العاشق الولهان

[الادهم]

السلام عليكم ورحمة الله وبركاته

العاشق الولهان ,,, كثير من الناس تنطبق عليهم هذى المقوووله وتنقلب احوالهم فى لحضه .... وتتغير اطباعهم ,وتجدهم يميلووون الى الوحده والتفكير وحب الليل اكثر من حب النهار وتجد العاشق يحب ان يكوون بعيدا عن اعين الناس يتمنى ان يكون فى الصحراء لكى لاتنقطع احبال افكاره فى محبوبته فهذا قيس يهجر مضارب اهله ويسكن فى الصحراء حتى اليفته الضبا ولم تعد تخاف منه علما بانه من خيار الرجال ولكن العشق وما يفعل وهذا
وهذا جميل بثينه يسمى باسم محبوبته بثينه لفرط حبه لها.. وهذا عنتر بن شداد فارس الصحراء مرعب الاعداء يتمنى ان يقبل السيوف ,, فقط لانها برقت فتذكر ثغرمحبوبته عبله ,,, فلا يلام العاشق بما يفعل .



الادهم راح لاحدى الدوائر الحكوميه لمراجعه عاديه فياليته ماراح كان استراح والهم انزاح ولكن الاقدار مامنها فرار ,, شاف بنت مزيونه وماطاحت من عيونه يتبعها بنظراته ويون وناته مشى وراها ليما دخلت فى قسمها
وهو معجب فى رسمها وفى جسمها ومن غير مايشعر سالها عن اسمها قالت له انت شكو قال انا موقصدى بس انا دازنى واحد على موظفه تشتغل عندكم وحسبت انها انتى قالت فيه الف موظفه بالاداره مو بس انا بروحى قلت انا اسف ,, طلعت وقلبى عندها واقول ياليتنى قدها بالعمر ولا حدها ركبت السياره ومشيت وصلت بسرعه للبيت وقالولى وش عندك جيت ,, قلتلهم انا مليت وباجر اذا الله احيانى اكمل مشوارى ثانى ومن باجر حزت طلعتها ناطرها يم ادارتها متشفق بس لشوفتها وطلعت وكحلت عيونى ياعرب لاتلومونى قلبى خذته معاها وكل يوم وهذى حالى مدرى شنهو اللى جرالى
لغبتها باسم ساره لانها تسر القلب والخاطر وباقى اعرف اسم ابوها على
شان اتقدم واخطبها ؟؟؟ البارحه كثر التفكير فيها ما قدرت انام ماغير افكر وادخن وحاس انى حزين ففاضت قريحتى بهذه الابيات



البارحه كل اكثر الليل سهـــــــران ..... قلبى حزين ومكتويه بزجـــــاره
ياونتى ونت مضارب وخســـــران ..... يون تالى الليل يشكى الخســـاره
على صغيرن حط بالقلب نيشــــان ..... حبه اسر قلبى بشوق وحــــراره
يابو نهودن بالتواصيف رمــــــان ..... ويابو خدودن كل ابوها نظـــاره
حنى على الادهم ترا القلب ولهان ..... قاعد يفكر فى مساه ونهــــــــاره
يلومنى العذال فى بعض الاحيــان ..... قالو الادهم كن ضارب اعيــــــاره
ياناشدن عنى ترانى اكحــــــــيلان ..... مير الهوا مافيه طب وشطــــــاره
وقالو علامك حد ادنى بالاحـــزان ..... قلت السبب قلبى تعلق ابســـــــاره
يفداك ياعمرى المخازن وسلطان ..... ويفداك عارف مع اصول واجـاره
وتفداك الاولى والمعادن وجيزان ..... وتفداك ايفا والخليــــــــجى وداره

----------------------------------------------------

باجر لى موعد جديد من الانتظار وتطور الاحداث

 

[boalons]

ههههههههه

طلعت من هين

 

[As You Like]

مثل ما يقولون إخوانا المصريين :

الحب في الألب زي عضة الكلب​

الله يعينك على الحب خصوصا اللي من أول نظرة أتمنى توافينا بالمستجدات وخذ بالك وإنت ماشي تطلعلك بنت حورية

موفق إنشاء الله

 

