ساعدوني بمشاريعكم وله مااتزوج

[ولد ابوه]

السلام عليكم ورحمة الله وبركاته

يااخوان ياكرااااااااام

جايكم ابي الفزعه ........

اخوكم تعبان نفسياً له اكثر من خمس شهور

انا موظف علي قد حالي وظيفتي مدنيه مايتعدى راتبي مع الزوجيه وبدل الاجار والزحمه 600 دينار

الزبده .. كان عندي طموحات اني اكون تاجر .. لكن مايسر الله لغاية الان(

الزبده يالربع انا نوية اخذ لي قرض 8 الالف دينار او 10 الالف دينار
واعطيها اخوي يدخلها معاه بالعقار

المهم انا علي وشك الزواج باقي علي عرسي سنه بالكثير
وتخبرون الحين الراتب (المعاش) مايبقى منه شيء عقب القرض اللي راح اقترضه
يعني تقريبا راح يصفي لي 380 دينار هذا غير والله اعلم شنو راح تحصلي من ظروف واخذ قروض بسيطه
المهممممممممم مابي اطول عليكم

انا ابي مشروع صغيرون يدخلي شهريا حتى لو 150 دينار راضي
علي الاقل يغطي مصاريفي الشهريه خصوصا ان معاشي نصه رايح علي
دفع الاقصاد .. وتخبرون البيت يبيله مصاريف وعوار راس

يعني ابي مشروع حلو و لا بآس فيه راس ماله مابين 1 دينار إلي 3 الالف دينار
ويكون دخله حليوو 150 دينار علي الاقل يغطي احتياجاتي بعد الزواج

تكفون الله يخليكم ابي مشروع مايحتاج ذيك الخبره ويفضل يكون نظام تضمين
يعني اجهزه واخلص منه بعدين اضمنه مباشره .. لكن مو ضروري اضمنه
المهم يدخلي دخل شهري ثابت بأذن الله
وهم مافي مشكله لو ازيد راس المال شويه اذا كان المشروع مافي اي
مخاطره

للمعلوميه القرض اللي راح اقترضه اسلامي
واتمنى يكون المشروع او الفكره اللي في بالكم مايكون فيها شيء من الحرام

اخوكم من الكويت

شنو المشاريع الماشيه هاليومين بليييييييز

ساعدوني ولا ابطل سالفة الزواج وأأجل عرسي لحد مايتنهي قرضي بو 6 سنوات ؟

 

[stillhamad]

اخوي لو كان فيه شي راس ماله ثلاثة الاف او حتي 7 الالاف ويطلع دخل 150 دينار ما كنش حد غلب وجان لقيت البورصه خاويه علي عروشها تصفر ..

وبعدين شنو هالعقارات اللي تبي تشتغل فيها بعشر الاف دينار لا يكون محاكر حمام ..


أنا راي أنك تعوذ من الشيطان وتتزوج وتعين من الله خير ..

خاف التالي لا أنت من الحرمه ولا أنت من حلالك .. يعني تفلس من الثنتين ..

والمثل يقولك حرمه بالأيد خير من محكر علي السطح ..

 

[ولد ابوه]

ياخوي عسى ماشر

طالب مساعده وله طالب احد يزفني ويجعم فيني ؟

وبعدين شنو هالعقارات اللي تبي تشتغل فيها بعشر الاف دينار لا يكون محاكر حمام ..

اخوي عفواً حضرتك تطنز وله شنو
قلتلك ياخوي بدش بشراكه مع اخوي بعشرة الالف دينار شالمانع ؟
يعني ادخل شريك معاه بعدد اسهم بالمبلغ اللي ادفعه انا

بعدين ياخوي انا طلبت مساعده بخصوص المشروع البسيط مو تحقيق

ا

خوي لو كان فيه شي راس ماله ثلاثة الاف او حتي 7 الالاف ويطلع دخل 150 دينار ما كنش حد غلب وجان لقيت البورصه خاويه علي عروشها تصفر ..

اولا مره بحياتي اسمع هالكلام ياكثر البقالات اللي تطلع بالشهر فوق 300 دينار اقل شيء
بس مشكلتها لازم اتبيع زقاير

والمثل يقولك حرمه بالأيد خير من محكر علي السطح ..[/
Quote]
ولله مافهمت وله حرف

وياليت ماترد علي مره ثانيه لانك بصراحه ماعندك اسلوب ودفش حدك:d

ومشكور علي النصيحه


منتظر الناس اللي تحب تساعد بدون اطنازه !!! ولوجه الله

 

[al7bebe]

اقول اركد وابلع العافيه وتزوج ابرك من تزوج القروض

لاتنظر في اهميه الدنيا اكثر من اهميه الاستقرار النفسي والحياه الاخره.
1- توفير السكن النظيف
2- الطعام والشراب
3- الملبس
4- الستر والعافيه
---------
في اهم منهم شيء. طبعا لا

 

[al7bebe]

اضافه

ان وجد راس مالي اضافي لاتعمد عليه في حياه المعيشه
لامانع من دخول اي مشروع تجاري.

 

[بن صقر]

يازين المعاش لا صار صافي بدون اقساط

نعمه من رب العالمين..............الحمدلله

انا اقول اعرس واستانس وارتاح بزواجك وريح نفسيتك ترى اهم شي النفسيه قبل العرس

بعدين عاد حوش شوي شوي وافتح لك مشروع على قدك

ولاحق خير ان شاء الله

 

[Moshaks_777]

افتح مخبز , وحطلك 3 عمال وخلهم يبيعون خبز إيراني , هذا أرخص مشروع

 

[حمووودي]

مافي على مشروعي

السلام عليكم اخوي
بالنسبة للمشاريع لاتفكر ولاتحتار غير حمووودي لاتختار


العضو حمووودي عنده لك مشروع لا ومافيه راس مال ببلاش بس يبيله شغله وحده ...

