ياشباب يا جماعة ياناس صرخة خسران والله والله والله تري ملينا من الخسائر الي متي والسوق وهذا حاله متي يتغير متي يصحي متي نعوض ولو جزء من خسارتنا كل يوم أردي من اليوم الثاني وكان عندي أمل السوق يرجع مثل السابق بس للصبر حدود اذا بعت أسهمي أكون طالع من السوق خسران واذا صبرت زادت الخساره يا اهل الخبره لا تبخلو علينا السوق وين رايح الي متي النزول هل أنتهي أو بعد في نزول في الايام والأشهر القادمه التوضيح يا اهل الخير كل ما أشوف شقي عمري يضيع مني وأنا مو قادر أسوي شئ يرتفع الضغط والسكر ونفسيتي تتعب وأعصابي منهاره حتي مع أقرب الناس مني الحل الحل الحل حلالي راح جدام عيني
أخي الكريم حط ببالك أنك لست الوحيد الخسران ومعاك الاف مؤلفه خسرانين .. وهم نفس حالتك مو عارفين شيسوون بالظبط أما متي راح يصعد السوق فهذا سؤال لم نجد له أجابه وحتي كبار المحلللين لا يستطيعون الفتوي بذلك ..
والله ودي بس موضوع الطيب جبرني اصير تكانه .. .. علي العموم ملحوقه و الليل بأوله ... ويمديني القالي موضوع أقحص فيه
هذا اهو المصاب والطامة العظمى ان الكل أصابه انهيار الاسهم التدريجي لو الواحد ابروحه يقول انا غلطان وما اعرف اتداول لكن الكل خسران شنو الحل ،، ليش الناس تسكت
أخي الكريم ... أسأل الله أن يرد إليك مالك وزياده ... أهم شي واللي فهمته من كلامك إنك شاري أسهمك من حر مالك، يعني ليس بدين وليس لأحد عليك إلزامات ماليه إن شاء الله ... إذا كان هذا حالك فإن شاء الله وضعك بخير ... أحدثك بقصة واحد أعرفه، صاحبنا هذا كان مثل ما يقولون هامور بسوق البورصه، وشغال ببورصة الكويت والسعودية والأمريكية، وخبره عشر سنين مو سنه وسنتين، كانت البورصه مصدر دخله الوحيد له ولعياله، ومشغل فلوس أقرباءه وأصحابه والكل مأمن فيه لإنه يعني صار خبير .... وبين ليله والثانية، مادري يمكن سنه ال 95 أو 96 صار هبوط شديد في البورصات العالمية منها الأمريكية والكويتية والسعودية، صاحبنا خسر بأسهمه تقريبا 80% !!! .... انصدم وما كان متوقع يصير معاه هذا الشي أبد ... إذا باع باع بخسائر غير معقوله وما لها قيمه وإذا نطر ما يقدر يطلع شي من هالبورصه الميته ... باختصار، قفل صفحة البورصة من حياته، وقرر ينساها كليا ويتجه لعمل خاص خارج البورصه، ولكن بالوقت نفسه لم يبع أسهم، وبعد خمس سنين استرد رأس المال، ومو بس زادت الأرباح وخصوصا خلال طفرة الأرباح للسنوات الثلاثة الماضيه ... أصحابه قالوله رد البورصه، بس صاحبنا ظل مطلق البورصه كليا، كل سنه ياخذ الأرباح والسلام عليكم .... أعتقد فهمت اللي ودي أوصلك إياه .... طلق سوق الاسهم ... لا تضارب ولا يحزنون ... بس تأكد إنك شاري بأسهم قياديه (بنوك، شركات لها على الأقل 5 إلى عشر سنين تعمل في مجالها)، ثم قفل على البورصه وعن أخباره، وركز بعمل خارجي وإنسى الأسهم، اعتبر نفسك بتأسس لمشروع، وأي مشروع يحتاج من ثلاث إلى عشر سنوات لاسترداد رأس المال ومن ثم الأرباح ... نصيحه لا تحرق دمك وأعصابك وتخسر أهلك على شي ما يستاهل ... المال بروح وبيرد، لكن الأهل والصحه إذا راحوا ما يردون ... وصدقني أي محاوله لك بهذا السوق في هذه الأيام حتزيدك هم وغم ... فقوم وتوضأ وصلي ركعتين وتوكل على الله وادعي الله إن يسر لك أمرك ثم فكر في باب رزق ثاني، ولا تفتح البورصه أبدا ولا المنتديات ولا الأخبار الاقتصاديه ... وكل سنه روح خذ أرباحك والسلام عليكم ............. الله يوفقك وآسفين على الإطاله ..
