مواقف حصلت فى عالم التجارة -- 9

abdullah6868

عضو نشط
التسجيل
3 مايو 2008
المشاركات
6,222
الإقامة
kuwait
السلام عليكم ورحمة الله وبركاتة
انا ما احب اذكر اسائت الاخرين لى شخصيا يعنى اطوف دايما
بس اليوم راح اذكر اساءة اقرب المقربين لى فى عالم التجارة للعبرة فقط
حبيبى وصديق عمرى من 30 سنه جانى فى البيت وقال يا ابو على ابى اتعلمنى تجارة الهند والدراعات الهندية قلت يا مرحبا غالى والطلب رخيص وديته للهند وعرفته على اكبر مصدر للدراعات الهندية فى الهند ( شيتل )http://www.sheetalindia.com/
وعلمته الطريقة بالكامل من الشراء الى البيع على الزباين
بدايتها نافسنى بالاسعار وغدر فينى كذا مرة لكن ما تعلمت الدرس وما راح اذكر الباقى -- بعدها نافسنى اكثر من 70 محل بالكويت والكل صار يشتغل دراعات هندية -- بعت محلاتى واتجهت على شى جديد -- لانى احب الابداع ولا احب اقلد او انافس احد
فى سنة 2001 اشتغلت على اندونيسيا بشكل مربح اكثر من الهند اشترى جملة كميات كبيرة وابيع جملة بالكامل
جانى صاحبى وصار يتكلم عن خسارتة فى الدراعات وودة يروح معاى اندونيسيا
الوالدة الله يطول بعمرها دايما نصيحتها 100 %
قالت ابعد عن صاحبك --- قلت لا يمه مسكين وما كان يقصد انه ينافسنى فى الدراعات -- قالت كيفك وراح تندم --- بصراحة تجاهلت النصيحة
اخذت صاحبى معاى اندونيسيا وعرفتة على الاسواق وعلى مكاتب الشحن لكن ما عرفته على مصانعى الخاصة اللى انا شخصيا اشترى منها كميات كبيرة استوك
شريت كمية كبيرة ملابس ستوك وصاحبى شرا تحف -- الله يرزقة
ردينا للكويت واحنا بالطيارة سئلنى عن مشترياتى وبلغته ملابس ستوك حاوية بالكامل وبلغته للاسف بالسعر الحقيقي ( وهذا اكبر غلط ) انصدم وقالى معقول هذا السعر تحصلة قلت من فضل الله هذا مصنع الله موفقنى معاة -- قالى بالحرف الواحد هذا كنز -- ما ذكر الله
واحنا بالطيارة الاخ جالس جنبى قلت وخر ابى اروح للحمام -- الله يعزكم -- رحت للحمام وبعد ما رجعت للكرسى لقيت شنطتى الهاندباك على الكرسي ومفتوح نص السحاب -- شكيك وقلت معقوله فتح الشنطة وشاف الفواتير -- لا -- مو لها الدرجه الخسة والنذالة -- طول الرحلة للكويت واحنا ساكتين وحسيت انه مرتبك
وصلنا للكويت وبعد اربع ايام رجع صاحبى لاندونيسيا بدون ما يبلغنى
بعد اسبوع اتصل صاحب المصنع الاندونيسي وقالى تعرف فلان -- قلت اية -- وقف قلبى -- قلت اشفية -- قال شرا منى بضاعه حاوية ملابس نسائية داخلية ب 100 الف دولار = 28 الف دينار كويتى
دقيت على مكتب الشحن الاندونيسى وقلت افلان عندكم قالوا نعم موجود قلت عطوني ياه كلمته وقلت افا يا بو فلان سرقت فواتيرى وخذيت عنوان صاحبي وشريت نفس بضاعتى هذى خيانه مو تجارة -- بكل برود رد -- مو انت بس اللى يجيب ملابس فية ناس واجد وانا ما خذيت فواتير من عندك -- قلت -- اتحدى الف واحد مثلك يطيح على هذا المصنع اللى يبعد 900 كيلو عن جاكرتا -- انت ما تقدر توصله -- صاحبنا من الفرحة مو هامة زعلت او مت اهم شى مصلحتة
