مواقف حصلت في عالم التجارة 2 -- موضوع مفتوح للمشاركة

الموضوع في 'إستراحة المنتدى' بواسطة abdullah6868, بتاريخ ‏24 نوفمبر 2009.

  1. abdullah6868

    abdullah6868 مشرف قسم الإستراحه مشرف

    التسجيل:
    ‏3 مايو 2008
    المشاركات:
    6,217
    عدد الإعجابات:
    162
    مكان الإقامة:
    kuwait
    اليوم نحكي قصة ثانيه من قصص التجارة اللى حدثت لى شخصيا
    في سنة 2000 وانا راجع من الصين مريت الحبيبه دبي وكان معاى بالطيارة تاجر ايراني لورد يشتري كميات رهيبه من البضايع الصفقه الواحدة لا تقل عن 150 كونتينر 40 قدم لو قلنا الشحن 1000 دينار للكونتينر يعني يشحن بس شحن = 150 الف دينار
    المهم قالى تعال انا عندي ستوكات بما انك من الحبيبه الكويت وفعلا رحنا لمخزنه في منطقة العوير وقالى هذى احذية انا بلشان فيها كلها لون ابيض اطفال 4 قياسات
    السعر 1000 دينار بالكامل
    واصل للكويت 1500 دينار مع الشحن والجمارك
    وشريت واتفقت مع سائق تريلا سعودي من اصل يمني فقير غلبان على نياته الله يذكرة بالخير
    وصلت البضاعه لجمارك الصليبيه وبعد التفتيش عطيته عنوان المخزن بالفحيحيل
    وقالى الله يخليك عطنى 20 دينار للديزل والله ما عندي ولا فلس حتى التامين عند الحدود النويصيب ما امنت سيارتى ما عندي مصروف انا على الله ثم 350 دينار اجار الشحن
    عطيته 20 دينار ورحت قبلة للمخزن - كاشخ بسيارتى شفر لومينا تونى فاكها امس من الوكاله 5000 دينار يا حلو سيارتى الله كشخه
    المهم وقفت سيارتى في مواقف العمارة والحمدلله وصلت التريلا فيها اثنين يمنيين واحد نزل يأشر للتريلا ارجع ارجع
    وانا الحين داخل المخزن بالسرداب
    والا صوت حادث حسبالى العمارة طاحت
    يارب استر
    والا الشفر واصله الدبه للسماعات الخلفيه
    الطيب راجع قري ما شاف سياراتي والمحترم اللى معاه ارجع ارجع على سيارتي
    شفت سيارتي انصدمت ياجماعه انا مو كأنى صافط اهنيه -- اي والله سيارتي حسبي الله عليك ما تهنيت فيها
    المهم اليمني نزل كان يلوح صاحبه راشدي محترم
    قلت بقلبى والله لو تقتله دافع دافع قيمة التصليح
    قلت الحين نزل البضاعه وبعدين نبلغ الشرطة وتاخذ الاجراءات
    صار يبكي والله مو امئمن ولا عندي ولا فلس
    نزلنا البضاعه واحنا انزل الا فيه واحد واقف يطالع البضاعه كل ما نزلنا كرتون مفتوح قام يطالع شنو اللى داخل الكراتين الحمدلله شكله مو صاحي وانا مو فاضيله اتهاوش معاه اللى فيني كافينى
    دقت الوالدة الله يطول بعمرها
    ها بشر وصلت البضاعه
    قلت وصلت حسبى الله على السواق عدم سيارتي
    شنو اللى توك شاريها امس
    اي والله يمه
    لا حول ولا قوة الا بالله
    انت سالم -- الحمدلله سالم -- وراعي التريلا سالم -- قلت اية كاهو يطالعني ودي اقتله
    قالت الوالدة الحمدلله على سلامتكم ياولدي الحديد يتعوض دامكم سالمين
    المهم العمال شغالين تنزيل -- والملقوف ما زال يفتش بضاعتي بدون اذن
