ليش الانترنت عندنا غالي حيل

[الفردوس]

يجماعه احسن خدمه واقوا سرعه للاب توب عن طريق الجوال شني وكم سرعتها وكم سعرها وعندي خبر عن القطعه الي ب125لاعند الوطنيه وسرعتها تغريبن 250 او150 مومتاكد بشتراك مفتوح ب10 دنانير بشهر في اقوا واسرع منها بلكويت افيدونا جزاكم الله خير
سوأل يطرح نفسه بنفسه هـــــــــــل من مجيب أو( ماحولك أحد)

 

[bodalal]

الأخ Cha3bar بارك الله فيك على التوضيح والمعلومات المهمة

وهذا انت قاعد تأكد كلام أكثر المشاركين ... ان المسؤول الأول والأخير عن تدني الخدمة وارتفاع الأسعار

هو وزارة المواصلات ...

والحل ... بيد وزارة المواصلات ... لازم تقدم خدمة الانترنت للمواطنين مع خط التلفون مثل ما هو حاصل في جميع بلدان العالم

مشكلتنا بالكويت في المشاريع الكبيرة ... انهم دايم متأخرين ... والشي اللي يكون تكلفته مليون هالسنة

ما يسوونه ... إلا بعد 10 سنين .. ليمه تصير تكلفته 10 ملايين

شوفو جسر الملك فهد رحمة الله عليه مثلاً ... في وقتها كلفهم أعتقد 30 مليون ... مو متأكد

وفي ذاك الوقت كان الكلام عن ضرورة انشاء جسر إلى فيلجا ... وأعتقد كان الكلام عن تكلفة 20 مليون أو أقل

شوف هالحين

تقدير تكلفة بناء جسر الملك فهد هالحين ممكن توصل مليار

لكن التخطيط السليم .. خلاهم هالحين طلعوا منه فوق المليار

البنية التحتية في بلدنا رايحه فيها ... والمشكلة مو قاعد نشوف تطور ... وكل ما يتأخرون راح تزيد التكلفة

وأخ يا بلد ... وين العقول

دينصورات معششيين على كراسي ... لو يعطون فرصة للشباب .. والله يحولون البلد جنة

 

[Cha3bar]

جزاك الله خير بودلال

من وجهة نظري المشكلة كما ذكرت مو في وزارة المواصلات المشكلة في محدودية السوق و هذي مشكلة عامة مو بس خاصة في الكويت فقط ..

بالنسبة للسلع الخدماتية التصور يختلف عن السلع الإستهلاكية من منظور إقتصادي .. المعروف إن زيادة الطلب على السلع الإستهلاكية يزيد السعر .. العلاقة طردية زيادة بزيادة

أما بالنسبة للخدمات فالعلاقة عكسية زيادة الطلب تقل الأسعار .. سوقنا متشبع وأعطيكم مثال شركات الهواتف في الكويت شركتين و من فترة ليست بقصيرة بحثوا عن أسواق جديدة وذلك لتشبع السوق المحلي "حوالي مليونين مشترك فقط" فما بالك بأربع شركات تتنافس على خدمة الانترنت على سوق لا يتعدى مشتركي الإنترنت فيه حسب آخر إحصائية 480 ألف فرد بخلاف المؤسسات والشركات طبعا

مثال آخر، يمكن الأغلب منكم سمع عن الصراع الأخير بين شركة مايكروسوف و شركة غوغل والمنافسة على دخول السوق الصيني .. تدري ليش؟ لأن السوق الصيني فيه أكثر من 80 مليون مستخدم للإنترنت حسب إحصائية 2004 ومعدل الزيادة هناك يصل إلى 18%

كنت قد ذكرت في أول مشاركة لي في هذا الموضوع أن سعر البانزين أقل من سعر الماي في هل البلد .. السبب أن تكلفة إنتاج البانزين أقل من تكلفة الماء وليس أن البانزين سلعة مدعومة .. ترى حتى الماي مدعوم ودعم الماء يفوق البانزين

الطلب على الإنترنت لازم لازم يزيد عشان تقل الأسعار

 

[bodalal]

الله يعطيك العافية يا أخي ..