والله العظيم اسبوعين وانا مريض من الخيانه -- اخر شى الوالدة بكت عندى وقالت انت مجنون تسوى فى نفسك جذية علشان فلوس -- قلت مو علشان فلوس والله ما يقدر ينا فسنى لان الرزق على الله واذا الله حاب يربحنى راح اربح -- لا كن اللى قاتلنى -- الخيانة --- اعز شخص عندى يغدر فينى -- بعد شهر -- رحت لصديق عمرى عارف الكثيرى فى دبى وشكيت له الخيانه -- قال بس -- الأخو يغدر فى اخوة مو صاحبك -- لا تزعل يابو على الدنيا ما تسوى -- اركب -- وين قال الصين -- قلت مالى نفس -- قال اركب وانا ابو محمد والله لأعلمك على رزقة ما يعلمها الاخو اخوة -- وفعلا سبحان الله -- الله عوضنى بالصين وشريت بأرخص واحسن والى اليوم ما زلت شغال بالصين من أحلى ما يمكن
المهم بعد سنتين من الخيانه ما أواجه صاحبي الا بالمناسبات بس وسلامى لله مو له من طيبى لانه يعتقد انى ما راح اسلم اذا شفته بس لا راح اسلم واكتم جراحى فى صدري
المهم بعد سنتين جانى فى الدوانية واستغربت واخوانى استغربوا لو ما الشيمه كان طردناة من الديوانية بس عيب ما تجى من الرجال اللى يعرفون الاصول
صار يتاسف وانه مو قصدة والكلام الفاضى واحنا اخوان -- جاملتة -- وقلت هذا ثعلب اكيد عندة شى -- وفعلا بعد اسبوع قال تفضل فى مكتبى عندي لك صفقة مربحة واصر وحلف لازم اجى عندة -- وقلت ياالله نشوف شنو يبى بعد ما جيته قال تذكر البضاعه اللى شريتها ب 100 الف دولار قلت ايه قال هذا كل ما املك من فلوس والبضاعه مو مباركه يابو على الى اليوم ما انباعت بسبت فعلتى معاك -- بكل وقاحة يعترف -- قلت المطلوب منى شنو -- قال اشترها بأى ثمن ومتى ما تدفع كيفك -- قلت شفى البضاعه ما انباعت بالعكس حلوة -- قال والله ما ادرى -- انا معاى مندوبى احمد المصري -- قال يابو على ادفع البضاعه ممتازة ومغلفه والطقم النسائى ينباع جملة دينار ونص -- وصاحبك يقول ادفع لو راس المال -- قلت هذا شيطان ما عرض البضاعه الا فيها شى -- كا خبرة فى الاستوكات -- بطلت اول طقم نسائى -- مت من الضحك -- قلت للمندوب -- ما قلتلك هذا خبيث -- قال شلون -- قلت ما لاحظت شى فى البضاعه -- قال لا -- قلت البضاعه قياسات آسيوية ما تمشى بالكويت -- يعنى الطقم النسائى الداخلى ما يلبسة الا الفلبينيات او الاندونيسيات -- وهذى اطقم راقية -- خدمنا ما يلبسون هذا -- انصدم المصرى و صاحبى الخاين -- رد صاحبى باالحرف الواحد -- الخبرة يابو على لها دور --- قلت تبيع ب 1000 دينار -- لان ما يشترى منك البضاعه ولا واحد -- قياسات اسيوية -- طبعا رفض الخاين -- وبعد 6 شهور رد الخاين وقال تعال ابيعك البضاعه --- بس خسارتى بحدود 27 الف دينار كويتى -- رحت لمكتبة وخذيت عينات -- وعرضت البضاعه على كويتى خال زوجته فلبينية ومن فضل الله بعت البضاعه ب 4000 دينار وحطيت فى جيبى 3000 دينار فايدة --- والخال ذكى جدا صدر البضاعه للفلبين مباشرة --- وصاحبنا حرم الروحة لاندونيسيا
وانا بعدها سمعت كلام الوالدة والحين من بعيد الى بعيد سلام وعليكم السلام
واسمحولى اذا ضيقت خلقكم على هذى القصة لانى احب اكتب مواقف احسن بس هذا طلب الاخوان قصة فيها خيانه الله يبعدكم عنها
واتقى شر من احسنت ألية
احذر عدوك مرة واحذر صديقك 1000 مرة​
 
التسجيل
17 أغسطس 2009
المشاركات
2,715
الإقامة
كويتية
احذر عدوك مرة واحذر صديقك 1000 مرة

هذي حقيقة في الحياة لكن مع الاسف لانعمل

بها لاننا نضع دائما حسن النية في التعامل مع الاخرين

فمابالك الصديق ...............

