إستشاره قانونيــة فضلاً .. لا امراً

الموضوع في 'قسم الإستشارات القانونيه' بواسطة A . Abo Naser, بتاريخ ‏24 سبتمبر 2009.

  1. A . Abo Naser

    A . Abo Naser عضو جديد

    التسجيل:
    ‏8 يناير 2009
    المشاركات:
    83
    عدد الإعجابات:
    0

    السلام عليكم ورحمة الله وبركاته

    تعاقدت مع شركه وهذا العقد من نسختين كل نسخه مختومه وموقعـه

    السؤال أو الاستشارة : دائماً اسمع عن توثيق العقد

    واسمع كلمة وثقه عند محامي احسن لك شنو المقصود بوثقه وهل قبل التوثيق العقد كان غير رسمي , وبعد التوثيق ياخذ صفته الرسميه مثلاً

    هل التوثيق افضل واذا كان نعم هل يكون للنسختين ولا فقط للنسخه اللتي لدي او انه لايوجد داعي لكل هذا واكتفي بالعقد بدون التوثيق وخلاص !

    شرح بسيط لهذا الموضوع الله لايهينكم وشكرا جزيلا , والفائده للجميع
     
  2. rahaly

    rahaly مستشار قانوني

    التسجيل:
    ‏13 ابريل 2005
    المشاركات:
    7,455
    عدد الإعجابات:
    4
    مكان الإقامة:
    الكويت
    أخي الكريم ..

    ببساطة .. التوثيق لدى كاتب العدل .. هو في حقيقته تصديق على التوقيع (( فقط )) ..
    وفي السابق كانت ادارة التويق تضع عبارة " هذا تصديق على التوقيع دون اية مسئولية عن مضمون العقد " ..

    يعني .. لكي لا ينكر احد المتعاقدين توقيعه مستقبلا ( وبصراحة هو امر قليل الحدوث وبخاصة اذا الشركة لا يتصور ان تنكر توقيع مديرها ) ..

    أما المحامي ..
    فيفترض ان يكون دوره مراقبة قانونية العقد وتقثديم المشورة لايصال الطرفين لافضل صيغة تحفظ حقهما تجاه بعضهما البعض ..
    أضافه الى ان التوقيع امام المحامي يحفظ ايضا الحق في عدم الطعن بعدم التوقيع(مثلا)..

    وبالتالي فانك اذا كنت مطمأن من صحة عقدك .. ومستبعد الطعن في توقيع الطرف الثاني ..
    ما في فرق سواء تم توثيق العقد أم لم يتم ..

    والله اعلم


    موفق
     
  3. الـمـحـامـي

    الـمـحـامـي مستشار قانوني

    التسجيل:
    ‏10 مارس 2009
    المشاركات:
    290
    عدد الإعجابات:
    1
    ان تكون من ثلاث نسخ
    النسخة الثالثة مع المحامي
    ودور المحامي هو حماية حقوق جميع الاطراف .... في وضع البنود القانونية الصحيحة

    ولافي مانع بعد كتابة العقد لدى المحامي ان تأخذ البنود المهمه الذي وضعها لكم المحامي

    وكتابتها في العدل وتصديقها امام كاتب العدل حتى يعتمد التوقيع أمامه

    فكل العقدين ثابتين ولهم الحجية بالاثبات امام القضاء
     
  4. fayoona74

    fayoona74 مستشار قانوني

    التسجيل:
    ‏31 يناير 2009
    المشاركات:
    2,071
    عدد الإعجابات:
    3
    مكان الإقامة:
    الكويت
    دائما الشكل الرسمي يبعث على الطمئنينة لدى اطراف العقد وان كان التوثيق امام كاتب العدل (ادارة التسجيل العقاري والتوثيق بوزارة العدل) وان كان هذا التوثيق تصديق على توقيع الطرفين لاأكثر
    الا أنني كوجهة نظر شخصية أحب الرسمي
    فانصح الاخ بتوثيق عقده لدى وزارة العدل وهم بعد يحتفظون بنسخة عندهم والموضوع مايحتاج الا رسوم طوابع مو أكثر وهم بعد عن تجربة شخصية يراجعون بنود العقد قبل مايوثقونه ويقدمون النصيحة والمشورة بالتعديلات
    يعني مايوثقون اي عقد الا بعد ما يدققون عليه
    يمكن المشكلة اللي راح تواجهها الوقت عندهم يعني ممكن مراجعة البنود عندهم تاخذ فترة
    وهذي وجهة نظر شخصية انا عن نفسي اي عقد احب يكون موثق عند جهة حكومية معتمدة ودائما انصح بهالشي
     
  5. rahaly

    rahaly مستشار قانوني

    التسجيل:
    ‏13 ابريل 2005
    المشاركات:
    7,455
    عدد الإعجابات:
    4
    مكان الإقامة:
    الكويت
    اشوة انج مو نائبه في مجلس الامة .. كانت تشريعاتنا صارت مثل الدول الشيوعية :)

    شنو يعني توثيق العقود !!!

