الى كل من يستلم دعم عماله

[general]

السلام عليكم
في الفتره الاخيره مواضيع ومشاركات ومشاهدات قسم اعلانات الوظائف صارت قليله جدا فحبيت اضيف جو لتنشيط القسم وابي منكم المشاركه في الردود
نبي رأيكم في الي يستلم دعم العماله الوطنيه واهو نايم بالبيت من الناحيه
1- الشرعيه .
2-القانونية.
3-الاخلاقيه.
4-العرفيه.

ومو شرط تجاوب على الـ 4 بشكل كامل
ملاحظة هامة : يمنع استخدام ميزه الاقتباس (عدم رد على صاحب تعليق) نهائيا لان الفكره فقط في ابداء تعليقاتكم ومانبي 2 يختلفون بالرأي ويتطور الموضوع الى عدم مبالاه الاشخاص في ابداء رأيهم .

 

[general]

انا بكون أول المعلقين
1- الناحيه الشرعيه (اعتقد المسأله جدا متفرعه وتختلف الفتوى باختلاف السؤال يعني مثال واحد يسأل بطريقه معينه له فتوى معينه والاخر له سؤال بصيغه اخرى هم له فتوى بشكل ثاني ) لذلك حسب قناعتي الشخصيه الموضوع غير قابل للافتاء فيه شرعا ً .

2- من ناحيه القانونيه اعتقد انها عمليه غير قانونيه بشكل قاطع لان في نصوص صريحه تدل على ان عدم مستحقين دعم العماله يهدرون اموال الدوله (على حسب قوانين البلد) .

3- من الناحيه الاخلاقيه اشوف ان الموضوع ماله علاقه بأخلاقيات المهنيه وشرف المهنه .
4- من الناحيه العرفيه (الي الكل قاعد ياخذه عذر ) ان هذا من خير البلد واحنه عيال البلد ونستاهل من خيراتها بدل مايروح حق دول الواق واق . (الرأي السائد وليس رأي) .

 

[بوفهيد]

1- الشرعيه .

اسمحلي يالغالي اني برد على نقطة واحدة و هي الاهم .
الشرعية .. من ناحية الشرعية ممكن تكون سليمة اذا تحقق التالي فيها :
1- استلام راتب من الشركة و لو راتب رمزي .
2- عدم دفع ايه مبالغ مالية للشركة تحت اى مسمي .
3- الغياب عن العمل او التأخير يكون بعلم صاحب العمل و بموافقته .
4- عدم استلام راتب بدون عمل . ( تنوية: كونك تستلم راتب و لو كان رمزي يجب ان يقابل بعمل ولو كان رمزي ككتابة تقرير او بحث او طباعه بعض المستندات ).

تحليل للنقاط اعلاة :

1- استلام راتب من الشركة و لو راتب رمزي .

شرعي : قال رسول الله صلي الله علية و سلم ( اعطو الاجير حقة ) و هنا اي شئ يدرج تحت بند التوظيف يجب ان يكون بمقابل .
مدني : لم تنص قوانين برنامج اعاده هيكلة القوي علي تحديد الراتب للاستفادة من دعم الدولة .

2- عدم دفع ايه مبالغ مالية للشركة تحت اى مسمي .

شرعي : سبب عدم الجواز لانها تعتبر رشوة مقابل العمل و قد جاء في مسند الفقهاء الرشوة اربع انواع منها :

الثالث: أن يقصد الظالم من الظالم أن يوليَه عملاً ليس كفئًا له.

مدني : تعتبر تحايل على القوانين .

3- الغياب عن العمل او التأخير يكون بعلم صاحب العمل و بموافقته .

شرعي : فتوي الشيخ حامد العطار جزاه الله خير

هل يجوز لصاحب العمل السماح لبعض الموظفين بالغياب دون غيرهم ؟
بسم الله الرحمن الرحيم
ان كان هو مالكا للمشروع من ماله الخاص، كان له حرية التصرف و لا يدخل ذلك من باب الظلم بشئ .

مدني : يحق لصاحب الشركة اتخاذ كافة القرارات حسب ما جاء بنص عقد التأسيس .

