الحبحب والاسهم

الموضوع في 'إستراحة المنتدى' بواسطة عفار, بتاريخ ‏7 مايو 2003.

  1. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    كيف الحال ابوفهد

    البارحه مريت بموقف طريف مع احد الاخوان بالماسنجر وحبيت أرويلك

    هالقصه

    أمس كان الجميع متخوف من السوق بيطلع ماهو طالع وكان هذا الشغل

    الشاغل للجميع

    فتحت الماسنجر ولقا واحد من الاخوان اللى من زمان مسكر ماسنجره

    فرحتبه وقعدت اسولف معه قلت وش عندك اليوم راز خشمك عند

    الماسنجر

    شرّاى ولاّبياع

    قال

    لا والله يالعفار ألا بياع وأبي أنحاش عندى سهم ناشب فى حلقى له

    شهور واليوم جاب راس مالى ويمكن انه يجيب مربح قليل وهذا ناطر المربح

    وفوق راس المال ببيع

    وكان السهم يابوفهد اثناء حديثنا على سعر الهاى والسوق على نهايته

    والرجال متوتر حتى كتاباته كلها اغلاط املائيه

    ويقط خيط وخيط

    المهم

    حطيت سهمه عندى على الاستريمر وقعدت اراقبه معه تفاجئنا ألا

    والسهم ينخرط الى تحت بسرعه مذهله وبدال ماكان راس المال سالم

    صار ينقص شوى شوى

    بعد صبر ايوب وطول انتظار الرجال انفعل

    قال تكفا يا العفار وش السواه واذا تبى الصراحه يابوفهد انا تلخبطت

    مادرى وش اقوله وكانت عبارتى بهذا الشكل

    لا يارجال خله يمكن يرد

    توحينى أقشطه والله يعوضك

    لا أصبر حطه على سعر راس مالك يمكن تجى ارباح سيسكو زينه ويطلع السوق

    أثناء كلامى هذا وأذا برجال

    يكتب بالماسنجر

    الحبحب عندنا ياولد

    على خمسه دولار على خمسه دولار

    الحبحب الزين عندنا ياولد

    قرب جاى قرب جاى

    أنا أستغربت منه وقعدت أضحك واحاول انى أكلمه عبر الهاتف ألا ان الرجال

    معطينى اشكل وكذلك أحاول انى أكتبله بالماسنجر لكن ايضا معطينى

    أشكل

    سكر السوق ولا ادرى عن صاحبنا باع ماباع

    ومن الصبح الساعه 9.5

    دقيت عليه ولقيته صاحى

    سلمت عليه وقلتله أنت علامك البارح أشغلتنا عليك وش الحبحب

    اللى انت قاعد أتحرج عليه فى الوول ستريت

    ضحك ضحكه فيها مراره وحرقه يابوفهد

    قال لى

    أنا يوم شفت السهم قام يدحدر ماتمالكت نفسى ورحت وعرضته

    على سعر معين وكانت الكميه كبيره والناس ماهى راضيه تشترى

    كل شوى جاى واحد ولاقط 100 سهم والطيب فيهم يمر ويلقط 1000

    وكنت ابى الكميه تخلص بسرعه قبل ماينزل السوق

    لانه يابوفهد كان يقول ان السوق بينزل والرجال كان متشائم خلقه

    المهم

    يقول وأنا فى هذه الحاله من الرعب ماقدرت أسيطر على نفسى ومرت

    فينى حاله صارت لى من زمان وأنا فى ريعان شبابى ( الكلام لصاحبنا)