    يا استاذه الناس تتعاقد بعشرات الملايين .. وما توثق
    وما شفنا ان المشكلة صارت بسبب عدم التوثيق ..

    خذي مثال ...
    دفاتر الدلالين باعوا صفقات بعشرات الملايين ..
    محد انكر توقيعه من المتعاقدين ... لكن الاشكالات كانت بسبب عدم لجوئهم للمحامين لبيان حقوقهم لهم ..

    افرضي ان عقد الدلال تم توثيقه ..
    هل سيمنع ذلك من وجود نفس المشكلة التي نشأت دون تصديق من كاتب العدل ؟؟؟

    وهل بعقل ان الناس كل ما تتعاقد مع شركة على مقاولة او صفقة بيع او ايجار او او او ... تروح العدل عشان تصدق عقودها ؟؟!!!!!

    يا استاذه .. خلينا نتكلم بواقعية اكثر ..

    يعني شركات العقارات .. لازم توثق عقودها ..
    وشركات البيع سيارات .. عقارات .. احذية .. لازم توثق عقودها ..

    يعني نحتاج لمئة الف موثق في البلد !!!!
    والا كل عقد ياخذ اسبوعين لتوقيعه


    والسؤال النهائي ..؟؟

    ما تكييف التصديق قانونا .. وما هي قوة حجيته القانونية بالمقارنة للعقد غير المصدق ؟؟
     
  6. fayoona74

    fayoona74 مستشار قانوني

    التسجيل:
    ‏31 يناير 2009
    المشاركات:
    2,071
    عدد الإعجابات:
    3
    مكان الإقامة:
    الكويت
    وانا شقلت فوق رحالي بس وجهة نظري احب الرسمي واكيد مو كل عقد مثلا العقود طويلة الاجل مثل الشركات او العقود اللي مبالغها كبيرة او عقود اتحاد ملاك العمارات السكنية وغيرها من هالانواع انا شخصيا احب تكون موثقة وان كان التوثيق عبارة عن تصديق على صحة توقيع لكن مستقبلا لو يعني لولو صار ماصار ونكر واحد توقيعه اكون اختصرت وقت اثبات
    وياحلو الرسمي حتى اوراق العدل تونس حلوة وفيها طابع تحسسك ان شي له اهمية واقوى حتى جدام اي جهة شكليا
    وثانيا يكون متراجع منهم لو في شي غلط ينبهونك عليه ومايوثقونه الا متأكدين من صحة بنوده يعني شكليا وموضوعيا افضل انك تلجأ لجهة حكومية رسمية مع احترامي لمكاتب المحامين الا انها قطاع خاص فيها مكتب ضعيف وفي مكتب قوي ومحد يضمن خاصة اللي مو عارف بالقانون اما الجهة الحكومية غير تظل تتبع الدولة
    انا جذي رايي رحالي احب الرسمي مع احترامي الكامل التام لوجهة نظرك القانونية ومااختلف معاك فيها
    يعني الطريجين صح لكنني افضل طريج الرسمي احبه مادري ليش يحسسني بالامان ويختصر علي وقت لو انكر الطرف الثاني اي شي بالعقد وحتى لو مليون مانكرو يمكن على حظ واحد ينكر اللي متعاقد معاه وتعال عاد اثبت

    والهدف مصلحة المواطن يعني العدل ارخص واظمن حتى لو مافي اشكالات صارت الواحد يكون حريص افضل ويطمن على بنود عقده من ناس تخصصة تتبع الدولة
     
  7. rahaly

    rahaly مستشار قانوني

    التسجيل:
    ‏13 ابريل 2005
    المشاركات:
    7,455
    عدد الإعجابات:
    4
    مكان الإقامة:
    الكويت


    اسمحيلي فيونة .. كلام غير صحيح نهائياااااااا

    اولا : العدل ما يصححون عقود ولا لهم شغل بفحواها والخطأ اللي فيها ..
    ( الا اذا كان التعاقد على شئ مخالف للنظام العام .. صفقة ممنوعات مثلا)

    ثانيا : هم يصدقون فقط .. وفقط .. على التوقيع .. يعني يقولون هذا الشخص حضر امامنا .. وقام بالتوقيع بشخصه(دون ادنى مسئولية تقع على العدل ودون اية علاقة بمضمون العقد) ..

