للتذكير بإفتتاحية الموضوع .. طالع الاقتباس
ضرايب مافي رسوم جمركيه 4%
والكهرباء و الماي و البنزين و الاسمنت ....و حتى الخبز مدعوم
و الدجاج مدعوم و المعكرونيه...المعكرونية .. إييييييه تذكرون الوزير اللي تكرم بمنحة معكرونيه على الشعب الكويتي....
الشعب الكويتي الابي اللي صمد امام اقسى احتلال....... معذور .. كل من يفكر و يعمل بموجب البيئة التي أتى منها.. عادي مادام يحطون وزراء بهالمستوى..
المهم
العيش و العدس و الشكر و الحليب و معجون الطماط مدعوم...اكو حكومه تدعم معجون الطماط ؟
شقالولكم احنا اسبان نتحذف بالطماط 
.. حاله
لا وتدعم العلف للماشيه
مع ان ماعندناش ماشيه على قولة عادل امام ..بس يالله ..الحكومه تدري و مشيه الموضوع...
دعومات لاتعد و لاتحصى .. و اعانات دراسة ..منح زواج ..و معاشات للي يشتغل بالخاص ..و دعم تقاعد قيادات النفط باكج بمليون دينار و هم ما تكفيهم مساكين 
... ليش
المعاش محمل بالديون من اول يوم خطبة 
ماتبوونا نتزوج ... مولازم 
انزين و البيت .. ماتبونا نشوف لنا بيت نسكن فيه
ما نشتري سيارة !
ما ناكل سمك
نبادر بالتجارة ..شنبادر كل شي محتكر للكباريه
على قولة المثل فلوسنا زي الرز .. لكن مي يايبه لنا العز
اول ما يبتدي الواحد بنفسه
خنشوف المعاش وين في نصرفه .....
و بعدين نوزع المصاريف على مجموعات ...
يعني مثلا مجموعة الصيانه ...و تحتها يندرج صيانة ادوات صحيه و كهرباء و سياره
........و بعدين ناخذ كل بند و نجمع فيه المعلومات و نتكلم عنه
و هكذا
خلونا نحاول ....يمكن نوصل لنتيجه ....
خل يكون عندنا اراده
...مايصير بس نتحلطم و نسكت....و نخليهم ينهبونا
كنا نصيح قبل الاجانب يستنزفون فلوسنا ... ..يحاسبون الكويتيين بأسعار اعلى بكثير من الاجانب
أما الحين
اللي قاعد يصير الحين ان اللي ينهبنا منا و فينا ...كويتيين مثلنا
لان في نهج جديد متبع هو خذ متخذ ....استولي...مد ايدك...اقبض...يبونها تصير قاع صفصفا
بطريقه مشروعه مو مشروعه اخلاقيه مو اخلاقيه ..ما تفرق ...
عيل توصل ان البعض يطلعون بطاقات اعاقه زورا و بهتانا .. و مساعدات اجتماعية بالنصب و الكذب و يستولون على الملايين
تجار هالوقت من مصاصي الدماء .. و تجار الأغذية الفاسدة .. و أذرعهم في الوزارات
و خماجير و خنابيج و دقلبازات و لعب التلات ورقات اللي على ودنة في الجمعيات التعاونيه
و هي اكبر بوابة لسلب اموال الناس بالغلاء و التلاعب ..
روح اسأل عن وسائل الابتزاز و الرشاوي اللي تدفعها الشركات و التي تصب بالنهاية في فاتورة سلب الاموال من جيوب المواطنين
الله يا الجمعيات ... الله يا الجمعيات .. مختطفة من فئة محددة من الوافدين .. بلاوي الدنيا فيها..و المصيبة انها المصدر اللي بشترون منه الناس حاجاتهم المعيشية
ليش سكاتين عنهم مجالس الادارة
ليش ساكتين .. لأن ما يحصلون مثلهم سمعا و طاعة
مو هني الخمال ..تشوف المرشحين يرفعون احسن الشعارات ..و من يفوزون .. سكتم بكتم ..خاموش ..و.. يبقى الحال على ماهو عليه .. شلي سكتهم .. هني القبنده
و المدمر ان بعض النواب بدأ يقترحون ما يساعد على التساهل في تجاوز القوانين و الهدر و الصرف لكسب الاصوات
و هذا امر لم يحدث في العالم او في التاريخ
يعني بلدنا المسكين مو عارف الصكات تييله منين ..من الحكومه و لا من النواب و لا من التجار و لا من بعض المواطنين
و مع هذا كله التمسك بفرض العدل و دحر الفساد و المفسدين
يجب ان تكون عقيدتنا في الحياة
و يجب ان نتذكر هنا قول الشاعر احمد شوقي
وما استعصى على قوم منال _ إذا الإقدام كان لهم ركابـــــا
منقول من بن عيدان
الجمعية ..مغارة الفساد المستتر و الخنابيج ..
أكبر بوابة لشفط المعاشات بالطرق الملتوية الخارجة عن القانون و الشرع و الجودة علمنا ام لم نعلم
-
