصيحه يا أخـــوان كثيرا من يجهل ولا يلتفت

لابسط الامـــور في التصميم منها الممرات يعني ممر مغاسل الضيوف ان كان نساء او رجال س1,30 متر انا برأي يعتبر قليل ممر

لايقل عن 1,80 او مترين حتي نضع احتمال كبير في الادوار العلويه لما يعمل

مهندس التكيف مخطط مرور ونزول الدكت التكيف ان تختار الاماكن بعنايه

واماكن مناسبه وفي ملاحظه...... وهي الحمامات أجلكم الله الان معضم اهل القسايم لم يحسب حساب البانيو في الحمامات

يكتفي بنزول 3 او 5 سانتي في منسوب الحمام وهي بنظر معضم الناس افضل من البانيو ومشاكل الخرير مع الوقت .....ودمتـــــــم

 

[قلم حر]

انا قاعد ابني وعندي الاسقف (( هوردي )) ومثل ماهو معروف
ان الهوردي يحطون وياه فلين عشان يخفف كمية الصبه
وبعدين نصحني اكثر من شخص اني اتخلص من الفلين
لانه يساعد على الحريق واي التماس كهربائي راح
يكون مشكله كبيره ويمكن تحصل اشياء مكروهه
والله يبعد عنا وعنكم الشر

النصيحه ......

ان الشخص اللي عنده هوردي يخلي شركه
يغلفون له الفلين وهم مسئولين عن تركيبه وازالته
لكن المشكله بالسعر راح يفرق كثير
او انه يركب الفلين العادي وبعد الصبه ماتريح
يتقاطع ويا عمال يشيلونه له

وشكرا​

 

[kaled9977]

السلام عليكم
اخوى طارق عسى الله يباركلك بالبيت وعساه منزل مبارك
وجزاك الله خير على هالمؤضوع اللى بصراحه مفيد للجميع
ويليتك تكمل لنا مثل الصحى شنو البايبات الافضل واسعارهم
وسعر الصحى وسعر الكهربائى ولك الف شكر

 

[طارق55]

السلام عليكم

أسف علي التأخير بسبب مرض الجهاز .. وقاعد أكتب الحين من الاب توب وماأعرف كيف أكتب فيه صعب شوي .. بس ميخالف .. خلوني أرد علي الشباب الي جزاهم الله خير شرفوني بالموضوع ..

-------------
الاخ شلون نبني؟

غلطان ياخوي تبني بالصيف .. غلطان ثم غلطان .. اخوي اول شئ البنيان يبيله مجابل .. ويقولون في الامثال الي ماعنده وقت لايبني !! جابل العمال والمقاول لازم .. ثانيا حتي الخرسانه لازم تنصب في جو بارد نوعا ما مو حار .. وأذا صبيتها بالحراره يبيلك حتي ثلج تحط فيها !!!! أي أدري بتقول شئ غريب .. لكن حسب ماسمعت وعرفت ان الخلطه الايرانيه يحطون فيها ثلج علشان تبرد شوي ( في الخلاط الايراني ) .. لان طال عمرك الخرسانه هي عباره عن تفاعلات كيميائيه .. بين الاسمنت والماء ومضاف عليها صلبوخ ورمل .. وبعدها يصب عليها الماء بصفه دوريه لزياده التفاعل والله يعينك علي استهلاك الماي في الصيف .. نصيحه .. ابني بعد رمضان الجو يكون اشوي احسن

---------------------
الاخ ودي اربح .. حاضرين وكلنا اخوان تنشارك بالتجربه .. حياك الله وارجوا ان يكون ماأكتبه فيه فايده ولو قليله

---------------------

الاخ محمد ابوعبدالله
طبعا ماتقوله صحيح .. ولكن اخي الكريم يختلف الامر من مقاول للاخر .. وهذي نفسيات تختلف من واحد للثاني .. ولكن اغلبهم نعم يستغلون هذه النقطه ..

