خافوا الله

[Alqorbah]

السلام عليكم ورحمة الله وبركاته
هالموضوع يا جماعه أحب اسميه خاطره كنت ارددها بيني وبين نفسي وانا متأكد ان في ناس ترددها وقالوها بس مو على الملأ ...
اللي أبي اعرفه يا جماعه لما الواحد يعرض عقار ما يستاهل 170 ألف دينار ولا يوصل سعره هالمبلغ ويقول السوم 250 ألف دينار !!! هذا ما يخاف الله ان كذب على الناس و كل اللي يقرأون كذبته ياخذ عليهم ذنب !!!
أنا اقول يا ناس خافوا الله عشان يبارك لكم هذا أول شي
وثاني شي انا واجهت ناس لغو فكرة شراء بيت والسبب هالاعلانات وحطو في بالهم ان فعلا هذي اهي الأسعار الطبيعيه وهالشي مو صحيح و أول ناس يعرفون اهم الناس اللي يطيرون الأسعار فوق السما ويا جماعه ترى السالفه مو إما تصيب ولا تخيب.
واتقوا يوما ترجعون فيه إلى الله ..
ودمتم سالمين

 

[ابــوخــالــد]

يا طويل العمر الناس احرار باسعارها وحلالها

وانت تشوف بعينك قبل لا تشتري يسوى السعر ولا ما يسوى

عندك الماديه اللي تكفي ولا ما عندك

مالك حق تغلط عليه ولا لك حق تدعي عليه

وانا والله العظيم لا مكتب عقاري ولا اى صله فيهم

 

[Bu Yousef]

بو خالد بارك الله فيك أخونا ما سب ولا غلط ولا دعى على أحد بس اللي قاله صحيح وظاهره منتشره للأسف بين دلالين العقار ولا نعمم والمفروض نأيده في أنتقاده لهذه الظاهره السلبية ونحاربها لأن الكذب في البيع حرام ويمحق البركة ... الله المستعان

 

[ابــوخــالــد]

منتشره للأسف بين دلالين العقار

يعني قصده مكاتب العقار

بالحاله هذي انا معاه ماني ضده

والله المستعان

 

[Abdulla990]

اللي يرفع راح يطيح عقاره بجبده
لأن الزبون واحد من اثنين
اما ان يكون تاجر عقارات و يعرف الأسعار
او يكون مواطن عادي ميزانيته على قده و هذا راح يسأل الكويت كلها قبل ما يشتري
و في الحالتين الشريطي ما راح يضر غير نفسه

 

[الأبطح]

اللي معزم يشتري ما عليه من اعلانات المكاتب
يحط اعلانه ويدور ويسأل ورب البيت كريم
بعدين الغلا ما يتحملونه المكاتب فقط
حتى الملاك ..... كل واحد يبي يبيع بيته باعلى حد
وهذا من واقع تجربة
قبل لا اشتري بيتي يعطيني الدلال عنوان البيت اشوفه
يعجبني ويكون الدلال قايلي مثلا 165
لما اكلم صاحب البيت يقول لا مسيوم 165 اذا ما قال 170 بعد
والله ما شفت بيت الا وصاحبه زايد سعره عن سعر المكتب

 

[nokia*nokia]

الله بالخير ياخوان

من واقع تجربتي بالفتره الأخيره وأكيد منكم أخواني الأفاضل شفتوا موضوعين

لي أطلب فيهم أرض أو قسيمه

طبعا خضت صولات و جولات لمدة شهر ونص لين من الله علي بأرض في

أشبيله وكلها اسبوع بإذن الله وخالصين من إجراءات التحويل

اللى شفته بعيني ما هو يأكد كلام الأخ صاحب الموضوع بأنه صحيح 100%

ولكن ليس كل الدلالين أو الملاك بنفس هذا الأسلوب ويوجد منهم من يخاف

الله سبحانه وتعالى

نعم هناك تضارب في الأسعار بشكل غير طبيعي وخصوصا من مكاتب العقار

على سبيل المثال : أرضي اللتي قمت بشراءها كان يوجد بعض الدلالين

يحلفون بالله بأن السعر المحدود هو 185 ألف ومنهم من قال 180 ألف نهائي

ولجأة لشخص من مكاتب العقار وتحكم بيننا صلة جيره وصداقه 20 سنه

وتدخل هذا الشخص بالأرض المطلوبه وللعلم بأنه لاتوجد عنده أي معلومات عن

سعرها الأساسي ولكن بفضل الله وهذا الرجل تم كتابة العقد بـ 178 ألف

مع الدلاله (( السعي )) و نسبة التسجيل العقاري ولله الحمد

لو لم أعرف هذا الشخص وأنا جازم على شراء الأرض لتم الشراء بالسعر

المذكور من مكتب العقار وأخذ مبلغ عن طريق النصب أو بما يسمونه

(( الشطـاره ))