4- عدم استلام راتب بدون عمل .

شرعي : وهذا ما أفتى به فضيلة الدكتور محمد سليمان المنيعي عضو هيئة التدريس بجامعة أم القرى، وإليك نص فتواه في ذلك :

إذا لم يقم المسلم بالعمل المطلوب منه لم يكن له حق في الراتب، وما سبق أخذه فهو أخذ بغير حق عليه غرمه ووزره، إلا أن يتوب فيتوب الله عليه.

مدني : ارجع الى نص تعريف التوظيف بديوان الخدمة


اتمني اني اكون وفقت بالشرح و النقل

و جزاك الله خير يالجنرال على اثارة الموضوع المهم

 

[general]

الاخ بوفهيد جذي زعلتني منك والسبب شرحك الوافي والكافي ومن بعد تعليقك المميز محد راح يعلق بشيء

 

[ابو محمد2]

اسمحولي ابي اجاوب على قدي انزين الحكومه ما تبي توظفنا شنو نسوي ننهب القطاع الخاص ما يبينا احسن نسرق وننهب ولا دعم العماله والحكومه تدري عنا بس تبينا نعيش على هالراتب الجامد من ناحية الشرع حنا ما نهبنا ولا بقنا ناخذ من خير ديرتنا وةبدون زيادات مو مثل غيرنا يا بوكم حنا كويتين حاسدينا على 300 تجينا من الحكومه لا وفيها منه بعد يا اخي بس غيرنا يستلم بالالاف وهو في بيته اكثر الدوائر الحكوميه وظائف مقنعه ما يدرون شنو طبيعة عملهم بس علشان هم في الحكومه ليه مايتكلمون عليهم حنا فينا حسد مو طبيعي يقولون انت جالس ويجيك 300دينار ومن شر حاسد اذا حسد

 

[بوفهيد]

الاخ بوفهيد جذي زعلتني منك والسبب شرحك الوافي والكافي ومن بعد تعليقك المميز محد راح يعلق بشيء

كل شئ ولا زعلك الحين امسح الرد

اسمحولي ابي اجاوب على قدي انزين الحكومه ما تبي توظفنا شنو نسوي ننهب القطاع الخاص ما يبينا احسن نسرق وننهب ولا دعم العماله والحكومه تدري عنا بس تبينا نعيش على هالراتب الجامد من ناحية الشرع حنا ما نهبنا ولا بقنا ناخذ من خير ديرتنا وةبدون زيادات مو مثل غيرنا يا بوكم حنا كويتين حاسدينا على 300 تجينا من الحكومه لا وفيها منه بعد يا اخي بس غيرنا يستلم بالالاف وهو في بيته اكثر الدوائر الحكوميه وظائف مقنعه ما يدرون شنو طبيعة عملهم بس علشان هم في الحكومه ليه مايتكلمون عليهم حنا فينا حسد مو طبيعي يقولون انت جالس ويجيك 300دينار ومن شر حاسد اذا حسد

اخوي بومحمد محد قالك لا تستفيد من البرنامج بس بالطريقة الشرعية :

1- استلام راتب من الشركة و لو راتب رمزي .
2- عدم دفع ايه مبالغ مالية للشركة تحت اى مسمي .
3- الغياب عن العمل او التأخير يكون بعلم صاحب العمل و بموافقته .
4- عدم استلام راتب بدون عمل . ( تنوية: كونك تستلم راتب و لو كان رمزي يجب ان يقابل بعمل ولو كان رمزي ككتابة تقرير او بحث او طباعه بعض المستندات ).


و السالفة مو صعبة ... و كلامك عدل هذا خير ديرتنا احنا اولي فية من غيرنا .

