استفسار بخصوص كمبياله

[Taekwondo]

السلام عليكم ورحمة الله وبركاته .. انا صارتلي سالفه طويلة وان شاء الله احاول اختصرها واحصل رد قانوني مناسب: قبل تقريبا 5 سنوات اشتركت مع احدى الشركات اللي يأجرون اسبوع بالسنه في منتجع سياحي نظام التايم شير وخلال اجراءات التسجيل للأسف وقعت على كمبياله ، المهم دفعت المبالغ اللي علي كلها وعطوني الكمبياله الاصليه وقالولي ما عليك شي الحين ، اليوم وصلني بريد على البيت من مكتب محامي يقول ان صاحبة الشركه تطالبني بموجب كمبياله مبلغ 1450 دينار وانا اكبر غلطه اني ما اخذت وصل وقت الدفع للأسف ، ولكن اقسم بالله العظيم انا دافع المبلغ عن طريق الكي نت يعني ان شاء الله بحاول اطلع كشف حساب من البنك يثبت انهم استلموا فلوس الكمبياله ، الشغله الثانيه انا راسلت المنتجع اللي كنت مسجل فيه عن طريق هالشركه وقالولي: ترى اصحاب هالشركه نصابين وكل العقود اللي عندهم مزوره (طبعا من بينهم عقدي) ودزولي بالايميل صور الحكم اللي صادر ضدهم من مصر وطلع الحكم بفسخ العقود المبرمه بين الشركة الاصليه هناك وبين الشركه اللي بالكويت .. هذي كل قصتي يا جماعه واقسم بالله العظيم اني دافع لهم كل فلوسهم بس ماني عارف شنو سالفة هالكمبياله اللي طلعوا فيها ، ان شاء الله احصل عندكم الرد القانوني والاجراء اللي اقدر اسويه والله يوفقكم دنيا واخره ان شاء الله

 

[fayoona74]

ماوقعت به ياعزيزي تدليس ولك انك ترفع دعوى ابطال العقد للغلط الجوهري والتدليس لان ببساطة محل العقد ماتملك الشركة التصرف فيه والمحل من الأركان الأساسية للعقد فعقدك باطل بطلان مطلق يعني منعدم ودلالة ذلك الحكم الصادر ضدها ولك انك تسترد فلوسك كاملة وترجع عليها بتعويض
هذا باختصار بس يريت عشان نكون أكثر دقة تحط لنا الحكم الصادر ضدها باختصار وتاريخ صدور الحكم وتاريخ ابرامك العقد
انظر القانون المدني

184
العقد الباطل لا ينتج أي اثر ، ويجوز لكل ذي مصلحة ان يتمسك ببطلانه ، وللمحكمة ان تقضي به من تلقاء نفسها.

المادة 185

1 - العقد الباطل لا يتصحح بالاجازة.

المادة 186

1 - العقد الباطل لا يتصحح بمرور الزمان.
- الا ان دعوى البطلان تسقط بمرور خمس عشرة سنة من تاريخ العقد.

187
اذا بطل العقد او ابطل ، يعاد المتعاقدان الى الحالة التي كانا عليها عند العقد ، ما لم ينص القانون على خلافه ، ومع عدم الاخلال بما تقضي به المادتان التاليتان.
192

1 - اذا بطل العقد او ابطل ، بسبب خطأ احد المتعاقدين ، كان للمتعاقد الآخر او للغير ان يطالبه بالتعويض عما يرتبه له البطلان من ضرر.
- على انه لا محل للتعويض ، اذا كان من اصابه الضرر نتيجة البطلان قد اسهم فيما ادى الى وقوعه ، او كان يعلم بسببه ، او ينبغي عليه ان يعلم به.

 

[Taekwondo]

السلام عليكم .. مشكوره اختي على تعليقج وان شاء الله أجركم عند رب العالمين على نصرة المظلوم ، بالنسبة لي تاريخ العقد كان 24/3/2004 اعتقد يوم السبت .. وجلسة المحكمه اللي بمصر بين الشركة الاصليه والشركه اللي بالكويت كانت يوم السبت 31/3/2007 والحكم اللي طلع كما وردني: حكمت المحكمه بفسخ عقد البيع المؤرخ بتاريخ 24/12/2003 وألزمت المدعي عليها بإعادة الأعيان موضوع ذلك العقد المبينين بعريضة الدعوى

 

[fayoona74]

يعني معناه ان التصرف كان قبل انعقاد الخصومة هالموضوع يبيله نشوف الحكم ممكن يتغير التكييف القانوني لقضيتك من عقد باطل لطلب فسخ العقد حسب ليش تم الفسخ بعدين في شي هل الحكم نهائي يعني مر بكل القنوات القاضئية من استئناف وتمييز؟