    ثالثا : كم .. وكم .. عقود موثقة تم ابطالها او فسخها او الغاؤها .. دون النظر للتصديق عليها .. لان التصديق لا يعطيها اية صفه اضافية ..

    رابعا : في العالم كله .. تقتضي سرعة وسهولة التعاملات .. التعاقد بين الاطراف دون الولوج في الرسميات وتضييع الوقت ..بل والعقود الان اصبحت الكترونية لا تحتاج لتوقيع ... ;)

    خامسا : مكاتب المحامين كمكاتب اي اصحاب مهنه ( الطبيب , المهندس .. الخ) .. واللي يختار المحامي الخطا يكون مسئول عن اختياره ..

    ............... لكن
    لاحظي ان المحامي لو أخطأ في صياغة العقد وتسبب بالضرر لاطرافه .. فعليه مسئولية ويلزم بالتعويض .. لكن الموثق .. (وقد يكون خائب وما يفهم شئ .. ومنهم كثيرين ) ... ليس عليه اي مسئولية لان دوره يصدق على التوقيع وخلاص (اما ان اجتهد ونصح الاطراف نصيحه خطأ .. الله وكيلج راح ينكر حتى انه تدخل في العقد) !!!!


    أخيرا :
    غالبا ان من يقوم بالتصديق على التوقيع .. في العقود هو من يخشى من وفاة احد الطرفين او هجرته من البلد (مثلا) .. ويكون العقد من الاهمية بحيث انه لا يراد ان يترك مجال للطعن في توقيع المتوفي ..
    ( مثل مشاركة غير رسمية بين طرف كويتي واخر غير كويتي .. وأكيد المشاركة تكون بمبالغ مهمة )

    أما لو كل عقد بنروح نوثقة ... كنا ما نشوف عقود عرفية .. وكانت شركة الخرافي حاجزة لها موثق خاص لعقودها المليارية .. لاحظي مليارية ولا توثق!! ;)


    والخاتمة :

    مو احنا المحامين الكويتيين اللي ينقصنا العلم والمعرفة والخبرة .. علشان نلجأ الى وافد يكتب لنا عقد ويدقق عليه .. لاننا لا نستطيع التمييز بين العقد الصح والخطأ في مكاتبنا !!!!!!!!!!!!!!!!!
    واذا كان واحد اشتغل محامي عدة سنوات .. ولا يفقه في العقود .. عشان يستعين بوافد (اجزم غالبا انه اقل خبره من المحامي الكويتي نفسه) .. فنصيحتي للكويتي .. " روح افتح مطعم جباتي .. واااايد ابرك لك "



    ويا أختي .. مع كل التقدير
    انا شايف انك دائما تنصحين بالاستعانة بالوافدين (ولا انتقص منهم شيئا) ..
    وتبينين عدم رضاك عن المحامين الكويتيين !!!
    فاذا كنت لا ترين في نفسك كفاءة الوافد .. فهو رأيك الخاص وهو شأنك..
    ولكن .. لا تعممي ذلك على مكاتب المحامين الكويتيين .. الذين اسسوا مبادئ القانون .. وياما غيروا قوانين والغوا قوانين بسبب وقوفهم امام القضاء .. ولا اجد داع لان اسرد لك ما فعله المحامون الكويتيون فالامثلة لا تحصى ... وبالتالي لن يعجزوا عن تحرير عقد اتفاق (مهما بلغ من التعقيد .. والتفصيل ) ..
    وبما انك بعيده عن المحامين ... (فقد) اجد لك العذر في نظرتك ...
    وان كنت قد جربت محام خيب ظنك في المحامين .. فاصابع ايدج مو سوا ;)


    ارجو تقبل الرأي .. فانت من تنتقصين من المحامين الكويتيين .. واضطر انا للدفاع عنهم :)

