تصدقون اول تجارة لي وما بعت ولا جهاز !

[النــاقــد]

السلام عليكم !

الحمد لله على كل حال

توكلت على الله و دخلت شريك مع احد الاصدقاء و اشتريت تقريبا 20 جهاز كمبيوتر Touch Screen عجيب تقدر تلمس الشاشة عوضا عن تحريك الماوس وشاشته تجنن و خفيف تقريبا 6 كيلو و الاهم سعره بالالكترونيات الغانم قبل لا اشتري الاجهزة كان 650 دينار كويتي !!!!

انا شريت الاجهزة وطلعت تكلفتهم علي 209 دينار و كنت ابي ابيعهم على 270 محد اشترى

250 محد اشترى

220 محد اشترى

والله محبط احس اني امسوي شيء غلط

مادري شنو الغلط بالضبط !

اول فتح باب لي بالتجارة و فقط 20 جهاز وما بعت ولا جهاز !
انا مو كاتب الموضوع علشان اسوي دعاية بالعكس هذا الموضوع (( يطقش)) اي شخص بيشتري مني لكن انا كاتب الموضوع علشان اعرف ليش ما انباعت الاجهزة ؟
خصوصا وانا متاكد من جودتها وعليها كفالة شاملة سنة مع تبديل الجهاز كاملا اذا كان الخطا من المصنع.

يعني الجهاز سعره رخيص

و جودته عالية

ومرغوب لان ناس واجد اتصلوا لكنهم مو جادين

ليش فشلت بتجارتي ؟

 

[Vaio-]

يالغالي هالنوع من الاجهزه يبيله ناس معيينه عكس الي متواجدين اهني


ينفع كغرافكس عالي الجوده خصوصا النشر والتصميم
انا اقول صدقني حطهم بسرعه 250 وخلك الفلوس للحين موجوده وهذا سعره بالسوق اصلا

 

[ace-q8]

ماني تاجر و لا لي خبرة بالتجار لكن التجارة يبيلها صبر
لكن اعتقد انك لازم تسوق حق بضاعتك اكثر و هذا شي مهم وايد

و خل سعرك ثابت لا كل مرة تنزل فية (علشان المصداقية)

الناس لو تييب لهم سيارة قيمتها 20 الف و تقولهم ببيعها 5000 بقراطيسها الناس تشك و محد يشتري

و انت لمن شريت هذه الكمية انت حاطلك وفت معين انك تخلصهم ؟ لان الكمبيوترات دايما في تطور سريع يعني توقع انك تبيع مثلا اول خمسة 270 و اربعه منهم 230 و الاخير 200 مثلا
.. و ليش شريت هذي الكمية ؟ يعني ليش مو اكثر او اقل؟ ليش بالبداية ما جربت انك تاخذ حبة او حبتين بالكثير ؟ علشان تشوف ردة فعل الناس حتى لو يكلفك هلشي اكثر و لا انك تجازف و تخسر .



لكن لا تتحسف انت في كل الاحوال ماخسرت كل شي لكنك تعلمت شي مهم و اكثر . يعني الواحد يتعلم من اخطاءة

والخبرة لا تأتي إلا بعد الوقوع في الأخطاء والإستفادة منها ومن أخطاء الآخرين


و بالتوفيق و الى الامام

 

[أحمد ظاهر]

يعين الله يا بو سالم

 

[Xmedia]

ابوي الرزق على الله مو على المنتدى

صف النيه ياخوك

 

[khaled2q8]

اخوي ممكن رقمك
انا ابي افيدك
وشكرا

 

[بـ1ـدر]

اول غلطة انك شريت كمية انت ماتدري انها راح تمشي ولا لأ، المفروض شاري حبة الى 5 حبات وتسوقها على راحتك، هالـ5 اللي شروا منك راح يدزون عليك غيرهم ..

 

[أبـو راشـد]

غريبه! مو لاقي موضوعك بالمنتدى!!!

