أنواع الشباب الموجودين في بلدنا

الموضوع في 'إستراحة المنتدى' بواسطة حوار صحيح, بتاريخ ‏3 سبتمبر 2006.

  1. حوار صحيح

    حوار صحيح موقوف

    التسجيل:
    ‏9 أغسطس 2006
    المشاركات:
    29
    عدد الإعجابات:
    0
    أنواع الشباب الموجودين في بلدنا

    1- نوع لاهي بالكره وكل يوم عنده لعب ويطلب احدث انواع احذية الرياضه من الانترنت ويكون متعصب على نادي اوروبي

    2- نوع توه مطلع اجازه سياقه وتشوفه راكب الجمس ولا الاستروو فان مال الوالد المهم سيارة يسوقها ويلزق عليها لزقة انيرجي يعني انا كووول وغالبا ما يخاف من الدوريات ولي صادوه يبجي

    3- نوع غرامه شي اسمه حمام ويحطله بالبر خيمة ومحكر حمام ويسمويه ياخور وغالبا يكون عنده سيارة كولت عشان ما تصرف بانزين بالطريج حق الياخور

    4- نوع تشوفه شيبه ومكبر عمره وما يخلي دوانيه الا يروح لها ويتكلم في كلام اكبر من عمره ويحلم يكون مرشح المستقبل وغالبا ما تكون جواتيه والنعل ملوته من ماركت كلاركس طبيه حشى السامع

    5- نوع جدام الناس والنعم وثلاثة انعام وما يخلي موجب الا ويروحله ويكون محبوب بين الناس وخدوم بس لا تتصل عليه بالويك اند بعد الساعه 12 لانه محول جهازه مس يووووو لووووول

    6- نوع دايما تشوفه هيلقي وهدومه كلها دهن وياشايل مكينه السياره يا مبدل الجير واظافيره كلها سود حتى لو كشخ من الدهن ودايما في رابطة السيارات كل اسبوع

    7- نوع ليلحين متخلف شغل هدات ومسابق وكل اسبوع بصبحان لوووول شبخاري وتكون سيارته كمارو ولازق عليها 9999تقسيم 88888=رقم تيلفونه الحبيب

    8- نوع مافي معرض بارض المعارض الا تشوفه موجود يحوووس فيه ويموت على التلزق بالبنات ولي شافه احد من اهله هناك قاله والله ياي اشتري كتاكيت ملونه حق اليهال.......نصااااااااااب

    9- نوع كل ماتروح فرايدز او ابل بيز لالالازم تشوفه مرتز على البار ويكون عمره فوق 35 ولابس غتره وعقال شغل خبال ويشرب شي دافي يدور على الرخص....الله يعين هارد روك الحين على هالاشكال

    10- نوع يدشلك كلية عسكريه عشان يقز بقرعته بالويك اند والبنات مثل الخبال وااااااااي يحلاتهم ملوت الشرطه والجيش وتلاقيه يوم الجمعه يكشخ بالبدله مالت الفسحه عشان يشتري زقاير قبل لا يدش



    11- نوع بوهبه يوم شاريله طراد يوم يشتغل بالعقار ويوم يدش شركة بزنس ويوم يدش النت ويوم يطير حمام ولا يطيح في قهوه مع ربع يدد......الله يرحم بحاله

    12- نوع هوايته شي اسمه قز تلاقيه كل شوي عنده موتر يديد والولد ساكب ذيج السكبه والبنات يستخفون عليه ولما يجيكون على سيارته يطلع مأجرها من محل اجار سيارات بالرقعي لووول

    13- نوع حده كافي خيره شر الناس وتلاقيه مايطلع من بيتهم الا حق الدوام بس وبالليل يقعد بدوانيتهم مع واحد من ربعه وكل واحد يلعب بروحه جنجفه شكو قاعدين مادري...والتلفزيون ليلحين عرب سات بعد

    14- نوع ايمعله معاش جم شهر وياخذ اجازه عشان يسافر تايلند ولا المغرب عند الحب ديالي لووول وتكون خرابيطه كلها بره الديره ولي رجع قالوا فلان والنعم .....والحين هابين في كرواتيا وصربيا حق الرخص