ياما راح نعيش ونشوف في هذة الحياة ...

شكرا لكا اخي...........
 

away1979

عضو مميز
التسجيل
4 يوليو 2008
المشاركات
10,947
الإقامة
Kuwait
سالفتك حلوة :D:)

الله يطول بعمر والدتك :rolleyes:

زين بوعبدالله شدراك لو صاحبك هذا يدري إنك ناجح بمواضيعك عندنا هني:rolleyes:

وبعدين يدخل علينا بنك جديد :confused: ويحط مواضيع شيقه ويخطف الأضواء :cool:

باللحظه هذي شراح تسوي تغير المنتدى :D:p:D:p


احذر عدوك مرة واحذر صديقك 1000 مرة ;)

من بعد سالفتك 1000 ويمكن ماتلحق :rolleyes:

تقبل مروري :)
 

general

عضو نشط
التسجيل
1 أغسطس 2009
المشاركات
1,510
الإقامة
بلاد الله الواسعة (الكويت)
اخوي بوعلي موضوع (التجسس على الفواتير والسعي وراء اكتشاف مصادري) صارت معاي وايد مثل حالتك وتدري الاجابه شنو ؟؟ التجاره شطاره وهذي شطاره مني ان طحت على فواتيرك وكافي بس اخذ الرقم (هذا رد اغلبهم)
 

ابن عمير

عضو نشط
التسجيل
29 سبتمبر 2008
المشاركات
2,870
شكرا على الموضوع ..
على قولة اخوانا المصريين _قلبت المواجع
آآآآخ لو كنت تعلم مابي كنت تبكي دما ..
تحياتي لك ولنفسك الطيبه ..
 

abdullah6868

عضو نشط
التسجيل
3 مايو 2008
المشاركات
6,222
الإقامة
kuwait
احذر عدوك مرة واحذر صديقك 1000 مرة

هذي حقيقة في الحياة لكن مع الاسف لانعمل

بها لاننا نضع دائما حسن النية في التعامل مع الاخرين

فمابالك الصديق ...............

ياما راح نعيش ونشوف في هذة الحياة ...

شكرا لكا اخي...........
يا مرحبا شكرا على المرور الطيب

سالفتك حلوة :d:)

الله يطول بعمر والدتك :rolleyes:

زين بوعبدالله شدراك لو صاحبك هذا يدري إنك ناجح بمواضيعك عندنا هني:rolleyes:

وبعدين يدخل علينا بنك جديد :confused: ويحط مواضيع شيقه ويخطف الأضواء :cool:

باللحظه هذي شراح تسوي تغير المنتدى :d:p:d:p


احذر عدوك مرة واحذر صديقك 1000 مرة ;)

من بعد سالفتك 1000 ويمكن ماتلحق :rolleyes:

تقبل مروري :)
منتدانا طيب باالى فية
ما نغير بيتنا الثانى
شكرا على مرورك الطيب

اخوي بوعلي موضوع (التجسس على الفواتير والسعي وراء اكتشاف مصادري) صارت معاي وايد مثل حالتك وتدري الاجابه شنو ؟؟ التجاره شطاره وهذي شطاره مني ان طحت على فواتيرك وكافي بس اخذ الرقم (هذا رد اغلبهم)
الله يبعدك عنهم
شكرا على المرور الطيب
شكرا على الموضوع ..
على قولة اخوانا المصريين _قلبت المواجع
آآآآخ لو كنت تعلم مابي كنت تبكي دما ..
تحياتي لك ولنفسك الطيبه ..

