السلام عليكم ...
حسب طلبك في أساسيات لشراء سيارة تستفيد منها وترتاح وفي وقت البيع تبيعها بخساره بسيطه ( وكافئ نفسك بالافضل )
1- شراء سيارة مستعمله تكون بحاله ممتازه وغير مصبوغه .
2- يكون جيب ، غالبا يكون جيب وليس صالون لأن عليه أكثر من طلب لكن لا بأس أن الصالون يريحيك أكثر.
3- شراء سيارة لا تقل عن 2008 ( لأن الشريطيه الحين يبون سيارات تنباع بالعراق والسعوديه وتحت 2008 ما تدخل العراق )
4- قبل الشراء أذهب وافحص عند الرمال الذهبيه الي بشويخ واخذ تقرير كامل مدفوع الثمن خشه عندك والتقرير يطلع بالعربي .
5- دراسة الوضع للوكالات وأحذر شراء سيارة يكون باقيلها سنه أ
و سنتين ويتغير شكلها ، يعني الحين بورش كاين السنه الجايه راح تنزل اصدار جديد وهذا راح يطيح سعر الي قبله بالتأكيد وبشكل ملحوظ .
6- أبتعد عن القول بأن تيوتا بيعها زين لأن تيوتا بيعها زين عند ناس معينين وهذا خطأ أنت لازم تجمع بين كل الرغبات إليك السيارات وخاصتا ان حاليا سمعة تيوتا عالميا انهارت بسبب سوء الصناعة وعلاة إلى هذا كره الناس للساير وخداعه لهم ( وللعلم حاليا رغبات السعوديه كله امريكي ) .
السيارات الي ما عليها كلام وتطمن عند شرائها شرط تكون مستعمله ! :-
1- لاند كروزر مفصخ ( وتحط الزوايد الداخليه عليه إذا انت حبيت ) شرط ان يكون الموديل من 2008 إلى 2009 !! لأن الموديل الي تحته خلاص صار قديم وموديل 2010 سمعنا ان فيه مشاكل بالكمبريسور ومشاكل اخرى
2- يوكن عادي أو يوكن دينالي وارد الوكالة ( أبيض - أسود - عنابي ) مع إضافة زوايد يفضل فوق 2008 يعني 2009 أو 2010
3- تاهو lt وليس ls وارد الوكالة ( أسود - عنابي ) وركب عليه زوايد حماية وتلبيس أرضيات وهذا تسويه حق أي جيب يفضل فوق ال 2009
4- كابريس ls ( لون الابيض أو الاسود ) يفضل فوق 2007
5- جارجر دوج العادي ( وارد الوكاله - أو وارد أمريكا ) يفضل فوق ال 2007
6- فورد أسكبديشن ( شرط تاخذه بحالة جدا نظيفة وألون معينه ) يكون فوق 2008 لكن لازم تاخذه بسعر حلو من البدايه لأن اهوه اصلا رخيص
طبعا توجد جيبات جديدة وموديلات اخرى وانواع اخرى لكن انه اكلمك عن شي إذا أخذته مستعمل تستانس منه وما تخاف وقت البيع شرط يكون مستعمل .
بقول كلام لكن من وجهة نظري ومن مراقبتي لها بأستمرار (( يا جماعة الــ المرسيدس والبي أم دبليو والرنج روفر والبورش من افضل السيارات وراحه وأمان وثبات مو طبيعي وكل شي أوكي لكن تره بوقت البيع اطيح من نص سعرها ألا أحيانا أحيانا تلقه واحد شراي شراي يعطيك سعر حلو فيها مثلا
BMW X6 سعره بالوكاله 2009 22.500 روح بيعه الحين ! قولهم ببيعه ب 17 ألف مثلا ورني ويهك إذا أحد دفع 17 على مستعمل أصلا منو عنده 17 الحين لوول
مرسيدس ML تاخذه من البشر مستانس وكاشخ ويكون AMG بسعر 24 ألف حلو روح بيعه إذا يابلك اكثر من 16 لك حق علي هذا إذا لقيت احد يشتريه منك يعني
الرنج روفر يعني شوي أرحم منهم لكن مشكلته ان اصلا سعره غالي فلازم يطيح سعره
البورش كاين سعره شوي فيه لكن بدخول 2011 صارت لخبطه كبيره في خصوصه
الحووت s350 سعره هم شوي فيه لكن مضطر انك اطيح من سعره وايد لأن محد الحين يدفع 20 او 25 على مستعمل أصلا السوق تعبان وايد وحتى لو تحسن بعدين سيارتك صارت خنزيره
في سيارات صالون ألمانيه لها شوي مكانه وسمعه حلوه
الفئة الخامسه من الــ BMW الي يكون 2008 و 2009 ويمكن 2010 لكن تغير شكله
الـ 460 LS لكزس
الحوت 350 S
الفئة السابعه من الــ BMW شرط الجديد الي يكون 2010 و 2009
تلخيص الكلام لا تشتري ألماني وتقول ببيع ولا تشتري تيوتا علشان بس تبي تبيع لفئة معينه من الناس ( أشتر الراحه في السياقه وفي البيع )