 

[ابو محمد2]

اسمع يا طويل العمر انا استلم راتب من واحد اجودي راتبي منه200دينار اهم حاجه اني اوزعله التمور من الحساء واخذ الفلوساللي عند الزباين والمكتب مو دايم اداوم فيه وعمره ما طلب مني مقابل هذا حلال ولا حرام

 

[بوفهيد]

اسمع يا طويل العمر انا استلم راتب من واحد اجودي راتبي منه200دينار اهم حاجه اني اوزعله التمور من الحساء واخذ الفلوساللي عند الزباين والمكتب مو دايم اداوم فيه وعمره ما طلب مني مقابل هذا حلال ولا حرام

يابومحمد هذي وظيفة و الله يرزقك و يزيدك و ان شاء الله انها حلال

احنا نتكلم عن الي قاعد بالبيت ما يشتغل نهائياً التوظيف الوهمي

 

[كل شي للبيع]

انا ماابي أتكلم عن الأخلاقيه ولا العرفيه اظن مو موضوع دعم العماله لأنه امر عام في جميع الوظائف
اما القانونيه واهي الغريبه شوي .. طبعا الحكومه تمنع هالشي لاكن استغرب من الحكومه ليش تمنع شي اهي تدري.. في واحد يسأل يقول شلون تدري ؟؟
الحكومه حطت القرار لأسباب ومنها :
عدم قدرتها على توضيف جميع الكويتين في الوظائف الحكوميه فحطت دعم العماله عشان يشجعون العمل في القطاع الخاص طبعا محد راح
اجبرو الشركات انها توظف نسبه معينه والشركات ماتبي كويتين فصارت الحركه المعروفه وهي التوظيف الوهمي
كان دعم العماله 190 دينار جم بيدفع صاحب الشركه راتب حق الكويتي عشان يكون راتبه مقارب حق الراتب الحكومي ؟؟
في أمر ثاني انه أكثر المستفيدين من دعم العماله نساء أو طلبه
منو يتخرج ويفكر انه يتوظف بقطاع خاص والقطاع الخاص مشاكله ماتخلص
والنساء يبون خرده ويبون يجابلون بيوتهم وماكو دخل غير بها الطريقه
والطلبه جم اعانتهم 100 دينار !! حتى حق بانزين السياره حق دوام الجامعه مايكفي . وبعدين في شي .. الديره قوانينها وايد ودائما ابحث عن المستفيد من القانون رايح تلقاه واحد عوود دايم أذكر نكتة انه الكويتي راتبه عباره عن بدل الي اهو بدل طراره
جني طولت
باقي المسأله الشرعيه
طبعا هذا الرد عليه يكون من أصحاب الإخنصاص لأنها مسألة فتوى مو مجال تفلسف
لكن انا بقول انه كثير من أهل العلم حللوها وفي المقابل هناك الكثير من اشترط لها شروط
واختلفت الشروط من قول لآخر ولكن تبقى المسأله خلافيه وقابله للأخذ والرد
وآسف عالإطاله
وشاكر لصاحب الموضع لإثارته مواضيع جميله

 

[بالغلط]

شرعياً .. ما اقدر اجاوبك عليها لأن ( من قال لا أعلم .. فقد أفتى )
قانونياً انا متأكد انها مخالفة قانونيّه
لكن المشكلة تقع في أن الدولة تلزم الشركة بنسبة معيّنه من العماله الكويتيّه
هنا بداية المشكلة , تأتي الشركة مجبرة لتوظف 30 كويتي مثلاً .. في عقد مدّته سنتين او ثلاث سنوات , الى هنا كلام جميل
المشكلة في تأهيل هؤلاء الموظفين .. فهي دورات مكلّفه جداً على الشركة , اذاً ماذا تفعل الشركه ؟

تقول للموظفين , نامو ! والدوله تعطي الشركة على الموظف الكويتي الواحد مثلاً 700 دينار في العقد .. الشركة تقوم تعطي الموظف 450

يعني الموظف نايم ومرتاح والشركة طالعه بـ 200 الى 250 دينار على الموظف الواحد .. ويا دار ما دخلك شر :>

هذي نظرتي للمشكله خصوصاً اني من الموظفين في القطاع الخاص. . بس الموظفين المغضوب عليهم

اللي ماهم راضين يعلمونا .. ولا هم راضين يعتقونا .. نداوم من 7 الى ثلاث العصر .. ماعندنا شغل .. كله نوم ولاب توبات .. والمشكله بصمة ! .. تخيّل ؟