وين احصل هذا الحجر الخارجي ؟؟

[طارق55]

السلام عليكم

ابي احصل هالحجر .. للقسيمه من برا ..

خارجي مو داخلي .. فيه احد يعرف وين ينباع ؟؟

مع الرقم التلفون .. او الوصف لو امكن ..

نماذج عنه في هذا الرابط :

http://www.superiorstonemfg.com/project_gallery

 

[طارق55]

ان شاء الله نلقي واحد عنده معرفه بهالامور

 

[المتفوق]

ابيات وبالتوفيق إن شاء الله

 

[general]

أخوي ما انصحك تكسي البيت من هل احجار واهم سببين
1- مظهر البيت الخارجي بيكون قمته .
2- سرعه توسيخ وتجمع الاتربه والغبار الخ,,, (لان المسامات بين الاحجار كبيره لما تركبها فوق بعض) .

اذكر مره شفتهم في محلات الشويخ وانت ياي من دائري الرابع المشاتل على يسارك وبنك الخليج على يمينك تاخذ اللفه على اليمين (قبل بنك الخليج) بتكمل سيده وتاخذ ايضا اول لفه يمين وبتلاقي سطره كامله محلات ادوات صحيه وسيراميك (وراهم بالضبط محلات الي تبيع احجار رخام و تلبيسات البيت (الخارجي) ...

 

[نواف25]

السلام عليكم اخوى طارق55
انا تابعت تجربتك مع البناء..البسيطه الأكثر من الرائعه.
أخوى من تجربتك أنا ناوى (إنشاء الله) أبنى فى مدينة جابر ثلاث أدوار دورين سكن والثالث شقتين بدون تشطيب ولا تكييف مع ثلاث واجهات كم تتوقع التكاليف؟
شاكر لك مقدماً

 

[الحريه وطن]

بالعكس هالحجر شكله حلو ومميز

 

[يوسف الشمرى]

السلام عليكم اخوانى اعتقد والله اعلم ان هالحجر يصلح للدول الاوربيه اما عندنا الجو حار جدا جدا بالصيف والغبار والرطوبه اخلصكم كل عوامل الهدم اللى بالدنيا اهنى والله يوفق الجمــيـع

 

[اماني الكويتيه]

السلام عليكم
اخوي روح امغره وشوفه شكثر عندهم
وعسى تلاقي حاجتك
بالتوفيق

 

[Amine33]

أخوي اطلب و تمنى ان شاء الله طلبك مجاب
لتواصل randmconsultants@gmail.com

 

[طارق55]

السلام عليكم

الاخ المتفوق .. حصلت في ابيات هالحجر بس للاستعمال الداخلي وهذا مايتحمل الحراره والشمس براه البيت .. اعتقد هالشئ .. شاكر لك مشاركتك
-------------
الاخ جنرال

بصراحه مافهمت اول نقطه انت ذكرتها واعتقد انك تقصد البيت بيصير يقمت القلب .. اذا كان قصدك هالشئ .. تري هالحجر يتركب لجزء من البيت ويتناسق مع السيجما هذا الي فهمته من مشاركتك فممكن توضيح اكثر .. ماعليك امر
والثانيه .. تري علي حسب الي يركب لك الحجر ان حشاها بالاسمنت بينها وبين الثانيه تبي تظبط ان شاء الله .. واكو ابيوت حطوا هالحجر من اسنين وماشاء الله الي الان مزينه البيت بس بيبيلها تنظيف مكثف .. شاكر لك مشاركتك
------------
الاخ نواف 25
شاكر لك اخوي علي الاطراء وان شاء الله نستفيد كلنا هنا في هذا المنتدي .. بس مافهمتك .. هل انت تريد تبني ثلاث ادوار أسود بس ؟؟ وايضا يعتمد علي بنيانك فيه هوردي او لا لانه مكلف ؟؟ عموما الاسود ثلاث ادوار تقريبا يأخذله من 32 الي 35 اذا كان بدون هوردي .. ولو تذكر التفاصيل اعلمك اكثر ان شاء الله
-----------
الاخ حريه وطن .. نعم .. شكله حلو .. بس لازم تنسيقه مع باقي البيت وهذا هو الاصعب .. لانه احيانا بصير مو حلو اذا ماتناسق مع بقيه البيت .. شاكر لك المشاركه
----------
الاخ يوسف الشمري
كلامك صحيح .. بس يعتمد علي نوعيه الحجر وطريقه تركيبه .. بس اذا توافر هالشئ شكله بيكون مميز .. شاكر لك مشاركتك

---------------
الاخت اماني الكويتيه .. رحت امغره .. شفت نوع واحد بس .. بس بصراحه ماشفت كل امغره .. يمكن جزء منها .. شاكر لك المشاركه
------------
الاخ امين

شنو تقصد .. عندك هالحجر يعني ؟؟ راح اراسلك علي الخاص

 

[الأبطح]

على كثر ماحست في ام غرة والشويخ
ما مر علي هذا الحجر
اخوي انصحك بالسيجما صيانته اسهل ولما تعمل توسعة ما تحتار
لان مع مرور الزمن الحجر يتغير لونه فحتى لو حصلت نفس النوع ماراح
يكون نفس اللون
والله يوفقك

 

[look4lands]

