السلام عليكم
اول شئ .. انت لما تتفق مع المقاول راح يسألك .. الصبه تبيها خرسانه جاهزه او صبه ايرانيه .. لان الايرانيه راح يزيد عليك 1200 تقريبا او 1000 .. لان المقاول راح يجيب لك عمال ايرانيين للصبه هم مع الكرين حق رفع الصبه للادوار كلها .. وراح يتعب المقاول بالصبه الايرانيه وتكون تحت اشرافه .. اما الخرسانه الجاهزه راح تريحه وتخلي مسؤوليته وراح تكون الشركه هي المسؤوله امام المالك عن قوه الصبه .. عموما الاسعار للشركات هي كالاتي :
هذي اسعار اغلب الشركات .. طبعا الاسعار بالمتر .. عموما .. الاسعار غاليه .. وتفرق عن الصبه الايرانيه .. كمثال : الصبه التي كلفتها جاهزه تقريبا 1800 دينار تكلفك بالصبه الايرانيه تقريبا 1100.. وبهذا تكون وفرت انت 700 دينار انت اولي فيهم .. بس لحظه في شروط مهمه لازم توافرها ..
أول شئ جيبلك ايراني نظيف مايغش بنسبه الخلط .. .. ياأنت تجلس علي رأسهم .. او المقاول .. أو حارسك .... ويتأكد من مقادير الصبه .. عموما هي النسبه معروفه .. كيس رمل ( والرمل سعره مغسول 33 دينار ) وكيسين صلبوخ ( سعر السكس ويل 183) وكيس ونصف أسمنت هذا للعمدان .. وتقدر تزيدهم وتخليهم كيسين اسمنت للعمدان وهذا وايد عليهم ومبالغ فيهم انت بعد .. وهذه هي الحبكه .. أذا أنت شفت فيه مكان معلق او تبي تقويه زياده زيد الاسمنت فيه .. وأنت بكيفك تتحكم بقوه الصبه .. اهنيه .. لازم ايضا المقاول شايف شغله .. وفاهم .. ويكون اهوه مشرف علي الصبه بنفسه أو تلقاه ماسك الهزاز .. ومل هذا لان الصبه أهوه يتحمل قوتها ومتانتها .. وهو الي يوجهه الايرانيين بالاوامر وأهم بس ينفذون .. عموما انا صبيت اول شئ خرسانه جاهزه وتحسفت بعدين ..
اول شئ سعر الخرسانه الجاهزه :
صبه النظافه .... 506 د.ك
صبه القواعد .... 1449 د.ك
صبه العمدان 432 د.ك
هذا كله قطيناه في الحفره
صبه قواعد الارضيه .. 966 د.ك
صبه الاعمده 305
صبه الارضيه 977
===========
المجموع 4635
المهم .. هذا كله دفعناه حق الخرسانه الجاهزه .. والبيت الان الظاهر منه الارضيه والعمدان للدور الارضي فقط .. وطبعا لو صبيناها صبه ايرانيه .. لوفره تقريبا 2000 دينار .. تقريبا او اقل شوي .. المهم الان انا .. حولت علي الايرانيه .. والحمد لله .. صبه ممتازه ولايعلي عليها .. وشوفوا ابيوت اهلنا ياجماعه صار لها 40 سنه وممتازه ولو فيك خير طق مسمار فيها أذا مو فولاذ المسمار مايدخل .. قويه وممتازه ولايعلي عليها ..
نرجع مرجوعنا .. أهنيه بعد مماتتفق مع المقاول .. عطه الاوراق اهو يكملهم في البلديه .. ويجيبلك( تسليم الحدود ) .. وهذا بموجبه تقدر تستلم أرضك وتبلش بالبناء .. أهنيه عليك مايلي :
تتفق مع الكهربائي .. وايضا عن طريق ترشيح احد اقاربك له ومجربه .. والصحي ايضا عن طريق الترشيح من قبل اقاربك له او احد اصدقائك .. وتوقع معاهم العقد ..
الان ... أحضر دفتر كبير .. ويستحسن التقويم مال العجيري الي فيه اليوم والتاريخ .. وسجل فيه كل شئ .. كل مصرفاتك اليوميه يوم بيوم .. حتي النصف دينار أكتبها ولاتخليها ..لا وبعد أكتب عطيت الكهربائي 100 دينار في الخيمه وكان معانا فلان وفلان .. أو عطيته جنب تانكي الماي ( كمثال ) ولاتعتمد علي الذاكره لان وراك فواتير الله يعلم عددها ومخك مهو دفتر ..
