اليوم فتحت حساب تداول وعندي سؤال ..!!

[أبوفلان]

ابشركم اليوم فتحت حساب تداول وبتداول عن طريق بيتك


السؤال : انا متكتتب لأسهم بوبيان أبيهم ينزلون باسمي يعني لما أفتح البرنامج مال بيتك اشوفهم جدامي عشان ماينحاشون خخخخخخخ

شنو اسوي بالضبط ؟

السؤال الثاني : انا مكتتتب باسمي واسم الوالد ودامج الأسهم باسمي اصير اتصرف فيهم ولا لازم موافقته ؟



شكار للي بيردون مقدما

 

[KUWAIT- STOCK]

سلمك الله تاخذ شهادة الاسهم وتروح شركة المثنى للاستثمار فى برج بيتك اللى على ساحة الصفاة الدور 32 و راح يسولك المعاملة و حتى لو عندك اسهم بأسمك تبلى تحولهم حق المحفظة نفس الطريقة

و الله اعلم

 

[أبوفلان]

تسلم طال عمرك

بس هالشهادة من وين اطلعها ؟

 

[NOCOMMENT]

تسلم طال عمرك

بس هالشهادة من وين اطلعها ؟

شهادة الاسهم القديمة اللى وياك اللى استلمتها من البنك بعد ماسكر الاكتتاب

طبعا بوبيان مرتين وزعوا اسهم منحة يعنى اسهمك زادت

فتروح سلمك الله حق برج احمد بجانب المستشفى الاميري وببطاقتك المدنية تطلب شهادة باسهمك ويعطونك
ودوامهم صبح وعصر على مااذكر

 

[أبوفلان]

شهادة الاسهم القديمة اللى وياك اللى استلمتها من البنك بعد ماسكر الاكتتاب

طبعا بوبيان مرتين وزعوا اسهم منحة يعنى اسهمك زادت

فتروح سلمك الله حق برج احمد بجانب المستشفى الاميري وببطاقتك المدنية تطلب شهادة باسهمك ويعطونك
ودوامهم صبح وعصر على مااذكر

الله يعطيك ألف عافية

 

[الصاحب الاول]

اعتقد انها تتأخر اسبوعين لحين وصولها الى رصيدك في نظام التداول عندك

طبعا انا خبري قديم وماادري اذا تطور الشيء عندهم وصار اسرع شوي

بس اذا كلامي صحيح احسن لك بان تبيعهم وتاخذ فلوسهم كاش وتشتري مرة ثانيه عن طريقهم

يعني قالوا وين اذنك قال هذي ( واشار الى اذنه اليسرى بيده اليمنى ) :d

 

[Smart Move]

الله يعطيك خيره و يكفيك شر بورصة الكويت عندي نصيحه أفضلك إذا كنت تنوي البيع روح أي مكتب و ساطه و معاك البطاقه المدنيه و بيعهم عند أي مكتب و تأخذ الشيك خلال يومين وتودع المبلغ في حسابك ألي فاتحه أفضل من أفترة أسبوعين لمن ينزل في حسابك. نصيحه و إذا كانت تبي النصيحه شيل عليه أنحش قبل ما تنصاد بمصيدة التجار الكبار أنا نفس حالتك صارلي فتره طويله و أراقب السوق و الحمدالله مازيلت متردد من التداول في هذا السوق. سوف أبدء التداول بعد ما يحطون النقط علي الحروف.

 

[الصاحب الاول]

سوف أبدء التداول بعد ما يحطون النقط علي الحروف.

الله يرحم والديك

ابي افهم

عفوا والله مابغيت اسال هذا السؤال بس ماادري اعتبرها لقافه يعني

من تقصد بالذي يحط النقط على الحروف وهل تقصد الحكومه ؟

الحكومه ضايعه

شنهي الحروف هذي ولو بمثال يعني ؟

ياخوي بارك الله فيك الناس طارت بارزاقها والشغله شغلة مضاربه بفلس او فلسين واطلع

لاتزعل مني

 

[Smart Move]

أقصد يا أخي قانون الأستقرار المالي ألي نسمع عنه يا خوفي يكون مثل المحفظه الملياريه

وإذا كان الله كاتب الرزق للأنسان يشوفه و كل الأمور يجب أن تكون بحكمة و صبر أن الله مع الصابرين. وسامحني يا أخي الفاضل المضاربه اليوميه ماعتقد أنها راح تربحك كل يوم ممكن تخسرك. سوق الكويت بالاسعار هذي سعر أستثمار للمدي البعيد. من وجهة نظري الشخصيه و الله أعلم. أنا مراقب وليس مستثمر أو مضارب. أنتظر السهم الصحيح للأستثمار فيه و أحط رأسي و أنام و تكون الكميه قويه و أريح بالي و أعصابي و إذا كان لديك أي فكره أي من الأسهم الوحد يأخذها و تكون أستثمار للمدي البعيد ياريت تفيدنا أنا و الأخ الجديد وعسي الله يبارك لك أن شاء الله.