عندي استفسار ... أطرحه بعد هالسالفة هذي ..

مرة كنت أحلق عند حلاق قريب من بيتنا .. أقدم صالون حلاقة بمنطقتنا .. المهم الحلاق ديكوره مو ذاك الزود .. قديم ومكسر
عاد مرة من المرات قلت للحلاق : ليش يا أخي ما تعدل صالونك وتظبطه ؟ شوف صالونات جديدة طلعت شكثرها وصار التنافس حامي

وانت صالونك يلوع الجبد ... غنفات مشققة وحالتك حاله ... ما تشوف حتى الزباين قليل عندك .. وزحمة عند غيرك ؟؟؟

رد علي رد غريب : قال ليمه يزيدون الزباين وتكثر الفلوس .. أعدل الديكور وأظبط المحل

قلت له غلط .. العكس هو اللي لازم يصير .. عدل المحل أول وبعدين يجونك الزباين

واختلفنا على هالموضوع

هالحين عاد استفساري على نفس هالقصة : هل المفروض ترخص الأسعار وتصير الخدمة سهلة وفي متناول الجميع .. وبالتالي راح يزيد عدد المستهلكين ؟

وإلا تصير الحكومة مثل صاحبنا الحلاق ... إتم تنطر لين المستهلكين يزيدون يالله تحسن الخدمة ؟؟

أعتقد ان حكومتنا أسوأ من عقلية هالحلاق ...

لأن المفروض ان الوعي بالخدمات الالكترونية راح يزيد بعد ما تقدم الحكومة هذي الخدمات للمستهلكين بطريقة ميسرة ومقبولة

وإلا شرايك ؟؟؟ حكومتنا عقليتها مو عقلية صاحبنا الحلاق ؟؟؟

 

[Cha3bar]

أختلف معاك في مقارنة حرفة بخدمة، أنا فاهم قصدك من المثال الذي طرحته لكن ربما غفلت عن جانب مهم جدا في سوق خدمة الإنترنت، الخدمة تتطلب خط هاتف "بتقول لي أكو خدمة وايرلس بقول لك حتى ال wireless بالنهاية مربوط بخط هاتف" بالنسبة لسوق الأفراد يوجد على الأقل هاتف واحد في كل وحدة سكنية في الكويت وحاليا زاد التوجه لدى بعض العائلات لربط الأجهزة في المنزل على خط هاتف واحد و إشتراك إنترنت واحد لتوفير التكلفة بدل من كل شخص يكون لديه إشتراكه الخاص

ذكرت لك أخي الكريم بأن عدد مشتركي الإنترنت في الكويت لا يتعدى 480 ألف بالنسبة للأفراد ولو تحسبها على تعداد الكويت الحالي ستجد أن النسبة تعادل 5:1 .. أي بين كل خمسة أشخاص هناك إشتراك إنترنت واحد "موزعة على أربع مزودي إنترنت في الكويت .. لا و بعضهم لديه إشتراك مجاني سواء من العمل أو ... "

النسبة عالية جدا ما شاء الله مقارنة مع الأسواق الأخرى في المنطقة العربية .. نقارنها الآن مع دولة مثل الولايات المتحدة .. أخي الكريم هل تعلم بأن النسبة هناك عام 2004 كانت 8:1 !!!

الشركات تتوجه للأسواق الواعدة ذات النمو العالي و أصدقك القول بأن الربح لا يأتي من الإشتراكات وإنما يأتي من الخدمات المساندة أو ما يطلق عليها added value .. بالنسبة لشركة مثل غوغل مجمل أرباحها تأتي من الدعايات و ما تدفعه الشركات لها فقط لوضع روابطها في الصفحات الأولى top results list

في الكويت للآن عامل الدعاية والإعلان لا يجد أي جدوى كبيرة للدفع .. هناك محاولات ولكن المسألة تتطلب وقت طويل جدا

 

[bodalal]