    بالتوفيق
     
  8. fayoona74

    fayoona74 مستشار قانوني

    التسجيل:
    ‏31 يناير 2009
    المشاركات:
    2,071
    عدد الإعجابات:
    3
    مكان الإقامة:
    الكويت
    رحالي شفيك عندك حساسية من الوافدين ترا مايبت طاريهم كلش وبعدين الواقع يقول ان في المحامي الزين وفي الشين وفي اللي يعرف يكتب عقد وفي اللي مايعرف بعد هذا شي عادي ومعروف بالديرة والانسان العادي بالله شلون بيعرف الشاطر من الفاشل
    مثلا انا لما بروح طبيب شدراني هذا زين لو موزين لاني ماني طبيبة اللي علي أسأل عنه
    عموما عن تجربة شخصية وانتو كيفكم انا كان عندي عقد وراجعوه العدل ماصدقو على التوقيع وبس يعني عندهم ناس تراجع وبدرجة قضاة بعد وافد كويتي مايفرق عندي اذا العقد طالع ممتاز لا وبعد دشيت مناقشات معاهم ومستواهم اوكي طبعا مو الكل بس عندهم مستشارين على مستوى
    ترا مااشتغل بالعدل بعد لتقول تدافعين عنهم :)
    وترا عندي زملاء محامين واااااايد وشايفة في مستويات زينة ومستويات فاشلة وهم ارد واقول بغض النظر وافد لو كويتي ماعندي تمييز عنصري واذا انت تميز الصح من الخطأ في العقد غيرك وايد مايميزون
    وبالنهاية ارد واقول اهي وجهات نظر انا عن نفسي العقود اللي تهمني اوثقها ليش لا شاللي يمنع شحادني ادفع 500 دينار وتكلفة العدل 7 دنانير طوابع وارد اقول مو كل العقود المهم منها بس وباب العدل مفتوح الانسان حر يختار ان يوثق او مايوثق

    وكل النقاط اللي ذكرتها من ان عقد تم الغائه ووو مااختلف معاك فيه اقرا اللي كاتبته عدل انا اقول
    الرسمي للعقود المهمة أنا عن نفسي انصح فيها وبالتفاصيل اللي ذكرتها فوق تمعنو وتمقلو فيها عدل مدل ويظل الخيار للسائل في توثيق عقده من عدمه
     
  9. fayoona74

    fayoona74 مستشار قانوني

    التسجيل:
    ‏31 يناير 2009
    المشاركات:
    2,071
    عدد الإعجابات:
    3
    مكان الإقامة:
    الكويت
    (فكل العقدين ثابتين ولهم الحجية بالاثبات امام القضاء) مقطع من اللي كتبه أ. عوض




    هذا الكلام حلو عجبني وكلنا نتفق عليه :)

    يعني الي ينجرح بايده يحطوله لفاف ابيض بس في واحد ثاني يحب يحطون قبله دوا ازرق مال قبل مع ان النتيجة وحدة بس يحب يطمن اكثر
    جذي التوثيق نفس الشي زيادة حرص وطمأنينة
    عندهم باصات توصل لي البوابة وفي بنك داخل بعد وفي كفتيريا فوق ومكينة طوابع وفي كويتيين وايد عشان رحالي
     
  10. rahaly

    rahaly مستشار قانوني

    التسجيل:
    ‏13 ابريل 2005
    المشاركات:
    7,455
    عدد الإعجابات:
    4
    مكان الإقامة:
    الكويت
    فيونه .. اكيد اني احترم وجهة نظرج ..

    بس صراحة مشاركاتج .. كثير منها تقللين من دور المحامين الكويتيين
    وان ماله داعي التعامل معاهم .. وياخذون فلوس بدون معنى ... و و و !!

    وممكن يكون الكلام مقبول من انسان غير قانوني .. او غير مثقف

    اما انتي قانونية وفاهمة ما شاء الله .. ومثقفه جدا ... مو مفروض تقولين مثل هذا الكلام !!!

    يعني بعض اللي يقنعون بكلامج راح تضيع حقوقهم .. بدون لا يعرف حقيقة الامر

    المحامين ياما وياما .. حفظوا حقوق الناس ............. وياما فعلوا ذلك بدون مقابل(اللي انتي معترضه عليه دائما ) ;)

    تخيلي واحد بيشتري عقار بمليون دينار .. راح لمحامي يباشر له الصفقة كامله بخمسة الاف دينار .. تبين له ان البيع فيه تلاعب .. انقذ له المليون بخمسة الاف فقط !!!
    ولو فرضنا اكتشف ان العملية سليمه وما فيها شئ .. صرت بيعته بمليون وخمسه الاف .. ما فيها شئ ... صح ؟؟

    انا شخصيا ما اسوي شئ في اوربا الا بمشاورة محامي(وتعرفين كم يكلف المحامي في اوربا ) ..

