عريس

[خالد فهد السلوم]

مره من الامرار كنت معزوم عند خالي ... وكان من ضمن المعزومين

رجال مبطي عنه ما يعرف البيت الجديد ... فالخال الله يجزاه خير

ارسل السواق ( كومار ) عشان يروح يجيب الرجال اللي بيوقف له عند

الطوارى للمتشفى اللي عنده الوصف .... المهم راح السواق وجاب

الرجال .. وبصراحه انبهرنا بهيئته والمشلح والسكبه ...المهم قعد الرجال

من ضمن المعازيم ... دخل خالي وقال للسواق (كومار) جبت ابو سعد

رد السواق ... ايوه بابا انا يجيب .... التفت خالي يم الرجال ..... حنا

طبعا قاعدين نتفنجل وسمعنا الرجال يقول لخالي ... يا عمي انا طالب

القرب منكم .......


اللي حصل ان الرجال بالغلط كان ينتظر ناس بيخطب منهم ... وهو مثل

صديق خالي واقف ينتظر الانساب الجدد .... على اي حال لزمنا عليه

ورفض .. وقال يا جماعه انا منيب يم عزايم ردوني جزاكم الله خير

غديني الحق عليهم لا يهونون ..... اخذت هالمره انا العريس الى المكان

اللي اخذناه منه .... ولقيت المعزوم الحقيقي واقف جنب بوفيه

المستشفى ياكل سندويتش فلافل ....

 

[خالد فهد السلوم]

ذيل الفاره

في بدايه عملي قبل سنين كانت في قسم الاعتمادات المستنديه

ومدير الفرع كانت شخصيته قويه جدا وكان يؤمن ان الاداره الناجحه

هي الاداره اللي تمشي الموظف على العجين ما يلخبطه ... وهو المدير

بالاساس من اسره غنيه فهو ماهوب في حاجه للبنك وراتبه .. ولكن

يبغى يحقق ذاته من خلال مبدأ اداري يقوم على ان الموظف اذا سمع صوته نشبت اللقمه في زوره

الان بان لكم الشكل العام لهذا المدير .... المهم يوم من الايام كان

فيه اجتماع كل سته اشهر يعقد بالتناوب في فرع من فروع البنك لمدراء

الفروع يحضره المدير الاقليمي ... اجتمع المجتمعون .. وقبل ان يبدأ

الاجتماع ناداني المدير عشان اسجل محضر اجتماع لان السكرتير

شايل اللوز في المستشفى ... المهم كان امامنا فناجيل الشاهي

وطبعا كل واحد يشرب .. ومن ضمن الحضور رجل خفيف الظل صاحب

نكته ... تذكر ايام زمان وشجون ايام قبل .. الشاهد قال للحاضرين الاتي



والله ياجماعه الخير اني يومني صغير كانت امي تكحل عيني بذيل فاره



وقتها كنت اشرب الشاهي وفجاه سمعت النكته .. وفجاه ابضا انتثر

من ثمي الشاهي من مفاجاه النكته على كتف المدير والاوراق اللي

قدامه ...............


ولكم الباقي عاد كملوا ......

 

[خالد فهد السلوم]

البثر

ابو سطام يتصل على الفرع بمعدل ثلاث مرات يوميا .. عشان يسال

عن المستندات هي وصلت والا لا ... المشكله ان التسهيلات اللي

ممنوحه له محدوده فهو فوق المكشوف ... وباستمرار يحرج مدير الفرع

اللي ما يجد بد من تصريفه ... وبعض الاحيان نحن ايضا نتبرم من الالحاح

ولكن اذا ضاقت بنا الحيله لصقناه في حلق "حسني " موظف جديد

لازال يجي للبنك لابس كرفته ...