هذا الحجر روعة من ناحية الشكل و بالكويت يحطونه على أجزاء من واجهات البيوت الراقية و العصرية

أنصحك تشوف كم بيت قبل لا تركب ، مثال في بيت بالرميثية على الشارع الرئيس قبال سلوى صفة البيوت قبل جسر الفحيحل كانك رايح بيان ، تلقى بيت رمادي (أو درجة بين الكحلي و الرمادي) مسوي خوش تكسية من هالحجر

و براي يصلح حق سور البيت لأنه يعطي انطباع سور القلاع المبني من حجر طبيعي نفس ما تشوف في اوروبا

و تلاقيه بعد عند حسن أبل بس اعتقد انه غالي حيل ، بس جيك على السعر و عطنا خبر لو ما عليك أمر

 

[ابوسعود555]

تحصله بالشويخ
بس اتعب شويه
موكل شى عالنت

 

[almellyarder]

فمن سكن منزلاً جديداً فإنه يستحب له أن يقول عند نزوله: أعوذ بكلمات الله التامات من شر ما خلق. لما رواه مسلم عن خولة بنت حكيم رضي الله عنهما قالت: سمعت رسول الله صلى الله عليه وسلم يقول: من نزل منزلاً ثم قال: أعوذ بكلمات الله التامات من شر ما خلق، لم يضره شيء حتى يرتحل من منزله ذلك. وهذا يشمل من نزل منزلاً ينوي الرحيل منه كالمسافر، وكذا من نزل منزلاً ليقيم فيه، سواء أكان ملكا له أم لا.
كما يستحب أن يقول: اللهم إني أسألك خير المولج وخير المخرج، باسم الله ولجنا، وباسم الله خرجنا، وعلى الله ربنا توكلنا، لما صح في ذلك من الحديث الشريف، إلا أن هذا الدعاء لا يختص بالنزول لأول مرة، بل يقوله المرء كلما أراد دخول بيته بعد غيبة، وينبغي له أن يتلو شيئاً من القرآن خصوصاً سورة البقرة لطرد الشياطين وتحصين البيت منهم، ففي صحيح مسلم أن النبي صلى الله عليه وسلم قال: لا تجعلوا بيوتكم قبوراً، إن الشيطان ينفر من البيت الذي تقرأ فيه سورة البقرة. ولا فرق في جميع ما ذكرناه بين أن يكون المحل مملوكاً أو مستأجراً.
والله أعلم.

 

[almellyarder]

هل تريد أن لا ينقطع عملك بعد الموت ؟

قال رسول الله صلى الله عليه و سلم (( إذا مات إبن أدم إنقطع عملة إلا من ثلاث , صدقة جارية أو علم ينتفع بة أو ولد صالح يدعو لة )) رواة مسلم .

 

[طارق55]

الاخ الابطح

لا أخوي أنا شفته في امغره بس محل واحد بس .. والمتر مشكل ب 3 دنانير اعتقد والله اني ناسي .. او 6 دنانير وعندي الكرت مالهم بس ماأدري وين قاطه الحين .. بعدين مثل ماقلت .. هذا الحجر تحطه في منطقه صغيره في الفسيمه والباقي سيجما علي قولتك .. وشكرا علي المشاركه

-----------------
الاخ look4lands

كلامك صحيح .. وبروح اشوف البيت الي تقول عنه .. وان شاء الله امر حسن ابل بعد .. وشاكر لك

-----------------
الاخ ابوسعود
بدال مااروح اخبط في الشويخ اسأل اخواني هنا وهما يدلوني اروح سيده مو احسن ؟ وهم بعد اسأل شويخ مافي مانع .. شاكر لك مشاركتك
----------------
الاخ almellyarder
جزاك الله خير علي تذكيرك بالكلام الطيب .. وشاكر لك مشاركتك ..

 

[متوازن]

منو يقول ان هذا الحجر .... جميل ؟؟

اولا هذا الحجر البلغاري الاصل ... مخصص للدول البارده .. والاجواء المعتدله

ثانيا : الكويت مايصلح لها الا السيجما او الحجر الطبزه .. المسمى بالاردني .. او جيري الوطنيه

واذكر شخص.. جاب الحجر البلغاري .. من الامارات وكان سعره زهيد ...وبعد سنتين .. شلعه مره اخرى وحط سيجما .... وانتهت القصه


نصيحه بلاش ... عن التفرنك.. في بعض الاشياء

شكرا لكم

 

[طارق55]

الاخ متوازن

منو قال ان هالحجر بس بلغاري ؟؟ اكو منه بالسوق اردني .. لو تطقه بالمطرقه ماينكسر من صلابته !!

واذا هالحجر مو عاجبك اكو ناس وايد يعجبهم بالنهايه المسأله اذواق

شاكر لك مشاركتك ..

 

[طارق55]

لقيت في امغره خمس انواع متنوعه الالوان .. للحجر العشوائي السوري القوي للاستعمال الخارجي .. قيمته 6.5 دينار ( سته ونص ) للمتر غير التركيب والتركيب يتراوح مابين 2 الي 4

 

[نواف25]

أخوى طارق الله يجزاك خير ويكمل بيتك وتسكنه بالبركه.
أنا قصدى بناء الثلاث ادوار على المفتاح و3 واجهات حجر سورى.
شاكر مقدماً.