-----------------------
الاخ ابوحمد 1 حاضرين للطيبين .. وأي سؤال انا حاضر بحسب خبرتي المتواضعه .. وأنت تأمر

----------------------

الاخي الفاضل .. MUSAED77 والاخ الفاضل fawaz69

حاضرين للطيبين .. وأي سؤال أنا حاضر بالي اعرفه .. والي مااعرفه أقول ماأدري .. ومن قال لا فقد افتي .. ماأحب اتفلسف بشي وأنا ماأعرف وأوهق الناس .. ومشكورين ياجماعه ..
----------------------


الاخ AL_nasser

نعم ماتقوله صحيح من ناحيه الاخطاء .. وأنا ايضا حصل معاي اخطاء ولكن بسيطه ولله الحمد المشكله عندما تكون هناك اخطاء قاتله مثل مايقولون ماتترقع .. والله يعين الجميع

---------------------

الاخ قلم حر
شاكر لك نصيحتك .. ولله الحمد عندي هوردي وكنسلته وطلعت عمود .. مصاريف اقل طال عمرك

----------------------

الاخ kaled9977 اخوي بعد أيام أدخل أنا بمعمعه الصحي والكهرباء أنا دخلت عليهم خفيف الي الان ... لكن أنتظر ولاقي خير ان شاء الله ..

------------------

أخواني اي استفسار انا حاضر بالي اعرفه .. الي الان انا في مرحله الاسود .. لكني سأجاوبكم بحسب معلوماتي وشاكر تفاعلكم معاي

 

[طارق55]

السلام عليكم

نكمل معاكم .. نطرح هالسؤال ( هل انت مقتنع بالمنطقه 100% او عند اول فرصه راح نبيعه وتدخل داخل المنطقه ؟؟)

أذا ياولد الحلال مو مقتنع بالمنطقه لاتقط علي بيتك وايد .. سوي بيت يعجب المشتري .. ودائما سوي شقه او اثنتين ( حسب مقدرتك ) علشان الي يبي يشتري اكيد يبيله يأجر البيت لمساعدته في القسط .. وكبر المطبخ .. لان دائما نظره المرأه مهمه في الموضوع لزياده الضغط علي الرجل ليشتري : ) صحيح والله هذي نظريه دلال فاهم .. عموما .. لاتقط علي البيت وايد أذا مو مقتنع بالمنطقه ..

ثانيا كم ميزانيتك ؟؟

هذا السؤال جدا جدا جدا مهم .. ياجماعه .. عندك افلوس سوي علي كيف كيفك بالبيت من ادوار ثلاثه ورخام ومن هالكلام .. ماعندك سوي دورين وبس علي قد افلوسك .. وايد من الناس بالغوا بالاسود .. وعند التشطيب وقفوا .. وروح افتر بالمناطق تلاقي بيوت صار لها خمس سنين والي الان ماأسكنوا .. عموما .. اسأل نفسك أذا توهقت من وين اجيب افلوس ؟؟ في من يسلفني ؟؟ هل يصبر علي ؟؟ وبعدين .. ليش السلف والدين وأنت مو محتاج اصلا .. وليش الناس يتحملونك وأنت تبي مجرد كشخه ؟؟ شنو ذنبهم ؟؟ يااخي سوي دورين وطلع العمدان لين الله يرزقك وتكمل .. وأياكم أياكم أياكم من الربا اخواني .. انصح نفسي وأياكم والله يثبتني قبلكم بعد .. الربا يااخوان مصيبه .. يمحق الله الربا .. ومن تربي علي السحت فالنار اولي به .. ياجماعه الخير والله اننا مو مغصوبين علي هالشئ الخطير ... والحمد دورين والله كافيه علينا .. بس احنا نحب نتشيحط زياده عن اللزوم .. وحتي لو حسبتها حسابيا .. تأخذ عشرين الف من البنك ويسوونها عليك اربعين .. أمتي راح تطلعهم من الاجار ؟؟ يمكن 60 سنه ماراح يطلعهم .. يعني انت خسران خسران في النهايه .. عموما الخلاصه .. غندك افلوس سوي .. ماعندك لاتسوي واللي ماعندوش مايلزموش علي قوله المصريين .. وصبرك علي نفسك ولاصبر الناس عليك ,,,

