فعلا كان ينزل بتواريخ 24 و 25 وبحد اقصى 26 لكن من 4 اشهر صارلهم ينزلونه 27 و28 ومرات حتى 29 , وبالنسبه لالتزاماتك الماديه وعلى قولتك اعاده الهيكله نايمين فأحب أقولك دعم العماله عنده فكره بأن اغلب المستفيدين توظيف وهمي لكن مجبورين لصرف صدقات لكم (حسب تصورهم) وتوصلني رسائل بالخاص الاغلب يشتكي من هل نقطه ( دعم العماله يصرف رواتب متأخره و راتب الزوجه ينصرف بتاريخ 22 و24 بحد اقصى والبعض يقع في إحراج شديد مع زوجته بأن راتب يتأخر و تقوم الزوجه مشكوره بمساعده زوجها لحين نزول راتبه وهذا يسبب ذل للزوج ويحس بأن لقمه عيشه قاعد ينصرف له من بيت الزكاة ) وأنا عن نفسي لو كنت مكانكم قسما بالله لو يصرفون لي دعم العماله 2000 بالشهر على ان امر بهل تجربه مع زوجتي , جان رضيت ب 300 دينار عوضا ً عن 2000 دينار .
بالأخير اقولكم الله يوفقكم وهذا حقكم راح تاخذونه بالنهايه
شوف يابو عقيل, أولاً نظرتهم هذي حسستني أنهم يصرفون من جيبهم !
ثانياً, التعميم لغة الحمقى .. فيه توظيف وهمي . نعم .. لكن يعممون على الجميع ؟
أنا دوامي من 7 الصبح الى 3 العصر في المنطقة المُشتركة .. واللي ما يعرفها اهي ورا مزارع الوفره بـ 5 كيلو تقريباً .. شوف المسافة أكثر من 80 كيلو من بيتنا الى دوامنا رايح .. و 80 كيلو راد ! يعني 160 كيلو يومياً !
والله اطلع من بيتنا ست الصبح أرد للبيت 4 العصر .. بعد هالتعب والكد .. يذلونا على الراتب ؟
بعدين اللي مرته موظفة يحمد ربه .. الحياة تعاون وهو وزوجته يشيلون البيت .. المشكلة اللي متزوج وحده ماهي موظفة .. وعنده إيجار شقة .. وصاحب البيت مأذيه أذيّة كل يوم يقول له أصبر علي لي باجر .. والمشكله أنه راتب الشركة ينزل 30 الشهر .. ودعم العمالة كان 25 .. وبدل الإيجار 1 الشهر .. وكانت أموره تمام .. إلا آخر 5 او 6 شهور .. والله احرجوه ورب الكعبة !
إحنا لازم تكون لنا وقفة معاهم جادة .. هالحجي ما يصير .. انا الحين بحول مواعيدي الماديّة كلها 30 الشهر .. وبخلص ! مو قد الثقة .. لكن أنت يابو عقيل شنو تشوف ؟ وشنو الطريقه اللي نقدر نلفت انتباه المدراء في اعادة الهيكلة .. إلى التأخير البايخ اللي ماله داعي ؟