[الادهم]

boalons

As You Like

تسلمووون يا حبايبى على المشاركه

00000000000000000


اليوم طلعت من البيت الصبح على اساس انى برووح الدوام ما حسيت بنفسى الا وانا سافط يم ادارة ساره احلى اداره فى كل الوزاره اللى فيها ساره نطرت وقلت هالحزه تجى بعد شويه تجى ,, تاخرت والساعه على ثمانيه اشرت وانا عندى دوام ولا اتحمل ملام من مسؤلينى ,, مشيت وقلت مو مشكله اروح وارجع الظهر وعند البوابه انتظر لما اشوف انا البدر ,, نطرت انا وقلبى صبور متى يجى بدر البدور كنى صياد الطيور انتظر حزت عبوور ,, بدت الناس تطلع والقلب يرقع ,, وانا عينى على الباب انتظر زول الاحباب ,, فجاه سطع نور من بين الحضور ,, من بين مجموعة بنات اطلعت ست البنات ,, ويوم طلعت طالعتنى وكان حال لسانها يقول ,, اشفيه هذا مهبول , كل يوم سافط بهالمكان ,, ما درت انى انا العاشق الولهان .


فى حرارة جو فى حزة ظــــــــهر ..... مع طلوع الناس من حزت دوام
سافط الادهم وقاعد ينتــــــــــظر ..... ينتظر ساره وقلبه فى هيـــــــــام
بين المزيون ياطلعت بـــــــــــدر ..... ايتهكع مشيته مشيت حمــــــــام
اشهد ان الزين بين يابشــــــــر ..... اشهد انه نور والباقى ظــــــــلام
التفت لى وارسل سهوم الخطر ..... يالطيف الطف وسلم ياســـــــلام


ما ادرى متى يجى اليوم اللى اقدر اكلمها واقولها عن رغبتى بطلب يدها من ابوها اللى للحين ما ادرى من تكون ومن يكون ابوها بس الايام الجايه تكشف الخافى ؟؟؟

 

[الادهم]

اليوم الساعه 12.5 تجهزت للطلعه من الدوام على شان اللحق على طلعت ساره من دوامها والا المدير بوجهى قال ها الادهم وين رايح قلت بطلع عندى شغل ضرورى قال يبه انت صارلك كم يوووم كل يوم تطلع هالحزه قبل لاينتهى الدوام الرسمى عسى ماشر ؟؟؟ شلون درى انى كل يوم اطلع ما ادرى مع انه مايطلع من مكتبه الا نهاية الدوام ويكون الكل طالعين المهم قلتله طال عمرك ابيك تسمح لى هاليومين اطلع قبل الدوام على شان عندى ضروووف خاصه ... الرجال ماقصر قال انت من الناس اللى مجتهدين فى عملهم واكيد ان سبب طلعتك من الدوام ضروووف قاسيه عسى الله يعينك .... المهم شكرته وقلت ماتقصر طال عمرك ولو مو الكبير القوى جان ماطلعت .


دقيت السياره سلف وحركت متجه الى الاداره اللى فيها ساره ,, وانا فى الطريق قاعد افكر لمتى بستمر على هالوضع .. لازم اتحرك لازم اسوى شى مايصير اللى انا قاعد اسويه كانى مراهق لابد من المواجهه بقول لها اللى بقلبى واللى فيها فيها ,,,, اخذت قرار انى انزل واكلمها ,,, شبيصير يعنى وانا اصلا مو جاى اغازل لانى كبرت على هالسوالف المهم وصلت الاداره اللى فيها ساره الساعه وحده الظهر وفى تمام الساعه وحده وثلث طلعت ساره كانها غزال من بين مجموعة صخول مع رفيجاتها وانتظرت حتى تفرقوا وراحت ساره حق سيارتها وبهذى اللحضه نزلت انا من سيارتى وتبعتها عند سيارتها وانا عظامى ترتعد لان شخصيتها قويه واحس ان مقامها عالى , وجمالها مسوى لى رعب بهاللحضه كانت اهى بالسياره فاشرت بيدى انى بكلمها فتحت الدريشه وقالت نعم اهى قالت نعم انا تخسبقت احس انى قمت اغط خيط وخيط المهم جمعت عظامى وقلت لها :-