    يقول أنى كنت أكد خط شقرا والسر وأنقل الحبحب من تلك المناطق

    الى الرياض على جمس ابوعبارتيين

    وكان شغلى بالايجار 120 ريال على النقله

    وفى يوم قردنى الله وقلت بشتغل لحسابى

    ورحت لواحد من اصحاب المزارع واخذت منه حمله ورحت فيها لسوق

    عتيقه

    وقعدت أحرج على الحبحب لكن الشريطيه الللى اهناك دقوا سوقى

    وأصبت بخساره يعنى يقول يالعفار راس المال يرجعلى لكن

    الخساره فالمشوار والتعب

    فرفضت ابيع حبت حبحب وقلت ياولد مالك ألا شارع أنكاس

    ببسط بذا الحبحب أذنه ينباع

    لكن المصيبه كانت اهناك لانه حرج على الحبحب بأقل من سعر المشترى

    نظرا للتنافس الموجود فى ذلك الشارع واهل الجموس كانو من صباح

    الله خير باسطين قبله وماكلين سوقه

    ويقول يابوفهد فى عرض سالفته انه ماينسى هالمشهد فى شارع

    أنكاس لما يمسك الحبحبه وهو راكب فوق الجمس ويصيح باعلى

    صوته

    الحبحب الزين عندى ياولد الحبحب الزين عندى ياولد

    قربوا جاى قربوا جاى

    على خمسه اريال

    ويطقطق على الحبحب

    فالمشهد هذا تكرر مع صاحبنا حيث ان السهم اللى شاريه كان عارضه

    بنفس القيمه خمسه دولار اللهم ان الاختلاف بسعر الصرف فقط

    فقام يطقطق بالكيبورد على خمسه دولار على خمسه دولار

    كأنه يبيع حبحب بدون شعور

    وقال لى

    هاذى السالفه يالعفار

    لاتعلم فيها ابوفهد

    قلت معصى والله لعلم ابوفهد

    يحط فيك قصيده

    وسلامتكم
     
  2. خالد فهد السلوم

    خالد فهد السلوم عضو جديد

    التسجيل:
    ‏3 سبتمبر 2001
    المشاركات:
    369
    عدد الإعجابات:
    0
    مكان الإقامة:
    الدرعيه
    عز الله انها وصلت يابو عبدالله .. ورفيقك مهوب بالحاله في مثل هالظروف.. (اقصد ظروف الحبحب والسكين) فهاذا صديق لي قبل خمس سنين .. كنا قاعدين نسولف ان لازم الرجال يتصرف ويتسبب ولا يترك خيرات ديرته لغيرها و ووووووو ... الخ ... الشاهد ان فكره التسبب خومرت في راسه وهو يشري له كميه ستوك ( طماط ) بسعر خمسين الف ( تحويشه العمر) ونصا بها سوق عتيقه عشان يبيعها من الفجر قبل ما تصحى الطيور من اعشاشها .. طبعا هناك في عتيقه وما ادراك ما عتيقه ... الشريطيه المحترفين ... الله لا يوريك ياكلون الزلط ... وعدو عيني اللي يتشطر عليهم .. وخصوصا اذا كان طري العود مثل رفيقي ... يحسب الدنيا كلمه رجال وقولت حق ... الشريطيه يوم انهم رازوا الرجال لقوه الله بالخير ... وبدأ المزاد واذا على اول النهار السعر ماجاب ولا راس المال ..... هنا طبعا هم متحكمين بامور السوم ولاعبين الشطرنج صح ... ومن هنا وهناك ... انتهى الوقت الافتراضي للبيعه وكانه عرف الملعوب ودخله العناد ... والله ما ابيع ....انا اوريهم من انا ( هذا كلام الرجال ) قرر انه يبيع بالقطاعي وحلف ذيك الايمان انه بيبيع بسعر يكسر سوقهم .. ويلقنهم درس ينسيهم حليب امهاتهم ...
    نزلوا صناديق الرجال وبدأ يبيع ويحرج .... انتهت فتره الصباح .. ثمن جت فتره المساء ... طبعا باع .. مهوب ما باع .. لكن نسبه ما باعه ما تتعدى ربع الكميه ... هنا صار يبيع براس المال .. ولمن قرب السوق يصك صار يبيع بخساره .. لان الطماط (الطماطم) يخرب بسرعه يعني اذا ما ينباع في وقته يفسد ...
    عند اقفال السوق قرب يمه لحيه غانمه من اياهم وهمس في اذنه
    الاتي :

    يا وليدي قلنا لك .. ما ينباع البيض على سلاقينه ....

    يقول والعهده على الراوي ... التفت على هالشايب وقلت ..هين بيني وبينكم السوق ... والميدان يا حميدان ...