كم عدد اولادك ؟؟ هذا السؤال لازم تطرحه علي نفسك .. اول شئ .. نقطه مهمه .. البنات لازم يكون لهم مكان مستقل عن الاولاد .. يعني غرفه كبيره او شقه صغيره .. غرفتين بينهم حمام ومسكره عليهم يطلعون يدخلون يستحمون يتسبحون كل هالشئ والاولاد ماشوفونهم .. بعيدا عن نظر الاولاد .. هذي نقطه مهمه لازم تطبقها .. خذ بعين الاعتبار عند البناء .. بعدين .. الكبير سوي له غرفه لحاله .. لكن اذا كانوا اثنين .. خلهم في غرفه مع بعض بس كبر الغرفه اشوي ..

 

[شلون نبني؟]

شكرا عالنصيحة و الله يسهل ان شاء الله

نقاط مهمه ... بخصوص غرف البنات ... و البناء على قد الفلوس ...


طبعا .. اللي ما عندوش ما يلزموش على قولة المصريين


متاااايعين ..

 

[طارق55]

خلونا نتكلم عن خطوه جدا مهمه .. اختيار المقاول ..

شوفوا .. وايد بيوت وقفت بسبب المقاول .. وللاسف مافي طريقه مضمونه 100 % علشان نتحاشي المشاكل مع المقاول .. لان في النهايه هي علاقه بين طرفين .. يمكن تقول كلمه تطلع منك .. توتر العلاقه ويروح المقاول ومايرجع ويوقف بيتك اسنين طويله في المحاكم بسبب كلمه طلعت لحظه سهو .. شوفوا ياجماعه .. اول خطوه ذكيه الشخص لازم يسويها .. هي اختيار المقاول الزين .. طبعا احسن طريقه عن ترشيح مقاول لك من طرف صديق او قريب مجرب هالمقاول وباني عنده ويمدح فيه .. لا وفي طريقه افضل من هذه .. طبعا انتوا تعرفون .. ان الفريج كامل يبني البيوت مع بعضهم البعض .. وتلاقيهم قاعدين في مكان واحد يسولفون ويشربون الشاي ويتبادلون الاحاديث عن البنيان .. وتلاقيهم كلهم يعرفون المقاولين الي في المنطقه .. أهنيه وفي هاللحظه يبين المقاول الممتاز .. تلاقيني انا مثلا قاعد مع مقاولي .. ومجربه .. لكني ارشح لك مقاول فلان جاري لاني اشوفه كل يوم تقريبا واعرف شغله .. الخلاصه .. أسأل عن المقاول الجيد .. وقول للي ينصحك ارجوك اذكرني سلبيات وايجابيات المقاول علشان نضمن ان بيتنا ينبي بأسرع وقت واجود صنعه ..
المقاولين ياأخوان نفسيات واطباع .. والي مروا علي اقولكم .. اكو مقاول زقرتي يقط من جيبه علي البنيان اذا ارتاحلك وهو عارف انك ثقه وراح ترجع افلوسه .. وأكو المحتحت المنتف الي يطر منك الدينار والدينارين .. قد يكون الاخير افضل من الاول في الفهاميه والضمير لكنه محتحت ومنتف .. أكو منهم الي زابن عندك في القسيمه نايم فيها مايتحرك .. ومجابل شغله .. وأكو الي يغيب عنك عشره ايام تدق عليه ولايرد عليك .. وتلاقي عنده خمس بيوت مااخذهم في نفس الوقت .. أذا عصبت عليه شويه جاك واشتغل يوم وغاب عنك اسبوع .. راح تشوف نماذج من المقاولين .. أفضلهم في نظري الي مجابل بيتك .. مايوقف يوم .. عماله من الساعه 6.30 الصبح تلقاهم في قسيمتك .. ولو انه حافي ومنتف .. فاهم شغله .. وينصح .. متجاوب معاك اذا قلت له ارفع او غير او بدل .. وعموما تغير رأيك في البيت اثناء التنفيذ هذا حلم كل مقاول علشان يزيد سعره عليك .. كمثال اتفقت معاه سعر نهائي عشره الاف دينار .. أثناء العمل خطرت لك فكره تسوي غرفه هالمكان .. يقولك اسويها لك بس تدفعلي 500 زياده !!! وأنت عارف ان المواد عليك .. بس هو يستغل الموقف وهذا شئ طبيعي كلهم جذيه .. كلهم بلا استثناء .. وعلشان تتغلب علي هالنقطه .. لازم تدرس خريطتك عدل .. وتكون دارسها دراسه 100% .. لاوتشرط عليه بعد قبل العقد .. أذا ابي ازيد طوفه او اهدم طوفه اشلون ؟؟ خليه يوافق علي هالشئ .. أنا اتفقت مع مقاولي ان اهدم ثلاث جدران .. عادي ومافي شئ وأكثر من هالعدد يحاسبني .. المهم كل المقاولين فاهمين الشغل بشكل ممتاز .. لكن من الي يعطي من نفسه .. اغلبهم شعارهم اكسب كثيرا واعمل قليلا الا من رحم ربي .. انت خلك فاهم وحاسبه علي شئ .. قوله سوي اهنيه كذا ولاتسوي اهنيه كذا .. اقربها مساحه الشبابيك .. ارتفاع السور .. أرتفاع الغرف او البيت ككل .. ومن هالكلام ..

