هبتكووووووووووووووووووا

[نوط بو 1000]

السلام عليكم ..

في مثل يقول : ( تعددت الاسباب و الموت واحد )

صحيح ان هبتكو راحت و راحت معاها فلوس العالم ..

لكن اللي يبط الجبد و يخللي مليون علامة استفهام تدور في بالك هو ان هناك شركات تستخدم اساليب ثانيه للنصب على الناس و تشتغل عيني عينك و مكاتبها في ارقى المجمعات و اصحابها من اكبرها و اسمنها ..

و اكيد اذا مو كلكم اغلبكم وصلته اتصالات غالبا ما تكون من بنت صوتها يقط الطير من السما و تقول لك و ابتسامتها شاقه الحلج : مبرووووك حضرتك فزت معانا بتذكرتين سفر للبحرين او دبي .. و لازم اخذ منك بعض البيانات .. و بعد ما تاخذ كل بياناتك حتى رقم فانيلتك تقوللك لازم تتفضل عندنا تاخذ فكره عن نشاط الشركه و تعطينا من وقتك ساعتين كشرط للحصول على الهديه .. و لازم المدام معاك بعد !!

الزبده انك يالفقير تروح مصدق نفسك انت و المدام و كاشخين على بالكم بحطون صورتكم بالجريده و انتو تستلمون الهديه !! و الحقيقه انهم بهالساعتين يسوون لك عملية غسيل مخ و بقدرة قادر تطلع منهم و انت موقع عقد شقه ( تايم شير ) بقيمة 5 الاف دينار مدفوعين بكمبياله او k net شلون ما تدري !! و ما تستوعب هالشي غير ثاني يوم .. عاد انت يالمسكين على بالك السالفه سهالات بيردون فلوسك اذا هونت و انت تضحك .. لكن بتكتشف ان المعامله اللي حصلتها امس بتلاقي عكسها 180 درجه .. طبعا وقتها لا صوتك بيفيدك و لا ايدك بتفيدك لانك بتكتشف ان هالشركه 3 ارباع موظفينها محامين .... مقطعين السمكه و ذيلها .. يعني لو تروح وين ما تروح ما بتحصل فلس من فلوسك .. و زياده على ذلك راح تكتشف اذا رحت تشتكي ان المحاكم مليانه بالمساكين اللي انضحك عليهم مثلك و مع هذا هالشركه ما تزال تعمل و تحصد المزيد من الضحايا .

خلاصة الكلام ان بعض الجنسيات استغلت طيبة اهل الخليج عموما و استخدمت اساليبها في النصب في مجتمعات مثل مجتمعاتنا الخليجيه المسالمه اللي تحترم الكلمه و تصدق اي شي لانها شعوب صادقه و تتوقع انها راح تعامل بالمثل .. و هالاشكال من حثالة البشر منتشرين حاليا و يشتغلون في مكاتب اكشخ من مكاتب الوزراء و تحت اسم احد الشيوخ لأضفاء المصداقيه في عمل الشركه بعيون المساكين اللي مثلنا علشان نقول لو هالشركه ما فيها خير ما صار رئيس مجلس ادارتها الشيخ الفلاني .. و طبعا هالشيخ ما يدري الشركه شنو شغلها فقط تكون الشركه بأسمه و اقامات هالحراميه عليه و اخر الشهر يقبض منهم مبلغ معين نظير استخدام اسمه كمدير لهالشركه !!

طبعا راح ينط واحد منكم مثل بو مهدي و بيقول شلون تقول هالكلام و تتهم اشخاص بدون ما تكون متأكد .. ردي راح يكون بسيط و سريع .. لان القصه اللي فاتت كلها هي .... قصتي انا !! و الشركه اسمها :

الشركه العالميه للسياحه
مقرها مجمع الخليجيه
الميزانين ( صالة غسيل المخ )
و الدور الثالث ( ادارة افراد العصابه )
و صاحبها مافي داعي اذكر اسمه تقدرون تعرفون منو بطريقتكم

الطامه الكبرى ان هالسالفه صارتلي من سنه و لا زالت الشركه تشتغل مثل الورد !!

والشي اللي يضحك من القهر انهم متصلين علي من كم يوم نفس الشركه و طبعا بصوت مخملي قالتلي : مبروك فزت بدعوه على العشا لشخصين في الفندق الفلاني بس لازم تمر علينا تاخذ فكره عن الشركه و تستلم الهديه !! طبعا انا قاعد اسمعها و اضحك من الوضع اللي صاير بهالديره ..

ما اقول غير الله يحفظ هالديره و اهلها الطيبين من شر الحاسدين و المرتزقه و اسمحولي على الاطاله <--- من القهر والله !!