    قلت له وبعدين رديت عليهم ؟ قال لا ابدا ..اللي سويته اني قمت بتوزيع اللي بقى معي من طماط على اللي اعرف واللي ما اعرف ... اقل ما فيها اني وصلت بعض ارحامي ولو بصندوق طماط .

    وسلامتكم .
     
  3. خالد فهد السلوم

    خالد فهد السلوم عضو جديد

    التسجيل:
    ‏3 سبتمبر 2001
    المشاركات:
    369
    عدد الإعجابات:
    0
    مكان الإقامة:
    الدرعيه
    الحبحب والسكين

    لا زلنا يابو عبد الله في الحبحب وخصوصا ذا الايام الحاره هو سوقها :-


    ثلاثه اشياء سهل اني انغش فيها .. :-


    1 - العسل .

    2 - العود ( الدخون )

    3 - الحبحب .

    ______


    ابي اتكلم عن الحبحب :-

    كثير من الناس وهذا بشوفه عيني يقدر يميز الحبحب الحمرا ء من الحبحب البيضاء بكل سهوله .... وطبعا انا ما اقدر اوهق اشتري الا بعد
    ما يسن السياف سكينه ويفك الجح واشوف هي حمراء والا بيضاء
    ولكن جاني علم من بعض الاصدقاء ان السكين المستخدمه عاده تكون ملوثه بالجراثيم لذلك نصحوني ان اشتريها بعد ما ابرقها زين واكتشف هي المطلوب والا لا .... قلت لهم كلامكم حلو ولكن كيف ؟
    قالوا شف يا طويل العمر :-

    ناظر جلد الحبحب وازلغ جلد الحبحب باظفرك .. اذا لونها اخضر فهي عز الله حمراء يقطر حمارها مثل الدم ... قلت بس هذا كل المطلوب ؟ قالوا نعم ... قلت جزاكم الله خير يا ليتني عرفت من اول ....
    مرت الايام وجت الايام .. وكنت انا وبعض الاصدقاء في طريقنا للبحر في مدينه جده ... وكان الجو يشوى الوجوه والاجساد ... يوم عدينا ذاك الونيت اللي متروس من الحبحب اللي يحبه قلبك ... زعقت فيهم مثل الملدوغ ,,, وقفوا .... وقفوا ... قالوا وش فيك عسى ما شر .. قلت
    نبي نشتري من هالمزايين ... الشاهد نزل اثنين من الاصدقاء وقالوا للرجال ... عطنا ثلاث ... بس على السكين ... ( يقصدون انه يفكها اول قبل ما نشتري ) ... قلت نعم ؟ وش تقولون ؟ على السكين ؟ وش هالحكي الفاضي ... انتم عارفين ان السكاكين ملوثه ؟ قالوا يابن الحلال تبينا نشتري حبحب يطلع ابيض ... قلت يا حليلكم .. اثر ما عندكم خبره في الحياه .. واللي يشوف شواربكم يقول يا سلام سلم ... وخروا عني وخروا يا مال الحبحر ... المهم قعدت اقلب الجح كانني اقلب اليت خروف واخترت ثلاث يحبهم قلبك ... وقلت بصوت الواثق المغرور ... هات هذولي يا ولد .... الشباب تعجبوا مني وقالوا ما شاء الله عليك يا خالد ما كنا ندري ان الجح له فنون وعلم ... قلت ما عليكم توكلوا على الله .
    الشاهد وحنا في الطريق همس في اذني ولد عمي ( خالد انت متأكد من الحبحب ؟ لا يكون نتفشل مع الربع ) قلت بصوت عالي يا جماعه ترى اذا الحبحب ما طلع احمر مثل دم الغزال فترى احلق شاربي واقطه في البر قدام عيونكم ... وبصراحه كلهم وبصوت واحد ردوا ... كفوا والله يابو فهد واثقين ان اختيارك صايب والا ما خاطرت بشنبك ....