    قيا اختي .. من الثقافة ان نشجع الناس ان يذهبوا للطبيب وليس (المجبر) .. والمهندس وليس (المقاول) والمحاسب وليس (البقال) .......... والمحامي وليس (المصري اللي تعبتي وانتي تمدحينه ) :)

    كلمة اخيره ...... الكويتي انفع
     
  11. fayoona74

    fayoona74 مستشار قانوني

    التسجيل:
    ‏31 يناير 2009
    المشاركات:
    2,071
    عدد الإعجابات:
    3
    مكان الإقامة:
    الكويت
    رحالي عزيزي المحامين زملاء وكلنا خريجين كلية وحدة بس اللي مايختلف عليه اثنين ان في شغلات تسوا واحد يروح حق محامي فيها مثلا قضايا الجنايات ومثل مانت قلت واحد املاكه بالملايين بس في شغلات ماتسوا صراحة كللش حرام مثل اللي بيدفع 1500 عشان اذا صارت قضية من مستأجرينه يباشرها المحامي غير اتعاب كل قضية واللي يدفع عشان صيغة عقد ايجار واللي طالب منه محامي 500 دينار عشان اقرار وتعهد لايبا كويتي لو موكويتي ارجع اقول العبرة باخلاق وشطارة واخلاص الشخص مو بجنسيته
    يعني لازم أذا شفت شي مايسوا انبه اللي يسأل على الطريج اللي يضمن له حقه وبنفس الوقت مايكلفه
    مثلا موضوعنا عقد يراجعونه العدل وبطوابع ماتكلف 7 دنانير وين المشكلة يعني اذا ماراح حق محامي بيضيع لالالالالالا مااتفق معاك بهالجزئية نهائيا في شغلات ماتسوا كللش
    وعموما الاختلاف بالرأي لايفسد بالود قضية والله يعين المحامين على مصاريفهم ما قلنا شي نتمنى ربي يرزقهم كويتي لو غير كويتي انا ماعندي فرق وتراني كويتية بعد لاتشك ان فيني عرج مصري ولا سوري :)
     
  12. rahaly

    rahaly مستشار قانوني

    التسجيل:
    ‏13 ابريل 2005
    المشاركات:
    7,455
    عدد الإعجابات:
    4
    مكان الإقامة:
    الكويت
    عموما قلت اللي عندي ..

    والحمدالله ان مكاتب المحامين مفتوحة من 50 سنة ..
    والموكلين موجودين من 50 سنة ..
    واللي يدفعون موجودين من 50 سنة ..
    والاراحت حقوقهم لانهم استغلوا اللحمة وخانتهم المرقة .... موجودين من 50 سنة .. :)

    والمكاتب بتظل شغالة ماراح تسكر من فيونه وغيرها ..

    وبعدين اذا انتي قانونية وعارفة بالقانون وقاعدة تعلمين الناس حقوقهم ..
    قاعدة تستعينين بناس تكتبلج العقود .. لا .. ووافدين ..
    شلون تنصحين الناس ما يروحون للمحامين .... وهم مو قانونيين !!!!!!!


    والله من اغرب ما سمعت !!!!
     
  13. Administrator

    Administrator عضو جديد

    التسجيل:
    ‏15 سبتمبر 2009
    المشاركات:
    26
    عدد الإعجابات:
    0
    السلام عليكم .....

    حبيت اشارك لان كلام الاستاذه فيووونه شدني للمشاركه ....

    انا مع احترامي للجميع مع كلام الاستاذه فيووونه من ناحية القضايا البسيطه لا يحتاج الواحد انه يوكل محامي ويدفع مبلغ وقدره طبعا من الف دينار وانت صاعد مثلا الاحوال الشخصيه وغيرها من القضايا البسيطه ما يبيلها الا صحيفة دعوى وحافظة مستندات يكتبها مستشار وتاخذها للمحكمه وتوقعها وطابع وتحدد لها جلسه وبس يعني ما تكلف 50 دينار وجلستين وتخلص القضيه مثلا مثلا ...


    كل واحد صارت له قضيه اذا مو شخصيا يكون شخص قريب له وانا شخصيا سألت اكثر من شخص كلهم يقولون ان المحامي ما يحضر الجلسه يحضر مندوب المكتب ويترجا اي محامي موجود علشان يدخل بالصحيفه للقاضي وتخلص القضيه ويصدر حكم والمحامي ما حضر ولا جلسه علما بانه ماخذ حوالي الف دينار واكثر ...

    انا ما اقول كل المحاميين ولكن البعض منهم ...

    اما اذا كانت قضيه جنائيه أو قضيه جنح وتحتاج محامي بالعكس مهما تدفع مو خسارة ...

    هذي وجهة نظر ....
     
