وين احسن مكان لتنظيف فرش السيارة؟

[المهندسـة]

السلام عليكم
بغيت اعرف وين احسن مكان لتنظيف فرش السيارة؟
اذا بودي السيارة ينظفون الارضيات وجذي؟

 

[Knights]

تبين نصيحتي وعن تجربه شخصيه عندج sts بالري قدام التجاري
شغل عدل ورخيص ب25 دينار وشغلهم ميه ميه جربيهم وراح تدعين لي ان شاء الله

 

[gulffalcon]

كلش بعد موصاحبك صلاح العيدان راعي الجراج فيه المتخصص بتنظيفات السيارات البريطاني للتلميع بشارع الري اللي فيه الحديقه الملكيه بس يصير على اليسار قبل لا توصلين ترفاليو عند كراج الملحم واذا تبين شي ارخص محطة الدبوس اللي عند ستي سنتر وفي شركات تنظف عند بيتج اذا تبين رقمهم قولي ادوره لج واطرشه

 

[المهندسـة]

مشكورين وما قصرتوا
شلون السيارة لازم تظل عندهم والا خلال اليوم تخلص؟

gulffalcon
وين صايرة المحطة اللي تقول عنها؟

 

[Knights]

لا والله لا صاحبي ولا اعرفه وحبيت انصح فيه عن قناعه وعسى الله يوفقه

بالنسبه لسوالج اختي تقعد يوم واحد لانه غسيل كشنات وكل شيء يوم واحد ان ماكو زحمه
وتقدرين تتفقين وياه ان ماكو زحمه تسلمينها الصبح وتاخذينها المغرب او بالليل
وموفقه خير يا رب

 

[mmf]

الجراج فيه المتخصص بتنظيفات السيارات البريطاني للتلميع بشارع الري اللي فيه الحديقه الملكيه بس يصير على اليسار قبل لا توصلين ترفاليو عند كراج الملحم واذا تبين شي ارخص محطة الدبوس اللي عند ستي سنتر وفي شركات تنظف عند بيتج اذا تبين رقمهم قولي ادوره لج واطرشه

نعم هذا اهو برتش اسبيشل = البريطاني ممتاز جدآ​

 

[أبوشيخه]

بصراحه غير الدوليه مالقيت

 

[bosa4u]

نعم افضل شي الدوليه بس لازم حجز مسبق وغالي شوي تقريبا 50دينار مكانه في الشويخ بنفس شارع مطعم كناري قبل كراج النجم الثلاثي

 

[BOSHHAB]

أفضل شي بالحـــوش مد الهوز وناد الصبي ولا الخدامه واشتر قوطيين فــوم منظف فرش من لوازم العايله وتب فيه صابون لولو وفراك وعقبها مسح بكودري ودقها اخلا غسله بالبيت جدام عينك

انا جربت اغسل السيارات من قبل يصير فيها ريحه عقبهم ماكو احسن من البيت

يالله ناطرين السؤال الياي !!

 

[airport]

سوبر سيرفس واقطع

 

[بالول]

المهندسة اسئلتج كله عن السيارات الظاهر عندج محل بشويخ احسن محطه التلميع الدولى او الاوربى بشويخ ب 50 دينار اذا جيب واذا صالون 40 بس راح تشوفين تنظيف وتدعيلى وشكرا للعموم وتحياتى

 

[gulffalcon]

مركز برتش للتلميع لازم تقعد عندهم السياره 24 ساعه بالنسبه للتنظيف الداخلي والتلميع الخارجي والسعر كاملا 45 دينار للجيبات و35 للصالون والتنظيف الداخلي 20 دينار اما محطة الدبوس عند ستي سنتر الشويخ اللي بعد جسر نادي الكويت بكيفان تنظيفها الداخلي اوكيه بس التلميع الخارجي صفر حالهم من حال شارع الزينه لان مكينة البوليش اللي يستعملونها نوعها صاروخ وتخلي الصبغه كلها دوائر مو نفس مراكز التلميع المتخصصه مكاينهم خاصه بالبولش ويتم تغيير قطنة التلميع مع كل سياره مو نفس شارع الزينة ومحطات الغسيل يحللون القطنه من سياره الى سياره بالاضافه الى بوليشهم تجاري لمعته ماتدوم اكثر من شهر لا ويشيل من اللكر شويه وهي ماده تكون فوق الصبغ لحمايته من الجفاف اقصد من الاحوال الجويه وهي الاساس بلمعة الصبغ

 

[gulffalcon]

برتش للتلميع

يكون بالري عند دخلت صفاة الغانم وتكملين بالشارع الى اخره وبعدين ترجعين فيه رتيرن يكون على ايدج اليمين مركز كبير وعنده كله مواتر

 

[Camaro]

برتش سنتر ممتاز بس اخير ايامه قام يخورها عندي سيارتي مره شالو العازل الحراري بالغلط وخليتهم يحطونلي من فيكول على حسابهم ومره ثانيه مانظفوها عدل ورديتها لهم والثالثه اليهال كانوا مشخبطين بقلم بيق على كشن السياره والكشن جلد ماروحوه بس بالاخير شغلهم زين وايد

 

[محمد-المطيري]

برتش الري

 

[ابو يعقوب SS]

ترى ذبحتينا . اول شي توج شاريه سياره جديده على قولتج مسرع وصختيها .. والمشكله انتي تسألين والكل حابب يشارك مشاءالله عليهم خدومين الشباب ... ... واتوقع سؤالج باجر ..(((( بانزين خصوصي او عادي )))). بوراشد شماغ احمر او اخضر