 

[المراقب4]

الرجاء من الأخوة عدم ذكر الجنسيات تحديدا .. نحن هنا في هذا المنتدى نمثل دولة الكويت ويجب ان نكون على مستوى من التمثيل ولا داعي لذكر جنسية محددة والاكتفاء بالعموميات

وشكرا

 

[بومهدي]

السلام عليكم و رحمة الله

شكراً عزيزي غازي على التوضيح ، نعم كلامك منطقي وهذا أسلوب و ديدن مجموعة من النصابين و لا حول ولا قوة إلا بالله .

الأخ نوط ....

أسمحلي أن أخبرك بأن الوضع الذي شرحته موجود في الكويت و جميع دول العالم ، أعني بهذا أن التايم شير معروف في بلدان العالم ، لكن ، الطريقة التي يتم تسويقها بالكويت و الخليج طريقة غريبة ولا يتم التوضيح للعميل خفاياها.

لعلمك وعلم الأخوان .... انني تعرضت لهذا الموقف مثلك ، لكنني كنت أقاطع الشخص بين الحين والآخر لأسأله عن القيمة المطلوبة .... تعرف ماذا رد علي ؟ قال لي: لازم أكمل أول بعدين أقول لك السعر !!!!!
عندها ضحكت ورحت تعشيت في مكان ثاني .

على العموم ، من منا لم يستلم رسالة غريبة قادمة من أفريقيا أو موضوعها أفريقيا و نيجيريا بالتحديد تطلب منك رقم حسابك بالبنك حتى يتم ايداع ملايين فائضة من مشاريع انتهت، وهناك الكثير من الناس من تجاوب مع هذا الطلب العجيب الغريب، وراحوا ضحية خداع ومكر الأشرار.

أخواني الشر موجود ولا ننكر وجوده ولكم في مدير فرع بنك دبي الأسلامي عبرة وعظة مما قد يفعله الأشرار وما قد ينتج عنه من خسائر. والمحاكم البريطانية تعج بمثل هذه القضايا لأنها دائماً ما يختارها الأشرار للتقاضي أمامها في أية نزاعات تنشأ نتيجة عمليات النصب كما هو أسمها الفعلي ، صفقات غير متممة كما يسميها النصابون.

وفقكم الله ووقاكم شر الأنس و الجن أجمعين.

اخوكم بومهدي

** الأخ نوط : تستطيع بيع ال Time share لكن ينبغي أن تكون حصلت على عقد موثق وموقع من الشركة.

 

[سهم كويتي]

اقتصادي 2005شكرا على التوضيح وايدك في فكرتك ومنطقك

أخواني الشر موجود ولا ننكر وجوده ولكم في مدير فرع بنك دبي الأسلامي عبرة وعظة مما قد يفعله الأشرار وما قد ينتج عنه من خسائر. .

شنو تطلع سالفه مدير فرع بنك دبي ؟

 

[بومهدي]

السلام عليكم ورحمة الله

بإختصار شديد .....

مدير أحد أفرع بنك دبي الأسلامي في دبي " تقدم" بشكوى الى السلطات مدعياً بأن أحد الأشخاص الأفارقة سحره بأداة غريبة وتمكن من تحويل مبلغ كبير من المال أظن والله العالم أنه 220 مليون درهم أماراتي ـ كان ذلك في سنة 1998 - يستطيع الأخوان المهتمين مراجعة هذه المعلومات في الصحف الأماراتية.

بعد الضجة التي أحدثها هذا الخبر سقط سهم دبي الأسلامي بسوق التداول ـ قبل أنشاء البورصة هناك ـ
وقام الشيخ محمد بن راشد آل مكتوم بتغطية المبلغ على مسئوليته الخاصة.

أنقل هذا الخبر على مبدأ ناقل الكفر ليس بكافر وحسب طلب أخونا سهم كويتي .

وفقكم الله ونسألكم الدعاء

 

[سهم كويتي]

بومهدي
كل الشكر على التوضيح والله يعوض على كل اخوانا ولازم نبه بعض على اساليب النصب المنتشرة

نوط بو1000

نفس الموقف تعرضت له مع نفس الشركة لا واسالوني سؤال اول ما اتصلت البنت فيني قالت لي لو سمحت ممكن اسال سؤال راح يحدد تربح جائزة والا ما تربح اذا ما جاوبت طبعا قلت لها اتفضلي قالت لي من هي مرضعه الرسول صلى الله عليه وسلم ؟ طبعا اخوك شاطر وجاوبتها صح بكل ثقه ولما رحت شكيت بالسالفه وقلت لهم اني ناسي البوك طبعا المعاملة تغيرت وظلو يتصلون فيني ليما ملو