أخوي أحتسب الأجر أنشااللة ولا تعب نفسك ترا الناس كلها خسرانة وحتي بعض المحافظ هم خسرانا اللة يوفقك ويفقنا معاك
الرجل يبي حل وانتوا تقولون الناس كلها خسرانه هو شعليه من الناس ؟ عندي حل ولكن تقدر تقول هو القشه ياقشه مادام المؤشر مانزل تحت 9400 لاتبيع وخلك صابر شوي اما اذا كسر 9400 وراح تحت يبه بيع ولحق عالباقي واليوم اللي يرتد فيه السوق بعد 5 سنين رد اشتر مره ثانيه اذا حبيت هذا حل مني يمكن صح ويمكن غلط مو كل الناس خسرانه ؟؟؟ تحياتي
أولا جزاك الله ألف خير ويوفقك وكلامك صحيح ان الصحة والعافيه تساوي كنوز الدنيا بس اللي يحز في نفسي هو قصرت علي أولادي وحرمتهم من السفر وهذه السنه الثانيه ما شافو السفر كنت أقولهم ان شاء الله تتعدل الأمور قريبا وراح اعوضكم بسفره في احدي الدول الأوربيه وكان عندي أمل أربح وأوفي بوعدي للأولاد وأم الأولاد بس الله مو كاتب لنا نسافر حتي هذه السنه
كلامك صحيح مثل ما في ناس خسرانه لازم يكون في ناس ربحانه صدقني كل ما أقول ابيع ألحق علي باجي فلوسي أخاف يطير السوق واتحسف وتصير خسارتي حقيقيه وليس دفتريه
اخي دليل البورصه . ما اقول الا الله يعينك ويرجعلك راس مالك علي الاقل . بس اخذها نصيحه من اخ في المستقبل لا تمسك سهم بالنازل ولا تبرد عليه . وقالوها بالامثال ( النحشه نص المرجله )
دشينا البورصة نبي نترزق نسينا طعم هنيًَّ النوم روحوا ناموا وعينوا من الله خير نشوف باجر شراح يصير وانا لله وانا اليه لراجعون على فكرة : ترى قطع الأعناق - ولا قطع الأرزاق حكمة قالها واحد ناسي اسمه
خبر عاجل :- تم استعانة الجيش الاسرائيلى اليهودى بتجار الكويت لتدريبهم على طرق الخباثه واللعانه والاجرام في التعامل مع صغار المتداولين . اخوى العزيز تجار الكويت اكبر صهاينه على وجه الارض يمصون دمك ويقطونك بالبحر اذا طلبت اطلب ربك لا ترجى منهم شي لو بيدينهم الهواء جان اقطعوه عنى وعنك ( حسبي الله ونعم الوكيل )
تفائلوا بالخير تجدوه شى غريب هالسوق , النفط وصل لسعر خيالى , والفائض من خير النفط دبلات وبالمليارات والحمد لله والمشاريع والتطوير حدث بلا حرج والإقتصاد آخر حلاوه , والوضع الداخلى يالله من فضلك , وغيره وغيره , يعنى المفروض السوق فى هالظروف فوق خمسة عشر الف نقطه , وآنه ما أبالغ , ما ندرى شالسالفه , آنه اذكر من ايام بداية طلعة المخازن وحتى بداية الكارثه وأغلب الكتاب و المحللين يبشرون بالخير وان المسأله مسألة وقت ويتعذرون بسعر النفط الخيالى والإقتصاد الجيد ..الخ وللأسف جشع الكبار ومحاولت بعض المحافظ استغلال الفرصه واللعب بأرزاق صغار المستثمرين والمساهمين , وصلنا لمرحله التخبط وعدم الشفافيه , لدرجه اننا نقرأ بالجريده بعقود وارباح لبعض الشركات وسبحان الله سعر السهم ينزل بنفس يوم ورود خبر العقود لنفس تلك الشركات , وشركات ترتفع اسهمها بعد اعلان الخساره , صراحه النفسيات تعبت والثقه انعدمت , بس المشكله ان الغالبيه اذا مو الكل يبى يرجع على الأقل راس ماله , ومضطر انه يصبر لأن ماله غير الصبر , والله كريم , وارجوا انكم ما تاخذون كلامى بسوء نيه , بالعكس تفائلوا بالخير تجدوه , لأن البورصه معناته تحت وفوق , يعنى السوق راح يجيله يوم طالع طالع ومفتاح الربح الصبر ( الصبر / الصبر / الصبر )
