خسران جداً
موقوف
- التسجيل
- 25 أبريل 2006
- المشاركات
- 1,333
انصحكم انكم تخلون قرار الشراء مدروس و بعيد عن الانفعال العاطفي
انصح اللي يبي يقرر يشتري و لا ينطر ، يدرس وضعه عدل و شنو اللي قادر عليه ، و هذا نوع من الارشاد:
1- قاعد عند الوالد ولا تدفع ايجار؟ اذا ساكن عند الوالد و مرتاح انسى تشتري بيت و انطر دورك!
2-كم قاعد تدفع ايجار حاليا (450 مثلا)؟ اخصم بدل الايجار (يعني صافي تكلفة الايجار 300 مثلا.
3-جم مستعد تقط على البيت سواءا اقساط أو مع دفعة اولى (شراء و ترميم) زائد ال70؟ اهني السؤال المهم:
لا تدغدغ مشاعرك و تقول الأسعار صاعدة و لا نازله هذا ماله شغل بالقرار لانه من علم الغيب و انت يهمك انت شكثر مستعد تدفع من جيبك أو من خلال الاقساط (و هو من جيبك على مدى بعيد) على المنطقة و مستوى البيت اللي يرضيك على الأقل، لأنه لو تفكر فيها اذا حصل تغير في الأسعار بالمستقبل كم راح يكون +- 20 الف؟ هذا مستوى التذبذب الممكن و بصراحة ما تسوى تبني قرارك على هالفروقات لانه الوقت يمشي و التضخم ياكل من قيمة الفلوس و الايجارات قاعدة تروح هباء منثور.
أعطيك مثال ، اذا معاشك يسمح تاخذ قرض قسطه 450 دينار أعتقد ممكن يجيبلك 50 الف على 15 سنة ، و اذا عندك مثلا كاش 20 الف صارو 70 الف ، و انت مقتنع اب بيت حكومة بالقرين مثلا اب 130 الف زائد ترميم 10 الف ، اهني تسوى تشتري هالبيت لأنك خذيت بيت كامل و طلعت من الشقة و سكنت فيه و هو لك و فلوسك رايحه حق استثمار بعيد المدى و فرق التكلفة الشهرية 200 دينار مع الكهربا و الماي و تسوى عندك حوش و طابقين و قاعد اب بيتك ( و قسط التسليف انت دافعه دافعه سواء شريت بيت الحين ولا نطرت دورك نفس الشي راح تدفعهم لين تموت).
و اذا قدرت تأجر جزء منه يكون احسن و بهالحالة يكون قرار الشراء فيه توفير لك و استثمار بعيد المدى.
مثال آخر ، انت من الطبقة الأغنى و حاليا ايجارك حق طابق بجنوب السرة اب 600 دينار ، و مرتاح من هالتكلفة الشهرية بس متحسف على الفلوس ، اهني ممكن تفكر تاخذ قرض 70 الف كاملة و زوجتك مثلا تاخذ 50 الف (أو انت تحط 50 الف تحويشة) يكون عندك 120 الف تقدر تتصرف فيها ، يا تاخذ بيت محترم بالعقيلة على 190 الف و تسكن فيه كله أو جزء منه و تشوف صافي التكلفة الشهرية كمقارنة (نفس المثال السابق) ، أو انك تزيدهم شوي و تخصص كاش للايجارات حق مدة البناء و تاخذ أرض بشرق القرين و تبنيها على مدى سنة.
4- الزبدة انت لازم تشوف وضعك و قدرتك المالية و لازم تتذكر انه قرار الشراء مادي بحت و لازم تدرسه على اساس التكلفة الشهرية و الفرق بين القرارين ، و دائما حطلك خط رجعة و خصص فلوس احتياط أو مصدر دخل احتياطي (كمثال دخل زوجتك بالوثيقة و القرض اذا حسيت ان العملية حده حده)
و تذكر انه صحيح ممكن في نزول أو صعود في الأسعار و لكن حسب تاريخ الكويت هذا تذبذب محدود و لا يؤثر على قرارك في الاستثمار على المدى البعيد ، اذا تبي تنطر سنة أو سنتين و تجرب حظك تمام مو مشكلة بس أكثر من جذي لا تنطر و اتخذ قرار حسب وضعك لانه الدولة فيها تضخم مو طبيعي و الدينار قيمته تقل مع الوقت ، و لا تنسى الايجار اللي قاعد يروح عليك مع الوقت (اذا ايجارك 450 يعني ال 300 دينار صافي البدل على سنتين يطلعون 7000 دينار مو شوية)
و الكل كان يتكلم عن العقار و الايجار انه غالي قبل عشر سنين بس قارنه مع الحين راح تلاحظ اثر التضخم مو طبيعي ، تذكر انه العقار بالكويت يتناسب تناسب طردي مع مستوى الدخل و هذا الشي واضح ، على سبيل المثال من كان يتخيل قبل عشر سنين انه كل جامعي معاشه يوصل 1000 على الأقل؟ تذكر سنة 2000 و قارن معاشات الناس مع الحين ، راح تلاحظ انها زادت 100% تقريبا (الضعف) و كذلك العقار زاد 100% تقريبا!