قلت السلام وسلم الله مقامـــــــــك ..... يامرحبا ويامسهلا ياحـــــــبيبـى
قالـــت تركــد لاتزيد بسلامـــــــــك ..... امرك غريبن حاجنى وش تبيبى
قلت انا الادهم مشتبك فى غرامك ..... قلبى عليلن وانت والله طبــــيبى
قالت توقف لاتكثر كلامــــــــــــــك ..... مانى من اللى يتبعووون الغريبى

للاسف حسبالها انى مغازلجى ماخلتنى اكمل كلامى مشت وخلتنى واقف بروحى ما درت ان قصدى شريف وانى ناوى ادخل البيت من بابه بس ابى اعرف منها عنوان اهلها واتقدم بشكل رسمى وبصراحه كنت ابى اعرف رايها بالموضوع قبل اروح بيتهم ,,,, يالله الله كريم باجر احاول مره ثانيه يمكن يحن قلبها على .

 

[قلم حر]

انا متابع لغرامياتك

بس لاتنسانى ببطاقة دعوة العرس واذا بقيت كفيل بالمخفرانا حاضر

 

[الادهم]

بس لاتنسانى ببطاقة دعوة العرس واذا بقيت كفيل بالمخفرانا حاضر

هلا بو عبدالله الله كريم ان شاء الله اقدم لك بطاقة دعوه للعرس بس اللى حصللى اليوم يهون معاه المخفر اسمع شنو صارلى اليوم.



كالعاده وانا فى طريقى للاداره اللى فيها ساره ,, اخذتنى الافكار بعيد وقاعد اتخيل انى لابس البشت وسويره لابسه فستان الزفاف والافكار اللى انت خابر
اللى تخص المعاريس فجاه رن التلفوون وقطع حبل افكارى ولا واحد من الربع ,,, قوه الادهم ,, هلا يبه شعندك ,, قال عندى لك خوش خبر قلت شنو قال المخازن .. قلت اشفيها المخازن ... قال بيدرجونها بالناسداك فى نييورك
قلت وانا شكو يدرجونها والا انشاءالله عمرها ما اندرجت لايكون حسبالك انا طارق السلطان والا خالد المطوع .. قال الادهم اشفيك انت ماتملك بالمخازن قلت بلا املك فيها .. قال لازم تستانس بالخبر هذا .. قلت يبه انا ماتهمنى المخازن .. عندى اهتمامات ثانيه مو فاضى حق المخازن وخرابيطها ... المهم الرجال جنه انحرج وحسيت انى فشلته ... داق على بيقولى خبر وانا احرجته .... ما انلام فيه قطع حبل افكارى ...... المهم


وصلت الاداره اللى فيها ساره على موعدى انتظرت شويه وطلعت ست الكل
وهى فى طريقها حق سيارتها وكانت تمشى قدامها وحده من رفيجاتها دبابه
مو مره ,,اذا وزنها 300 كيلو شويه ,, مشيت ورا سويره وقاعد اقولها ممكن كلمه صغيره لو سمحتى ,, وهى ابو لابس ,, وانا محاولاتى مستمره فجاه جان تنادى الدبابه اللى تمشى قدامها ... وقالت يامنيره فكينى من هذا
تقصدنى ... التفتت على منيره الله لاينور طريقها .. ياجماعه اول مره اشوف مره اذا فتحت حلجها حنجها الفوقانى يوصل جبهتها ,, تمساح مو مره ,الله يعين اهلها عليها ,, وصرخت على ذيج الصرخه اللى احس الارض اهتزت من تحت رجولى ,, قالت اشعندك ياللى ماتستحى وياللى فيك مافيك ,, المهم خلتنى بيزه ما اسوى ,, الناس قامو يطالعون ,, قلت ولى هذى من وين طلعتلى ,, المهم انا طقيت اللثمه قلت يمكن احد يعرفنى ولا شى , وخطوتى صارت مترين باتجاه سيارتى ابى الفكه من هالبعير الهايج اللى قام على ماوصلت سيارتى الا انا بسابع روح ... قلت عزالله هذى حوبت رفيجى اللى داق على وانا ماعطيته وجه .