( أعرف شخص أعطي المقاول 1000 دينار زياده .. يقول والله متأكد 90% أني عطيته اياها من قبل بس الفاتوره ضاعت وعن الحلال والحرام أعطينه ال 1000 دينار !! لانه طبعا العمال والمقاول طبعا ماكو ذمه ولاضمير علي طول أنكر الاستلام .. وبعدين جيب لك كتيب الي يبيعونه بمكتبات الجمعيه .. دفتر استلام الفلوس .. الي فيه الصيغه جاهزه أستلمت انا كذا من كذا مبلغ كذا .. وأي واحد تعطيه افلوس خله يوقع لو هي 20 دينار .. أذا عطاك اهوه فاتوره كان بها ماعطاك انت خله يوقع وأحتفظ في الوصل في البيت مو في القسيمه يمكن واحد يبوق الفواتير ويصير ماعندك دليل علي استلامه الفلوس ولو يشتكي عليك راح تدفعهم مره ثانيه وخلك حريص وذيب ..
حتي الدفتر مال اليوميه الي اقولكم عليه سوي منه نسخه ثانيه في البيت عندك يمكن يضيع او يبوقونه او يحترق في الخيمه مثل ماصار حق واحد معرفه .. او حتي المقاول يعطي 50 دينار للحارس ويقوله روح اسرق الدفتر وجيبه لي .. كأن يأخذك احد العمال علشان يراويك شغله وواحد ثاني يلطش الدفر او الفواتير .. وتعال ادفع لانه ماعندك دليل علي الدفع .. عموما خلك ذيب لانك في غابه ولايضحكون علي شواربك .. وأخذ نصيحه اخ عزيز على قال لي .. طبق هالمثل (( أنت كيكه الكل يبي يأكل منك )) وهو الصادق والله وراح تشوف هالامر بعدين ..
الان ... تقوم تحضر حارس من اي مكان .. وياكثرهم اهم يجيونك في المناطق الجديده .. نقي الزين منهم .. ومعاشاتهم 70 دينار وعليه الاكل والشرب مالك دخل فيه .. وأخذ بطاقته المدنيه وصورها لو ينحاش او شئ .. وأسأل هل كفيله سامح له بالشغل او منحاش منه .. لانه ان كان منحاش من كفيله فيه مشكله عليك .. أسأل عنه ايضا الحراس الي حواليك يطلعوون الصجيه منه .. وأذا منحاش من كفيله اطرده علي طول ..
أشتري خيمه مستعمله من مكان الخيام المستعمله الي جنب سوق الجمعه ب 20 دينار او 25 دينار .. روح الاسواق الشعبيه وأشتري ( جوله ) وصحون وقلاسات وحب ماي ( من سوق الايراني ) وصندوق من سوق الصفافير كبير شوي يحط فيه شغلك او شغله المهم .. ومعاه هو قفل كبير شوي .. أشتري تانكيين ماء تقريبا حجم 1000 مع ماكينه ماي .. واشتري هوز طويل حجم كبير شوي لرش الماي علي القسيمه حين الحاجه ... وجيب له فراش أيضا .. وأعطيه خريطه لبيتك نسخه راح يحتاجها او تحتاجها العمال وايد .. المهم .. كل هذا استعدادا للبناء والمرحله القادمه ..
أهنيه بهالوقت .. ابي صاحب القسيمه يقعد له ثلاث ايام تقريبا في الصبح في الخيمه .. راح يجون له المناديب .. من كل صنف وشكل .. من خرسانه جاهزه ويعطيك بطاقته .. والرمل والصلبوخ .. والاسمنت .. والطابوق .. راج يجون لك العشرات من الناس وكلهم يعطونك بطاقاتهم .. وتشرط عليهم .. ترا ماكوا افلوس كاش .. أبيك تصبر علي .. يمكن اسبوع اسبوعين وكلهم راح يوفقون لاتخاف .. وهذا الكلام للي يقول انا ماأعرف ابني أو ماأدل هالشغلات .. لاتخافون هم راح يجون ليعندكم ... وللحديث بقيه ,,,
ملحوظه مهمه .. مندوب الخرسانه الجاهزه .. راح يقولك والله الشركه ماتسمع بالسلف والدين الا ان اعطيتني وصل امانه أو شيك بأسمك .. وهذا من حقه .. اكتب له لكن اكتب بوصل الامانه الشركه الفلانيه تطالبني بأربعه الالاف مثلا وذلك عن قيمه الخرسانه الجاهزه ضروري لانك هنا انت حددت نوع المطالبه وهي قيمه الخرسانه ولما تدفعها خلاص لايوجد أي نوع من المطالبات الاخري .. .. ولما تسدد المبلغ اخذ الوصل منه ..
أما في حاله الشيك .. أذا كتبت شيك علي نفسك .. اعطيه اياه وأذا عطيته افلوس ولو جزء صغير اكتب في الوصل وهذا المبلغ دفعه عن الشيك رقم ( كذا ) من البنك التجاري ( كمثال ) لان تسديدك لجزء من المبلغ يبطل الشيك ككل .. هذي ملحوظه مهمه جدا ..
