موضوعك مهم اخوي يــاسر و جدا مأسف و وصل مرحله ما بعد الخطوط الحمرا ،
يا أخي انا واحد من سكان المناطق الداخليه ( احد المناطق المعروفه التي تطلع على الدائري الثاني ) ، قمت العن اليوم إلي الشخص سمى فيه هالشارع شارع الحب ..!!
يا جماعه والله تعبنا من الامور ، قسما بالله اني لا طلعت مشوار و خصوصا ايام الاجازه على ما اوصل البيت بالفيحا ، والله اني اخذ وقت كأني رايح الدوحه ، بسبب الزحمه و السرعه من هالشباب و الحوادث إلي تصير بهالشارع و اخذ يا التأخير ، غير تأخير الزحمه يصادفك تأخير الحوادث ،
للأسف ما يسمى بشارع الحب و شارع الخليج صار شارع ( جناقل ) للأسف يتوافدون للهشارعين جميع شباب محافظات الكويت إلي يسوى و إلي ما يسوى ،،
لي درجه وصل الامر إلي حد الانفجار ، الكل يبي يتحرش في بنات خلق الله ، الكل يبي يرقم ، الكل يبي بنت ، الكل صار ما يستحي ، الامر تعدى الجرأه و بقوه ،
و المشكله سكان هالمناطق كلهم عيال ناس معروفه و ناس مناصب ، و إلي يتحشرون في بناتهم جناقل بكامري ولا هوندا و البنت راكبه اقل شي بورش كاريرا ، و غصب طيب يتحرش ....!! و أخذ السرعات و المناورات بالشارع على بنت بالسياره ابوها صاحب شركه على اقل تقدير ،
للأسف اصبحت سمعة الشارعين ليس بالكويت بل خارج الكويت ، شباب من دول خليجيه يتوافدون لهلشارعين للمغازل و التحرش في بنات خلق الله ..!! و كأنك بنات عيال شوارع ،،
والله برأي الشخصي اعتبر هذا بلاء و مرض من الله على بعض شبابنا إلي ما يستحي و للأسف اغلبيه الشباب ،
والله لي جار رجل منصب بالدوله و من عائله معروفه يسولف لي و حسرات الندم و الألم اشوفها على وجهه ،
سالفته ، قمت اتخيل أني بداله و احط نفسي بموقفه ، جارنا مسكين بنته ما صارلها 3 ولا4 اشهر مطلع لها ليسن توها صغيره وهي بنت ناس و محترمه و ابوها شخصيه نعرفه و معروف من عائله كبيره ، يوم من الايام يتصادف معاها وهو طالع من البيت هو طلع بسيارته وهي بسيارتها مع اختها الصغيره ،
و طبعا خروجهم من الفيحا طبيعي على شارع الدائري الثاني ( شارع الحب) المسكين صادفته بنته بسيارتها جدامه و هو وراها و يمشي ، و يشوف سيارتين يلاحقون بنته وهو على نياته مستغرب ، لين وقف عند بنته بالشارع عند الاشاره و صار يلكمها من الدريشه و يسألها شفيج عسى ماشر بنتي شصاير ،
تخيل بكل وقاحه ، ييلك واحد من هالكلاب اعزك الله يقول للابو ( انت يا الشايب روح بعيد انا لاحق البنت قبلك ) ..!! والله وهو يسولف لي اشوف نظرات الألم و الحسره بوجهه ..!! للأسف والله ..
و بنته تقوله يبا هذا شي عادي يوميا يحصل معاي بكل وقت ، الله يرضه بهالكلام ؟؟!!
والله شي مخزي ، يااخي هني بالكويت جرأه اكثر من الرهيبه بهذا الموضوع ،
انت شدخلك بينهم ، و اخص بالذكر ابناء المناطق الداخليه ( المنصوريه - الدعيه - القادسيه - الفيحا - الضاحيه - العديليه - كيفان - النزهه - الشاميه )
ليش ملاحق بنات خلق الله ، وخصوصا إلي ساكنات بهالمناطق بحكم الروحه و الطلعه و الدخله و مرورهم بهالشارع ..!!
ياخي بنات عوايل محترمه و عيال جخ انت شكو ملاحق فيهم ..!! هي كل يوم تكشخ بسياره اخر موديل وانت طرق الهوندا ولا التيوتا ليش مأذيها وحاشر نفسك غصب ..!! تعبت و انا اشوف هالمناظر كل يوم جدامي ، عيب والله عيب ،
ولا يعني كل بنت تشوفها مو متحجبه خلاص تصير عندك عاهره و العياذ بالله .. المشكله خلاص صارت عاده عند اغلبيه الشباب تقريبا مثل الادمان ، اذا ما يروح يتحرش في بنات خلق الله ما يرتاح ،
الحين اخوي حلها مالها حل ، إلى تاخذ حقك بيدك ، ولا هني خلاص سايبه بالكويت ، هذاك اليوم يطلعلي احد المذيعين بقناة مرينا اف ام من غير ذكر اسم المذيع ( المايع ) ، على بنه اجازه الاسبوع يقول ( يله شباب روحو طلعو استانسو الجو حلو طلعو قزو ) ...!! هذا يبين لك ان الموضوع خلاص اصبح عادي جدا ،
والله اخوي ياسر الكلام وايد ما يخلص بهالموضوع ، باستثناء ملابس البنات و حركاتهم ،
اخوي انا ادري انه وياك حق بحكم انك تمر عليك هالشغلات كل يوم
وما الومك الصرااحه
اللي قاعد يصير غلط كبير
بس عتبي عليك
انك بس متعنصر للمناطق الداخليه
وتتحجى بس عنهم
وانهم عيال ناس كبار وجخ ومهمين بالدوله
اذا انت ما تبي الناس تتحرش فيهم عشان هالسبب
وتبي الناس يتحرشون ببنات الناس الفقارا المساكين
اللي على وظايفهم وناس على قد حالهم مو جخ على قولتك ولا مهمين بالدوله
اسمحلي اقولك انك جانبت الصواب
اتمنى تتقبل كلامي بصدر رحب
وتعمم الغلط على الكل
ولا تفرق بين عيال جخ وعيال ناس مهمين
وعيال الناس العاديين
ترى هم بنات الناس العاديين ناس اهل حمايل وناس محترمين
الله لا يدخل الشيطان بيننا
تحياتي