 

[بن برغوث]

هذه التجارة ، أنا قبل خسرت ايضاًَ والحمدلله على كل حال ـ والحين تبت من التجارة ولله الحمد هههه

المهم في موضوعك سبب تخوف الناس من الشراء هو شئ يسمى "الهمس "اي السمعة السوقية حسب ما قرأت في كتب التسويق ـ المشكلة أن النوع هذا ما كثر تداول اسمه بين الناس لذلك يتخوفون ـ في الكويت ممكن تقول توشيبا اتش بي إلخ لو اسوأ جهاز توشيبا عندهم أفضل من أي جهاز آخر ماركة غير معروفة ولو كانت مشهورة جداً في الدول الغربية .

لذلك انصحك قبل فوات الأمر ـ اعمل موضوع شامل عن مواصفات الأجهزة واجمع لينكات مواقع اجنبية تتكلم عن الأجهزة ـ وانشره في المنتديات العامة الكويتية ـ تعمل سمعة سوقية ـ لما يتسائل شخص وين اشتري يا انه يبحث في جوجل ويجد موضوع انت كاتبه في موقع عرض سلع مثل الحين او مواقع عادية الموضوع اللي منتشر تضع فيه ايميلك .

 

[أبـو راشـد]

عموما التجارة:

( أحسب حساب الخسارة قبل الربح ) ويجب أن نفترض الأسوء دائما,,

 

[Bu Arab]

أخوي مشكلتك إنك مانوعت يعني كل الأجهزة الموجودة عندك نوع واحد !

 

[ostath]

لي تجربه مشابهه لتجربتك...لكن تعلمت انه الواحد لازم يعرف نوع الزباين اللي بياخذون منه قبل لا يتاجر بأي شي..و لو تتفق مع جم واحد قبل الشراء احسن..و اذا لقيتلك شرايه بالجمله احسن..يعني ممكن تبيع للمحلات جمله

 

[BO NASER]

عسى الله يرزقك بتجارتك

الفترة اللي طافت السوق بشكل عام تعبان

حتى المحلات تشتكي من هالشي

عطلة الصيف ورمضان والعيد والمدارس والاوضاع المالية كانت تعبانة بسبب كثرة المصاريف لدى الجميع

أهم شي التسويق أعرض بالجرائد الاعلانية والمنتديات وشوف جم محل بحولي موقعهم ممتاز أعرض عندهم الاجهزة

وإن شاءالله بتبيع المجموعة كاملة

والبيع والمشترى يبيله طولة بال

موفق خير



​

 

[الحريه وطن]

شنو الاجهزه اللي جبتها ؟
ياليت نعرف شنو نوعها ومواصفاتها او رابط لها؟

 

[albttar]

ممكن تذكر المواصفات كاملة عشان إذا عجبنا الجهاز ممكن ناخذ منك واحد .



.

 

[النــاقــد]

اول شيء مشكورين على الروح الطيبة والتعاطف الاخوي الحلو
والله خففتوا علي حزني لكوني اول مرة ابدا بالتجارة ولله الحمد ما فشلت لكني مو متوفق لغاية الان.

ثانيا اسمحوا لي اعيد كتابة الاعلان عن الاجهزة للاخوان الاعزاء اللي طلبوا مواصفات الاجهزة وهم:

شنو الاجهزه اللي جبتها ؟
ياليت نعرف شنو نوعها ومواصفاتها او رابط لها؟

ممكن تذكر المواصفات كاملة عشان إذا عجبنا الجهاز ممكن ناخذ منك واحد .

.

حاضرين يا اخوان وانا مع شريكي سبق وكتبنا موضوع عن اجهزتنا واليك المواصفات:​

​

بسم الله الرحمن الرحيم

أخوتي أخواتي اعضاء المنتدى الكرام

السلام عليكم ورحمة الله،،،​

أما عن اجهزتنا:[/B][/U]
كمبيوترات بمواصفات قياسية تلبي كافة متطلباتكم بكل يسر وسهولة. وينقلها نقلة نوعية كبيرة جداً ويجعلكم من أوائل من يستخدمون هذه التنقية الذكية.

الجهاز عبارة عن كمبيوتر مدمج بشاشة كرستالية تعمل بخاصية اللمس Touch Screen. وهو ما يطلق عليه جهاز الـ All In One. مما يوفر مساحة كبيرة كانت تشغلها اجهزة الكمبيوتر المكتبية القديمة.