 

[Taekwondo]

ودي احط حكم المحكمه اللي في مصر لكن عباره عن 7 صفحات وكلام وايد ماني عارف شلون لكن الرساله اللي وصلتني من الشركة الام بمصر كان الرد فيها ما يلي:

فإننا نجزم لسيادتكم بأنه لم يصدر من شركتنا أي عقود بيع لأي شخص بدولة الكويت حيث قام المذكورين عالية بتزوير العديد من العقود وتزوير أختام الدولة على هذه العقود ولا يوجد للمذكورين عالية أو من تعاقد معهم بدولة الكويت أو غيرهم أي حقوق على مشروع شرم صن شاين أو على الشركة المتحدة للمشروعات السياحية.

 

[rahaly]

اخوي في قرارات اصدرتها وزارة التجدارة والصناعة بخصوص شركات التايم شير
والصراحة شادين عليهم شدة قوية .... لا تضيع وقتك بالمحاكم .. راجع الوزارة واسأل عن الادراة المختصة .. وان شاء االله تحصل على نتيجة توفر عليك الجهد

واحرص على الحصول على اثبات الدفع بالكي نت

 

[Taekwondo]

عساكم على القوة جميعا .. طيب اخوي رحالي بالنسبه حق الكي نت ان شاء الله بحاول احصل كشف حساب من البنك والله كريم .. لكن الشركة الام في مصر دزت لي ايميل وقالت: جميع العقود الصادره من الكويت مزورة ولا يوجد لي انا او غيري حصص بالمنتج هناك .. شنو اقدر اسوي بخصوص الكمبياله اللي الشركه بالكويت تطالبني فيها؟ وللعلم انا دافع لهم وعطوني الكمبياله الاصليه

 

[fayoona74]

جرب اول شي اخذ الكمبيالة وروح وزارة التجارة مثل راي رحالي اظن حماية المستهلك واعرض عليهم المشكلة وبالنهاية راح تتحول قضية
اذا تحولت تمسك ببطلان العقد لانعدام محله وهم تقدر تتجه للشق الجنائي بالبداية بخصوص عملية الغش والتدليس والتزوير
بس اول اول خطوة قبل كل شي طلع بيان او مستخرج من البنك بما يثبت سدادك للقيمة لهم

 

[Taekwondo]

الله يعطيكم الصحه والعافيه ان شاء الله .. ان شاء الله على باجر الاحد اذا ربي سهل احاول اطلع كشف حساب من البنك علشان يبين مبلغ الكمبياله ، طيب حماية المستهلك وين مكانهم بالضبط؟ ومشكورين ما قصرتوا وراح اقولكم كل التطورات اللي تصير معاي ان شاء الله

 

[rahaly]

الله يعطيكم الصحه والعافيه ان شاء الله .. ان شاء الله على باجر الاحد اذا ربي سهل احاول اطلع كشف حساب من البنك علشان يبين مبلغ الكمبياله ، طيب حماية المستهلك وين مكانهم بالضبط؟ ومشكورين ما قصرتوا وراح اقولكم كل التطورات اللي تصير معاي ان شاء الله

اعتقد حماية المستهلك في جمعية المنصورية بس مو متأكد ان هي شغلتهم .
. عموما ابدأ من هناك والله يسهلها

ولا تحاتي الكمبيالة ... اذا ما خلصت شغلتك في وزارة التجارة ...
اطلب من المحكمة الزامهم بتسليم الكمبيالة

بس هم للاطمئنان روح المحكمة الاستعلام القضائي او ادخل بوابة العدل على النت ودائما تابع ... لا يفاجئونك ويستصدرون ضدك امر اداء ( حكم ) بالكمبيالة ... هالشركات نصابين للاسف


موفق

 

[fayoona74]

رحالي الريال عنده اصل الكمبيالة ماتشوف ان هالشي ممكن يكون لصالحه وفي شي ثاني انا رايي قبل مايستصدرون ضده امر اداء يسبقهم بشكوى بالنيابة ويحتج بالحكم الصادر ضدهم ولا شرايك
وبالنسبة للاخ تايكواندو خبرنا شيصير معاك اول باول وحماية المستهلك انا مرة رحتلهم بالسالمية يم الجمعية بس يمكن يكون لهم اكثر من فرع لو تدق على وزارة التجارة اكيد يفيدونك

 

[Taekwondo]

الله يعطيكم الصحه والعافيه وما قصرتوا معاي صراحه .. اخر الاخبار: كلمت محامي عن طريق واحد من الاهل وثقه وفاهم مثلكم ما شاء الله عليكم صراحه وباجر موعدي معاه وقالي تطمن دام طالع حكم بمصر من الشركة الاصليه صاحبة المنتجع ضد الشركة اللي بالكويت والحكم كان بفسخ العقود بينهم لا تحاتي بإذن الله