اول شئ نسيت اقولكم عن خطوه سابقه .. مهمه جدا هي الخريطه .. راح اكتب عنها بالتفصيل الممل .. ان شاء الله ..

 

[ابوفيصل_]

بارك الله في

وجعلها في موازين حسناتك

سجلني من المتابعين

 

[طارق55]

السلام عليكم

هلا اخوي ابوفيصل بارك الله فيك ويشرفني متابعتك ولايهونون الشباب البقيه ..

الخريـــطه .. وماأدراك مالخريطه .. اخواني اتقان الخريطه ودراستها ممكن توفر عليك الالاف الدنانير .. اشلون ؟؟ اول شئ .. مثل ماقلت لكم .. بعدين في التنفيذ لو تطرأ لك فكره معينه يقعد يتشرط المقاول بالسعر .. والاكيد راح توافق لانه انت ماتبي الشغل يوقف .. وتشوف اشكره الاستغلال والابتزاز بكل اصوله وغصبا عليك توافق .. لو تكلمه بالعقل والمنطق .. راح ( يتنح ) معاك .. والله مابتوفي معاي .. والله الشغله مكلفه .. ومن هالكلام وانت عارف ان تكلفه يوميه عمال اثنين او ثلاث وماتزيد مصاريفه عن 100 دينار بالكثير ويطلب منك 500 كمثال !!! وعلشان تتخلص من هالابتزاز لازم تسوي الخريطه عدل .. مثل ماقلنا في الاول .. شوف افلوسك .. وقدرها .. افلوسي بأسعار هالايام كم تسويلي ؟؟ كمثال عندي 7 الالاف دينار .. زائد ال70 مالت الحكومه .. أسأل اسعار البناء هالايام .. راح يقولون لك تسويلك دورين ونصف بدون مبالغه بالتشطيبات .. حلو .. سوي دورين ونصف ولاتزيد .. أدري والله انها مهمه شاقه لان الكل يبي ينصحك .. يبيون يقولون لك .. عندك حديد مدعوم وطابوق ابيض مدعوم .. واسمنت مدعوم .. ابني ثلاث ادوار واخلص !! لك خلق بعدين طاخ وطيخ علي رأسك وانت ساكن البيت ؟؟ كيف تبني بعدين وأنت ساكن في نفس البيت ؟؟ كل هالكلام راح تسمعه وأكثر لكن خلك واقعي وأتخذ قرار حكيم .. انا ماعندي ولاراح ابالغ بالبنيان .. خلاص خلصنا .. لان اغلب الي اسمعوا هالكلام وقفت ابيوتهم لان ماعنده افلوس يشطب البيت ويلجأ للحرام والربا .. والسعيد من اتعض بغيره ..