    وصلنا وتغدينا والي علينا بالخير وكنا حاطين الحبحب في ثلج عشان يبرد
    قام واحد من الربع وسل السيف واخذ الحبحبه الاولى وفكها واذا والله لونها اشد نصاعه من خد جورج بوش ... انا كنت لاهي ما شفت اللي صار ... المهم اخذ الثانيه واذا هي ماهيب اقل من اختها ... والثالثه كأنها حب اللولو من شده البياض ... ناداني خويي بصوت عالي :-

    ابو فهد ... ابو فهد ... قلت سم ... قال بسرعه الله يجزاك خير جب معك موس ... قلت ليش ؟ قال ابد طال عمرك ابي احلق مهوب شاربك ... بس .. ابي احلق رموشك وجفونك يا ما الحبحر .

    طبعا عقب ذاك اليوم ما عاد لي وجه اطل عليهم ولا اطلع معهم للبر لان الفشيله شينه يا ولد عبدالله ...

    وسلامتكم .
     
  4. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    ههههههههههههههههه

    أربنك فكيت أشنبك يابوفهد

    الثقه الزايده فى بعض الاحيان توهق الواحد مثل سالفتك هاذى اللى بغا

    شنبك يروح فيها

    تدرى يابوفهد

    مشكلتنا الكبيره أننا ناخذ المعلومات وننقلها بدون مانفكر فيها او أناقش

    اللى قالوها لنا أو نجربها معاهم قبل ماننقلها ونتحمل وزرها

    يعنى لونك شريتلك حبحبه وحده ورجعت للرجال اللى قالك ذا السالفه

    او المعلومه هاذى واختبرت قدراته ماكان وقعت فى مثل هالاحراج

    مع العيال

    صح يابوفهد

    أنا بشتريلى قلب من هالسالفه وانت بعد يابوفهد اكيد أنك اشتريت لك

    قلب من هالموقف
     
  5. عجيم

    عجيم عضو جديد

    التسجيل:
    ‏1 أغسطس 2002
    المشاركات:
    531
    عدد الإعجابات:
    0
    ههههههههههههههه

    للاخوه الكويتيين الحبحب يعني (الرقي):eek: :eek: :eek:
     
  6. a7dab

    a7dab عضو جديد

    التسجيل:
    ‏24 مارس 2003
    المشاركات:
    11
    عدد الإعجابات:
    0
    :D :D :D

    اللهم لا تبلانا
     
  7. دايخ

    دايخ عضو جديد

    التسجيل:
    ‏3 فبراير 2003
    المشاركات:
    175
    عدد الإعجابات:
    0
    مكان الإقامة:
    السعوديه
    :D :D :D :D :D :D :D :D

    والله ضحكتونا ياجماعة يازين هالسوالف :p .
     
  8. خالد فهد السلوم

    خالد فهد السلوم عضو جديد

    التسجيل:
    ‏3 سبتمبر 2001
    المشاركات:
    369
    عدد الإعجابات:
    0
    مكان الإقامة:
    الدرعيه
    برنامج

    ابو عبدالله ... مساك الله بالخير ... وجميع الاخوان ...

    فيه يا طويل العمر برنامج يحبه قلبك ... ويمكن انك تعرفه ... هذا البرنامج

    يجي مساء يوم الاحد واسمه ( شعر النبط ) في القناه الفضائيه الكويتيه

    انا قد شفته من زمان ... ولكن البارح كنت اتابعه من اوله لاخره وبصراحه

    رائع جدا .... الشعار نقوه ... والشعر من اللي يخليك تعيش في زمان

    راكان بن حثلين ... والدويش ... وغيرهم من عظماء وفرسان الجزيره

    والخليج .... والاروع من ذلك ( في وجهه نظري ) هو المقدم ( سعد

    العزب ) هاللحيه الغانمه ( سكره ) رهيب سواءا في اسلوبه الغير

    تقليدي والا في طريقه لبسه للغتره .....

    الا بالمناسبه ... ما لاحظت ان 99 % من الشعار اذا سألهم المقدم

    وش عندك يا فلان من قصيد الليله ؟ ) كلهم او معظمهم عنده قصيده

    غزليه .... يعني ما قد سمعت احد يقول ان عنده قصيده في وصف

    فوائد النوم بدري ... والا تفريش الاسنان في اليوم ثلاث مرات ..!

