الصندوق الكويتى يساهم في توفير القروض لصغار مربي الدواجن في مصر

[مساهم قديم]

مرض الطيور ( نشله :d ) فى مصر
انا ما اصدق اقول تمثيليه مصريه
تضحى مصر بكم مليون طير
وتربح عشرات الملايين من الدولارات ((( من البقره الحلوب طبعا )))

 

[نوط بو ربع]

قريت هالخبر وكنت وقتها قاعد على السفره أنطر الغدا طبعا ما يحتاج أقولكم شنو الكلام اللي قلته وآنا قاعد أتحلطم ( إحنا شكو بدجاجه حايشتها نشله في مصر !!؟ بتقولي إستثمار وبتعطيني أرقام ورسم بياني وبتقولي شوف جم دفعنا وجم بيرجعلنا بقولك إستريـــــــــح !!؟ بيدفعولك من القرض قسطين وباجر زيارة رسميه عالية المستوى وعزف السلام الوطني المصري بقاعة التشريفات ويعقبه عزف السلام الوطني الكويتي ومأدبة عشاء على شرف الرئيس ويطلعلك المذيع بأخبار الساعه تسعه يقول : وصل مطار الكويت الدولي سعادة الرئيس وذلك في إطار زيارة أخويه لتعزيز العلاقات بين البلدين وتقوية روابط المحبة بين البلدين الشقيقين ... وعقبها تعال دور القرض ذو الأرقام الفلكيه !!! بتلقاه يا حلو مجرد خبر بميكروفيلم في أرشيف الصحافه !!؟ طبعا سعادة الرئيس ما يحتاج أقولكم عن مهارته بالكلام المنمق طبعا بعد حفل العشاء المقام على شرفه يسأله بعض المتواجدين ويقول : شصار على قرض الدواجن يا سعادة الرئيس ترى صار مده والاقساط تتراكم ؟؟ يرد طبعا فارس الكلام المنمق ويقول : يادي حكاية القرض إللي طلعتولنا فيها اليومين دوووول !!! ده خير ربنا كتير وإنتو بسم الله ماشاء الله نفط إيه وغاز إيه تروحو الصحرا وتعملو مخيمات وتطبخو من غير وبور ولا بوتجاز كفايه تحفرو تلاتين صانتي وبيطلعلكو غاز بتطبخو عليه !!؟ وبعدين تعالو أقولكو حاجه ده كان قرض عشان شوية فراخ وماتت من زمان ؟؟!! وبعدين يا جماعه ما تخلوش شوية ملاليم تبوظ العلاقه بين لخوات وبعدين مصر ام الدنيا والكويت زي بنتها ومفيش بين الام وبنتها قروض وبالمقابل أنا مستعد أبعت لكم هرم خوفو عشان تشيلو سوق البورصه بتاعكو وتحطو الهرم مطرحه لأني سمعت يا عيني إن فيه مستسمرين صغار جاتلهم صدمه من السوق وبقو عاملين زي المومياء المتحنطه فأكيد محتاجين لهم هرم عشان يسكنو فيه ... ويختم الحديث بمقطع للسيده أم كلثوم ويقول : قرض إيييييييييه إللي إنته جاي تقول عليييييييه *** منت عارف إن القرض اللي قبله راح علييييييك بزمتكم يا أصحاب المعالي أنهو إللي أحلى صوتي ولا صوت الست أم كلسوم إهنيه عاد ربعنا يتشققون من الضحك ورووووووووووح يا قرض ما كأنك قرض ... على طاري الغدا ترى ما تغديت للعلم لأنه يوم طاح الغدا ولا مجبوس دجاج وبصراحه انسدت نفسي والسبه هالخبر !؟؟

الاخ العزيز wawwaw كلمتك اللي قلتها صابتني بمقتل حين قلت : ((حسي يا حكوووووووووووومه حسي بشعب يموت ولا يتكلم)) فعلا كلامك هذا يعكس صورة وأخلاق الشعب الكويتي البار بوطنه وحاكمه والذي اعتاد أن يعامل حكامه كما يعامل الإبن البار أباه ... فهما إشتغل هذا الأب عن إبنه فلن يتفوه هذا الإبن بكلمه في حق أبيه وذلك حياء منه وبرا بوالده لعل وعسى أن ينير الله بصيرة أبيه ويشعره بما يعانيه هذا الأبن من جفاء ... واعذروني على الاطاله وسلام يا أحلى شعب ويا أحلى وطن .