يازين هالبيوت يابوفهد

عفار

عضو نشط
التسجيل
16 يناير 2002
المشاركات
1,389
الإقامة
الرياض
ياهل الديره اللى طال مبناها
0000000000000000000ما ابلاد حامها طول حاميها
المبانى تهاوى كل من جاها
000000000000000000مايفك المبانى غير أهاليها
ديرتى صار داها اليوم برداها
000000000000000000ما تصح البلاد وعيبها فيها
أن كان ماتفزع اليسرى ليمناها
00000000000000000أعرف ترا اللى وطا ذيك واطيها
راعى الاعمال بالنيات يلقاها
0000000000000000000من حفر حفرة لزما يقع فيها
 

عفار

عضو نشط
التسجيل
16 يناير 2002
المشاركات
1,389
الإقامة
الرياض
تركى بن حميد وما أدراك ما تركى بن حميد الله يغفر له وأموات المسلمين

الله الله يابوفهد

له ديوان مطبوع للكاتب الكويتى ابراهيم الخالدى

وفى كل كتاب عن الموروث الشعبى تجد له عدد من الدرر

وفيه كتاب لابوعبدالرحمن الظاهرى وهو عباره عن مجموعه من الاسفار

يتحدث فيها عن مناقب هذا الشيخ والفارس المقدام الجزء الثانى

أبوفهد

أذكر وأنا فى الثانويه العامه

أخذ سيارة البيت (وارد عراوى) موديل واحد ثمانين تقول راكبلى فياقرا

من دون علم الاهل وجيك كافخ للرياض من مسافة60 كيلو

ولا أروح لاسواق ولاغيره طوّالى الى مكتبة جامعة الملك سعود

قسم الشعر وأذكرر مره من المرات دخلت قسم المخطوطات

وحبيت على خشم رئيس القسم على أنه يورينى مخطوطة تركى

بن حميد اللى كتبها العمرى والتى أخذ منها جميع المؤلفين قصيد

تركى ولا تتصور سعادتى وأنا أتصفحها لانه فى ذلك الوقت كان ممنوع

ألا بورقه من مدير الجامعه ولا يسمح ألا لباحث ماهوب واحد جاى

وداق بنت البكّار ويبغى يشوف مخطوطه ههههههه

عموما ياأبوفهد

أنصحك بالقراءه لهذا الشاعر والفارس المقدام

يقول فى أحدى قصائده

الحر لادبت عليه النواميس
00000000000000000يشهر وعن دار المذلّه يشومى
 
التسجيل
3 سبتمبر 2001
المشاركات
369
الإقامة
الدرعيه
الله المستعان

مات تركي بن حميد ؟ .... الله المستعان ... الله يرحمه وجميع

اخواانا المسلمين ... يموت الانسان ويبقى عمله الرائع وهالدرر اللي

قالها وشعر فيها والى هالحين تنقال ويقال بها .. يا سلام ..وسوالف

الاولين ما تمل يا بو عبدالله .. ويا حبي لقعده شيبانا وهم يسولفون عن

ايام اول ايام الفروسيه والنخوه والشجاعه وعلوم الرجاجيل .. شرواك

وشروى السامعين ... يقول واحد من شيبان الدرعيه وكان مسير على

الوالد .. ان اول كان شرب التتن جريمه يعلق بها الرجال من كرعانه

الله يكرمكم .. وكانت الناس عندها حاسه شم عجيبه ... فممكن من

مسافه ثلاثه كيلو يشمون التتن ... يعني لو واحد منا زقرت وابعد بعيد

عشان يشرب المخزي ( التتن) فالجماعه صايدينه .. صايدينه ... الشاهد

يقول في غزوه من الغزوات كان هو مع مجموعه راجعين واذا واحد منهم

يقول يا جماعه ... وقفوا ... وقفوا ... قالوا خير .... وش عندك ... قال

يا جماعه انا اشم ريحه تتن ورا هالجبل .. المهم راحوا ورا الجبل ثم

ورا الجبل اللي بعده .... المهم حاسه شم غريبه ما ودي اوصفها بشي

الله يكرم بني آدم .. المهم فعلا لقوا رجال ميت من ايام ... الظاهر من

الغزو بين قبيله واخرى .. قربوا من الرجال وناظر عليهم الرجال وقال

ترى هاللحيه الغانمه يشرب التتن ... قالوا ربعه الله يغربلك وش دراك

انه يشرب المخزي .. قال هالحين اثبت لكم .. المهم طلع من جيبه

ذيك السكين اللي جعلكم ما تشوفونها ولا بالحلم وفك صدر الرجال

وكانه يفك له برتقاله .. يوم فاح ريحه التتن ... صاح ربعه اي والله انت

صادق ... طبعا انا وانا قاعد اسمع السالفه كان تركيزي مهوب على

التتن او المخزي ولكن كان تركيزي على هالحنين رقيق المشاعر اللي

فك صدر الرجال عشان بس يثبت انه يشرب تتن . !!!!!!!!
 