  14. الـمـحـامـي

    الـمـحـامـي مستشار قانوني

    التسجيل:
    ‏10 مارس 2009
    المشاركات:
    290
    عدد الإعجابات:
    1
    اسمحلي اخوي اذا هذا رأيك ماقول إلا الله يوفقك
    شي غريب .. الطلاق جلسة او جلستين
    ....... النفقة الفائته جلسه او جلستين
    ....... الطاعه ... جلسه او جلستين

    كل اللي ذكرتهم لك مو أقل من سنه ..... للعلم اي اكثر من 15جلسه





    اخوي اذا حنا نحضر عن بعض فهذا الاتفاق جميع الدول العربيه وليس الكويت
    فلو ماحضرنا عن بعض تصبح قضية الاحوال الشخصية مو ألف راح تصبح عشرة ألاف دينار

    فالعبره ليس بالحضور فقط اخوي بل بالمتابعه الجيده

    وأخيرأ هذا ابو الخمسين راح يحضر لك بعد ... او شنو راح يسوي

    الله الموفق
     
  15. الـمـحـامـي

    الـمـحـامـي مستشار قانوني

    التسجيل:
    ‏10 مارس 2009
    المشاركات:
    290
    عدد الإعجابات:
    1
    انا قلت ولافي مانع ..... للتوضيح

    ولكن نحن اصحاب المكاتب باليوم الواحد نعمل عقد او عقدين
    يعني بالشهر فوق 25 عقد تقريبا اي بالسنه فوق 200 عقد تقريبا
    دون الرجوع لكاتب العدل وأكثرهم تكون مبالغ عاليه .... وبعد فتره البعض منهم يختلفون ويكون هناك شرط جزائي ..ونأتي له بحكم نهائي وتتنتهي المشكله ....
    وبعض العقود عندي والله العظيم تفوق 5 مليون دينار وحق جميع الاطراف مضمونه ...
    ===========

    ( fayoona74 ) رحالي شفيك عندك حساسية من الوافدين

    ماهي حساسية أ.fayoona74 مثل ماتتصورين
    ولكن احنا اصحاب مكاتب نشوف شي انتم ماتشوفونه
    فلو انتي بالمستقبل ان شاء الله وفتحتي مكتب راح تشوفين اللي نشوفه وتعذرين اخوانج الكويتيين بالتحديد اللي انتي مقلله من قدرتهم ...

    ======
    المحامي الوافد يأتي لدينا مندوب في الاول نحن ندربه ونعلمه ونتعب عليه ونصلح أخطائه حتى يجيد الكتابة بعد مرور سنه او سنتين ويكون الوافد معلوماته على خط واحد فقط
    فلو خرج من هذا المكتب وذهب الى مكتب اخر يكتشف صاحب المكتب اخطاء كثيره لان كل محامي كويتي له طريقته واسلوبه بعمله.... وهذا اكبر دليل على حنا اللي علمناهم

    واتمنى يا أستاذه تقعدين مع زملائك المحامين عن قرب في مكاتبهم ... راح تتغير نظرتك .... انا متأكد
    انا قبل ما افتح مكتب كنت شغال في القطاع النفطي وكانت نظرتي مشابهه لنظرتك الان ... الوافد وبس في نظري اما الكويتين مايعرفون شي .. لان الوافد حافظ كلمتين .. اقول والله هذا فاهم .. وتالي بعد ماجلست عن قرب مع اصدقائي المحامين أكتشفت الكثير .... وجدت ان المحامي الكويتي ذكي جدأ وفاهم .... وطيبين بدرجة عالية جدأ
    وعرفت ااكثر بعد مافتحت المكتب وبعد فتره سنتين وثلاث اكتشفت اكثر فاكثر وبعد فتره اطول .عرفنا الكثير عن الوافد...
    فانا والله احترمهم جدأ اذا كانوا في عملهم المشروع ولم يتجاوزو حدود عملهم مثل ادعياء المهنه .. تجده شغال في شيشه بالليل وفي الصباح محامي ينافس المحامين الكويتين الجدد يكتب مذكرات ...
    فبدل مانقف مع اخواننا المحامين الكويتين الجدد نحاربهم ..ونقلل من قدرتهم

    على فكره انا والاستاذ رحالي ((امون اتكلم عنه)) على استعداد ان نجلس مع اي مستشار خبر 15 سنه في المهنه وليس محامي وافد تختارينه وفي اي مكان يختاره المستشار الوافد وراح نطرح ونتناقش في بعض الاستشارات القانونية الكويتيه وبدون فتح كتب وانا واثق رايح تتغير نظرتك ...