مبين عليك مجروح الله المستعان
احد على ربعه شجرة مظله -- واحد على ربعه سموم ولواهيب
جدى الله يرحمة عندة مزارع وقصور فى المنطقة الشرقيه --- حزم ام الساهك --- يوم كانوا الناس فى فقر -- وكان يعطى ولا يرجى شى سوى رضى الله سبحانه يفعل ويحذف فى البحر
واحنا اتبعنا الطريق --
لا تلتفت للردى اعمل بما يرضى الله ويرضيك
مشكور على مرورك واسمحلى جددت جراحك
 

نواره1

إلغاء نهائي

والله يا بو علي .. موقف مو سهل ... خاصة لما يجيك الغدر و الخيانه من أقرب الناس ........
الصدمه من الخيانه طبيعي إنها تضعف من أصابه سهم الغدر ... لكن هذا الضعف بعد فتره ينقلب خبره و قوة و ثبات ...

و هذا ما يكون إلا للي إيمانه بربه قوي ... وعنده عزيمه للمواجهة والتحدي ...
و عز الله ما هو بعيد عنك .....

الله يعزك يا خوي .... و يوفقك .....

تحياتي لك ،،،،
 

abdullah6868

عضو نشط
التسجيل
3 مايو 2008
المشاركات
6,222
الإقامة
kuwait

والله يا بو علي .. موقف مو سهل ... خاصة لما يجيك الغدر و الخيانه من أقرب الناس ........
الصدمه من الخيانه طبيعي إنها تضعف من أصابه سهم الغدر ... لكن هذا الضعف بعد فتره ينقلب خبره و قوة و ثبات ...

و هذا ما يكون إلا للي إيمانه بربه قوي ... وعنده عزيمه للمواجهة والتحدي ...
و عز الله ما هو بعيد عنك .....

الله يعزك يا خوي .... و يوفقك .....

تحياتي لك ،،،،

مشكورة اختى نوارة
كلام مية مية فعلا بعد سنه تشجعت وضغط على النفس وكل شى يتعوض الا الانسان وليش نزعل الزعل ما يجيب نتيجة ويجب ان نتحمل نتيجة افعالنا سواء زينه او شينة
شكرا على المرور الطيب
 

Balloons Shop

عضو نشط
التسجيل
11 سبتمبر 2009
المشاركات
1,377
الإقامة
أسواق القرين
بالمبارك المؤسسة ، وإن شاء الله التوب على كل الكويت
النية صافية والكلام صادق ورضا الوالدين توافيق من رب العالمين
عسى ربي يجعلك من ذو الحظ العظيم .
 

abdullah6868

عضو نشط
التسجيل
3 مايو 2008
المشاركات
6,222
الإقامة
kuwait
بالمبارك المؤسسة ، وإن شاء الله التوب على كل الكويت
النية صافية والكلام صادق ورضا الوالدين توافيق من رب العالمين
عسى ربي يجعلك من ذو الحظ العظيم .
الله يجزاك كل خير ويجعلك من الرابحين فى تجارتك
وانت ابدعت فى تجارتك الله يرزقك وانا اشجعك واحب كل مبدع وارجو انك تتابع كل جديد فى اسيا عبر الرابط التالى
www.alibaba.com

تسجيل حضور

أسأل الله أن يوفقك ويرزقك أكثر
الله يجزاك كل خير
ومشكور على المرور الطيب
 

هامور 2000

عضو نشط
التسجيل
7 نوفمبر 2007
المشاركات
1,776
و الله يا الحبيب الخيانه ما تيلك الا من اللي ما تتوقعه

و هذي التجاره للاسف وايد ناس فاهمينها غلط

حسبالهم صج التجاره شطاره و نسوا ان الرزق بأيد واحد احد

و اذا ما نقرصت ما تتعلم الدنيا مدرسه و انا اخوك

و اللي يسون هل حركات ما يفكرون ان لودامت لك ما اتصلت لغيرك
 

abdullah6868

عضو نشط
التسجيل
3 مايو 2008
المشاركات
6,222
الإقامة
kuwait
و الله يا الحبيب الخيانه ما تيلك الا من اللي ما تتوقعه