عموما الخريطه وماأدراك مالخريطه ..
اولا قلت لكم تحت سوي لك غرفه مع حمامها .. في المستقبل لما تكبر وتشيب .. تحتاج لها أذا ماتقدر تطلع السلم بعدين .. وأنا عملت للغرفه الي تحت باب بينها وبين غرفه السائق .. بس الباب مسكر والعتب موجود علشان في اي وقت افتحه ( العتب هو خرسانه الي فوق الباب ) وهذي مجرد فكره خطرت لي اثناء البنيان .. لاننا عانينا من الوالد الله يرحمه .. لانه جاه شلل ابعيد عنكم وعانينا من دخول وخروج المرافق له الي داخل البيت .. وهذي دنيا كل شئ يصير فيها .. بتقولون اشدعوه ومن هالكلام .. اقولكم ياجماعه هي كلها عتب بسيط حطيناه لحين الحاجه له وأذا مااحتجناه يفيد مايضر والفكره ببلاش مو بفلوس .. .. ثانيا .. الديوانيه .. فيه ناس يبون الخصوصيه في الديوانيه .. واناس ثانيه ماتحب الديوانيه المسكره وكل واحد حسب احتياجه وقناعاته .. بس اغلب الكويتيين يحتاجون الديوانيه .. المهم حط فيها تكرمون حمام وحط فيه دوش بعد لاسمح الله يجيك اخوك او احد أقربائك يسكن عندك يومين .. يلاقي الديوانيه مجهزه للعيش فيها يومين .. أو .. نفرض ان زوجتك طردتك من الغرفه .. روح عيش فيها يومين علي ماتراضيها : ) اتغشمر وياكم ..
المهم .. تحت كل واحد فيكم يحط الي بيه .. من صالات او غرف او شئ ثاني ..
الدور الاول .. ايضا مثل ماقلت لكم .. البنات لهم شقه لحالهم .. والاولاد غرف لهم علي حسب اعمارهم اذا متقاربه كل اثنين في غرفه واحده .. وحاول ان تتخيل في المستقبل اذا يبي احد من اعيالك يتزوج هل استطيع ان افصل شقه ايضا حقه ؟؟ خاصه للي عندهم ثلاث اولاد او اربعه .. يعني سوي طريقه الغرف تتقبل الفصل بعدين ..وأنشاء ايضا باب لحاله .. غرفتك انت وام العيال .. الماستر .. في اخر عمرك حاول ان تدلع نفسك شوي ... سويلك غرفه كبيره وحمام تكرمون واسع حق جاكوزي بعدين .. او علي الاقل كبير وحلو .. ومابقي بالعمر كثر مامضي .. حاول قدر المستطاع ان تجعل الصاله فوق نوعا ما بعيده عن غرفه نومك .. لك خلق انت نائم واليهال يتهاوشون بره جنب غرفتك .. انا اقول حاولوا .. قدر المستطاع يعني ,,
الي يبي يأجر .. لازم تعمل سلمين .. واحد لك يوصل من الارضي الي الاول فقط .. والثاني الي فيه المصعد يوصل الي السطح .. لازم سلمين للايجار .. او حتي للاولادك بعدين .. يمكن زوجتك ماترهم مع زوجه ولدك .. عطه الشقه الي فوق يطلع ويدخل ولاتشوفه ولايشوفك والله وياه .. وهذي دنيا كل شئ يصير فيها ..
طبعا كل هالنصائح يعنمد عليه موقع البيت .. البطن وظهر غير والزاويه غير .. وهلم جرا ..
الدور الثالث .. اذا عندك مقدره سوي شقتين .. ماعندك سوي شقه واحده .. وحاول ان تضع التكييف علي سطح الشقه الي بنيتها .. وتخلي مكان الشقه الثانيه فاضي علشان تبني عليها اي وقت بدون ازاله الدكت مال التكييف وهذه نقطه مهمه ..
