يا جماعة شنو الفرق بين لاندكروزر 6سلندر و8سلندر

[بث مباشر]

السلام عليكم

يا اخوان شنو الفرق بين لاندكروزر 6سلندر و8سلندر لأني شريت واحد 2010 وابي اعرف الفرق وانا ماني راعي سفر ولا خطوط وهل احتاج 8 سلندر ولا كفاية علي 6 سلندر ارجو الافادة من الاخوان


الله يباركلي فيه ويعطيني من خيره ويكفيني شره قولوا امين يا وجيه الخير

 

[خالد32]

اخوي العزيز الجديد وبعد نزول جي اكس ار 8 سلندر انهى ال6 وماقمنا نشوفه وحتى سوقه طاح وانا مثلك ماني راعي سفر وبغيت اخذ 6 ونصحوني العالم كلهم ان اوخر عنه لانه ثقيل وماكو عزم ومزعج وال8 طلقه وان بغيته خط اوبر عزمه افضل بكثير لوتلاحظ محد يقرب صوبه السته واذا عندك راي ثاني انصحني وانا ان اقتنعت احتمال اخذ 6 لان سعر الثمانيه مرتفع شوي

 

[sunkist_q8]

8 سلندر ولا تفكر بغيره

لانه سياره بحجم الاندكروزر مو معقوله بتمشيها المشي الي يريحك مكينه بحجم مكينه الكامري ؟؟

ومثل ما قال حجي ماكدوندز ( الكبير يبي كبير )

 

[بومحمد المطيري]

مايبيله أكييد 8 سلندر أفضل بالأستعمال وبالبيع

واذا بخاطرك 6 سلندر خذ قير عادي نصيحه

 

[بث مباشر]

انا اخذت ٦ سلندر ٢٠١٠ قصدي انا ماني راعي سفر ولا خطوط ولا بر يعني داخل الديرة وبس هل راح ارتاحله ولا بتصادفني مشاكل مع ان يوم شريته كلمت البايع وقالي الفرق بينهم الفزة وبس وبعدين ٨ سلندر اغلا من ٦ سلندر ب ١٠٠٠ دينار

 

[غير محظوظ]

ياخوي انا عندي 6 سلندر وما اشتكي منا هذا لاندكروزر مايهمه شي

 

[Duke wahid]

انا ماحب اللاندكروضر بس موضوع حرني ولازم اجاوب

من طلع اللاندكروضر من سنه 19وحطبه وهو 6 سلندر والجماعه والربع داقينه دق بر ووديان وجبال

وبحر وجو والكل يمدحه ومحد يذمه

والحين لما طلع ال8 سلندر صار ال6 سلندر كوخه وثقيل ويلوع الجبد

وصدقني راح يركبون مكينه جديده 4.6 بالموديلات الجديدة وساعته راح يطلعولك

الفاهمين والمحنكين يقولولك لايحوشك تاخذ المكينه 8سلندر القديمه ويعذربون فيها

الكويت بلد منبسط جغرافيا لاجبال ولاوديان يعني 6سلندر كفاية

الله يباركلك في الموتر وتكسر بالعافية

 

[بوعبدالجليل]

اذا الموتر مافيه حنه وممشاه زين وماتشوف فيه شي تعور راسك ليش خصوصا انك خذيته وخلصت
لاتسأل وايد تضيق قلقك
المفروظ تسأل قبل لاتاخذ

 

[ابن ضعيان]

الفرق سلندرين مافيه غيرهم
والحالة النفسية لدى البشر ... وعلى قولت أحد الأخوة اللاند من يومه وهو 6 سلندر والثمانية لزيادة مبيعات الجيب

 

[بو شيشه]

لو فيه 4 سلندر همن ما يهم ولا مشكله
هذااااااااااااا تويووووتا لاند كروزر غني عن التعريف يالحبييييب
دامك الحين مو متأذي منه بشي؟؟؟
خلق قنوع بنصيبك واتفائل بالخير و اتأكد انك راكب موتر فزاع ...... اذا كان موضوعك عن الباترول او الرنج ؟؟.... اي شي ثاني...يختلف هني الحجي
بس خلك مصحصح تراه لاااااااند دق سلف وانت مطمئن ان شاء الله
"" لاند كروزر.....للفزعه والأناقه مفهوم اخر ""

 

[am7]

أكبر فرق بينهم و هو أهم فرق في جيوب الدفع الرباعي
و هو العــــزم torque

بالنسبه لمحرك 4.6 لموديل 2010 على التوندرا في أمريكا أفضل لسبب رئيسي مهم جدا
مع أنه أصغر من 4.7 الا أنه يصل لأقصى عزم عند أقل دوران من المحرك , يعني يعمر اكثر بأقل جهد على المحرك , بالتأكيد أفضل من 4.7 و يعمل على تقنية i-Force نفس تقنية محرك اللكزس 5.7​

 

[khaled777]

اخوي كان عنده 6 سلندر وسافر عليه

وحلف مايقعد عنده يوم لما يرد , اول مارد الديره

باعه لاول سوام : )

اعتقد انه ماينفع بالسفر بس !!

والله يوفقك .

 

[خسران جداً]

بسم الله الرحمن الرحيم

اخوي سوق الموتر قبل لا تشتري على شان مايصير بذمة احد وتكون مقتنع بالشراء

انا عندي لاندكروزر 6 سلندر 2008...قاومت لاندكروزر في اكس ار 8 سلندر موديل 2006 والله اني طلعت عليه...وشقيته شق بعد...وسقت جيب لكزس 2007 وقلت لراعيه نفس قومة سيارتي وقاومني والله انه استحى وقال لا ماني مقاومك وشفته مره بالشارع وقلت له دوس؟ استحى والله.

السته سلندر الجديد نفس ال8 سلندر القديم او احسن منه بشوي.

بخصوص البانزين انا يقعد عندي 800 كيلو متر واعبي مره ثانيه وسافرت عليه ومن احسن ما يكون بجميع المقاييس ولا نقدت عليه بأي شي

ولكن لما سقت ال8سلندر مال صديق لي بصراحه كان طياره وأعجبني بصراحه ولكن من ناحية صرف البانزين اعتقد انه يصرف اكثر. انت أسأل عن صرفه وشوف...انا اعبيه فل يقعد معاي 800 كيلو وخرده.

أما من ناحية القومه والفزه والعزم....ترى الجديد غير عن القديم وانا اقولك ومتأكد من كلامي بأن ال6سلندر الجديد احسن من ال8سلندر القديم. وجرب و راح تتأكد من كلامي

 

[خالد32]

اذا لايعه جبدك اومتحسف انا افتح بابه 11 شرط الفحص

 

[BOSHHAB]

اخوي انا خابر الي بيشتري يسال قبل لا يشتري مو يشتري وبعدين يسأل

عموما اعتقد انك توفقت بالاختيار لان ال 6 افضل من ال 8 بكل شي تقريبا

والله يعطيك خيره ويكافيك شره

 

[ADEL ALAZMI]

8 سلندر ... هذا جيب لازم عزمه يكون قوى .. وشووف الــ 6 سلندر ماحد ياخذة وسعرة ارخص

8 سلندر

 

[بث مباشر]

مشكورين والله يعطيكم العافية انا مو متحسف عليه اكيد من شريته بس حبيت اعرف شنو ألي سوقه ماشي اكثر ٦ سلندر ولا ٨ سلندر فقط وعرفت وانشاء الله ما راح اندم علي شريته
وشكرا مره ثانية