مواقف حصلت فى عالم التجارة ----- 21

[ميكانيكي]

خوش قصه

تسلم بو علي

والله يوفقك يا رب

 

[الاحمـد]

انت قلتها يابوعلي النيه الصافيه والخوف من الله

اهم شي هذول

والله يوفقك ان شاء الله وين مارحت

 

[abdullah6868]

السلام عليكم

يعطيك العافيه طال عمرك والله القصه حلوه واعجبتني والله سبحانه مايبي الربح حك الانسان اللي

خانك يبي الربح حك الرجل اللي شاركك ويستاهل والله يرزقه ويرزقك انشاالله

بس يالغالي ثاني مره اذا جبت سيارات من امريكا لاتنسانى عندي سكراب بيع علي ترى اشتري منك ) لا تبيع

عالافغانستانيين الكويتي اولى ,,,, واتوقع ان ماخذين من عندك يوكن صح لان اللي باع قال

قرقانيين بالباخره عموماااااااا ترى شراي اي شي حولك للبيع ترى نبي يوكن - جمس - جيب

تويوتا - اسكاليد -وانيتات -جيبات -سفاري - بوشنب بلغني وهذا رقمي

معاك ابوحمود/// 99555741

هذا ايميلي/// haybosa@hotmail.com

هلا اخوى ابو حمود ان شاء الله اي صفقة تعرض على ابلغك
تستاهل طال عمرك كل خير الله يوفقك

 

[abdullah6868]

خوش قصه

تسلم بو علي

والله يوفقك يا رب

هلا بالامير
الله يرحم والديك ومنورنا طال عمرك بمرورك الطيب

 

[abdullah6868]

انت قلتها يابوعلي النيه الصافيه والخوف من الله

اهم شي هذول

والله يوفقك ان شاء الله وين مارحت

الله يجزاك كل خير طال عمرك
منورنا يا امير بمرورك العطر

 

[abdullah6868]

مواقف حصلت فى عالم التجارة ----- 23

غرائب التجاره

فى سنة 1998 تقريبا كنت فى الهند فى بومبى منطقة ناكبره مدينة المسلمين فى فندق اسمه ساغر رابع يوم من اللف والدوران بحث عن الفرص التجاريه الصبح الساعه 7 تقريبا صحانى من النوم موظف الفندق وقالى فيه تجار يبونك فى الرسبشن وبعد ما لبست وتجهزت نزلت تحت الا 8 اشخاص تقريبا اشكالهم من عصابات المافيا ومعاهم حمايه وبعد مارحبت فيهم سئلتهم شنو تبون رد على كبيرهم وقالى عندنا عرض تجارى لك يفيدك ويفيدنا , شنو عرضكم قالوا بضاعه عباره عن 10 حاويات 40 قدم استوك خامات . رديت عليهم انا ما اشتغل بالخامات , قالوا السعر مغرى جدا وفيه فايده , المهم وافقت وثانى يوم ابعثوا لى سياره شالتنى من الفندق واتجهنا الى منطقة الاستوكات , ( تربور ) تبعد حوالى 6 ساعات بالسياره عن بومبى ووصلنا مصنع كبير جدا وطلعوا الخامات وهى عباره عن رولات خام جميع الالوان الفاتحه لاكن الخامات هى شيفون تستخدم بطانه داخليه للدرعات النسائيه لاكن النوع الردى جدا والتعبان , قلت هذى الخامات تعبانه جدا
قالى التاجر شوف عرضنا
قلت تفضل
قالى سعر الكرتون شد 50 رول والرول 26 يارد = دولار واحد = 300 فلس للكرتون
يعنى سعر الرول الواحد = 6 فلس كويتى
انصدمت من السعر وقلت ابقلبى فيه شى فى هذى الصفقه مستحيل
ما جاملت الهندى وقلت له بلغنى شنو القصه وانا ادفع لك الحين
قالى لما توصلك البضاعه الكويت ابلغك القصه
قلت ما اتفقنا ولا راح ادفع ومع السلامه ردنى لفندقى لو سمحت
قالى منو قالك ادفع
ادز لك البضاعه عن طريق ال سى ( ضمان بنكى يضمن حق الطرفين متبع عالميا )
ولاكن الفاتوره راح اكتب فيها انك دافع 10 مليون دولار واستلمنا منك المبلغ والباقى هو = 3000 دينار
ما استوعبت اللعبه كلها وقلت بقلبى راح اوافق واتركه يولى هذا مجنون او عنده شى غريب ما نى عارفه
رديت عليه بالموافقه , وقالى عطنى صوره من رخصتك التجاريه وعنوانك بالكويت علشان ابعث لك البوالص واحساب البنك واسم البنك = وفعلا عطيته ومشيت
طبعا نسيته لانه مجنون وعرضه خيالى
بعد ما وصلت الكويت ب شهر تقريبا دق على بيت التمويل الرئيسى بشرق عند موظف مصرى مسؤل عن معاملات ( ال ال سى )
وفعلا رحت للموظف استقبلنى استقبال ممتاز واحترام غير عادى وقالى سيد عبدالله وصلت لك 10 حاويات من الهند وان التاجر استلم منك 10 مليون دولار والباقى 3000 دينار فقط قلت بقلبى اشوفك اهتميت حسبالك انى مليونير لو تدرى انا شخص عادى كان ما اهتميت لاكن خلك على عماك
صراحه انصدمت وقلت هذا مجنون او البضاعه فيها ممنوعات
قلت للمصرى ما راح استلم البوالص وراح ارد لك خبر بعد يومين
دقيت على صديق عزيز على من موظفين الجمارك وقلت له الموضوع بالكامل والقصه الحقيقيه , مات من الضحك وقالى من صجك يابوعلى قلت اى والله , بس شنو رايك انا خايف حيل من الموضوع كله شنو اتشير على علشان اضمن حقى لو كان في البضاعه ممنوعات
قالى الموظف الصديق اكتب كتاب للسيد مدير عام الجمارك بطلب معاينة البضاعه قبل اصدار بيان جمركى , وفعلا كتبت كتاب وتم الكشف على الحاويات وطلعت نفس الخامات اللى شفتها , اهنيه ارتحت
وفعلا تم عمل بيان وتم دفع الجمارك واستلمنا الحاويات وخزناها كلها فى بيتى وعرضتها على تجار الخامات ولكن للاسف ما فيه احد سام البضاعه حتى بدينار واحد لردائة الخامات
طاحت البضاعه ما انباعت
وجانى شخص سورى وقالى تبيع الرول ب 50 فلس
وفعلا بعتها وربحت مبلغ ممتاز
تدرون شنو صار
انباعت البضاعه بالمفرق الرول ب 100 فلس للعالم كلها بالكويت واللى شروها استخدموها للزينه فى المدارس والبيوت , يمكن مرت عليكم
شنو قصة البضاعه و 10 مليون دولار
التاجر الهندى فعلا دفع حق نفسه 10 مليون دولار واخذ مقابلها 25 % من القيمه من الحكومه الهنديه مقابل حجز 10 مليون دولار فى البنوك الهنديه لمدة 6 اشهر وهذى لعبة التجار الهنود ( اكسبورت )
الهندى لو عطانى البضاعه بلاش اهو اللى ربحان
وهذى قصة الاكسبورت