عالعموم أنا لا أشمل كل مكاتب العقار ويوجد منهم الشرفاء بنسبه قليله

ولابد من الشاري أن يفهم مايدور حوله وأن يتأنى ويسأل بالشكل المنطقي

حتى لايضرب الأخماس بالأسداس وتكون عاقبه وخيمه له

والحمدلله على رضاه وعطاه وأتمنى لكم التوفيق بإذن الله تعالى​

 

[المعجم]

أولا أشكر صاحب الأطروحه الطيبة

لكن ردي بالمختصر كل واحد عقله براسه يعرف خلاصه مثل لو واحد طرح بيته أو أرضه دبل سعرها بالنهاية حلالة وكيفه حتى لو يبيعه بلاش ليش لمن الحكومة تبي تثمن الاراضي أو البيوت ما نرضى بالتثمين معنا سعر التثمين عالي ودائما البني أدم يحب المزيد شوفوا مره واحد طالب بأرضه بجنوب السره مبلغ 300 الف ومان مساحتها وموقعها ملوكي بس لما عرف أنا في واحد هامور يبيها حق ولدها تدرون كم طلب فيها 400 الف طقه وحده وهم أخونا الهامور خذها .

 

[عذبي 71]

يا جماعة انا من وجهت نظري البيع والشراء عقد بين اثنين يتم بالايجاب والقبول
البايع يطلب السعر اللي في باله
والمشتري يحق له ان يقبل او يرفض او يفاوض
طبعا الاخ القربا اللي فتح الموضوع
كان يقصد ان صاحب الملك يدعي بالكذب انه عقاره
تم طلبه للشراء بسعر كبير ب 250 الف مثلا
والحقيقة انه تم طلبه ب 170 الف او اقل
وبسبب طمع البائع بالربح يكذب ويخترع اسعار ما تم طلبها منه
وهذي الطريقة خاطئة ولكن دارجة بمعاملات البيع في كافة السلع
بالسيارت بالعقار بالاجهزة .....
ولها تاثير كبير يعني لما ينزل لك البايع من هالسومه الخيالية 20 او 30 الف
الشاري شيصير ابحاله يدودهه ويعتقد انه ضغط عالبايع وكسر اضلوعه
وبالتالي اذا شرى العقار بسعر مثلا 190 الف ما يقول للناس بيتي ب190 لا يقول ب 250 الف عشان يترزز...
هذه المشكله سببها مثل ما تناقشنه مع الاخ ابو فلجة بموضوع بورصة العقار انه لا يوجد سوق رسمي ومنظم يعرض به العقار ويتم تسجيل الصفقات ليتمكن الراغب بالبيع والشراء الاطلاع على الارشيف والتوصل للسعر الحقيقي

***
اما يا اخوان اذا واحد شرى بيت اليوم ب100 الف
وعرضه للبيع بكره بسعر 200 الف وزاد اذا شاف الشاري مقتدر
فهذا لاشيئ فيه المالك حر بما يملك
وله حق يعرض بالسعر اللي يعجبه

ولنا بالتخصيص الاسكاني خير مثال
اذا واحد طلع له بيت اليوم بموقع مميز
قام وعرضه للبدل مع اخذ الفرق
ويطلب فرق خيالي 50 و60 الف
بناءا على شنو ..؟!
بالرغم من انه البيتين سعرهم واحد من قبل الاسكان
لكن القاعده الشهير في هالحاله تقول
انا راضي وهو راضي مالك انته يا قاضي

 

[المعجم]

اوف عذبي ليش وصلتها المحاكم وقاضي يمعود الصلح زين

 

[عذبي 71]

حاولنه نتصالح بس ماكو فايده وماحطو السلاطين الا للشياطين

 

[Alqorbah]

قواكم الله على التفاعل

اشكر الجميع على المرور والتعليق
والله يا جماعه بسبب هالسالفه الناس تهون عن المشترى وتتناقل اسعار بالدواوين مو طبيعيه والمصدر شنو ؟؟ جذبه
ما راح نغير شي .. لأن مثل ما قال أخوي ان في ناس تعتبرها شطاره واحنا نعتبرها جذبه بالعرض يعني غش.
أسمعت لو ناديت حياً ولكن لا حياة لمن تنادي.

والله يبارك لنا ولكم.