افضل عرض انترنت

[انا الفهد]

يا اخوان صراحه الواحد من كثر مايشوف عروض طيبه من قبل شركات الانترنت يقول شئ طيب
لانه فيه تنافس ومافيه احتكار.
لكن فيه امور خفيه لانعلمها الا من واقع تجربه او خبره فنيه مختصه في هذا المجال .
فنرجو من اصحاب الخبره والمشتركين افادتنا .
لكي تعم الفايده.​

​

 

[بحريني1972]

والله ياخوي كلامك صحيح

واتمني اللي عنده خبره بالموضوع هذا يفيدنا

شكرا لك

 

[انا الفهد]

صحيح اخي البحريني لانه لدي صديق كان مشترك بكواليتي نت 1 ميجا وكان النت عنده سريع نوعا ما وفي المعرض الاخير جدد الاشتراك ب2 ميجا ولكن يقول لا يوجد شئ يذكر بالنسبه للسرعه وكل شوي يفصل .

 

[Black]

السلام عليكم
اخوي انا عندي اشتراك كواليتي سرعة 1 ميجا و كنت مشترك قبل على سرعة 256 و لو تسألني عن السرعة اللي اشوفه ان على 256 كان اسرع من الحين ، و فيه مشاكل الخط يوم يشتغل عدل و 10 الخط ميت و كل فترة و الثانية يتعب الخط بالمره و ساعات ينقطع و اذا دقيت على الشركة تلاقي الخطوط مشغولة يعني في مشكلة بالشركة و قليل جدا يقولون المشكلة من الشركة دائما المشكلة من بره او كيبل مقطوع او داعمته باخرة و من هالاعذار اللي ما تغني من جوع و انا سمعت من كذا واحد مشتركين بشركات ثانية يعانون من نفس المشكلة .
نفس سالفة خطوط التلفون النقال مع البياجر ، الخط يتحمل 10 مستخدمين و هم يحملون عليه 100 مو مهم الخدمة المهم الفلوس تندفع .
و في شي مو زين في الكواليتي بالمره ، الحين اذا واحد زبون عندهم و صارله سنوات يشترك معاهم لما يجدد اشتراكه ما يعطونه اي خصومات او حوافز حق الاشتراك على انه زبون مستمر معاهم ، بعكس المشترك الجديد يحصل على هذه الحوافز و الخصومات يعني بالعربي انهم مو مهتمين حق الزباين القدامى ، المهم زبون جديد .
و الله يعين و الله يوفق الجميع

 

[انا الفهد]

اخ بلاك يعجبني صراحتك وآنا قلت ولازلت اقول انه المشكله في العالم اجمع مشكلة قوانين مو مشكله ماليه او فنيه اوصحيه بمعني انه ازمة التجاره العالميه والصحيه (انفلونزا طيور وخنازير وغيره ياي بالطريج ) ازمة قوانيييييييييييين يعني لو فيه قانون حق المتلاعبين بالبورصه والبنوك ومتصنعين والمتسببين بالمراض لما كانت عندنا هذه الازمات . يعني شوية صعاليك يعملون انفسهم خبراء كمبيوتر ويحط ايده باأد متنفذ ويلعب براحته يعني بذمتك سيرفر مايستوعب 1000 شخص يحطون عليه 10000 شخص مو حرام . هذا خاجه باشه كان مطلع لهم قرون واغروه بالثراء والمال واتلاها شوف وينه ,حسبي الله ونعم الوكيل

 

[كوزموز]

ياخوان انا بشترك ديسل وشفت عرض كيمز ..