    اروح اتهاوش معاه -- قال الموظف اللى عندي -- هندي شوكت -- بابا هذا مباحث يشوف فية وسكي والا لا --- هنيه خقيت -- قلت خلة يفتش على راحته ما عندي ممنوعات الحمدلله نظيف بالحلال يالله نربح حرام بعد الله يبعدنا
    على اخر تنزيل البضاعه -- دقت امى للمرة العاشرة -- لبيه يمه
    قالت طلبتك -- قلت اكيد 50 دينار -- هذى طلبات الوالدة الله يطول بعمرها
    قلت امري يمه -- قالت لا قول عطيتك -- غريبه -- امري يمه الحمدلله عمري ما عصيتج امري بسرعه مشغول ونفسيتي تعبانه
    عطيتني -- عطيتج -- قلت هالمرة اكيد 100 دينار
    قالت -- هاليمني الفقير المسكين جاى من دبي -- لحظه لحظه لحظه يمه -- قالت خلني اكمل -- مخلى امه وعياله ووصل بضاعتك بسلام -- قول الحمدلله ما ادعمك ولا حرق بضاعتك -- انت سالم وبضاعتك سالمه
    سامحه لله الله يوفقك يا ولدي
    قلت لا حول ولا قوة الا بالله
    ناديت اليمني
    تعال يا -- مايكل شومخر
    مسكين يالله يمشى من الصدمه -- سيارته تريلا ما فيها شي وانا الشفر سماعاته طالع برة من قوة الدعمه
    انا مسامحك بس مو منى والله لو بيدي ما اخليك -- بس امي حلفت اني اسامحك
    روح الله يسامحك وتفضل 350 دينار حسابك + 50 دينار صدقه من امي
    والله يا اخوان
    رفع ايده فوق ودعى من قلبه اطيب الادعيه لى وللوالدة
    صراحة فعلا كسر بخاطري هذا المسكين الصحيح -- والعوض على الله
    البضاعه شريناها 1500 دينار -- انشاء الله تجيب الدبل 3000 دينار
    وانا راجع للمخزن بعد ما مشى -- مايكل شوماخر --ولا هذا صاحبنا المباحث واقف قلت الحمدلله خاب ظنه ما لقى ممنوعات
    نادانى المباحث على قولت الهندي شوكت
    يا الطيب
    نعم اخوي امر
    البضاعه للبيع قلت نعم -- قلت بقلبي صج ما يستحي بعد يتطنز
    كم يالطيب
    يشهد الله انى ابى اقول 3000 دينار
    قلت 9000 دينار من باب التطنز -- لان مستحيل مجنون يشتر ي الله يعزكم احذية كلها لون ابيض 9000 دينار
    طلع دفتر شيكات من مخباة شسمك -- اخوك عبدالله
    تفضل اخوى شيكك استلمه الحين من الوطنى وانا الحين ادق على الهاف لوريات احمل
    انصدمت
    قلت اخوى انطرني استلم افلوسي وبعدين استلم الاحذية
    ركبت وانيت -- طبعا الشفر رايح فيها -- للوطنى على طول مو مصدق -- وفعلا عطوني 9000 دينار -- هه طلع تاجر اسمه كريم هاشم دلال معروف بسوق الجمعه ايراني مو مباحث -- حسبى الله عليك يا شوكت -- قلبت الحقيقه
    يارب لك الحمد
    شوكت -- نعم بابا -- سلم عمك ابو هاشم البضاعه استلمنا الفلوس
    سلمنا البضاعه رحت للوالدة ابشرها
    قالت والله تعطيني 1000 دينار -- ما يصير يمه 500 دينار على الاقل قالت كيفك 1000 والا ازعل عليك -- تفظلي 1000
    والا --ام على تطالع -- وانا يابوعلى قلت توني معطيج 100 دينار بعد تبين
    كيفك 1000 مثل امى والا ازعل عليك -- يا ام على 200 حلوة -- لا لا 1000 نوط ينطح نوط -- دفعنا 2000 دينار للوالدة وام العيال مو خسران الحمدلله ربحان
    صراحه انا الغلطان علمتكم