كلامك صحيح ... واضح انه علمي ويرتكز على أسس اقتصادية بحتة

أنا بصراحة مو متخصص في هالمجال ... لكني درست الاقتصاد السياسي والمبادئ الفلسفية للاقتصاد

وأتكلم من هذي الزاوية ... زاوية فلسفية

الكويت بلد صغير وغني ولله الحمد والشكر ... عسى الله لا يغير علينا إلا للأفضل

الأسعار تزيد من سنة إلى سنة ... وفي مشاريع البنية التحتية ... كل ما بدأت الدول بمشاريع البنى التحتية أسرع كل ما كان هذا في صالح البلد

ومن جهة أخرى .. الوعي الاجتماعي في كثير من الدول العربية سيء ... الغالبية العظمى من المستهلكين

يفتقدون الحد الأدنى من الثقافة الضرورية ... وعملية رفع مستى الثقافة والوعي تقع أولا على الدولة

هذي الحقيقة اللي توصل لها حتى كبار منظري الاقتصاد بعد الأزمة الاقتصادية الكبرى اللي تعرضت لها الالولايات المتحدة الأمريكية خلال الأعوام 1919 و 1923 ..

ضرورة تدخل الدولة ... لأن في الاستثمار البشري لن تجد القطاع الخاص .. وإنما الدولة

لأن الأرباح هنا هي في بناء الانسان وليست رصيد في البنك

أشكرك على النقاش الجميل ... رجعتني لجو الدراسة

 

[Cha3bar]

أشكرك على النقاش الجميل ... رجعتني لجو الدراسة

بالعكس الشكر يجب أن يقدم لك إنت أستاذي الكريم بما إنك دارس الإقتصاد

ذكرتني أيام ما كانت النت أبيض وأسود

 

[bodalal]

ههههههههه

العفو يا أخوي ... لا استاذ ولا شي

ومشكور

 

[مقاييس]

يجماعه احسن خدمه واقوا سرعه للاب توب عن طريق الجوال شني وكم سرعتها وكم سعرها وعندي خبر عن القطعه الي ب125لاعند الوطنيه وسرعتها تغريبن 250 او150 مومتاكد بشتراك مفتوح ب10 دنانير بشهر في اقوا واسرع منها بلكويت افيدونا جزاكم الله خير
سوأل يطرح نفسه بنفسه هـــــــــــل من مجيب أو( ماحولك أحد)

والله انا استخدمه مال الوطنيه القطعه ب 125 واشتراك شهري مفتوح 12 د ك وسرعه 220 د س ل وكافي انك تشبك في اى مكان

 

[الفردوس]

والله انا استخدمه مال الوطنيه القطعه ب 125 واشتراك شهري مفتوح 12 د ك وسرعه 220 د س ل وكافي انك تشبك في اى مكان

مشكورررررررر بس أبي أحسن منه وأسرع فيه بلكويت (جوال ) ومشكور علي ردك علي

 

[london]

الانترنت

يا شباب فعلا اسعارالاشتراكات مبالغ فيها وبطى مقارنة بالخارج
من هو المستفيد ؟؟؟؟؟!!!!!

 

[mxxy]

الانترنت غالى لانه محتكر من قبل عائله وحده الغانم واكثر شئ بالسوق ماشي ومسيطر شركتين
1) كوالتي نت
2) فاست تلكو
وهذيلا ملك الغانم وبنفس الوقت الغانم يمد الشركات الثانيه بالخطوط عشان جذيه الانترنت غالى لان مافيه منافس شركات باسماء مختلفه لكن في يد شخص واحد

فعلا غالي وهذا ما ذكرته جريدة القبس عن هالشركتين لكن هذا الحجي من فترة طويلة شوي

 

[STOCK_O]

كلمة حق في شركة كوالتي عن تجربة
بصراحة شركة رائعه جدااا جداا اسعار رائعه بالمقارنة مع غيرها هنا وايضا ما تواجه ولا مشكله التحميل قوي وثابت والتصفح رائع 00
والدعم الفني رائع يرد عليك بأي وقت 00
ونأمل في تخفيض الاسعار اكثر 0