عفار

عضو نشط
التسجيل
16 يناير 2002
المشاركات
1,389
الإقامة
الرياض
عز الله أنك صادق

ياعينى على المشاعر

يسولف علي واحد من الجماعه يابوفهد بسالفته مع أبوه يقول أول

مابدا التسجيل فى العسكريه أنحشت من أهلى فى البر وجيت

للرياض لانهم كانوا يعتبرون من يدخل فى العسكريه كافر وحجتهم فى

ذلك الوقت أن العسكر يلبسون نفس لبس النصارى يقولى هالشايب

ماكان أبى ولاربعى يسلمون على أذا جيتهم فى البر لاننى عسكرى

وبعد مده من الزمن خفت هذه النظره مع كبر الشايب بعت الابل

وجبته معى يسكن فى الرياض0

وأول ماجا رحت للبقاله وشتريت بعض المواد الغذائيه وشريت ببسى

وكان على أول وردته للمملكه والناس توهم طايحين فيه

يقول وأنا أجيبه عند الشايب وأفك الغطا وهو يقعد يزبد

قلت

يابوى اشرب

قال الشايب

أبك هذا وشنهو

قلت له

هذا الببسى أحلى من حليب الابل ذقه

وبعد ألحاح منى شربه وأول ماشربه يقول الشايب اللى يسولف على

يابوفهد

يقول طارت اعيون أبوى فوق وطنّب بالصياح أنا أخو فلانه تغشنى يالكافر

تشرّبنى الخمر وأخذ تلعين ودعا وأنا قاعد أهدى فيه لكن مافيه فايده

ولو كان مستصح كان ذبحنى وأخذ مدة أسبوع مايكلنى وأذا جيت براضيه

يقولى أذلف عن وجهى ياشراب الخمر

ولم يقتنع هذا الشايب ألين شاف الناس تشربه وتحطه على موائدهم

وجوه الجماعه وما قصروا صالحونى معه بعد أقناعه بأن الببسى ليس خمرا
 
التسجيل
3 سبتمبر 2001
المشاركات
369
الإقامة
الدرعيه
الزمن غير

الزمن اول يابو عبد الله غير .... يعني الناس كانت تستنكر الشي الغريب

وترفضه الىان تطمئن منه ... ونسمع من الشيبان عن اجدادهم ان اول ما

جاء التلفزيون .. كانت الحريم يتغطمون عن المذيع اللي في الشاشه ...

وفي بعض القرى لمن شافوا السياره تمشي قربوا لها البرسيم ...

واشياء كثيره ... وبعضها غريب وبعضها طريف ... وهذا واحد
يسولف ويقول ان رفيق له عنده مزارع وسواق وكان هالصبي

عيار وممرور ....وكان من وقت لوقت يمر على هالرجال الكريم طرقيه

يسوقون هاللواري من على هالكثبان الرمليه وما يوصلون الا وطلعت

ارواحهم ... طبعا مزرعه هالرجال على الطريق ... فا .. يلفون عليه

يبردون ويتغدون ويقيلون واللي عليهم بالخير ثمن يتوكلون على الله

المراد مع كثر الجاينين والرايحين .. مل هالعامل من هالبشر لان امور

تكريمهم هو المسؤول عنها ... وكان يشتكي من بعض الطرقيه اللي

ما يحترمونه وينهرونه بداعي وبدون ... معزبه طبعا ما نفس له .. لكن

طلب منه الصبر لانهم ضيوف ...

يوم من الايام جاء اثنين من الطرقيه كالعاده بيتغدون عند هالرجال

وكان هالاثنين بالذات يضايقون هالصبي و لايحترمونه ويتعبونه كثير ...

الشاهد ... ترك هالرجاجيل وراح يطبخ لهم الغداء وبعد ساعات زهب

الغداء ... تغدوا بالخير ... وبريق الشاهي يقول ياليل يا عين وتحت

هاك العريش في ايام الصيف ولا مكيف LG ناموا نومه سنعه ... اذن

العصر صلوا الجماعه ... وشغلوا لواريهم وتوكلوا على الله .. وكانوا هالمره

مبسوطين كثير من هالعامل لان الكبسه كانت خوش مسكته لدرجه

انهم لحسوا الصحون وما بقوا حتى عظام هالارانب ...

المهم بعد ما غادروا التفت الصبي الى عمه وقال يا عم بغيت والله اقول

لهم شي بس خفت انهم يذبحوني ... شهق المعزب وقال خير ان شاء

الله ليه ؟ ... قال تذكر يا عمي ذيك الخيشه اللي مليانه قطاوه ؟

قال ايه !!! قال ابد سلامتك طبختها لهم .
 
أعلى