    المهم صفينا على 7000 دينار يارب لك الحمد -- صلحنا الشفر 300 دينار
    هذى قصه حقيقيه حبيت ابين لكم ان الله يعطى الانسان على قد نياته
    والحمد لله ابو هاشم توفق بالبضاعه وما زال الى اليوم يواصلني
     
  2. دنياء غريبه

    دنياء غريبه عضو مميز

    التسجيل:
    ‏5 يناير 2009
    المشاركات:
    12,840
    عدد الإعجابات:
    686
    مكان الإقامة:
    ● فــَي قـًلـب بـًآبـآتيِ ..!ِ~}
    ماشاءالله عليك

    في التجاره عندك تجارب

    بس صراحه عجبني مواقف أمك الله يحفظها لكـ

    وانت في التجاره دائم ترجع خطوه وبعده تتقدام 3 خطوات ;)

    وعلى قولتهم (التجاره ربح وخسره)

    والله يوفقك


    انتظر موضوعك المواقف 3 التجاره بكل شوق
     
  3. abdullah6868

    abdullah6868 مشرف قسم الإستراحه مشرف

    التسجيل:
    ‏3 مايو 2008
    المشاركات:
    6,217
    عدد الإعجابات:
    162
    مكان الإقامة:
    kuwait
    حياكم الله ومشكورين على المرور
    وراح انتكمل باقي المواضيع والمواقف على نفس الموضوع -- بناء على طلب واستشارة احد الاعضاء المحترمين
    انشاء الله
     
  4. نواره1

    نواره1 إلغاء نهائي

    سبحان الله ... صج كلامك اللي يصفي نيته ويسامح و يتوكل على الله ...بالعون بيتوفق ......و بيرزقه رب العباد من حيث لا يحتسب ....

    و الله يجزاها خير أمك.... و يطول بعمرها ...



    ومشكور يا خوي ...على طرح تجاربك التجارية ... المليئة بالخبرة والعبرة ...
     
  5. كويتيه @

    كويتيه @ عضو نشط

    التسجيل:
    ‏30 يناير 2009
    المشاركات:
    874
    عدد الإعجابات:
    0
    مكان الإقامة:
    الكويت الغاليه
    والله مواقفك غريبة

    الله يوفقك بتجارتك ويفتح لك ابواب الرزق من اوسع ابوابة

    ولا تحرمنا من جديدك
     
  6. NoOoOoR

    NoOoOoR عضو نشط

    التسجيل:
    ‏18 أغسطس 2008
    المشاركات:
    10,667
    عدد الإعجابات:
    9
    مكان الإقامة:
    الكــويـــت....:))
    خووووووووووش موضوع

    مواقف ... وتجارب .... نستفيد منها

    الله يوفقك في تجارتك ويرزقك الرزق الحلال

    ومشكوووووووووور
     
  7. abdullah6868

    abdullah6868 مشرف قسم الإستراحه مشرف

    التسجيل:
    ‏3 مايو 2008
    المشاركات:
    6,217
    عدد الإعجابات:
    162
    مكان الإقامة:
    kuwait
    حياكم الله ومشكورين على مروركم الطيب
    وكل عام والجميع بخير
    انتظروا الجديد من القصص الحقيقيه
     
  8. bensh

    bensh عضو نشط

    التسجيل:
    ‏1 أكتوبر 2007
    المشاركات:
    717
    عدد الإعجابات:
    16
    مكان الإقامة:
    Q8
    قواك الله

    خوش قصص والله

    فيها عبر

    واحنا بنتضارك
     
  9. ابوشروق

    ابوشروق عضو جديد

    التسجيل:
    ‏18 يوليو 2009
    المشاركات:
    577
    عدد الإعجابات:
    0
    مكان الإقامة:
    الكويت
    ماشاء الله عليك فعلا من ترك شي لله عوضه الله ابرك منه