و هذي التجاره للاسف وايد ناس فاهمينها غلط

حسبالهم صج التجاره شطاره و نسوا ان الرزق بأيد واحد احد

و اذا ما نقرصت ما تتعلم الدنيا مدرسه و انا اخوك

و اللي يسون هل حركات ما يفكرون ان لودامت لك ما اتصلت لغيرك

حياك الله طال عمرك
انا احترم المبدع مو اللى يقلد الناس او ينافسهم بارزاقهم
من فضل الله عمرى ما قلدت احد او نافست احد على رزقته
والفرص كثيرة بس خف رجلك وتحرك وراح تتوفق
من فضل الله قبل اسبوعين فى السكراب فية فلسطينى نزل خيام الجيش الامريكى 100 خيمه ستوك شريتهم جمله 1500 دينار بالكامل وعطيت الدلال اللى بلغنى فيهم 200 دينار
ونزلتهم على شارع الوفرة يمكن الكل شافهم اخر خيمة بعتها امس 30 دينار
اذا نمنا اكيد ما فية ارباح بس اذا تعبنا بنحصل خير
الله المستعان
ومشكور على مرورك
 

شجرة العود

عضو نشط
التسجيل
10 سبتمبر 2008
المشاركات
1,816
الإقامة
ديرتي
فعلا الموقف اللي حصل معاك يحصل مع الكثير للأسف في ناس تبي تتاجر على حساب تعب الغير وتبي تصعد فووووق بسرعة وتحصّل غايتها بأي وسيلة كانت حلال أو حرام والعياذ بالله
بس الله سبحانه يمهل ولا يهمل وكل من سلك طريق الغش والخيانة الله يعطيه ويعطيه بس يجيه يوم يخسر أثمن شي عنده وإن ما خسر بالدنيا في وراه الآخرة
عموما انا عندي أكون مظلومة ولا ظالمه واحمد ربك يا بوعلي انك مظلوم بس تأكد دام الله والوالده الله يطول بعمرها راضين عنك بينصرونك وبعوضونك خير ان شاء الله ولا تتحسف على الطيب الواحد يتحسف على الردى ويحاول يصلحه
بس الحذر مطلوب من البعيد والقريب
مشكور عالطرح
 

abdullah6868

عضو نشط
التسجيل
3 مايو 2008
المشاركات
6,222
الإقامة
kuwait
فعلا الموقف اللي حصل معاك يحصل مع الكثير للأسف في ناس تبي تتاجر على حساب تعب الغير وتبي تصعد فووووق بسرعة وتحصّل غايتها بأي وسيلة كانت حلال أو حرام والعياذ بالله
بس الله سبحانه يمهل ولا يهمل وكل من سلك طريق الغش والخيانة الله يعطيه ويعطيه بس يجيه يوم يخسر أثمن شي عنده وإن ما خسر بالدنيا في وراه الآخرة
عموما انا عندي أكون مظلومة ولا ظالمه واحمد ربك يا بوعلي انك مظلوم بس تأكد دام الله والوالده الله يطول بعمرها راضين عنك بينصرونك وبعوضونك خير ان شاء الله ولا تتحسف على الطيب الواحد يتحسف على الردى ويحاول يصلحه
بس الحذر مطلوب من البعيد والقريب
مشكور عالطرح
نعم كلام صحيح
وهذى حيلة الضعيف لان التاجر الناجح هو التاجر المبدع
احنا اكتشفنا اسيا بالكامل من غير مساعدة احد
 

abatchy007

عضو نشط
التسجيل
8 أبريل 2006
المشاركات
1,200
موفق يا بوعبدالله ومبروك على المؤسسة ومنها للاعلى وقصصك ما تطوف اتمنى تسوي موضوع شامل تجمعهم كلهم في صفحة وحده وعقبال ما انشوفلك كتاب فيهم وفيه نصايح للي يحب يبدأ بالتجارة
 

abdullah6868

عضو نشط
التسجيل
3 مايو 2008
المشاركات
6,222
الإقامة
kuwait
موفق يا بوعبدالله ومبروك على المؤسسة ومنها للاعلى وقصصك ما تطوف اتمنى تسوي موضوع شامل تجمعهم كلهم في صفحة وحده وعقبال ما انشوفلك كتاب فيهم وفيه نصايح للي يحب يبدأ بالتجارة

الله يجزاك خير ومشكور على مرورك الطيب
 

الاحمـد

عضو نشط
التسجيل
16 يونيو 2008
المشاركات
1,425
طعنك في ظهرك الخاين

لكن ماراح بعيد مرده يرجع لك يابوعلي
 
أعلى