 

[خالد فهد السلوم]

البثر

ابو سطام يتصل على الفرع بمعدل ثلاث مرات يوميا .. عشان يسال

عن المستندات هي وصلت والا لا ... المشكله ان التسهيلات اللي

ممنوحه له محدوده فهو فوق المكشوف ... وباستمرار يحرج مدير الفرع

اللي ما يجد بد من تصريفه ... وبعض الاحيان نحن ايضا نتبرم من الالحاح

ولكن اذا ضاقت بنا الحيله لصقناه في حلق "حسني " موظف جديد

لازال يجي للبنك لابس كرفته ...

انا بصراحه عمري ما شفته شخصيا اعرفه بس بصوته ... المهم يوما من

الايام ناداني المدير وكان عنده رجال قاعد امام مكتبه ...سالني المدير

عطني مستندات شركه ..... قلت له الا ما قلت لك يابو عزام ؟ شف

لنا صرفه مع هالبثر تراه اغثاني وكل مره اصرفه مافيه فايده ... ابو عزام

ياشر لي بس انا ما فهمت .... اللي حصل ان اللي قاعد هو الرجال اللي

انا اشتكي منه ..... ابتسم وقال حيا الله ابو فهد ... رديت الله يحييك

من وجه الخير ؟ قال انا صاحب المستندات اللي توك تكلم ابو عزام عنها

ابتسمت وقلت انت ابو سطام ؟ قال نعم ... قلت اشوف الفرع منور ..!

 

[المؤشر]

الله يجزاك خير يابو فهد ضحكتني ووسعت صدري الله يوسعها عليك دنيا وآخره ....... كثر منها ترانا محتاجينها إذا خف علينا الشغل خصوصا في الويك إند للوول ستريت

 

[خالد فهد السلوم]

ابشر بسعدك

جزاك الله خير يابو على على هالدعاء اللي يبهج القلب ... وكلك بركه

اللي عرفتنا على الاخ عفار اللي بسبه مقاله قبل اسبوع تغيرت

اشياء كثيره عندي ... فانا هالايام طايح بحليب النياق الين صرت اهذري

واتذكر ذكريات قديمه ما ادري وش اللي طلعها .....

 

[رائع]

انت يا خالد رائع

 

[خالد فهد السلوم]

هذا

من طيب ذاتك يا الغالي .

 

[عجيم]

قبلة المنتدى ياخالد

 

[خالد فهد السلوم]

تقدير

اشكرك اخوي عجيم ... وان شاء الله نكون عند حسن الظن .

 

[خالد فهد السلوم]

هل واجهتوا نفس الشي ؟

بالاول كانت مسأله العمر (اي عمر الشخص ) تهم النسوان اكثر من

الرجال ... وممكن الحريم يتقاضبن الشوش عشان مسأله شهر زياده ..

لكن اللي حاصل الآن ان العدوى انتقات للرجاجيل وبشكل مضحك جدا

فا .... ليله من الليالي كنت معزوم .... وفي ذاك الصالون اللي يفتح

النفس قبل الشهيه دارت القهوه ودندنت المعاميل ... والقدوع من يد

قوي الى اقوى منه ... والسوالف الخاثره تبدأ وما تنتهي .... والضحكات

اللي كنها كلكسات بابور الاسكندريه ... فجأله صاح المعزب .. تفضلوا

.... تفضلوا ... الله يحييكم ......... قام الرجاجيل ووقفوا على رجليهم

ووقفت انا .... ولكن ما احد تحرك .... هاه ... ورا الجماعه ما يتحركون ؟

المهم وخذ يا نظرات ... كل واحد يقول للثاني تفضل ... يرد عليه الاول

ابد والله تفضل انت ... يا خوي انت اكبر مني ... وخذ من هنا وهناك

والعشى بيبرد وكل واحد يحلف انه مهوب اكبر سن من الثاني ... وشوي

الاصوات ترتفع ... يرد الثالث انا اتذكرك يابو حمد رجال كبير وانا بزر العب

في الشارع .... لا حول ولا قوه الا بالله .... قلت يا جماعه انا عندي حل

انا اكبر واحد فيكم وتراني ابي اقلط على العشى ترى المفطح مشتاق

للمساتي .... المهم تقدمت وحليت هالمشكله اللي كانت بالاول سالفه

نسوان ... اما طوال الشوارب فالله يخلف .