للفايدة اى شخص فيكم يشترى اى بضاعه من الهند ( يطلب شرائها اكسبورت ) علشان يشحن بلاش وياخذ خصم 10 %​

 

[بو شيشه]

مشكور عالقصة المفيدة
ومنكم نستفيد

 

[ريّس نفسه]

الله يحفظك يا بوعلي يمعود ديررر بالكـ ولا سالفة طلعتك معاهم 6 ساعات الى المخازن.. ما فكرت بخطورتها؟

 

[khalid592]

ماشاء الله عليك يابوعلي .. بس ابي اعرف .. انت من قلت بضاعه 10 مليون راح بالي بعمليه غسيل اموال نفس الطريقه هذي على ما اعتقد ..

 

[المغامر_1986]

مشكور على الجزء الجميل جدا والسرد الرائع

لكن يعني لو مثلا واحد يبي يشحن من الهند كاونتر يشحنه ببلاش للكويت ؟؟!!!

مافهمت هالنقطه اتمنى تششرحها لنا بالتفصيل علشان جميع الاخوان يستفيدون

وجزاك الله خير

 

[::فزاع::]

مشاالله فالك طـيب يابوعلي..

 

[Balloons Shop]

بو علي
إن ما سويت لك كتاب وعنونت له عنوان جذاب ما عندك سالفة
قصصك واقعية ورائعة خاصة للشباب المغامر
وأضمن لك بتكسب من بيعته أقوى من بيعة صاحبة سلسلة هاري بورتر

 

[abdullah6868]

مشكور عالقصة المفيدة
ومنكم نستفيد

هلا طال عمرك
يسعدنى استفادتك طال عمرك

الله يحفظك يا بوعلي يمعود ديررر بالكـ ولا سالفة طلعتك معاهم 6 ساعات الى المخازن.. ما فكرت بخطورتها؟

اكيد فكرة وصار لى موقف داخل مكتبهم
وانا قاعد على الكرسى وقام الهندى مد ايده بالسقف بقوه وسحب درج خشبى متحرك من قوة الصوت قمزت من مكانى
الشيطان كان قاصدها
منورنا طال عمرك

ماشاء الله عليك يابوعلي .. بس ابي اعرف .. انت من قلت بضاعه 10 مليون راح بالي بعمليه غسيل اموال نفس الطريقه هذي على ما اعتقد ..

