ابي مشروع ناجح مايتعدا 5 آلاف دينار

[نوفه]

السلام عليكم ورحمة الله وبركاته

هذي اول مشاركه لي بهالمنتدى واتمنى اني القى الافاده
منكم

رفيجتي عندها مبلغ 5 ألاف دينار وتبي تفتح لها محل

وتبي مشروع ناجح وماشي سوقه

قالوا لها محل تلفونات يطلع ذهب وفي محلات بدون خلو

وقالوا صالون نسائي

وانا اشوف انه المصبغه ربحها ممتاز بس اكيد انه اهم شي الموقع


ياليت ماتبخلون علي بخبرتكم


واتمنى هالموضوع يفيد الكل


اختكم : نوفه

 

[Lover]

وعليكم السلام ..

حياج الله اختي .. اول شي خليها تبتعد عن محل التلفونات لان انا جربته ومافي من وراه فايده ..

وانا من رايي بالصالون النسائي بس احتمال بيكلف اكثر من ال5 لان يشترط الموقع والتجهيزات الكامله والخ..

هذا من وجهة نظري البسيطه .. وبالتوفيق ان شاءالله..

 

[نوفه]

ماقصرت اخوي لوفر

وبالنسبه لمحل التلفونات وين كان محلك

اعتقد على حسب الموقع

والله يوفقك ويرزقك يارب

 

[المهندس الكويتي]

الله يوفقها ان شاء الله

بس انا اشوف ان الصالون او المصبغة بحاجه الي راس مال اعلي من 5 الاف. يا تشوف افكار ثانية يا تدور علي شريكة.


وبالتوفيق​

 

[نوفه]

يعطيك العافيه اخوي المهندس

واتمنى اشوف ردود باقي الاخوان

 

[nokia*nokia]

الله بالخير أختي

إذا تبين نصيحتي شوفيلج ركن بهالمجمعات

وأفتحيه (( عصـايـر + آيس كريم ))

وأخذيلج فره على سوق السالميه إللى فيه ستي سنتر

والشوفي الشغل الصح بعيوونج الله يوفقهم

شي مايكلف لكن يبيله مجابل والنظافه والعماله تكون ممتازه

موفقين بإذن الله

 

[linspire]

الاخت نوفه برأيي ان المبلغ ما يساعد على فتح محل. في البدايه لازم تسوين دراسه جدوى للمشروع ولازم يصير التخطيط على اساس في حال الخساره كيف تستمر الامور. يعني اذا المحل ما يدخل مصاريفه من ناحيه الايجار والمواد ومعاشات العمال هل باستطاعتها الدفع والاستمرار؟
مشروع الصالون او المصبغه طبعا يكلفون اكثر. وانتي اكيد عندج خبره بموضوع كل منطقه ولها ستايل يعني صالونات الديره غير عن المناطق العاشره مثلا. والمصبغه المعدات بس تكلف اكثر من 10 الآف طبعا اتكلم عن اجهزة الدراي كلين.
برأيي افضل شي تستوردين بضائع من الصين وتوزعينها على السوق. والله سبحانه يبارك لج في التجارة وحطي في بالج ( قليل مستمر خير من كثير منقطع )
بالتوفيق

 

[فوق التسعيره]

اول شئ الشغل مو عيب

- يعني ممكن بهذا المبلغ نفتح مشروع بيع نخي وباجله بفرع اي جمعية .
- محل تصليح ( أحذيه وجناط ) وعندي مدير ارشحه وخسران جدا خوش عضوا عنده المام ببيع الصابون والجناط .
- سياره كتنقله كرفان بيع مثل البقالة .

وله شرايكم 5 الاف يمكن تفتح بنك شباب بسكم مجاملات ها ها

 

[meshari80]

عطينياهم انا اشتغلج فيهم


اتغشمر

 

[أبوفلان]

نحل عصير مشروع ناجح بس الاهم الموقع

اما الصالون النسائي ما انصحج كل مكان في وبعدين في وايد محاذير شرعية مثل النمص ووصل الشعر وغيرها

 

[FIBONATCCI]

يا اخوااان كونو واقعيين لا تخلون الاخت تضيع فلوسها من غير ناتج

5 الف دينار حتى خلو محل مايجيبلج ااذا مكان ممتاز
انا انصحج نصيحه وحطيها في بالج عدل ابتدي في مبلغ جدا جدا بسيط يعني ملافع تشترين وتبيعين او من الأشياء النسائيه وجربي حظج والارزاق بأيد الله سبحانه اذا توفقتي فيها كبري المشروع وجيبي مكيات اكثر وان خسرتي تكونين خسرتي مبلغ صغير مو كبير
ومبلغ 5 الف فوق الزمن هذا حتى سياره زينه ماتقدرين تشترين
البداية لازم اتكون بسيطه وفكري الف مره ترى الخمس الف دينار مراح ترجع ان راحت
واسف على الاطاله بالكلام
والله يوفقج

 

[محمد2000]

اقترح تتعلم طبخ الاكلات الكويتية وعمل صواني الحلو بالبيت .
وتشتري سيارة لتوصيل الطلبات .
واعلان بالوسيط او 808080

 

[دار الفردوس]

والله انا ايد الاخ محمد 2000 على اقترح لانها هدا اللى يبى ينجح معاج

او تشتغلين بملافع او الصين شغل نسائى هاليومين ماشى حيل

فوق التسعيرة اهم راى زين

 

[السهم الامريكي]

أحسن مشروع من قديم الأزل وإلي الان ومستقبلا مشروع

جمع جمع جمع جمع جمع جمع جمع جمع

خليهم بالبنك بدل ما يطيرون ويطيرون معاج نفسيتج وأعصابج صدقيني

 

[اقشر]

بعد ما الكل ابدى رايه اسمحوا لي في راي شخصي والتوفيق من الله سبحانه وتعالى

المبلغ ما يساعد على فتح مشروع يدخل دخل جيد وخصوصا عندنا في السوق المحلي تعبان والناس تتخوف وتتردد حتى لو كانت السلعه بدينار,, السوق الصيني وخري عنه ما وراه بركه,, ممكن فتح مشروع دخله زهيد جدا مقابل التعب وعوار القلب اللي راح تحصلينه,, اقل مبلغ ممكن يدخل دخل جيد هو 50000 بدون مبالغه عشان تقدرين توقفين على حيلج وتكونيين قاعده من الزباين,, وفي النهايه التوفير اهو افضل مشروع في هذي الحالة وفيه راحة البال.

 

[TIME1111]

بخصوص اي مشروع اهم شيء فيه انك تكوني حابه وفهمانه لهذا المشروع وطبيعته من جميع النواحي وثاني شيء وهو شيء مهم جدا تقديم افضل خدمة للعميل بمصداقيه وراح تلاقي على المدى الطويل انه في ارباح عاليه.

وبالتوفيق

 

[نوفه]

يعطيكم العافيه على الردود وماقصرتوا

 

[سارونا]

عندي فكره بسيطه

تشتري سياره او باص صغير وتحط سايق شاطر وتوصل موظفات او طالبات المعاهد والجامعات

وتجرب حظها اذا مشت امورها تشتري سياره ثانيه وهكذا

والله يوفقنا ويوفقها

 

[بـــــــراك]

البورصه وضعها ممتاز
وفي سهم جيد وله طلعه حلوه

 

[فنان999]

اقترح تتعلم طبخ الاكلات الكويتية وعمل صواني الحلو بالبيت .
وتشتري سيارة لتوصيل الطلبات .
واعلان بالوسيط او 808080

هذا يحتاج الي خبره