 

[Taekwondo]

كلمت المستشار القانوني اللي بمصر وأكدلي سالفة الحكم اللي طالع من شركتهم ضد الشركه اللي بالكويت لأنه الشركه اللي عندنا كانت شاريه حصص من هناك وما سددت اقساطهم فبالتالي رفعوا عليهم قضيه وربحوها وكان الحكم بفسخ العقود اللي بينهم وارجاع الحصص اللي عند الشركه اللي بالكويت حق الشركه الام ودفع مبلغ وقدره وأكدلي بعد ان شركتهم ما اصدرت اي عقود حق اي شخص بالكويت

 

[fayoona74]

عيل دام جذي اظن بحالتك تطالب بفسخ العقد مو ابطاله لان محل العقد كان موجود وشرعي بس بغلط منهم بتقاعسهم عن سداد التزاماتهم فسخت الشركة صاحبة المنتجع العقود معاهم وهالشي ينسحب على العقود المبرمة معكم يفترض تسوي الموضوع معاكم وترجعلكم فلوسكم كاملة وتعويض فوقها

 

[Taekwondo]

يعني انا اللي ابي منهم فلوس مو اهم يبون مني ها والله فوق شينهم قوات عينهم
شكلي عفست المثل فوق تحت .. شكلي بقول حق الشركه اللي بالكويت يبه انا عندي عقد معاكم صح .. اذا قالوا اي اقوله حبيبي هذا التلفون دقلي على مصر خل اكلمهم ومايدري انا اليوم داق دولي مكلم المستشار هناك

 

[rahaly]

اخوي لا تعور راسك ولا تحاتي ...

بس صراحة اخاف مثل هالشركات نصابين ويغدرون ... ياخذون عليك حكم غيابي او امر اداء بدون علمك ... وتفوت مواعيد الطعون ..

افضل شئ ... واسهل شئ ... ويحطك ببر الامان

مدام تعرف محامي.... خليه فقط يوجه لهم انذار رسمي ... بان عقدك مفسوخ للاسباب اللي ذكرتها انت فوق...

((( واهم شئ)))

يحطلك عنوان مختار يخبرهم فيه .... لايه اعلانات او اخطارات ... لانهم يضربون اعلان اي كلام وانت ما تدري ... واذا اخطرهم محاميك رسميا بعنوانك المختار

...................... نام طال عمرك
وحط ببطنك بطيخه صيفي

شفت ؟؟؟

عملية سهلة ... تكلف طابع نص دينار ... واذا المحامي ميانة ... الانذار بلاش او بكم دينار حسب الميانه

بالتوفيق

 

[Taekwondo]

مشكورين يا جماعة الخير والله يكثر من امثالكم ويوفقنا ويوفقكم على فعل الخير ان شاء الله .. اخوي الرحالي ورقة مكتب المحامي اللي اهم مكلفينه وصلتني البيت يوم الأربعاء تاريخ 20 ولكن الخادمه الله يهديها ما عطتني اياها الا الخميس بالليل .. ومكتوب فيها عندك مهله 5 ايام .. هل تنتي المهله الاحد باجر او الاثنين؟ خصوصا موعدي باجر ان شاء الله بالليل مع المحامي اعطيه الاوراق ويفهمني كل شي .. والاثنين باذن الله اروح الصبح اسويله توكيل واكون عنده قبل الساعه 12 الظهر

 

[fayoona74]

دام معطينك مهلة 5 ايام معناه ان ناوين على أمر أداء بسرررررعة طلع مستند من البنك بتحويل المبالغ وحتى لو طلع الأمر عادي تقدر تتظلم منه وتقدم الورقة للقاضي اذا صارت عندك وتقدر تستأنف بعد بس قولنا شيصير معاك

 

[Taekwondo]

شكرا اختي فيونه على التوضيح .. لا بالله باجر بحيل واحد احد ان شاء الله داق على البنك من الصبح

 

[Taekwondo]

كاتبين لي في الخطاب المسجل بإنذار مدين بالوفاء بدين مستحق الأداء اللي واصل من مكتب محاميهم انهم طلبوا مني وديا مرارا وتكرارا بالدين ولكن للأسف انا تقاعست عن سداد قيمة المبلغ المطالب فيه .. انا رقمي اللي بالعقد وعنواني اللي بالكويت نفسه ما تغير ولا مره وصلني شي منهم .. ودي اعرف شلون مرارا وتكرارا ، الله يظهر الحق ان شاء الله وينصركل مظلوم .. وان شاء الله راح ابلغكم بأي جديد معاي