(مثال الأرض كانت بجنوب السرة على 60 الف الحين 180 الف يعني 200% بعد! طبعا لان هالمنطقة جدا مرغوبة و هذا عامل يدخل في الحسبان)
و ارجع عشر سنين قبل راح تلاقي نفس السيناريو و اسال واحد عود عند عايلتك راح يقولك نفس الشي عن التغير من سنة 1980 و 1990!
والله اتذكر انه الدينار كان يسوي شغل بطفولتي حق طلعة وناسة (أول الثمانينات) و الحين العشر دنانير يالله تكفي حق طلعة و هذا تضخم 900% خلال 30 سنة!
أراضي بيان كانت تنباع على 2000 دينار بآخر السبعينات
و كون واقعي أكثر و تذكر انه الوضع الحين أصعب، في بطء في انجاز البنية التحتية و بطء في التخصيص و توزيع القسائم بشكل مخيف اذا اعتبرنا نسبة زيادة عدد طلبات الاسكان! 7000 طلب جديد كل سنة و الحكومة قاعده تخصص قسايم قابلة للبناء (و ركز على هالشي انها قابلة للبناء) بمعدل يقل عن 1500 قسيمة سنويا ، و يوجد اكثر من 80 الف طلب عالق!!!
و تذكر ان الأراضي تحتها بحر من النفط و قالولك مؤخرا النفط موجود و يكفي اكثر من 300 سنة ، و هالاراضي ما راح تزيد و الكويت ما راح تكبر بس الشعب قاعد يزيد.
يعني الحسابات بحد ذاتها مخيفة ، و هل انت ضامن ان الحكومة راح تعطي ال 70 الف في المستقبل؟ و هل انت ضامن ان الحكومة راح تستمر في بدل الايجار؟ و هل انت ضامن ان تكلفة البناء ما راح تتضخم مع الوقت؟و هل و هل...؟
و لا تصدق الحكومة و لا تقولي الحكومة راح توفر و راح تسوي كذا و كذا كلام فاضي ، الحكومة المحتكر الأساسي و شوف لعبتهم اهي لعبة منوبولي! الف قسيمة اهني و 500 قسيمة اهناك و حول هاذي القطعة قسايم و هذا الحجي الفاضي ، لو يبون يحلون المشكلة الاسكانية جان حلوها خلال أشهر معدودة! و المليارات مو لك ( الصراحة ضرورية ولو مؤلمة ، الحكومة ما تهتم فيك! بس تهتم انها تعطيك على قد انك تعيش في حاجة دائمة من غير لا تكون مطهد لدرجة انك تفكر في شي موزين)
ولا تقارن الاسعار مع الدول الاخرى و اذا تقارن قارن بشكل منطقي ، و اذا تبي مقارنة مخيفة و واقعية قارنا مع البحرين! اسعار بيوتهم تقريبا نفسنا و ماعندهم ال 70 الف و تعتبر دولة خليجية فقيرة نسبيا!
ولا تقولي الخفجي ما الخفجي ، تبي تعيش في الخفجي؟ لو كنت تبي جان رحت اهناك و هني يتمثل فرق السعر في العقار ، معظم السعودية الشقيقة لا تقارن مع الكويت و هذا سبب الفرق في الاسعار ، و لكن اذا قارنتنا مع جدة مثلا تلقى تقارب في اسعار البيوت، ليش؟ بسبب تقارب مستوى جودة الحياة ( وجرب تبحث عن عقار في جدة راح تنصدم انهم نفس طقتنا)
و اذا قارنتنا مع اوروبا أول شي قارن موقع العقار و قربه من أماكن العمل و مساحة البناء و راح تلقى ان احنا بخير و نعمة! و لا تقارن مع أرض فاضية على جبل أكيد ارخيصه لان الظروف تختلف اهناك (تكلفة المواصلات و البناء و التدفئة و الضرائب و كل هالأشياء عالم ثاني)
شوف اليابان و الدول الغنية من اوروبا و راح تلاحظ ان معظم الناس ساكنة في شقق ، و الكويت جاي دورها و لا أعتقد ان من الغريب انه تملك البيت أصبح حلم بعيد
و أخوي انا ابي الخير لك و اتمنى نزول الاسعار و احب الخير للجميع و لكن هذا لا يعني اني اسكت و ما أبين الواقع اللي احنا فيه ، و ما عندي أي فائدة من هالمشاركة نهائيا ما عدا محاولة فعل خير باذن الله
الواقع ان من الصعب جدا جدا انه يكون في نزول معتبر في المستقبل القريب او البعيد مالم تحدث معجزة أو كارثة بهالديرة!
اذا ابني قرارك على أساس قدرتك المادية الحالية بعيد عن الأحلام و الأمنيات
موضوعك طويل و دراستك فاشله مع احترامي لك. شهالشقه اللي ب450 دينار؟ اللي مأجرها مجوي على مخه
بعدين ادفع اللي وراي و دوني على شان اشتري بيت حكومه بالقرين؟ واقعد اقاسط 15 سنه ومشقوق شق وادفع كهربا وماي. لا يبه اسكن اجار ب10 سنين ومرتاح على الاخر ولا ادفع غير الاجار وانطر الحكومه تعطيني ارض وابنيها بنيان سنع ومحترم وشغل عدل. بعد عشر سنين اسكن بيت انا بانيه وبتصميمي واختياري ولا ادفع 15 سنه اقساط على بيت حكومه.