انك تسمع نصيحتي وتنفذ المشروع وشوف شلون كل شهر بيدخل لك 150 دينار شهريآ ...

لا وابلاش بعد بدون راس مال ..

خلك معاي خطوة خطوة ...

1- دبر لك واسطه اي واسطه خفيفه او قوية تقدر تتعيين في اي وزارة مثل الاعلام او الطاقة او الشؤون على بند المكافأت ...
2- الدوام على بند المكافأت مافيه اي دوام اصلآ ولو داومت يوم بالاسبوع بس ...
3- معاشك 150 دينار ..

شرايك بس ؟..

 

[ولد ابوه]

al7bebe
مشكور اخوي علي النصايح

اخوي بن صقر اشكرك علي المبادره الطيبه والكلام الجميل
لكن تخبر هالايام الواحد اذا جيبه فاضي نفسيته تتعب اكثر !
انا الحمدلله بخير ونعمه لكن تخبر ظروف الحياة والمستلزمات والكماليات
تحتاج ماده

اخوي Moshaks_777

افتح مخبز , وحطلك 3 عمال وخلهم يبيعون خبز إيراني , هذا أرخص مشروع

ولله المشروع ناجح لكن وين تحصل محل خباز لابد من وجود فرع او جمعيه عشان تحط لك محل فيه
وتخبر حضرتك محلات الجمعيات ضرب عصي عليهم هالايام(

اخوي حمووودي هههههههههههه عجيب ردك بصراحه
وبيني وبينك انا بسوي هالطريقه وبتوظف بالميناء او من هالخرابيط ان شاءلله
لكن انت خابر هالوظايف مو دايمه يعني يمكن تمشي لك ثلاث سنوات ورى بعض وممكن ماتمشي لك سنه وحده !
لكن ان شاءلله بحط رايك بعين الاعتبار وبسعى لها وعالله احد من الاعضاء يوظفني بهيك وظايف

لكن المهم الحين ابي المشروع اللي محد يقدر يطردني منه وله يقولي بيباي


بانتظار استشاراتكم

 

[سهم مرتاح]

حط مشروع صغير استفيد منه وخصص جزء بسيط للبورصه في الاسهم الامريكيه البني..طبعا للمغامره فيهم لانها اما ترفعك فوق او تفلس منهم بلحظه وحده

 

[ولد ابوه]

اخوي سهم مرتاح البورصه ماحصلت منها غير الخساير ولله
لي عشرة الالف دينار في بورصة الكويت وللاسف الحين راس مالي 7 الالف
بس انطر يرجع راس مالي وبنحاش من البورصه
بصراحه البورصه مغامره اللهم الأكتتابات ربحهم مضمون باذن الله

بانتظار طرح مشاريعكم يااخوان؟

 

[ولد ابوه]

شكلي قررت اخوض بالسوق السعودي ؟؟

ولله اني مصرقع وبجيب العيد بنفسي

لكن شسوي محد فيكم قدر يساعدني

 

[بوعبدالله]

جرب الصناديق الاستثماريه
حط فيها المبلغ الي تقدر عليه وان شاء الله تتيسر امورك
شوف الصناديق واسئل فيها الاخوان ولا تسئلني لاني للحين قاعد ادرس مشروع الصناديق و الاستثمار فيها ولا استقريت على شي معين على شان اقدر افيدك فيه

وعلى فكرة المينون الي يروح السوق السعودي لان بحد ذاته الدخول فيه مقامره وغير مأمون وخسايره جايده وانت ماعندك تبريد يعني بتقط المبلغ الي عندك كله وبتقامر

لاتنسى تستخير

 

[محب التوحيد]

بسم الله الرحمن الرحيم
الأخ الكريم
السلام عليكم ورحمة الله وبركاته
اسمح لي أن أقدم للك المشاريع التالية الناجحة باذن الله:
1-محل بيع أشرطة اسلامية:
رأس المال خفيف ومساحة المحل صغير .
معدل المردود الشهري(70-140)د.ك.
2-شريك في مكتبة اسلامية:
رأس المال متوسط ومساحة المحل متوسطة.
معدل المردود الشهري(140-500)د.ك.
3-شريك مع مجموعة في حملة حج وعمرة:
رأس المال كبير ومساحة المحل متوسطة.
معدل المردود الشهري للعمرة الأيام العادية(500-900)د.ك.
معدل موسمي الحج والعمرة في رمضان(10.000)د.ك.

وبالنهاية أذكرك اذا فتحت مكتبة اسلامية لا تنسى توزع لوجه الله الكتاب الرائع (الزهور العطرة في رياض المغفرة)

 

[ولد ابوه]

بو عبدالله كلامك منطقي ويثلج الصدر بصراحه ومشكور وماقصرت
اخوي محب التوحيد جزاك الله الف خير علي النصيحه
وهالمشروع بتشاور فيه مع احد الاصدقاء حيث انه يملك تسجيلات اسلامية

سلام عليكم

 

[dcnaq]

قرض وحياة حلوة

السلام عليكم
عزيزى المستثمر ابو عشرة الاف
احسن استثمار من وجه نظري ان تكمل دراستك وتصبح
مهندس او دكتور
على الاقل ادوبل راتبك من 600 دينار الى 1200 ديتار
واتمنى لك التوفيق

 

[بوعبدالعزيز76]

يا ولد ابوه اذا تبى الزرق من الله وانت جاد فى هذا الطلب انا انصحك نصيحتين ما فيهم خلاف ولاشك
1- الزواج اولا لان الزوجه تجى ويجى الرزق معاها
2- اكثر من الاستغفار فهو جالب للرزق
هذا دينك وهذى سنة نبيك