قلت اوقفيـــلى ياســــويــــره ..... وحطى كلامى عالبــــــــال
سمعى منى كلمه اصغيـــــره ..... واذا ودك بالجـــــــــــــوال
نادت وقالــــــت يامنيـــــــره ..... فكينى من هالرجـــــــــــــال
جتنى وحده ضخمه كبيـــره ..... جنها مصارع اثقــــــــــــال
خلتنى ما اسوى ا شـــــعيره ..... عطتنى كلام اهـــــــــــوال
واصبحت انا بموقف حيره ..... وجهى تلون اشكــــــــــــال
يالله عسى فيها خــــــــــيره ..... وبعدها يضبط الحـــــــــال


الله يسامحك ياسويره وين قطيتنى على هالذيبه ومشيتى وخليتينى

 

[As You Like]

أخي العزيز الادهم :

لا تستسلم أبدا ولا تكون حادثة اليوم نهاية لقصة غرامك اللي شغلت تفكيرك بالفترة الأخيرة وشغلتنا معاك وياما ناس عانوا في البداية لكن بالنهاية وصلو لبر الأمان...

حبيبي بس حاول تلقالك فكرة إنك تكلمها أفضل من اللي سويتها لأن البنت ما تقدر تكلمك حتى لو دقيقة والناس تشوف عدل والا لا...

لا تستعجل فكر عدل بس فكر بعقل مو بطيش شباب...

تمنياتي لك بالتوفيق...

فاز باللذات كل مغامر ومات بالحسرات كل محاذر​

 

[قلم حر]

ورقة صغيرة + ورده

ورقة صغيرة تبيين لها انك تحبها وقصدك شريف + ورده حمرا حطها على سيارتها يمكن تحن عليك . وتكون هذي الحلقه الاخيره : :d

 

[بو صالح]

الله يكون بالعون

من كسب ساره حضيضن واهنيه............انشهد انه كاسبن كل التجاره


تبي نصيحه يالادهم ضبط رفيجتها منيره وقولها عن اللي بخاطرك وحبك لساره بس خوفك تحبك الدبه وتروح فيها :d

 

[الادهم]

السلام عليكم

As You Like

تصدق حاشنى احباط وضيقت خلق فضيعه ما ادرى شسوى

بو عبدالله

تقول اخذ ورده حمرا شقالولك عماد حمدى انا ,, ومع هذا باجر بسوى طريقتك يمكن تضبط ويانا شسوى بعد ماباليد حيله

بو صالح

صح لسانك اللى يفوز بساره كانه فايز بالدنيا كلها اما منيره ياعمى هذى
ذيبه مو بشر لو تقرب لها تعضك

----------------------------------------------------

اليوووم وصلت الاداره اللى فيها ساره وما وقفت سيارتى بالمكان اللى العاده اوقف فيه .. بالعاده اوقف يسار الباب الرئيسى حق الاداره اليوم وقفت يمين كان منظر الذيبه منيره فى بالى وخفت ان الذيبه تنتبه حق مكان السياره المهم .... انتظرت شوى ولا ساره طالعه كتف بكتف مع الذيبه منيره ...؟ صكت فينى الدنيا ,, شسوى ؟ شنو الحل ؟ قلت يمكن تفك عنها ؟؟ للاسف
مافكت عنها ,, ليما مشت ساره بسيارتها ,, حسيت باحباط حسيت الدنيا كلها ضدى ,, حسيت بشعووور غريب ,, ودى ادعم الذيبه بالسياره افكار غريبه راودتنى ,,, قعدت بالسياره شوى اتحلطم ضايق خلقى ,, وانا قاعد بالسياره الا هذا واحد من الربع اسمه حموود ,, جانى وسلم على وشافنى ضايق خلقى قال الادهم عسى ماشر اشفيك ,, اذا عندك معامله بهالاداره ترا اعرف واحد يخلصك بسرعه ,, قلت انا معاملتى الظاهر ماراح تخلص ,, ورفيجى هذا امووون عليه حيل ,, فقلت خلنى اشكى عليه الحال ,, سولفت حق رفيجى السالفه وغرامى بساره ,, سولفت له السالفه وياليتنى ماسولفتله ,, انا ابيه ايكون عون صار فرعووون ,,, قام يتطنز ويقول انا خابرك يالادهم قلبك قاسى جذى وحده تخليك بهالحال ,, خلها تولى ياعمى ,, فى الف وحد غيرها ,, انت اكبر من ان وحده تسوى فيك جذى ؟؟؟ قلت له :-