    ----------------------------------
    ===============

    واذا كان على الرخص مثل ليش نروح لمحامي كويتي ياخذ 500 اكتبها برا 50 دينار مثلا==============

    خلاص خلونا نطرد جميع الباحثين والمستشارين القانونيين الكويتين بجميع الهيئات الحكومية ونوظف مكانهم وافدين ارخص من الكويتي هذا يأخذ 420والكويتي ياخذ 1500 الى 2500 دينار
    ونطبقها على المحققين والمدرسين والمهندسين في القطاع النفطي
    ونعتبر الوافد هو الافضل من الكويتي .... اعتقد هنا راح تتغير نظرتج أيضأ لو صار صج

    ومثل ماقلتي
    الاختلاف بالرأي لايفسد بالود قضية
    ولاتزعلين اختي من صراحتي
    فانا غيور جدأ على بلدي وهويتي وعلى مهنتي أيضأ من أي مرتزق يحاول العبث بها
    =======================================
    عجبني كلامه

    rahaly
    والحمدالله ان مكاتب المحامين مفتوحة من 50 سنة ..
    والموكلين موجودين من 50 سنة ..
    واللي يدفعون موجودين من 50 سنة ..
    والمكاتب بتظل شغالة ماراح تسكر ..


    الله يزيدهم عدد ويطول في اعمارهم ...أمين
    بيض الله وجهك أستاذي
     
  16. fayoona74

    fayoona74 مستشار قانوني

    التسجيل:
    ‏31 يناير 2009
    المشاركات:
    2,071
    عدد الإعجابات:
    3
    مكان الإقامة:
    الكويت


    من قالك اني استعين بأحد يكتبلي عقد انا اصيغهم بنفسي وانصح الناس تعتمد على نفسها بالامور السهلة اللي مايبيلها شي
     
  17. fayoona74

    fayoona74 مستشار قانوني

    التسجيل:
    ‏31 يناير 2009
    المشاركات:
    2,071
    عدد الإعجابات:
    3
    مكان الإقامة:
    الكويت



    ياجماعة الله يهداكم تراكم قلبتو الموضوع فوق حدر انا لاقللت من شأن المحامين الكويتيين ولا يبت طاري وافدين تكفون اقرو مشاركاتي عدل تراني منكم وفيكم معقول بقلل من شأنكم ترا الانسان مو بجنسيته ولا باصله وفصله خليكم متواضعين ولاتشطون عن الموضوع كل دول العالم فيها مكاتب زينة ومكاتب موزينة وكل دول العالم فيها ناس زينة وناس نصابة هذا شي طبيعي
    لاتقولوني شي ماقلته
    كل اللي اقصده ان الشخص العادي في شغلات مايحتاج فيها محامي وانا صاجة عند ربي
    يعني لازم يروح حق مكتب محامي لكل شاردة وواردة عشان اكون ماأقلل من شأنهم
    شرايكم مرة وحدة تصيرلي عندها كان قضية احوال شخصية نصحتها تباشرها بنفسها وعطيتها الطريج والحمدلله كسبتها وماخذت منها لا سنة ولا سنتين جم شهر بس بعد موتقولون األف هذي واقعة صارت جدامي وغيرها وغيرها
    عموما حصل خير وكلنا اخوان ولاتصيرلاون حساسين واقرو مشاركاتي عدل
    وبعد لاننكر ان اغلب اذا مو بنسبة 99% من مكاتب المحامين فيها وافدين بعد ليش الواحد ينكر
    ياجماعة الغرور مو زين من تواضع لله رفعه الانسان باخلاقه واذا انتو غيورين على بلدكم تراني ماني ياية من الشارع كلنا نحب بلدنا وماني عارفة ليش شط الموضوع على كويتي ووافد مع ان مايبت هالسيرة نهائيا خلوكم واثقين من نفسكم
     
  18. qanon

    qanon عضو جديد

    التسجيل:
    ‏16 ابريل 2009
    المشاركات:
    512
    عدد الإعجابات:
    0
    اول شى صبحكم الله بالخير

    ترى الاختلاف بوجهات النظر ام عادي ولكن الامر الغير عادى ان الاختلاف يوصل لمرحلة التشكيك فهذا امر ما اتصور احد يرضى عليه

    واسمحولى يا اخوانى الكبار اساتذة القانون للدخول بالمناقشة من باب تهدئة موضوع المناقشة

    وانا ما احب اطيل بالموضوع وباختصار شديد ما اتصور ان يوجد مكتب واحد من مكاتب المحامين بالكويت لا يوجد فيه مستشار من اخوننا المستشارين من الدول العربية وهذى حقيقة ما اتصور احد يقدر ينكرها هذا اذا يبى صاحب المكتب ان يصف مكتبه مع المكاتب الرائجة وذات السمعة العالية.

    وانا ما اقلل من مكانة المحامي الكويتي

    واتمنى التوفيق للجميع

    وانا مع تشجيع المواطن والمقيم على الذهاب للمحكمة من غير محامي :))
     
  19. rahaly

    rahaly مستشار قانوني

    التسجيل:
    ‏13 ابريل 2005
    المشاركات:
    7,455
    عدد الإعجابات:
    4
    مكان الإقامة:
    الكويت
    رد مجمل ...

