ليش المتزوج يغازلـ !!

[الهمس الخجول]

بصراحهـ بصراحهـ ومن غير زعل الخطاء من البنت!! هي إللي تعطي الشاب المجال !!لكن لو تصدهـ

وماتعمل لأي شخص يعاكسها أي أعتبار بيخجل منها والأكيد مايتجرأ يكرر تجربهـ المعاكسهـ مره ثانيهـ !!

شكراً كثير كثير سويتـهـ !!

 

[rodjeria]

جزاك الله خير اخي الفاضل كلامك في محله

 

[مراقب الاسهم]

حلوه هذي (مره) كلش مو منقول

ليش الرجال يغازل وهو متزوج ؟

لانه جبان الشرع حلل له اربع حريم بامكانه الزواج من اخرى على سنه الله ورسوله اذا كان هناك اسباب للتغيير
لا ضرر ولا ضرار

ماتسوى عليه بالدنيا ينصاد ويتشحطط ويتبذل آخر بهذله بالمحاكم بالآخره له العذاب الاليم

شكراااا ليلي

 

[ريّس نفسه]

كلامج صح والشي هذا ينطبق على الجنسين مو علينا بروحنا ::verymad::

لكن الرجل اعلى بشي بسيط لايذكر

وحنا الرجال نعاني من مشكلة بعد !!

إذا الرجال شحلاته يتمشى مع زوجته بالمجمعات او بالحدايق تلاقين البعض من الحريم يتحرشون فيه وطايحيله خز وحركات

واسئلي اي شخص متزوج هذي مشكلة نعاني منها

يمكن الشي هذا يحصل معاي أنا بروحي

شكرا ليلى

​

لا مو عشان الازواج .. بدليل ان هالشي قاعد يصير مع غالبية الازواج... لسبب

بس عشان يغيضون الزوجة .. ويبينوون لها ان احنا يا بنات قدرنا نلفت انتباه

زوجج .. فقط لا غير

الحل: تذكر ان خزهم مجرد تحدي بينهم عشان يضايقون الزوجة .. فتجاهلهم وخلهم يحسون انهم ولا شي وانهم غير موجودين

(( ليش الرجال المتزوج يلجأ للمغازل (تلفون_نت_يواعد......الخ))​

اببساطة لانه قليل أصل

قليل أصل لانه اولا..

1/ عصى ربه
2/ خان زوجته
3/ خدش سمعة اهله اللي ربوه
4/ اهان عياله
5/ وقليل اصل لانه ما يقبل ان يخون احد اخته ، لكن يقبل ان يخون بنات.. الناس

 

[كويتيه @]

اعتقد لانه يبحث عن التغيير فقط لا غير !!

 

[Winchester SX3]

بكل بساطه موضوعج يتلخص بثلاث أسباب رئيسيه:

1-قلة دين
2-إنفتاح زايد
3-إغراءات قويه

 

[اليوفي الثاني]

شخصيا للتغير
تفاح تفاح تفاح ............ بس عاد

 

[D.Q8]

الموضوع جميل ويحتاج مناقشه والهدف معرفه اسباب انحراف الزوج او العكس
انا ودي جواب من اللي يناقشون
1-ماهو الفرق بين ايام زمان واليوم من ناحيه التقاليد واللبس والمكياج
2-هل دخول التلفون والنت والفضائيات في غرفنا غير من تصرفاتنا
3-هل الزواج المبكر يجعل الرجل اكثر عرضه للخيانه
باختلاف وجهه النظر الواعظ الديني موجود حاليا اكثر من ايام زمان من ناحيه الاعلام والمساجد والشيوخ ​

شوف ياخوي اولا في فرق بين ايام زمان باللبس والمكياج

شوف المجمعات والاماكن العامه البنات صار لبسهم فااااضح والشباب بعد شورتات قصيرة بناطيل ظيجه وغيره وغيره

ثانيا النت بدون مراقبه الاهل هذا يسوي بلاوي والله عندنا بنات بالمدرسة على عمر 12و14 يحاجون شباب ويطلعون معاهم بعد والفضائيات اللي هي برامج الواقع مثل ستار اكاديمي خلا الامر طبيعي عند الشباب والبنات ان عادي اكلم شاب " بوي فرند" عادي لو اهي متزوجه وسمعت واجد حريم متزوجات وتحاجي ولما تسألها تقول والله زوجي مومقصر بس املي وقت فراغي