يتميز الجهاز ايضا بأنه يمكن دمجه ضمن الشبكة الداخلية لا سلكيا Wireless، مما يوفر إنشاء شبكة داخلية تعتمد على الاسلاك، ومما يجنب تكالف انشاء شبكات داخلية، وتكاليف صيانتها الدورية وتكاليف الفنيين القائمين عليها.

المواصفات الفنية للكمبيوتر:
- شاشة كرستالية لمس حجم 17 انش.
- كور 2 ديو 2.1 جيجا.
- هارد دسك 250 جيجا.
- كرت الشاشة 256 ميغا.
- 4 منافذ usb
- قارئ كروت الذاكرة.
- كاميرة مدمجة.
- ماوس + كيبورد عربية.

وهذا عرض بالفيديو للجهاز على موقع اليو تيوب:
http://www.youtube.com/watch?v=2hsc0YndoJE

تعتبر هذه الاجهزة الحل الأمثل للمنزل والأفراد .. للمكتب والشركات .. للمدارس والمعاهد .. للبنوك والفنادق لخفتها وسهولة حملها فوزن الجهاز 6و نص كيلو فقط !

واللي حاب يستفسر او عنده اي سؤال يتصل على : 55152466 او 99855708

والله ولي التوفيق،،،

​

 

[؟؟؟؟؟؟]

ما ادري بالنسبة لدراستي .. اول شي لازم تعرف الناس شنو محتاجة .. وشنو تميل له .. يعني شوف هبة الناس بشنو .. بعدها تسوي دراسة جدوى .. بعدها شوف من النوعية من الناس تقدر تشتري هالمنتج .. واعرضة شي بالمعقول .. او اعرضة في محل .. يعني مثل حالتك .. تروح لأحد المحلات وتقول له هذي كمية من الاب توبات انا ابي منهم مثلا 250 دينار صافي.. بيهم واخذ ربحك .. ..
بعدين انت غلطان تشتري اجهزة تش .. لان التش الناس ماتشريهم وايد لانهم بسرعه يخربون .. ويبيلهم احد محافظ .. يعني مفروض تشتري شي عملي ..

واذا بتاجر .. مثلا بتيب بضاعه من برة .. قبل اي شي .. حط مو ضوع اذا شفت الناس تتجاوب معاك .. سوها بالحجز .. يدفع عربون بعد ماتوصل البضاعه بسبوعين يدفع لك الباقي .. هذي افضل شي ..

معوض خير اخيي

 

[kw_29]

اللهم ارزقهم علي قد نياتهم

اخوي انا اتمنالك التوفيق
وبنصحك نصيحه عندك ناس تتوجه لهم تسوق عليهم وتعرض الاجهزه
اذا انت بتفتك سو عرض سعر واربح بنصهم ونصهم لا واعرضهم علي
روح قسم المشتريات بالبنوك والشركات مثل زين والوطنيه والمستشفيات الخاصه لانه مفيد لهم وشركات الدتداول الاكتروني وشركات المقاصه بس اي عياده او مشتشفى اتوقع تعجبه لانها تعطي رقي للعياده وممكن تعرضهم عند مركز سلطان علي البيع او تبيعه كاش علي الغانم وقولهم ممكن اوفر كميه لكم ويمكن تنقلب الخساره لربح وممكن تحطلك فني وتعطي الشركات كفاله لانهم يموتون علي الكفاله وتسوي عقد صيانه سنوي وبالتوفيق ياااارب

 

[saud101]

[[http://www.indexsignal.com/vb/showthread.php?t=204199

نفس الشركة ؟؟؟؟؟؟؟؟؟؟؟؟؟؟؟

 

[النــاقــد]

اكرر شكري للجميع ويعطيكم العافية
الحقيقة افكار حلوة ومقترحات احلى
بحاول اتحرك هاليومين وان شاء الله الامور تتغير
وشكرا

[[http://www.indexsignal.com/vb/showthread.php?t=204199

نفس الشركة ؟؟؟؟؟؟؟؟؟؟؟؟؟؟؟

اي نعم اخوي نفس الشركة ونفس الموضوع شنو المشكلة ؟
هذا شريكي كان كاتب موضوع عن الاجهزة وانا كاتب موضوع مختلف تماما عن تجارتي !
وبس

شاكر لك تواجدك معانا