الان .. اقعد أنت وزوجتك .. وارسم في كراسه عاديه .. وأعمل نماذج للبيت وطريقه توزيع الغرف .. سوي مره ومرتين وحتي ال 100 مره .. ولما تخلص .. وتقتنع انت وزوجتك .. روح افتر علي البيوت في المناطق الجديده مثل غرب مشرف .. الجليب .. الدوحه .. وروح افتر عليهم وصور البيت الي يعجبك بالكاميرا .. وحط في بالك كل تكسيه خارجيه او تصميم خارجي يكلف كلفه تختلف عن الثاني .. وكل شئ بسعره .. اذا كنت منتف وماعندك افلوس غير السبعين ركز علي بيون المزاييك .. لانها ارخص شئ .. لاوالله عندك افلوس طالع بيوت الحجر او السيجما لانها اغلي شوي .. المهم لما ترسي علي نموذج معين من الشكل الخارجي اهنيه روح للمهندس وقول له ابي تسويلي قياسات هالخريطه وركب عليها هالواجهات وطريقتها وطريقه الشبابيك .. هو بدوره يرسمها لك بالقياسات وأذا اعجبتك المهندس يوديها حق المهندس الانشائي علشان يسويلها العواميد ونسب الحديد ومن هالشغلات وضروري .. ضروري .. ترفق انت فيها الشكل النهائي علشان لايحط لك العواميد مكان الشبابيك الي انت اخترتها .. وحاول ان تقول له لايحط لك هوردي وايد .. لان الهوردي مكلف ويأخذ حديد واسمنت وايد .. حاول .. وياجماعه بعض العواميد مو بايخه للدرجه هذي .. يمكن يطلع لك هاالعمود في مكان يكون مو مؤثر وايد بل يمكن بالعكس اذا مكانه عادي خليه ولاتشيله .. لبسه زجاج او اي شئ كديكور يطلع شكله حلو .. يقول لي قريب لي يقول قطيت افلوس علي الهوردي علشان الغي عمود .. ولما خلص بيتي شفت ان العمود مو مأثر ذاك التأثير علي الصاله .. فتحسفت اني الغينه .. عموما خذوها قاعده .. عامود فوق عامود .. البيت مرتاح ومريح .. هوردي وجسور وعمدان نايمه .. البيت اقل راحه مهما تقط عليه وهذا غير المخاسير .. أما ان طلع لك العمود في الوسط هذه ام المشاكل والله يعينك علي تكلفه الغائه ..
لازم تقول للمهندس الانشائي ارتفاع البيت الي تبيه .. عموما لك 5 امتار للدور كأرتفاع من البلديه .. فيه ناس تسوي 5 امتار ارتفاع الدور الاول كفخامه .. مافي مشكله ولكن المهندس الانشائي راح يسويلك عرض العمود تحت 25 سانتي وفي هذه الحاله يكون ظهور العامود بشكل بارز في الطوفه لان قطر الطابوقه اقل .. فلازم تحط الطابوقه ( الطابوق الابيض ) بالعرض وهذا مكلف عليك .. خلك بالارتفاع الطبيعي 430 متر وهذا الارتفاع مايحتاج له عمدان 25 سانتي .. يحتاج له 20 سانتي فقط وهذا مو مشكله .. ولازم تكتب الارتفاع هذا في الخريطه وتأكد علي المقاول هالامر من البدايه قبل توقيع العقد علشان لايزيد عليك المبلغ في التنفيذ ( طلب مني مقاولي 300 دينار للارتفاع دور واحد فقط زياده الي 430 سانتي وطلب 1000 دينار زياده عند ارتفاع 5 متر كامله .. وسويت 430 سنتي ) !!!

وللحديث بقيه ,,

 

[busalih]

ما شاء الله، الله يعطيك العافية ، بصراحة وايد ونستنا بشرحك و مفيد و ماقصرت

و اعجبتني فكرة الحمام الواسع (الجاكوزي) ، ممكن بالمستقبل اتحوله مطبخ تحضيري جنبه غرفة خادمة و حمامها اذا تبي تأجر لان العازل يكون موجود

انزين اخوي تقدر تشرحلي من الناحية الفنية اشلون يفرق الهوردي او ليش مكلف؟ شلون ممكن تجمع سقف هوردي مع عادي في الطابق نفسه (اذا فهمتك عدل)؟؟