نعم صحيح
منورنا طال عمرك

مشكور على الجزء الجميل جدا والسرد الرائع

لكن يعني لو مثلا واحد يبي يشحن من الهند كاونتر يشحنه ببلاش للكويت ؟؟!!!

مافهمت هالنقطه اتمنى تششرحها لنا بالتفصيل علشان جميع الاخوان يستفيدون

وجزاك الله خير

نعم تشحن بلاش بس تطلب من الشركة اكسبورت بس يكسبون ثقتك يعطونك على طول لانه لازم يسجلون فاتوره انك دافع مبلغ معين
موفق ان شاء الله

مشاالله فالك طـيب يابوعلي..

وفالك الخير ان شاء الله
يشرفنى مرورك الكريم

بو علي
إن ما سويت لك كتاب وعنونت له عنوان جذاب ما عندك سالفة
قصصك واقعية ورائعة خاصة للشباب المغامر
وأضمن لك بتكسب من بيعته أقوى من بيعة صاحبة سلسلة هاري بورتر

صراحه بديت افكر فى هذا الموضوع بعد مقابلة الكاتب خليفة صليبيخ - من البحرين
الله يرحم والديك ومشكور على مرورك الكريم طال عمرك

 

[abdullah6868]

مواقف حصلت فى عالم التجارة ----- 24

بدايتا
اشكر كل من اتصل فينى سواءا من الكويت او من باقى دول الخليج يشكرنى ويبلغنى بانه استفاد من هذه المواقف