اذا احد من الاخوان عنده خبر عن الاسليب الجديدة في النصب يا ريت يقول لنا

 

[نوط بو 1000]

شكرا للاخوه الاعضاء على مرورهم و نصايحهم لكن المثل يقول : اذا فات الفوت ما ينفع الصوت !!
و يا بو مهدي اسمحلي بهالكلمتين ترى انت قاعد تتكلم مثلهم و بمنطقهم و تدافع عن سالفة التايم شير .. لكن اسمحلي اقوللك ان اللي ايده بالماي مو مثل ايده بالنار و انت ما جربت اساليبهم علشان تحكم عليهم .. منتجع الدوحه اللي هالشركه تسوق له شقق بطريقة التايم شير هو مثل قواطي الحليب اللي حطتهم شركة هبتكو بالجمعيات علشان يكون شغلهم على مايه بيضه .. لكن اتحدى اي واحد اشترك بالتايم شير و سافر في هالمنتجع !! يا جماعه صارلي سنه اطبق المثل اللي يقول الحق الكذاب لين باب بيته .. كل ما اقول لهم يالله بسافر يردون علي : واللهي حدرتك دلوئتي في صيانه و للأسف مش حتئدر تسافر !! اقول في قلبي اللهم طولك يا روح يالله ما عليه بسافر في اي وقت انتو تحددونه لي مو مشكله .. لين يومكم هذا ما اتصلو و كل ما اتصل اسأل عن الشخص اللي وعدني اكتشف انه استقال و واحد ثاني مستلم مكانه و يوعدني نفس الشي و العمليه ماشيه !!

الزبده اني فوضت امري لله و انشالله عوضي على الله و هالاشكال و اللي واقفين وراهم لهم يوم انشالله .

ملاحظه للاخ مراقب : انا ما كتبت غير الصج و الواقع و اذا احنا نمثل دولة الكويت عيل لازم نتكلم بديمقراطيه و حريه مثل ما دستور ديرتنا كفل لنا هالشي .. و الجنسيه اللي انا ذكرتها مو غريبه عليهم سالفة النصب و الاحتيال و الكل يدري انها صفتهم الاولى !! انا اقول مافي داعي حق الحذف لان الحمدلله كل واحد فينا رقيب على نفسه و ما ننتضر احد يقول لنا شنو الصح و شنو الغلط لان الحمدلله كلنا متربين و نعرف الاصول .. و في النهايه الصدق و الصراحه ما ينزعل منهم و اذا خايف على اللي في بالي يزعلون انا اقول لهم زعل بو يعل !!

 

[سوق التجار]

نوط بو 1000 كلمني على الخاص.

 

[بومهدي]

صحيح ............

السلام عليكم و رحمة الله

الأخ نوط ....

معاذ الله ان أكون ادافع عن هذه المجموعة ، وأعتذر إذا المعلومة وصلت لك بهذه الطريقة ، يمكن كان الأسلوب غير واضح بالنسبة إليك ـ معذور أخوي لأنك فعلاً ايدك بالنار ـ وأسأل الله أن ينجيك من هذا المأزق و جميع الأخوة الذين تعرضوا لمثل هذه الأساليب.

لأيضاح الموضوع .... هناك من أشترى تايم شير و كان الناس اللي باعوه واضحين و مستقيمين ونفذو العقود اللي بينهم و بين العميل ـ معرض العقار و المال الكويتي ـ وكنت أنا واحد من اللي شرو بيوت في ( أورلاندوـ فلوريدا) ولم أجد صعوبة ، الموضوع كان استشارة محامي مختص ن وتكوين فكرة عامة عن الموضوع. أخوي أخيراً ..... وأحنا اليوم نشتغل في الأسهم هل التعامل في هذا القطاع وتنظيماته الموجودة اليوم مثل ما كانت قبل أزمة المناخ وتوابعها ؟ أرجو أن يكون السؤال واضح ، كما أتمنى أن لا أظهر أمامك بصورة محامي الشيطان ـ أعوذ بالله من غضب الله ـ ولكن ورد هذا المثل لتقريب الصورة.

وفقك الله ورعاك و حفظنا وأياك من شر من لا يخافو ن الله في أموال وأرزاق الناس.

أخوك / بومهدي .

 

[سوق التجار]

نوط بو 1000 أرسلت لك رساله على الخاص أقرأها

 

[كارتير]

الطيور طارت بارزاقها

هذى الشركه لعينه وراعيها لعين واللى يجيها ماعنده سالفه ومسكين وعلى فكره الشركه اسمها المعلن للناس هو (هبتكو) ولكن اسمها بقلب صاحبها (حتبكو) وفعلا ناس واجد بكم منها ....