39 سنه ودبل .. حلو

ولله الصراحه طمعت وقلت انتضر


تتوقعون في عروض اقوى

 

[LS1]

بالنسبة لي انا مرتاح مع بشركة كيمز ... انا اتكلم بواقع تجربة اشترك وياهم اكثر من 3 سنوات

الشركة هذي اذكرها من زمان من التسعينات كانت ضعيفة حيل وكانت شركة كواليتي اهيا

اقوى شركة في هذيك الفترة ... ولكن لما ارجعت كيمز ارجعت بقوة وعروضها اقوى عروض

وبصراحة لمدة 3 سنوات مافيه مشاكل كثيرة .. صحيح في مشاكل اللي صارت قطع الكيبل

وغيره هذي اتحصل في كل شركة ولكن لما تتصل عليهم كافي نفسيتهم زينة ويحلون مشكلتك

بأسرع وقت ... انا اشتركت معاهم من سرعة 512 الى 3 ام بي والحين خلص الاشتراك

وناوي انشالله على 8 ام بي بسعر 600 دينار .... وشغلي كله جيمز في الاكس بوكس

ولا بلايستيشن 3 الاون لاين قوي وبعد تورنت .... مع العلم ان المنطقة اللي انا فيها قديمة ومافيها

الخطوط الجديدة الالياف الضوئية .. وبخصوص العملاء القدامة دائما يعطونهم عروض جديدة...

وللعلم ان شركة كيمز شغلها اكثر شي على الشركات والانترنت حق

استاربكس من عند نفس الشركة .. واذا اشتركت عند كيمز تقدر تشبك

في اي فرع من مقهى استاربكس ابلاش وفي اكثر من 80 مكان في الكويت

تقدر تشبك فيه ابلاش مثل المقاهي و الفنادق وغيرها

ملاحظة : بعض الاخوان يشتكون من السرعة انها موكافية ولا بطيئة

اول شي عليه ان يبدل الراوتر ويحط الراوتر الجديد اللي فيه ميزة فئةال N

وفي راوترات حلوة حق الجيمز علشان فيها اعدادات في الراوتر للجيمز

وقبل كلشي تقدر اتجيك على سرعة النت في موقع speed test العالمي

وتقيس سرعة الداون لود (وسرعة الاب لود اللي تحتاجها في الجيمز)

واذا ماعطاك سرعة اللي انت مشترك فيها يصير الخلل من الشركة

 

[وليد السعيدي]

افضل شركات النت كيمز ..

 

[انا الفهد]

فعلا الكيمز حاليا افضل العروض ولكن الخدمه والدعم الفني ما يندري عنها

 

[هادي33]

اتمنى من الجميع مراجعة هذا الموضوع للفائده العامه ووووشكرا

http://www.indexsignal.com/vb/showthread.php?t=221237

 

[G900]

كيمز هي الافضل حتى من ناحية الدعم الفني

 

[okey]

لو تشابهت الأذواق لبارت السلع ..

أنا أفضـّل شركة فاست تيلكو على الشركات الأخرى .. مشترك معاهم من الـ 2004 وما شفت منهم أي مشاكل ولا غيرة .. حتى لما انقطع الانترنت من قبل فترة في الكويت بسبب كيبلات في البحر أو ما شابه ذلك .. شركة فاست تيلكو ما تأثرت بالخلل هذا بسبب ان لديها كيبل خاص فيها يعني ما تعتمد على شركات غيرها .. على خلاف الشركات الأخرى ..

وسرعه الانترنت اللي تاخذها من فاست تيلكو لا تنقص ابدا .. يعني لو تاخذ سرعه 256 راح تلاقي الداونلود عندك 32 وتوصل مرات 35 .. هذي قاعدة عامه بالنسبة للداونلود فقط قسم السرعه على 8 راح تعرف جم سرعه الداونلود عندك ( 256/8=32) ..

يكون بعلمك بعض الشركات الداونلود يتغير بسرعه .. يعني مثلا الحين 100 وبعد شوي 20 وبعد شوي 5 وبعد شوي 1 وجذي .. يعني مو ثابت ..

وازيدك شغله بعد ان الآي بي مالي ما تغير من الـ 2004 .. وهذا دليل ان الآي بي هذا ثابت لي انا فقط .. يعني ما يتغير كل ما اطفي النت واشغله مرة ثانية .. معظم الشركات ما تتبع هذا الشي بالنسبة للآي بي ..


هذا مجرد رأي .. واختلاف الرأي لا يفسد في الود قضية ..


لكم الود

 

[أبوسعد الخالدي]

السلام عليكم