    15- نوع يشتركون 3 ولا 4 شباب ويحطون لهم شقه ولا بيت على بو انها دوانيه لهم ومكان يتنفسون فيهم بينهم وبين بعض وماشين على مبدأ الستر زين ويسمونهم الزقرتيه ;}

    16- نوع مايعرف يقعد راحه وكله شاد حيله وان قلتله يلا تلاقيه راح قبلك بس للاسف شغله كله تيش بريش يعني اي حاجه ويسمونه الخكري النشيط

    17- نوع غرامه انه يتعرف على البنت ويجذب عليها انا ولد فلان وعندي سياره اخر موديل بس بعتها والحين طالبلي من دبي موتر وانا ولد فلان الفلاني واخر شي يطلع مو كويتي ولا ^^^^ الله المستعان

    18- نوع مايطلع من بيتهم تلاقيه 24 طايحله انترنت وينام لي شق النور وكل همه يرقم بنات ولا يشتري عود ويدندن في البال توك والبنات الللللللله بعد بعد غن وتتولع فيه البنت بس مو راضي يوريها شكله

    19- نوع كل مره ياخذ قرض ويسدد فيه قرضه القديم بحجة انه يبي يسوي مشروع واخر شي طاق التذكره وطاير وطارت الفلوس وطار المشروع وهلم جرا

    20- نوع مو عاجبه وضعه بالشغل ووده انه يصير شي وكل شوي يدش بمشروع ويبط على ويهه وما يتعض من تجاربه الفاشله ويسمونه المدمغ



    21- نوع مطير معاشه وفلوسه على البنات واهوا مو طايل منهم لا حق ولا باطل ولي دق على البنت ترد عليه بعد 5 اتصال وغالبا يكون جيكر ويسمونه الكمخه

    22- نوع ليلحين قاص على عمره ويشجع ريال مدريد !!! ياعمي القوة مو بالعضلات ترى افهم عاد شنو شغل يهال انا احب رونالدوو

    23- نوع مايعرف يحلق لحيته الا بالحلاق يقول لي حلقت بالبيت اقلب الحمام حشاكم مصلخ من الدم ....ياخي شوي شوي لين اتعلم ليش الخساير

    24- نوع يشتريلك فراري ولا ديابلو ويطقلك الغتره جريمبه فوق العقال ويحطلك قفل بدون شنب ويلبس نعال نجديه حشاكم يعني العوده اللي الماضي وانا كووووول

    25- نوع يشتريلك جيب ويغيمه تغيم اسود بالكامل ويلزقلك عليه وسم الاسره الحاكمه ومايرد على احد ولي لحقته تلاقيه ساكن الفردوس شلووووووووون بالله !!!!!

    26- نوع في نقص كل ما يسولف لازم يجذب ودايما يحب يتفخ نفسه انا وانا والمشكله ان الناس طايحين عليه وعنده حق كل سؤال جواب (انا ضابط واهوا رقيب اول)

    27- نوع ضارب الدنيا بالحيط عنده طراد 14 قدم ولابس ذيج البجامه وكل يوم يدش الحداق بروحه واهم شي يكون معاه مارلبوروو بوكس احمر...يالله الجدوه :)

    28- نوع في بلاغة شف دايما يحب يعرف فلان من ولده ومنو خواله ويتكلم عن الاصل والفصل واهوا لونه وردي !!!

    29- نوع حاطله شقه بروحه اجارها 90 دينار ومتعرفله على فلبينه من ملوت صالات البلياردوو ومغرقها كروت وطنيه اكسبرس ومطيح معاها في سوق المحاميد حق الرخص

    30- نوع تقول مبطل في بيتهم مصبغه غترته على طووول واقفه وما اتعفس وطاقلك ذيج السبعه والبزمات مالها والي وكل شهر لازم تشوف صورته في مجلة ليالينا....شسالفه تلحق المصور مالهم ياالحبيب



    31- نوع اثول كل مره يتعرف على بنت ويبتلش معاها نفس البلشه ويقعد يدقدق على ربعه يدور على حبوب ويشتريها لو 200 دينار.....علامك ياخي مافي كنتروووول......الحمدلله والشكر

    31- نوع مستانس انه متخرج ضابط وتلاقي بدلته ما تنزل من السياره على طول معلقه ورى وقز بالشوارع ودايما يخلي البنات بالاشاره صوب المكان اللي معلق فيه البدله