    الله يخليلك الوالده وثبته على دين الاسلام

    موفق خير اخوى
     
  10. دبس الرمان

    دبس الرمان عضو جديد

    التسجيل:
    ‏28 يونيو 2006
    المشاركات:
    84
    عدد الإعجابات:
    0
    مكان الإقامة:
    الكويت
    الله يحفظ لك الوالده وام علي وكل من يعز عليك
    صراحة حبيتك الناس الاشراف شرواك يدشون القلب

    ربي يوفقك دنيا واخره ... ولا تتاخر علينا ناطرينك تكمل

    في امان الله
     
  11. abdullah6868

    abdullah6868 مشرف قسم الإستراحه مشرف

    التسجيل:
    ‏3 مايو 2008
    المشاركات:
    6,217
    عدد الإعجابات:
    162
    مكان الإقامة:
    kuwait
    الله يرحم والديك
     
  12. kuwait-kuwait

    kuwait-kuwait عضو جديد

    التسجيل:
    ‏11 ابريل 2009
    المشاركات:
    179
    عدد الإعجابات:
    0
    اشكر اخونا ابو علي على هالموضوع

    انا مره اشتريت فورد من واحد فاكها على ايده وتوها حاله عليها الدفعه الاخيره قالي ادفعها واخذ السياره كانت 1740 د.ك

    بعد يومين بعت السياره 2600 د.ك

    الحمد لله نعمه من رب العالمين وطالما الواحد مصفي نيته ويتحرى الحلال الله سبحانه يوفقه
     
  13. q8royale

    q8royale عضو جديد

    التسجيل:
    ‏27 يونيو 2009
    المشاركات:
    426
    عدد الإعجابات:
    0
    الله يوفقك دنيا و أخرة و يحفظ لك الوالدة

    انت فرجت كربة عن واحد ما تعرفة - و بعدين سامحته و فرجت له كربة اكبر من الاولى .... سبحانه و تعالى يفرج لك كرب الأخرة و قبل ذلك يعطي بالدنيا اضعاف و اضعاف مقابل تلك الكرب

    "و ما ادراك ما العقبة ..... "

    هذه القصة فيها اكثر من درس و عسى ربي يدوم عليك العافية و ان يرزقك من الخير كله
     
  14. الاحمـد

    الاحمـد عضو نشط

    التسجيل:
    ‏16 يونيو 2008
    المشاركات:
    1,425
    عدد الإعجابات:
    2
    الله يخليلك الوالده ان شاء الله
     
  15. ابو عيسى

    ابو عيسى عضو نشط

    التسجيل:
    ‏6 يوليو 2004
    المشاركات:
    975
    عدد الإعجابات:
    0
    مكان الإقامة:
    عريفجان
    تدري يا اخوي عبدالله اني كل ما اقرا لك موضوع عن هالمواقف

    اقسم بالله العظيم احس براحه مو طبيعيه من المردود اللي يجيلك

    عسى الله يوفقك ويخليلك عيالك والوالده يارب والله ثم والله ثم والله

    استمر على هالشي وصدقني سوالفك يوخذ منها العبر والحكمه

    وموفق خير ياغالي
     
  16. abdullah6868

    abdullah6868 مشرف قسم الإستراحه مشرف

    التسجيل:
    ‏3 مايو 2008
    المشاركات:
    6,217
    عدد الإعجابات:
    162
    مكان الإقامة:
    kuwait
    الله يجزاك كل خير طال عمرك
    يسعدنى كلامك الله يطول بعمرك
    ويشرفنى مرورك العطر ياالغالى
     
  17. Low Fat

    Low Fat عضو مميز

    التسجيل:
    ‏2 سبتمبر 2009
    المشاركات:
    3,276
    عدد الإعجابات:
    661
    مكان الإقامة:
    قطعه 13
    الله يبارك لك في حلالك

    ويجعل البركه فيه وفي ذريتك

    ويحفظ والدتك ويرزقك برًها .. اللهم آمين