الزواج المبكر ما اعتقد له علاقه اللي مايخاف من الله وموحاط لربي هيبه راح يكلم ويسوي كل شي حرااام لانه ماخاف من الله تبيه يخاف من النااااااس

وسوري على الاطاله بس الموضوع جد شدني لان صار زايد عن حده​

 

[kuwaitey]

اول شسى مشكوره يا اليل على فتح الموضوع

انا بقولها من غير مقدمات

احنا لو الله يفكنا من التبرج واللبس اللى مادرى شلون صاير والله نصير بخير

انا ادخل السوق مع زوجتى وعيالى اقول الدعاء وبعدها اضيع الطريق كل شوى واحد من عيالى

يمسك ايدى يقول لى ها الصوب يبه مني مني يبه انزل راسى مابى

اشوف البلاوى والهوايل اللى اشوفها فى السوق ...

انا بسألكم سوال للبنات والشباب احلفكم بالله تجاوبنى الصج

ابيكم توصفون لى شعور الرجال لما يشوف حرمه لابسه بلوزه شفافه مشخله والبلاوى مبيييينه

اقسم بالله الذى لا اله الا هو شفت المنظر هذا فى احد مجمعات الكويت

90% المصايب كلها من البنات والـــ10 % من ابليس

هذا غير المخازز اللى يصير حق المتزوج الجديد تشوف التحرش فيه عييينك عينننك

الله يرحم ايام قبل وناس قبل ومستحى قبل

>>>>>قلبه مترووووسه

 

[بومحمــد]

الســلام علـى الجميــع


عجبني تعليق البعــض

وشدنـي الموضوع الى المشـاركه
والله يعينكـم علــي ..


بقـول اللي شفتـه من خـلال مشـواري الطويـل
مع النسـاء والشبـاب والجنـس الناعـم والمراهقـات

أخـوكم مدير معهـد صحي نسـائي ورجالي من سنـة 1998
الى 2002
وأمتلك معهـد صحـي رجالي خـاص فينـي
وأعمـل خبيرتغذيـه ومدرب رياضي لتخسيس الوزن وزيادة الوزن
وألعاب القـوى وبعض التمارين من أجل الحصول على اللياقه
وشاركت في بطولات محليه ودوليه في الرياضـه
وحاصل على بطولات عديده في لعبـة كمال الاجسـام لأكثر من 7 سنـوات

ومشـواري الرياضي والاعلامي أكثر من 16 سنـه

هـذه نبـذه بسيطـه عشتهـا مع الجنسيــن

عرفتكـم على عملي ومشـواري
ولكن ماأعرفكم على نفسي
ويشرفني معرفتكـم الطيبـه
ولكن كل شي في وقتـه حلو .


ندخل في الموضوع
والله ياأخوان رأيــت في عينــي الكثير من الاهـوال
والتي لن يتصوروها البعض في الصـور
ولن يراها الكثير في الاحلام


من خلال مشـواري الطويل مع النسـاء والرجـال
كنـت مدرب للجنسيـن واعطيهم جداول تغذيه وبعض النصايح الطبيه

في البدايـه لاننسـى ان الشيطـان شـاطر ولكـن هذا موعـذر او مبرر
لأن الشيطـان يـوم الحسـاب
يقـول أني برئ منك اني اخاف الله رب العالميـن

ولا ننسى ان النفس ضعيفه وأماره بالسـوء
ولكـن هم هـذا موعـذر وليس كل نفس ضعيفـه

احنـا بشر وليـس ملائكـه والكثير منـا يحمل الذنوب والمعاصي التي لا تستطيع حملها الجبـال , عسى الله يغفر لنا ولكـم اللهـم آميـن

ياأخـواني وخواتـي
من خلال مشـواري اللي ذكرته لكم شفت الهـول والعجب
بعض الفتيـات يمارسـون لعبة كمال الاجسـام الحديد
والاختـلاط مع الشبـاب والضحـك ولمس الجسـد عـادي عنـدهم
وللأسف هالبنـات عـرب ومسلمات وبنـات نـاااااس وياكثرهم
والموضوع أمر بسيــط بالنسبه لهم
وتخيلو تدخل وحـده محترمـه نفسهـا وتشـوف هالاشكـال
بالأول تعيب عليهـم ومايعجبها الوضـع
والأسبوع الاول لكم عليها
والاسبوع الثاني صارت مثلهم
والاسبوع الثالث لاحول ولا قـوه