    بصراحه انا متعجب ......
     
  9. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    هلا ابوفهد

    العزب رجل مطلع فى الشعر يابوفهد وله كتاب

    ويعد من افضل المقدمين لبرامج الباديه فى الخليج

    أما سر أناقته فاسأل عجيم هو أخبر منى فى هالشى

    :)

    أما ماتفضلت فيه يابوفهد أن الشعار ماعندهم ألا الغزل

    فالاعلام عاوز كده

    لكن فيه شعر سياسى وشعر يناقش المواضيع الاجتماعيه

    وأيضا شعر يهتم بالصحه مثل

    على جناح الباميه وقع الفول 00وصارت على بعض الفواكه غبينه

    المقصد

    راح أسمعك قصيده لواحد شاب

    أبتلش مع البلوه اللى يسمونها البطاله

    لكنى ما أحفظها وراح اسجلها لك ونزلها بالمنتدا

    على شان ماتقول ماعندكم ألا الغزل

    :)
     
  10. ابوخالد

    ابوخالد عضو جديد

    التسجيل:
    ‏1 سبتمبر 2002
    المشاركات:
    400
    عدد الإعجابات:
    0
    مكان الإقامة:
    الرياض
    عن اذنك ياعفار ارسل لك قصيده انا ماعرفت انزلها في المنتدى ان رايت مناسبتها فالله يعينك على تنزيلها ترى اخوك (ميح) يالله اساسيات في الجهاز
    مع اعتذاري من الجميع على المداخله الي مالها سنع
     
  11. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    ابوخالد

    أكتبها هنا ونزلها

    ياطويل العمر

    ماتحتاج هاللفه

    :)
     
  12. ابوخالد

    ابوخالد عضو جديد

    التسجيل:
    ‏1 سبتمبر 2002
    المشاركات:
    400
    عدد الإعجابات:
    0
    مكان الإقامة:
    الرياض
    صادق والله ياطويل العمر بس المشكله انها ملف صوتي
    وسلامتك
     
  13. ابوخالد

    ابوخالد عضو جديد

    التسجيل:
    ‏1 سبتمبر 2002
    المشاركات:
    400
    عدد الإعجابات:
    0
    مكان الإقامة:
    الرياض
  14. عفار

    عفار عضو جديد

    التسجيل:
    ‏16 يناير 2002
    المشاركات:
    1,389
    عدد الإعجابات:
    0
    مكان الإقامة:
    الرياض
    هلا ابوخالد

    الظاهر حنا طلعنا ماحنا والنعم

    لانى شايل سماعات الكمبيوتر حقى

    على شان مايدوخنى

    بصوته

    مادريت انك بتحطها صوتيه

    وش الدبره ياطويل العمر

    لانى حاب أسمعها

    :(

    أن كان أحد سمعها ويقدر يكتبها لنا أكون عاجز عن شكره
     
  15. ابوخالد

    ابوخالد عضو جديد

    التسجيل:
    ‏1 سبتمبر 2002
    المشاركات:
    400
    عدد الإعجابات:
    0
    مكان الإقامة:
    الرياض
    اخوي عفار تامر اخوك الصغير امر
    والله اني اشغلتك بشئ اخاف مايجوز لك
    لكن والله اتوب بس عطني اشاره منك او من الحاضرين وسلامتكم
    http://www.al4san.com/AlSaed02.htm:(
     
  16. ابوخالد

    ابوخالد عضو جديد

    التسجيل:
    ‏1 سبتمبر 2002
    المشاركات:
    400
    عدد الإعجابات:
    0
    مكان الإقامة:
    الرياض
    اسف رح للعنوان هذا واطلب( قالت بدو)
    http://www.al4san.com/AlSaed.htm
    ذكرتني بايام الامتحانات
    تعرف ان ماعندك سالفه وتقول يمكن المدرس يجوز له ولا يرحمني
     
  17. دربك أخضر

    دربك أخضر عضو نشط

    التسجيل:
    ‏12 فبراير 2010
    المشاركات:
    482
    عدد الإعجابات:
    14
    مو جح ؟