ممكن شرح السوق الاجل

[الرشيدي15]

السلام عليكم


ممكن شرح السوق الاجل بالتفصيل

 

[المعرس]

سوق الآجل:
تقدر تشتري منه بس وما تقدر تبيع.. اللي يبيعون اثنينه بالسوق .. تقريبًا 95% من عقود الآجل تقوم فيها شركة الكويت والشرق الاوسط..
وحداته = عشر اضعاف وحدات السوق الرسمي
في شي بسوق الآجل يسمونه موعد استحقاق.. مواعيد الاستحقاق بالاشهر: 3 او 6 او 9 او 12، والعاده تكون 3 اشهر
طريقته: تشتري اسهم وتدفع 40% مقدم من قيمتهم يعني جنك شاري اسهم قيمتهم 100الف دينار بس تدفع 40الف وصانع السوق يدفع لك الباجي (60الف).. وتكون الاسهم باسمك طول فترة الاستحقاق

حالة الخساره: اذا طاف موعد استحقاقك.. ونزلت قيمة السهم عن 60% من السعر اللي شريته.. يعني يوم شريت قيمة اسهمك 100الف عدل؟ اذا نزلو وصارت قيمتهم تحت ال60الف يقوم صانع السوق ويبيع اسهمك كلها ب60الف دينار وبهالحاله يكون ضمن الفلوس اللي دفع لك اياها 60الف.. يعني ما خسر ولا شي.. وانت؟؟ تروح عليك فلوسك وتفرش بساط الفقر

حالة الربح: اذا ارتفع سعر السهم من يوم شريته وصارت قيمة اسهمك مثلا 200الف دينار.. انت دفعت يوم شريت 40الف عدل؟ والبايع دفع لك 60الف.. تملك الاسهم ويكون صافي ربحك = 200 (قيمة الاسهم الحين) ناقص 40 (فلوسك اللي دفعتها يوم شريت الآجل) - 60 (الفلوس اللي دفع لك اياها صانع السوق يوم شريت الآجل) .. الناتج راح يكون 100الف.. يعني استمثرت 40الف وربحت منهم 100الف خلال فترة الاستحقاق

مو كل الشركات تقدر تشتري منها بالآجل ومو بأي وقت.. كل شي يمشي على مزاج صانع السوق.. والمستفيد الاول والاخير من الآجل اهو صانع السوق سواء كنت خسران او ربحان اهو بالحالتين ربحان ربحان ..

دير بالك ترى صانع السوق يلعب بالصغار العاااااب بسوق الآجل ويتحكم باسعار الاسهم.. وبسوق الآجل انت تحط راسك راس صناع السوق وبالنهايه انت اللي بتخسر ومن خسارتك اهو يطلع ربحه

 

[مساعد الجارد]

السلام عليكم

الله يبعدنا و يبعدكم عن الآجل يسمونه الأجل ( الموت ) .

استثمر فلوسك القليلة و الله بيوفقك ان شاء الله .

و فر من الآجل فرارك من الأسد

 

[جاد جدا]

ابعد عن الطمع الآجل هو الطمع بعينه