    33- نوع سواله جم سي دي اغاني قال اسكت صرت دي جي ويبلش يسوي حق ربعه وبعد فتره يطبعله كروت ويفتح محل افراح......شدعوه يا الحبيب اخاف دي جي كروو بس

    34- نوع لاتطيح عينك بعينه واهوا قاعد يسولف والله يجلب فيك ويقعد يقرع عليك لي اذان الفير وانت مثل الاهبل اي واي

    35- نوع لي شفته ماودك تسلم عليه من ريحته اعووووذ بالله الظاهر ما يبي يستعمل سيكرت ولا ليدي سبيد مال الجسم عشان لا تبقع فنايله باللون الاصفر لووووووول

    36- نوع يموت على ملاحق البنات ومتعته لما البنت اطيح فيه سب وتلعن ابو خامسه والحبيب مبطل الكشره ويتضحك جنه يقول لها بعد سبيني ....وين كرامتك طال عمرك !!!

    37- نوع متعته يقز بشارع الحب ولا يرقم ولا شي بس شغله شفت فلانه اليوم مرت وفلانه شافتني وبعدين شهالخساير بالله

    38- نوع مشتهي يتزوج بس مو قادر كل ما يمعله جم بيزه شيشوه ربعه بالعطله وطق وسافر ولي رد يقعد ايمع من جديد ويقول بس اخر مره

    39- نوع مايبي يتزوج خير شر طايحله على وحده مطلقه ومريح باله وعيالها ينادونه عمي فلان لانهم دايما يشوفونه لما ايب لهم الغاز بالشقه لووووووووول

    40- نوع لي صك عمره 40 لبسلك ذاك القميص والبنطرون والكاب عشان يخش الصلعه وشال الشنب وصبغ الزلف ويتفرفر من كافيه لي كافيه وتلاقيهم في كوستا المرينا وايد...ياخي مايصير تاخذ زمانك وزمان غيرك



    41- نوع معتوه تلاقيه يطول على مسجلة السياره ومبطل الدرايش عشان يحسس البنت اللي واقفه يمه بالاشاره ان الاخ حده رومانسي وغالبا ما يكون عنده كولت ولا جالنت وكاتب عليها من ورى فوولووو مـــــــي ;)

    42- نوع متخلف ما يبقى شي مو مسويه بسيارته وتلاقيه يحول الجلانت بي ام 500 ويحول الجيب الباثفايندر جيب انفينيتي ويكون حاط الليت الازرق المليق اللي يسكر العين ويوقف في شارع المطاعم بالليل

    43- نوع توه مطلع اجازه تلاقيه ياخذ سيارة امه ويكود عيال خالته معاه ويقز فيهم بالشوارع وامه المسكينه متوهقه مافي احد يرجعها البيت من عقب الزواره فا ترجع مع خالته

    44- نوع تلاقيه مغتر ولابس ذيج الدشداشه المخصره والقوله تقول برج العرب وحشاكم النعال او الجوتي من رومانتك يعني يشجع الصناعه الوطنيه ويقول حق البنت فـــــي مجااااال وتلاقيهم في سوق السالميه اليديد او المباركيه

    45- نوع دايما تلاقيه في الكافيها ستاربكس او كوستا يقعد من الساعه 5 العصر عشان ياخذ موقع ويطلع عصير برتقال عشان الرخص واهوا طايحله بلوتوووث

    46- نوع شاد حيله بنتخابات الجامعه ومضيع صحته ومراكض بالمطابع ودافع من جيبه يمكن 1000 دينار واهوا يدري ان بيتخرج وماراح يستفيد شي
     
  2. سوينق

    سوينق موقوف

    التسجيل:
    ‏26 يناير 2006
    المشاركات:
    285
    عدد الإعجابات:
    0
  3. الرشيدي15

    الرشيدي15 عضو جديد

    التسجيل:
    ‏13 يونيو 2006
    المشاركات:
    24
    عدد الإعجابات:
    0
    نوع يشتريلك جيب ويغيمه تغيم اسود بالكامل ويلزقلك عليه وسم الاسره الحاكمه ومايرد على احد ولي لحقته تلاقيه ساكن الفردوس شلووووووووون بالله

    متى الكويت تصير حكومة فدرالية وتصير بينا وبينكم حدود