وطبعـاً كنـت أتكلــم وأنصـح وأتعب
وغيري يتعب من كثر الكـلام
ونقول عيـب ولزمي حدودج .. للأاسف ماكـو فايـده
فالجـواب بكل بسـاطه تقول (( صديق مؤقت لا أقل ولا أكثر )) في نظرها كل شي يجــوز وحـلال (( لأنه مجرد صديـق ))


فتخيلـو تركـت هذا المكـان
وأنتقلت الى مكـان أخر خـاص فقط بالرجـال



هذا الجنـس الناعم اللطيف اللي المفروض
أنهـا تقعد في بيتها وتلتزم احدودها في عملها
وتجابل اهلها وأخوانها ووالديها اللي تعبـو عليهـا وعلى تربيتهـا
والمفروض انهـا تبيـض الوجـه وتفكر في مستقبلها
وشهادتها وبنص دينها وبما يرضي الله سبحانه وتعالى ..
ولكـن الأسمجـه الشينـه تخـرب أغلب السمـج
وليس كل السمـج ..

وبعض البنـات اهلهم والله مايدرون عنهـم
تلفون ولاب توب وبلاك بيري ومكيـاج وغرفه بروحهـا وسايق يوديها ويجيبها
وعمرها مايتجاوز ال17 سنـه
وأقسملكم بالله شفتهم بعيني وشفت اللي ماينوصف بالحروف

بأختصــار يابنــات لاتلومون الشبــاب او الريال المتزوج
ولاتقولون وين زمان اول وزمان الحيــن

زمان اول وحريم اول
ماكو عندهم بلاك بيري
ماكو أنترنت وبلوتوث
ماكو بنـات قز في المجمعات والقهاوي
ماكو بنـات متبرجـات مثل تبرج اليوم وحواجب اليوم
ماكو بنـات واشمات نامصات وبعضهن بويـات لا حول ولا قوه
ماكو بنـات يسوقون سيارات ويسابقون الشباب عالبحر
ماكو بنـات يركبون بانشي وغيره
حريم اول مايسافرون بروحهـم ويقولون ديمقراطيه
حريم اول مافي شي عندهم اسمه ستاربكس ولا شاي الضحى
حريم اول يخافون الله
ويخافون من رياييلهم ويصلون الصلاه بوقتها وصلاة الضحى
حريم اول تطبخ وتنظف البيت وأتعلم الاعيال وأدرسهم
والبيت يازينـه وتغسل ملابس البيت بيدينها الطاهره
وهي حامل بشهرها..


ولكــن بنــات أول للحيــن في منهم وموجوديــن عسى الله يحفظهم
ومستورين في بيوتهم محد يشوفهـم
وأعيــال الاصل والفصـل مايختربون بسهوله
لأن عنـدهم مقوله وارثينها وراثه من اجدادهم وأمهاتهم
(( رضى الله ورضى الوالدين ورضى بوالعيال ))
ومكانها من البيــت للعمل واذا بقت تطلع تزور صديقاتها وأقاربها وترجع مستوره..


بعـض البنــات سودو وجيه والدينهـم ودينهـم
وشوفوا البرامج وشوفوا الاعلام وشوفوا الجرايد وشوفوا المجلات
وروحوا المحاكم وحضروا الجلسات تشوفون وتسمعون العجب ..
وشوفوا نسبـة الطــلاق في محاكمنا الكويتيه .. اللهم لاتبـلانا


وبعض البنـات رفعـوا روس والدينهم ويبيضـون الوجـه
وهذيلـه من الصعب الواحد يفرط فيهــم



ومثل ماهنـاك بنـات سيئـات
فهنــاك شبـاب سيئ ..


ولكـن شنـو ذنب هذا الرجل الملتزم يطلع مع زوجته وأعياله وياخذهم للمطاعم الفقيره وبعض القهاوي الشعبيه
على شـان بس يبتعـد عن بعض البنـات
وملابسهـم الضيقه والمكيـاج اللي تارس الوجه
والحواجب المرسومـه بعمل الشيطـان
ومايبي بناته الصغـار اللي تعبان عليهـم بدم قلبه يتأثرون بهالاشكـال
وهالمسكين من يرفع عينـه يشوف وحـده تخزه ووحده تأشرله
وهـذه تبتسملـه
وطايحله اعوذ بالله من الشيطـان واللهم ثبتني على دينك وسنة نبيـك
وخايف من عقاب ربـه وخايف على بيتـه لايخترب