 

[خالد فهد السلوم]

اللسان

اللي يعرف منطقه الشفا في الطائف يعرف ان الجو هناك حتى ايام
الصيف
امطار وضباب وشي يسر العين .... كنت انا وولد عمي معزومين على

الغدى عند رجال من بني ثقيف ... وكان معنا الوالد وبعض الاعمام ...

وكان برفقه عمي رجال قبل يجي ويروح معه في مثل هالمناسبات

المهم ... جت الساعه واحده بعد الظهر وكنت انا وولد عمي ميتين من

الجوع ... الجو والضباب وامطار تخللي اللي مهوب جايع يجوع ... فما بالك

باللي ما افطر الا على شابوره ... وللعلم اللي عازمنا ذابح ذبيحتين في

الاستراحه حقته ومغطيها في براميل غوزي تحت الارض .. طبعا الريحه

تفلح الكبد قبل المعده ... وخصوصا انا وولد عمي ... المهم كل ما دخل

على المجلس احد فزت قلوبنا متعشمين نسمع الكلمه السحره ...

تفضلوا ... تفضلوا ... الله يحييكم .. ولكن تبوء آمالنا سرابا اذا الداخل

يجيب قهوه والا شاهي ... المراد بعد رحله عذاب من هالروائح اللي

تزيد الشوق شوقين دخل الرجال وقال يا جماعه ترا غداكم جاهز تبونه

داخل الخيمه والا على التله ؟ طبعا انا وولد عمي بغى يغمى علينا من

الفرحه لاننا في آخر رمق .... وفجأه حدث اللي ما توقعناه ... تتذكرون

صديق عمي ؟ طيب .... نط بدون احم ولا تستور وقال .. يابو طلال

تو الناس ترانا ما جعنا ... وشهو له العجله !

طبعا الرجال نادا العامل اللي عنده وقال له طف على الغوازي يا ولد

الين يجوع الرجاجيل ..... طبعا تخيلتم وجهي ووجه ولد عمي ... ؟

خليط من القهر .. مع اليأس ... وعقدنا العزم على ان عزيمه فيها

هالرجال ما نحضرها حتى لو كانت عزيمه عرسي او عرسي ولد عمي

وتوبه غبر هالنوبه .

 

[خالد فهد السلوم]

قحطه

طبعا من منكم ما يتذكر مسلسل (درب الزلق ؟) .... اعظم دراما انتجتها

الدول الخليجيه على الاطلاق واعتقد بنحتاج 50 سنه زياده الى ان ياتي

وقت نشوف مثل هالروائع ... على اي حال مهوب هذا الموضوع .....ز

الموضوع هو اني انا واخوي يومنا صغار ( نسبيا ... يعني في الطعش) كنا

عفاريت ... يعني اشقياء ... وكان يجي للوالد لحيه غانمه تقريبا يوميا

ديوانيه الوالد ... فا .. كل مره يطق الباب الخارجي نصيح انا واخوي :-

يبه .. يا .. يبه ... جاك " قحطه " .. الشبه ماهو معقول ولا تقول

فوله انقسمت نصين .... وحتى الصلعه .. اخوها ولد امها وابوها ...

المهم ... الرجال تضايق مني ومن اخوي وقرر يشكينا على الوالد ....

وطبعا كان مصيرنا علقه ( انما ايه ..)

بلعت انا واخوي هالعقاب .. ولكن اضمرنا في انفسنا الانتقام ...

وكنت انا اعرف وش نقطه ضعف هالرجال وكنت واثق ان هذا الشى

بيشفي غليلي وغليل اخيييييي ...