أما فاست اسعارها ثابته ما تغير وشكلهم ما عندهم نية تخفيض

 

[مساهم جديد2007]

لامنافس Ego (أم تي سي) مفتوح ب14 شهري وسرعة3.6mbps شيىء مذهل سرعة رهيبة بدون إنقطاع

 

[Night-Arrows]

العالم وصل تقنيه T1 T2 T3 او احنا مستانسين على 3 ميغا لااا او ياليت توصل هالسرعه اقل ابوايد

 

[الدميرة]

والله يا شباب ما توقعت النقاش يصير حامي لي هالدرجة

بس شفتو شلون ... هذا كله لأن الكل مو راضي عن خدمات الانترنت بالكويت

وإلا معقولة جذي ... والله العالم في بريطانيا يتصورون الكويت على انها من أكثر الدول تطورا

على بالهم كل شي عندنا على آخر موديل ... أحدث الأجهزة وأرخص الأسعار

ولمه تسأله ليش متخيل جذي ؟

يرد عليك بأنها دولة صغيرة وغنية

بصراحة معاهم حق ... فعلا دولة صغيرة وغنية .... بس ليش ما في ذاك التطور بالخدمات

خاصة الخدمات الإلكترونية ... مع ان المسألة وايد بسيطة ... عقد لشركة لعمل كذا وانتهت القصة

خلال سنتين ثلاث وإلا البلد من أروع ما يكون ... على الموضة

الله كريم ... ومع هذا ...

لازم نشب على وزارة المواصلات ... وكثر الدق يفج اللحام

وين المطرقة

ربعنا مهما دقينا عليهم اجاويد يزيدون السعر

يامعود كيبل فايبر اوبتكس وممدود وتقوم في صيانتة وزارة المواصلات وصار له عشر سنين
والتجار قاعدين يحلبونه عدل ورابطين عليه شوية سيرفرات

الله يلعن ابو اللحام اللي مابفج عقولهم المودره اللي قاعده تحلب الشعب الكويتي

 

[الدميرة]

لامنافس Ego (أم تي سي) مفتوح ب14 شهري وسرعة3.6mbps شيىء مذهل سرعة رهيبة بدون إنقطاع

يامعود استريح الله يخليك ويرحم والديك

الاي كو طال عمرك فشل ذريع على وسام الام تي سي والشركة الناجحه مع احترامي الى سعد البراك

الام تي سي والنعم لكن الاي كو سرعته مجربه بالحيل وليس 3 ميجا بل الباند ماله 3 ميحا

 

[الدميرة]

كلمة حق في شركة كوالتي عن تجربة
بصراحة شركة رائعه جدااا جداا اسعار رائعه بالمقارنة مع غيرها هنا وايضا ما تواجه ولا مشكله التحميل قوي وثابت والتصفح رائع 00
والدعم الفني رائع يرد عليك بأي وقت 00
ونأمل في تخفيض الاسعار اكثر 0

أما فاست اسعارها ثابته ما تغير وشكلهم ما عندهم نية تخفيض

كوالتي نت والنعم وفاست تلكو والنعم بس غاليه بالحيل
والدعم الفني رائع يرد عليك بأي وقت
ونأمل في تخفيض الاسعار اكثر

 

[hassankoc]

لأن سعر البانزين أرخص من الماي في هل ديرة

إذا عندك أحد في koc أكو خوش عرض dsl 512K بي 25 دينار شهريا

عرض الكي او سي فاشل اسألني

 

[الدميرة]

العالم وصل تقنيه T1 T2 T3 او احنا مستانسين على 3 ميغا لااا او ياليت توصل هالسرعه اقل ابوايد

اخوي ماعليك

مافي 3 ميغا طال عمرك

المقصود فيه هو التردد او الباند 3.6 ميجا

اما المقصود بان العالم وصل الى تقنية T1 فيعني بسرعة 1.5 ميجا بت

و T2 يعني دبل ماذكرناه

و T3 يعني ادبلها مرة اخرى وهذا استاندرد امريكي لسرعة التبادل الالكتروني في عالم الارسال والاستقبال والانترنت يشملها