وبعض الشبـاب اللي نفسهـم ضعيفـه
ويـن يروحون والبنـات في كل مكـان وفي كل قهـوه وفي كل صاله بلياردوا وبكل منتزه وحتـى في البر تتحرش وتتحدى الشبـاب
والمصيبـه تأجر بانشــي بروحهـا وتسابق الشبــاب

وتعالوا شوفوا الملابس وشوفوا المكيـاج والتبرج
واللبـاس الضيق وحتى الجو البـارد اللي يقرص العظـم
لبـاس للركبـه وشفاف ولازق بالجلـد , وين الدين وين الأسـلام
وين اللي يقولون أحنـا مسلميــن ونخـاف الله
وبنـات أعمارهـم ماتتجاوز ال20 سنـه متبرجات و24 ساعـه
بانزيـن وبريــك وسيـاره أحدث موديل
وقز من الصبـح للعصر ومن العصر لمنتصف الليل
على حسـاب الشايب المسكين اللي قصو عليه بكلمتيـن
وشيبو راسه
ولا على المعـاش اللي المفروض أطلع منـه شي بسيط حق والدينها
بدال ماتدفع نصه على السيـاره
وياليـت 10 دنانير صدقه جاريـه تنفعهـا بعـد المــوت
ويمكـن تنجيهـا من أهوال جهنم وعذاب القبـر ..

ياأخوان هالانسـانه اللي مومحافظه على نفسهـا
ولا على سمعـة اهلها .. شلـــون بتحافظ على بيتهـا
وأعيالها وعلى بوعيالهــا , وفي النهـايه لابـد من الطــلاق وأختـلاق المشاكل ..


وهنـاك بعض الشبـاب اللي يقولي والله يابومحمـــد
ودي أصون زوجتـي وأحافظ على بيتـي وأعيالي
بس موقـادر موقـادر
وأقوله ليــش ياخـوي
يقولي تعال يوم واحـد للدوام وبتشوف الاشكـال وتشوف العجب
وعنـدنا عرض أزيـاء بالدوام ويتنافسـون مع بعض
وتعال شم العطور من اول الممر لنهاية الدوام
وتعال شوف المكيـاج ياكلونه أكال
وتعال شوف اللبس اللي ماعمرك شفتـه ولا راح تتخيله
أبي أعرف شسوي وشنو العلاج .. ألبس نظـاره ولا أستقيل من عملي ولا أستسلم وأخون زوجتـي ولا أقعد في بيتي ولا اروح اشتغل في مكان ماتربطني فيه صله ولا عندي فيه من الخبره شي ..
ولا أقعد طول الدوام طايحله أستغفار ؟؟ والمشكله ان الاخت تبعد عنـه باعيــن !

وبعض الشبـاب فيهـم مرض أي نعــم مرض الله يشافيهـم
عنـدهم حريــم والله العظيــم قمه في الاخلاق والأدب والاصل
وعنـده أعيــال ما شاءالله عليهــم أخلاق وعلم وأدب
وفوق كل هـذا يخــون ويكلم أكثر من وحـده وتلفون داخل البيــت
وتلفون ماينـزل من السيـاره
ويخربـط من ورى زوجتـه هالمسكينـه المحترمـه
اللي في كل صلاه تقول يارب احفظه لي ولعياله
واللي أحسـن أكل تطبخله واذا مرض اتجابله
وتوقف فوق راسـه واللي صاينه بيتها وصاينته .. لاحول ولا قوة الا بالله العلي العظيـم

وطبعـاً هالحاله مومرض او يستهبل او مخه ناقص ..
هـذا يعاني من نقص بالأيمــان وقلبـه مايخشع للرحمــن
ولو كان يفكر بمايرضي الله ويخاف من عقابه
كان ماخـان ام عياله .. مهما كانت الاسبــاب
واذا فيـه مرض يتعالج ويتزوج بالحلال وبرضى الله وبرضى ام عياله والشرع محلله ..
ام انـك تخــون وأنـت تعلم ان الخيـانه حــراااام
فأسمحلــي ياخــوي حبل الخيانه قصيــر
وأنــت مبتلي والدنيــا دواره


كلنـا مانقبل ولا نسامح اذا الواحد طاح على زوجتـه تكلم غيره
سواء العلاقه من غريب ولا قريب!

ولغايـة أمــس وانا قاعـد مع مجموعـه من الشبـاب
وأغلبيتهـم متزوجيــن يقولون تعبنــا شنـو أنســوي يابومحمــد
كل مكـان نروحلـه نشـوف عرض أزيـاء وهذه رايحه وهذه داخله
شنسوي نقعد في بيوتنا ونجابل حريمنا ومانطلــع !!

