النجر

[عفار]

يقول تركى بن حميد

ياما حلا ياعبيد فى وقت الاسفار
0000000000000000000000جر الفراش وشب ضو المناره
مع دلة تجذا على واهج النار
000000000000000000000ونجر الى حرّك تزايد عباره
النجر دن وجاذبن كل مرّار
0000000000000000000ما لفه الملفوف من دون جاره
فى ربعتن ماهيب تحجب عن الجار
0000000000000000000000لامن ولد الاش ماشب ناره
وخير منها ركعتينن بالاسحار
0000000000000000000لا طاب نوم اللّى حياته خساره

 

[خالد فهد السلوم]

الحمد لله على السلامه

عافاك الله يا عفار وان شاء الله ما تعبت ... وش لون الخوال في الكويت

عساهم طيبين ؟.... والناس تقول من طول الغيبات جاب الغنايم ...

وانا اقول من طول الغيبات جاب السوالف السنعه والعلوم الزينه ..

وعلى فكره عرفت تنقي يابو عبد الله هالابيات اللي توسع الصدر للشاعر

تركي بن حميد .. صح لسانه .. ولسانك .

 

[عفار]

الله يسلمك يابوفهد

وابشر بالعلوم الزينه والقصايد وفلت الحجاج بس عسا نارنا حيه

ودلالنا على ماهى عليه

والخوال طيبين بس متغيرين ماهم مثل كل سنه

ولا تنشدنى ليش لانى ماراح أقولك

يا ماحلا الفجال مع سيحة البال
000000000000000000000فى مجلس مافيه نفس ثقيله

 

[خالد فهد السلوم]

نرنا على ما هي عليه

اولا الحمد لله على سلامتك وسلامه السامعين ... وبصراحه الزاد

مافيه ملح بدون ملح .. وحنا في هالاستراحه ناقصني الملح اللي هو

انت .. وبدون مبالغه يابو عبد الله عمرك شفت سياره تمشي بدون

بنزين ؟ .. بس سطر من عندك تخللي السوالف تدندن .. والنار والدلال

ما تنفع الا بسمارها .. واول ما قريت عنوان هالمقال ( النجر ) الا

وضحكت لان لي ذكرى زينه مع النجر بالذات ... ما اطولها وهي قصيره

في ديره Uncle Sam وبالتحديد في نادي جاكلي سبا في مدينه

لوس انجلوس كنت اتدرب حديد ... وكان من وقت لوقت اشوف وجيه

مع الوقت تعودت على معرفتهم بدون اسامي .. وكان مره (بكسر الهاء)

من الامرار وجه ما هوب دمه غريب ... قربت منه وسلمت وطلع الرجال

من الديره .. طبعا فرحت به ..وبدينا نسولف عن التخصص وعن الجامعه

وقبل ما اسأله عن اسمه ..اذا وحده تنادي بصوت مسموع :-


ستيف .....ستيف .... طبعا في النادي اعداد مهيب هينه والخواجات

مملين كل متر من هالنادي اللي يفتح النفس ... فا ... وبدون مقدمات

رد رفيقي اللي قبالي .... yes honey ... هاه وش صاير ؟

المفاجأه اللي ما حريت لها ان ... ستيف ... هو صاحبنا ... وهذي

اللي تناديه زوجته الاامريكيه ..!

طبعا المفاجأه مهيب في ان زوجه اي احد تناديه ... او ان احد يتزوج

اجنبيه ... ولكن المغاجأه هي ان ولدنا مسمي نفسه .. ستيف .

المهم بعد ما خفت المفاجأه ... وراحت الحرمه بعيد ..قربت من الرجال

وقلت ياخوك منهو ستيف ؟ .. رد على انا ستيف ... قلت انت ستيف !

قال ..لا ماهوب اسمي الحقيقي ... قلت طيب من ذيك الحرمه ؟

رد على ذيك زوجتي ... قلت وليش مسمي نفسك ستيف ... رد على

ذي المره وفي عيونه شي من الحسره وقال ..وياليته ما قال

قال :-

يعني تبيني اقول لهم ان اسمي " نجر " ؟ .... نعم يا ساده يا كرام

رفيقنا ستيف اسمه ..نجر ...

 

[عفار]

يهبا ويهبيه الله

سوّد الله وجه هالنجر

من نجر الى ستيف

أكيد ساحرته هالحمره العطره الله يكرهن

قرب لى القدوع وعطنى فجال فوّر دمى هالنجر الامريكى

ومادام هاذى سواليف النجر أنا بردها فى الفناجيل اسمع هالسالفه

ياطويل العمر فيه واحد اسمه أبوعزيز بائع متجول على وقت غارات القبايل

والحروب يعنى قبل توحيد الجزيره وابوعزيز هاذا رجال أجودى ماله فالحرب

وغيرها همه هم بضاعته وتصريفها فى يوم من الايام لفا على قبيله

من القبايل وكانت هذه القبيله تعقد مجلس حرب عند شيخ القبيله

ولا فيه أحد يتمشى أو جالس فى بيته كلهم عند الشيخ أبوعزيز متعود

اذا لفا لاى قبيله الناس يطيرون بضاعته ألا هالمره مافيه أحد صخه

أشوى ولاّ مار عليه واحد من الربع هذولى قاله تكفا يالاجودى الناس

وينهم فيه ماشوف أحد لى ساعه أنا وحمارى ننتظر ماجانا أحد يتقضى

من بضاعتنا

قاله الرجال

كل القبيله مجتمعه عند الشيخ بشوفون من هو اللى بيشرب الفجال

خل البضاعه تنثبر هنيا وأراحك معى

أبوعزيز ماصدق خبر قال مادام اليوم مافيه بيع ولا مشترى بروح وشوف

وش قصة ذا الفجال

راح الرجال ولقا الشيخ وحوله جماعته وصباب القهوه يفتر بالفجال

وكل ما مده على فارس من الفرسان طقته أم الركب

ولا واحد راضى يشرب هالفنجال والشيخ متوهق مايدرى وش يسوى

أبوعزيز شاف هالمنظر فقال لرفيقه ياولد الناس هذى علامها ماتشرب

الفنجال أن كانهم مكيفين قبل مايحضرون المجلس ترا راسى ذابحنى

لى يومين ماشربت القهوه 0

بالله ناد صباب القهوه خله يجيب الفجال أبشربه أنا

طالع فيه رفيقه بنظره غاضبه فقاله أبك أنت صاحى ولاّ مجنون ترا هذا

الفنجال اللى عليه الكلام يعنى اذا شربته ياذابح يامذبوح

فقال أبو عزيز

عما عما

والله يافنجالن عند أم عزيز أبرك من هالفجال مية مره لا بالله فكنا منه

وسلامتك

يابوفهد

 

[عفار]

أبوفهد

نسيت لا قولك شغله حيّرتنى البارحه

أنت تقول (مره)بكسر الهاء

السؤال

هل الراء مشدده أو عليها سكون

لانى ضيعت شوى

 

[خالد فهد السلوم]

مره

يابو عبدالله يمسيك والسامعين بالخير ... مره .... المفصود بها

مره واحده ..اي فتح الميم ...وتشديد الراء .... وسكون الهاء .