لولا الحيا ياحمود لا اشقق الثـــــوب ..... واصيح انا ياحمود واعلن هواها
ياويل قلبى اصبح اليوم معطـــــــوب ..... وياويل حالى وان تاخــــــر دواها
وياويل عقلى اصبح اليوم مضروب ..... وعجزت اميز ميلها من ســـــواها
ياحمود انا قلبى تعلق برعبــــــــوب ..... حبه سطا بقلبى وروحى كــــــواها
ولاعاد تنفعنى تعاليم واطبــــــــــوب ..... اذا حبيب الروح بهجرى نـــــواها

استفدت منه شغله وحده بس قال يا اخى الحقها اذا طلعت بالسياره وشوف بيتهم وين صاير ,, قلت والله خوش فكره ؟؟ مالى الا الحقها بالسياره .

 

[قلم حر]

الادهم

دير بالك وخلك حريص لي لحقتها بسيارتك خاف تشوفك منيره الذيبه وبعدين تسفطك بالجمس مالها والباقي انت تعرفه

 

[الادهم]

السلام عليكم

والله ضحكتنى يابو عبدالله مو ناقص الا تصفطنى بالشارع هالذيبه الله يكفينا شرها .

اليوم وصلت الاداره اللى فيها ساره الساعه وحده وربع تاخرت بسبب زحمة الطريق ومعاى وردتى الحمرا حسب استشارة ابو عبدالله وخذيت دوره على السيايير اللى بالموقف ماشفت سيارة ساره ,, رديت واخذت موقعى يمين الباب الرئيسى للاداره اللى فيها ساره انتظر طلعتها ,, وحاط فى بالى الحقها بالسياره على شان ادل بيتهم ,,, انتظرت شوى ولا الدبه منيره طالعه قلت الحمدالله الدبه طلعت بروحها ,, فكه منها الله لايردها ,, المهم انتظرت تطلع سويره ,, ماكو شى ,, مابقى احد ماطلع ,, كل الموظفين اطلعو الا اهى ,, قلت مافيه الا انزل اشوف اهى موجوده بالاداره ولا لا ,, نزلت ودخلت الاداره ولا ناطحنى عسكرى ,, قال امر ياطيب ,, قلت عندى معامله بالقسم الفلانى اقصد قسم ساره ,, قال مافى احد جميع الموظفين طلعوا تعال باجر ,, قلت خير ان شاءالله ,, الظاهر انها اليوم اطلعت مبجر قبل لا اجى او انها مو مداومه اليوم قلت يالله خيره انشاء الله ,,, دقيت سيارتى سلف وحركت رايح بيتنا والا بدقة التلفووون ؟؟؟؟؟؟؟

الوو,, قوه الادهم ,, قلت هلا ,, منو معاى ,, قال انا فلان ,, والا واحد من الربع اللى بالبالتك ,, قال اشفيك عسى ماشر ماتشبك هاليومين ,, قلت انا مشغووول شوى ,, بعد ماتبادلنا اطراف الحديث ,, سالته عن واحد من الشباب نكه الحربى ,, قال ما اشوفه يشبك ,, قلت منو من الشباب الموجودين الحين ,, قال ابو مناور ,, وسعد ,, وابو ريم ,, وابو راشد ,, ومسولفجى , والشباب كلهم ,, اهو قال امسولفجى انا تذكرة الزهيريات اللى دايم ايقولها بو وليد ,,, قلت انا ليش ماقول زهيريه بساره ؟؟؟؟؟؟ مع انى ما اعرف شنو يعنى زهيريه ولا عمرى كتبت زهيريه ,, انا بدوى وماهى عوايدنا نقول زهيريات ,, قلت يالله خل اجرب يمكن تضبط وياى .

صبرت انا وناطر يمر .. حبيبى ... ماشوفه
تشتاق عينى بشوفته .. وتتكحل ... ابشوفـه
متى يجى يوم ويقول .. ترانــى ... بالشوفــه

متى يجى يوم ويحن ويرأف.. على ... حالــى
متى يجى منه طعم من.. ريجــــــــه ... الحــالى
يالايمى مالــــــــــــــك شغل ..خلونى ... ابحالى

متى يجى منك كلام ..وتوعدنى ... ابشوفـــه


عسى بس ضبطت الزهيريه ترانى غشيم بالزهيريات ,, المهم انا الحين شيصبرنى ليوم السبت على شان اشوف ساره ما اقول الا الله يعين .