قلتهلــم أنا حالي من حالكــم
لا أقل منكـم ولا اكثــر , وأعاني أكثر منكــم
ولكــن مـع هـذا كلــه أشــوف زوجتـي أجمـل النســاء
وأطهر النسـاء , وريحتهــا عنـدي تسـوى الدنيـا ومافيهـا
والزوجه اللي تخـاف الله وتخـاف على زوجها وتبي رضـاه
ومحافظه على بيتهــا وأعيالها
تســوى عنـدي وعنـدكم مليــون بنــت متبرجـه او غير متبرجـه


والسموحـه عالطـواله

وياشبــاب أحـذروا كيدهـن أن كيدهـن عظيــم
وأن كيد الشيطــان كان ضعيفــا


هالبنـات خواتنـا وعسى الله يهديهـم ويهدينـا
وأتمنــى من كل شــاب يكلــم من ورى زوجتـه
او يخونهــا ان ينظـر لله سبحانـه وتعالى
ولا ينظـر للبس والمكيـاج ولا تغرك المظاهر
وأعلـم ان الله يراك وكل شي راح تلقاه مكتوب في كتابك
والدنيـا دواره اذا ما حاشـك الدور فكر في بناتـك وهلـك
وتخيل لمـدة خمـس دقايق ان زوجتـك تكلـم من وراك

بعـرف شنو راح يكـون (موقفــــــك)

وعسـى الله يبعـد عنـا وعنكــم
شر المتبرجـات وشر النسـاء وكيدهـن وشيطانهـن

وان يحفظ بناتنـا وبناتكم وخواتنـا وخواتكـم الصالحـات المحافظات
من بعض الشبـاب الضـال
ويهـدي خواتنـا الضالات وأخوانا ضعفـاء النفس
الى الطريق المستقيــم اللهـم أميـــــــن .​

 

[bo fawaz]

بارك الله فيج ليلى

بختصر الاجابة فى كلمتين

السبب الابتعاد عن الدين

والعادات والتقاليد ( قبل الناس تعرف عدل معنى كلمة عيب

والحين صارت عادى )​

 

[Balloons Shop]

فتش عن المرأة

الآية الكريمة تبدأ ( الزانية والزاني ..)

يعني بداية الفعل من المرأة ، لبسها ، نظرتها ، حتى إحساسها الداخلي
يستطيع الرجل أن يلتقطه ، ويفرق بين ذات الحياء والصرح المتين وبين لتي تبحث عن متعة زائلة بعدها ألم وحسرة ..

ولو كل مغازل يفكر بالحديث ( بشر الزاني بخراب بيته ولو بعد حين ) لما أقترب من نساء خلق الله ، فكما تدين تُدان .

 

[nestla]

أظن السبب ان الرجل و خاصه الكويتي يحب يعيش حياة المتزوج و العزوبي بنفس الوقت .

 

[فهرنهايت]

بــكــل إخــتــصــار

دنــــاءة نـــفـــس

سـواء مــن الــرجــل أول الــمــرأه​

 

[الكوفه]

بــكــل إخــتــصــار

دنــــاءة نـــفـــس

سـواء مــن الــرجــل أول الــمــرأه​

كلمات المفروض تكتب بماء الذهب بارك الله فيكم​

 

[زلابيـــا]

بــكــل إخــتــصــار

دنــــاءة نـــفـــس

سـواء مــن الــرجــل أول الــمــرأه​

انا من رايك شكرا لصاحب الموضوع

 

[al.jamly91]

لان بعد سنتين او ثلاثه زواج زوجته تصير مثل واحد من الربع ناقصها تقوله عطنى زقاره بس
ههههههههههههههههههههههههههههههههه

 

[السيدةالانيقة]

العين تعشق كل ما هو جميل

 

[ميكانيكي]

باختصار

الحين بهالوقت الي مايغازل

يقولون عنه جبان او غير متحضر ويطالعونك بنظرة غريبة هههههههههههههههههههههههههههههههههههههههههه

 

[acton]

باختصار

الحين بهالوقت الي مايغازل

يقولون عنه جبان او غير متحضر ويطالعونك بنظرة غريبة هههههههههههههههههههههههههههههههههههههههههه

تصدق انا ماغازل وكله يقولون عني تكانه
صج نسيت الموضوع على المتزوجين​