    اولا فيونة ..
    تقولين راجعوا مشاركتي وانج ما قلتي شئ عن المحامين الكويتيين ..
    انا اتكلم عن مجمل مشاركاتج ومن بداية القسم ..
    دائما تقولين " لاتروح حق محامي ليش تخسر ؟؟ الشغله سهلة" !!!

    يا اختي ..
    احنا ليش نرد على جميع الاستفسارات ؟؟

    نرد عليهم مع اغن بعضهم يكون اصلا في المحكمة ...
    لان المهم عندنا نعطي المشورة .. وكل واحد حر يروح محامي ما يروح ..
    واذا راح .. ترا ما راح يروح مكاتبنا .. هناك الفين محام تقريبا .. يروح للاقرب له .. صديق او قريب او معرفه ..

    وشلون تقولين انج تكتبين العقد وما تحتاجين الوافد يكتبة وانتي بنفسج تقولين رحتلهم وصلحولي العقد ودفعت ب 7 د.ك ؟؟
    (يعني انتي اول وحدة محتاجة محامي يساعدج ;) )


    وبالنسبة للقضايا السهلة ... مو كل واحد يقدر يقضي وقته بالمحكمة او بادارات المحاكم (مثلج يعني :) ) ..
    يا استاذه .. 90% من الكويتيين يعرف يغير خلاط المطبخ .. ويغير زيت سيارة .. ويصلح باب ما يسكر ...

    ................. لكن
    كلنا نستعين بالعمالة للقيام بذلك ... من باب الراحة والرفاهية ... ومن باب عط الخباز خبزة :)

    زين .. سؤال

    مدام بعض القضايا الى هذه الدرجة سهلة واغلب القضايا ما تحتاج محام ..
    ليش كل يوم عندنا ياخذون استشارات شنو يسوي ووين يروح و و و و ؟؟؟؟

    بالاخير هو حصل على استشارة محام بالنت .. وطبقها بالواقع ..
    ( شايفه ان الناس مالها غنى عن المحامين ؟ ;) )

    وترانا نخدمهم بعيونا .. ولا لنا منة عليهم .. لكن للايضاح ...

    وارجع واكرر كلام اخونا المحامي .. مع شوية تعديل ..

    اولا ... ما نقول كل الكويتيين فاهمين بعملهم .. وهذا شئ طبيعي ..
    ولكن ... لا نستهين بقدراتهم (من يحب عمله ينجز الكثير)

    ثانيا .... كثير من الوافدين القانونيين (في اي مجال دون استثناء) ... غير متمكن من عمله .. وياما في مستشارين كويتيين فاقوا من هم اقدم واكبر منهم ويشهد لهم بذلك ...

    ثالثا .. انتي ماجربتي الوافدين اللي يشتقلون بالقانون " انا .. وانا .. وانا " .. وهو ما يعرف وين الله حاطة ..

    رابعا .. كلمة قالها مستشار كبير لاحد اخوانا القضاة الشباب الفلته ..
    " يا ابني المصري مش ذكي لكن الخبرة علمتوه (شغال 40 سنة طبعا) .. لكن الكويتي ذكي جدا ... بس لما يحب يشتغل .. رغم قلة خبرته "

    خامسا .. كل يوم المحامين يسولفون عن واحد اشتغل عنده مستشار وبالك بالك .. ويطلع بالاخير ما يفهم شئ ..

    اخيرا ...

    مهما وصل الوافد من مستوى .... لولا مكتب الكويتي الذي اعطاه الفرصة والامكانيات والامكانات .. ما كان ليصل الى شئ

    يا أستاذة نحن لنا ثقة بالنفس ... يسميها البعض غرور .. ;)

    لكن تأكدي ان الكويتي عنده قدرات ينافس فيها ربعج اللي مغتره فيهم :)

    ومثل ما قال استاذ عوض .. عندج احد ينافس ؟؟
    حاضرين بالشوفة :)
     
  20. fayoona74

    fayoona74 مستشار قانوني

    التسجيل:
    ‏31 يناير 2009
    المشاركات:
    2,071
    عدد الإعجابات:
    3
    مكان الإقامة:
    الكويت
    احنا عزيزي مو بمعرض عناد ومنافسة بالعكس زملاء ونتعاون ونتعلم من بعض وانا شخصيا تعلمت وايد من مستشارين مصريين على مستوى عالي جدا وبعدين في محامين وقانونيين مو قد المنافسة يعني ماعنده ماعند يدتي بس حجي

    اخ منك آخ خلك متواضع ولاتصير عنصري