 

[قلم حر]

الادهم اسمحلي انت غلطان

لما مالقيت سويره عين السيح المفروض تلحق منيره الذيبه لبيتهم هي تغزيره ليوم السبت وهي من ريحة عين السيح

 

[الصبر زين]

إن كان الأمر مجرد مزح فالله مغنيك يا أخي عن الكذب .. فأسلوبك يا أخي جميل وشعرك أجمل ...


وإن كان صحيح فتخيل أن سارة هي أخت الأدهم أترضى لها بمثل هذه المواقف .

 

[قلم حر]

الاخ الكبير الصبر زين

اسمح لي اختلف معاك انا متابع لكتابات اخونا الادهم في هذا الموضوع خصوصا والرجال لم يذكر اسم البنت ولاقبيلتها ولامكان عملها والرجال نيته انشاء الله طيبه ويريد الزواج منها وكتاباته في هذا الموضوع من اجل المشوره وكذلك يريد معرفة بيت البنت حتى يتقدم لها . ولااخفي عليك اخوي الصبر زين انني صرت متشوق جدا لكتابة اخوي الادهم ومنتظر بفارق الصبر ان اقرأ قريبا انشاء الله ان الادهم تقدم الى خطبة البنت رسميا . ونكون انا وياك مدعوان لحفل الزفاف وتكون هذه الحلقه الاخيره في رائعة ( العاشق الولهان )

 

[الصبر زين]

الله يكبر قدرك يا أخي



إنما كان قصدي النصح .

 

[الادهم]

السلام عليكم

اخوى الصبر زين كلامك زين وعلى الراس والعين ,, اما اذا كنت تقصد بكلامك انى اتركها فهذا من سابع المستحيلات ,, الا بعد ان اتقدم لها بشكل رسمى وترفض فحينها سوف اعتبرها مثل اختى ولن اتفوه بكلمه تمس شعرها ومثل ماقال اخوى ابو عبدالله فانا لم اذكر لها اسم حقيقى وانما لقبتها باسم ساره , ولم اذكر حتى المكان الذى تعمل به ,,, شكرا على النصيحه اما
اذا كنت تقصد عدم الكتابه هنا ؟؟ فهذا ممكن



انا اشـهد انك ناصحن يالصبر زيــن ..... وانا اشهد ان القلب مايسمع النصح
وانا اشـهد انى غارقن غرقة البيــن ..... كنى غريقــن بالبحــر حســه الملــــح
نوم البشـر يالصبر ماتشوفه العيــن ..... ليما يشـــق النــور مع نجمة الصبـح
قالوا تـناسه قلت انا علمكم شـــيــن ..... انســـى انا عمرى ومانســـاه بالمدح


الله يعطينا الصبر يالصبر زين

 

[الصبر زين]

وعليكم السلام ،،،،، إنما تخيلت أن أختي أو ابنتي يترصد لها فلان من الناس يحاول محادثتها بعد خروجها من الدوام ،،،،،،، حتى لو كانت النية حلال ....


لذا كتبت ردي لك ..........


عموما يا أخي الله يكتب لك ما فيه خير .

 

[قلم حر]

الاخ العزيز الصبر زين

اولا :
اتفق معك مئه بالمئه ان اي رجل لديه ذره من الرجوله والغيره
لايقبل لاي انسان ان يعترض طريق اخته او ابنته حتى ولو
كان قصده شريف ونيته سليمه .
ثانيا :
دعنا نتكلم بكل صراحه لو ان هذا الرجل الغيور راى بنت
جميلة وعلى درجه عاليه من الاخلاق واراد ان يرتبط بها
وهو لايعرف اسمها ولاعنوانها ، فقط يعرف مقر عملها!
ماذا يفعل الغيور المسكين ؟
برايي انه امامه طريقتان :
الاولى :
يحاول ان يكلمها من اجل التعرف على عنوانها ومن ثم
التقدم لها بشكل رسمي .
_ هذه الطريقه التي اتبعها اخونا الادهم _
الثانيه :
ان يصطحب امه او اخته لمقر عمل البنت لمعرفة
عنوانها وهو ينتظر بالسياره .
والطريقه الثانيه برايي هي الافضل وهي الصحيحه.
ارجو المعذره على الاطاله

واقبلوا فائق التقدير والاحترام ،،،،،،،،،،،،،