عزايم الوالد اسبوعيه تقريبا ... يعني يا عازم يا معزوم ... وهالثقيل على

قلبي وقلب اخوي يلازم الوالد في كل المناسبات تقريبا ... وعلى فكره

هو يحب اللسان ( لسان الخروف موت ) يعني الذبيحه اللي مافيها لسان

ما كنها في عينه شي ... وكان يحرص وبشده على ان يقعد قريب من

راس الخروف عشان يقطع اللسان قبل ما احد تهوزه نفسه ....

ما احد مركز عليه ... الا انا ... وحطيت في نفسي ساعه الصفر ....

صرت في كل مره فيها عزيمه .. اسبقه وامصع اللسان من لغاليغه ...

ولا ابقي شي ... في البدايه الرجال ما يدري من يقطع اللسان ... ولكن

مع تكرار هالشي ... ركز الرجال ولقى ان اللي يقطع اللسان هو حضرتنا

لكن ما له حيله لانه يستحي من الوالد ... لكن مثل ما قالت ام كلثوم

انما للصبر حدود .... كنا قاعدين على السفره وكان هو قاعد كالعاده

جنب الراس ... والضعيف يبي مويه في اقصى السفره ... فا قام

يجيبها .. وانا وفي اجزاء من الثانيه قطعت اللسان وبلعته ... فا ...

الرجال يوم قعد ما شاف الا آثار اللسان .. وصاح .. من اللي مصع اللسان

جعل رقبته المصع .... نطيت انا ونشوه المنتصر " انا يا عموووووووو "

طبعا الوالد كان قاعد وسامع ... المهم رد وبكل عفويه ... انت ؟

قلت ... ايه انا .... قال .. الساعه المباركه صحتين على قلبك يا ولدي .

 

[فيومي]

فيه الف عافيه اخوي خالد


وعشانك اخذت اللسان لزم تجيب قصيده للاخوان هذا شي


معروف الي ياكل اللسان لزم يجيب قصيده


والا ويش راي الشباب



صراحه اخوي ابو فهد واخوي عفار اكتشفت انه مثل منتم

فلتات في الاسهم عيني عليكم بارده بس صراحه عندكم

اسلوب حلو في الكتابه وانا من رائي تسون قصص وروايات قصيره

وتبيعونهاا ترى اربح من الاسهم





الله يعافيكم علي كل هذا المجهود الوافر وجعله الله في

موازين اعمالك

 

[خالد فهد السلوم]

الف شكر

اخوي فيومي وابشر بسعدك اما القصيده فانا في الغالب اكتب

قصايد باللغه الانجليزيه .... صحيح والله ما امزح ...

 

[فيومي]

عنقليزي والله منت بسيط يا ابو فهد لله درك والله ما يجي

منك يا ابوفهد حلو ودرر سواه عربي او انقليزي وما يجي

من الطيب الا الطيب

 

[bo ahmed]

ما فيييه حيله
هههههههه
اسلوبه عجبني لانه فيه عفويه مو طبيعيه

 

[ابو برهوم]

اخوي خالد بارك اللة فيك .... اضحكتنا اضحك اللة سنك فعلا مواقف حلوة ومضحكة واسلوب من نوع السهل الممتنع وخفيف ع القلب
اللة يسر امرك وياريت تستمر بكتاباتك
موفق يالغالي

 

[almoress]

أخوي bo ahmed

من وين طال عمرك مطلع الموضوع ؟؟؟؟؟!!!!!!!!!!!!!

والله صدمتني !!!!


الموضوع صارله 7 سنوات !!!!!! وانت نابشه نبش


ما شاء الله عليك


اخوي ابو برهوم شوف التاريخ طال عمرك


لكم ودي

 

[ابو برهوم]

تصدق مانتبهنا ع التاريخ ...... شخباري 2002 ههههههههههههههههههههههههه
المهم ابتسمنا شوي تسلم على نقل الموضوع بس لاتعيدها ههههههههههههههههههههه