نكمل تلك المواقف ليستفيد منها الكل بأذن الله

فى سنة 2004 تقريبا مر على احد الاقرباء وقالى تعال معاى لسكراب امغرة ابى اشترى ماطور كبير من صديق عزيز فلسطينى
وفعلا رحنا للسكراب واستقبلنا الفلسطينى ابو بشار -- ماشاء الله عندة ساحه كبيره وفيها جميع انواع السكراب -- وعرض الماكينه على صاحبى وانا فحصتها بحكم خبرتى بالمكاين والماكينه ممتازة وشراها صاحبى واثناء الحديث صاحبى قال للفلسطينى ان ابوعلى تاجر استوكات لكن ملابس واجهزه والعاب والى اخره
رد الفلسطينى وقال السكراب تحت امرك يابوعلى ممكن تستفيد ونستفيد منك , ولكن ما حصلت شى يفيدنى
وكان قدام السكراب 20 سياره لتنظيف الشوارع -- اللى فى جوانبها مكانس دائريه ولكن انتهى عقد الشركه وشراها الفلسطينى قبل 5 سنوات السياره 500 دينار الاجمالى 10 الاف دينار
وسئلته عن السيارات , وقالى ما تصلح لك لان ما حد يشتريها وهذى غلطه وراح ابيعها حديد ب 200 دينار
قلت انا اشتريها منك , قالى ما تصلح لك وراح تخسر فيها
قلت الله كريم , بس السيارات شغاله , قال ما ادرى يابو على , جيب ميكانيكى يفحص
قلت انا ميكانيكى وبكره جايك الساعه 7 الصبح ان شاء الله
واحنا رادين قالى صاحبى مجنون انت تشترى سيارات تنظيف , والله ماتجيبلك دينار , دق على الزلمه وقوله هونت
قلت مو شغلت عندى خطه وان شاء الله تنجح , رد صاحبى هين يابو على ,
ثانى يوم جبت العامل معاى وفحصت السيارات كلها شغاله بس تحتاج الى بطاريات ونفخ التواير , والسيارات صناعه المانيه ونوعيه ممتازه اسمها انديرى
دفعت للزلمه ابو بشار 6000 دينار , بعد ما شافنى صامل زاد على 100 دينار , حلال عليه ابو بشار لانه خسران 200 دينار بكل سياره
وقعنا العقد
وقالى شنو ناوى يابو على قلت سر بعدين اعلمك , قال الله يرزقك
ثانى يوم اجرت 10 تريلات وصقت اللوحات وسويت بيان جمركى وصدرت السيارت لدبى وتواعدت مع السواقين فى جبل على المنطقه الحره
وبلغت اعيالى انى رايح لدبى وطلبونى تكفا يبه كلنا معاك , وحملت الاسره الكريمه بالسياره , بدون ما ابلغهم بالصفقه
بعد ما تعديت الخفجى وقفت عند الجمارك حتى اطمئن على السواقين
اهنيه الصدمه , ام العيال قالت ابوعلى لايكون شارى سيارات البلديه هذى , اعرفك تسويها , قلت نعم , عيالى تكفه يبه وخر عنها لا يعيرونا بكره فيها , مت من الضحك , قلت هذى الخير كله والوعد قدام , لكن المشكله ما فيه احد شد حيلى الكل ضدى فى هذه الصفقه
المهم رحنا لدبى وبعد 3 ايام وصلت التريلات وقفت قدام باب اكبر مزاد فى جبل على
http://www.wwauctions.com/
رحت المزاد بحكم شغلى معهم فى جميع دول العالم وانا عضو فى المزاد
علشان اخذ تصريح دخول المعدات وموعد المزاد بعد اسبوعين
مهم للمنتدانى الطيب ( المؤشر نت )
(((( هذى المعلومات القيمه راح يستفيد منها كثير من التجار و حلال عليهم الف عافيه ))))
بعد ما خذيت التصريح
رديت لسيارتى اعيالى ناطرينى
الا ام على تقول فيه ناس ناطرينك كاهم جاو
وفعلا الا 6 اشخاص سودانيين ( مرحبا اخ ابو على ) قلت هلا
تبيع المعدات قبل لا ادخلها المزاد , قلت ابيع سوم اذا فلوسك كاش
رد السودانى فلوسى كاش والحين لكن السيارات شغاله قلت شغاله ومثل الساعه وافحص
قال السودانى السياره 5000 دولار = 1500 دينار للسياره
من الفرحه انا موافق بس شغل تجار , عطيته نظرة الاستغراب ( شنو انا بايقها الله يسامحك )
ام العيال تنقزنى بيع ؟؟؟ اعيالى عارفين الفايدة والسعر على طول الفايده 20الف دينار بدون تعب لله الحمد
طبعا سويت حركه عشقت القير على ابو بحرك مو عاجبنى السعر
انجن السودانى لحظه الله يهداك شفيك زعلان كم بخاطرك
قلت 10 الاف دولار = 3000 دينار للسياره الوحده
قال شوف 2000 دينار واحب راسك وربعه والدلالين يصيحون بيع ياكويتى بيع يستاهل السودانى
اهنيه ام على واعيالها بيع يبه بيع
قلت مبروك جيب فلوسك
وفعلا سلمنى 40 الف دينار كاش
الحمد لله السياره الوحده كلفت مع المصاريف 500 دينار شحن وجمارك والى اخره
صافى الربح 30 الف يا رب لك الحمد
وانا بالطريق راد للفندق دقيت على الزلمه عندك سيارات بعد ( قال الزلمه لا والله ما عندى باين عليك ربحت , قلت من فضل الله ربحت )
قلت لعيالى شرايكم بسيارات البلديه جابت لكم الفايده
عاد العيال شماتين -- والله يبه اطلعت خوش سيارات

تعرفون كم باع السياره السودانى بالمزاد ( 5000 دينار للسياره )
تدرون ليش -- السياره فيها ماكينة شفط الرمل والاوصاخ ( داخل الصندوق المسكر )قيمتها 5000 دينار
الله يرزقه استفاد الدبل ونص

((( الله يرزق كل من يستفيد من هذة العمليه المفصله بالكامل )))



​

 

[قلم حر]

على نياتكم ترزقون

بو علي

الله يرزقك من حيث تحتسب ومن حيث لا تحتسب​

 

[abdullah6868]

على نياتكم ترزقون

بو علي

الله يرزقك من حيث تحتسب ومن حيث لا تحتسب​

هلا اخوى ابو عبدالله
يسعدنى مرورك الكريم طال عمرك

 

[بو شيشه]

عسى دوم مفتوحه بوجهك يا وجه الخير
حبك الخير للغير ولمصلحتهم هذا دليل على طيب اصلك ومعدنك

 

[العاشق]

بوعلي الله يفتح لك ابواب رزقه انت وجميع الاخوان بالمنتدى

ودير بالك من قلم ماذكر الله ترا عينه حاره ​

 

[abdullah6868]

عسى دوم مفتوحه بوجهك يا وجه الخير
حبك الخير للغير ولمصلحتهم هذا دليل على طيب اصلك ومعدنك

الله يجزاك كل خير
مشكور على مرورك العطر طال عمرك

 

[abdullah6868]

بوعلي الله يفتح لك ابواب رزقه انت وجميع الاخوان بالمنتدى

ودير بالك من قلم ماذكر الله ترا عينه حاره ​

هلا بالعاشق
منورنا طال عمرك
الله يستر من عيون مشرفنا
توسط لنا عنده طال عمرك لا يصكنا بعين