السلام عليكم
النقاش جميل وإن شاء الله راح يوصَل الجميع إلى نقطة إلتقاء ترضي جميع الأطراف .....
وأرجو أنكم تقبلوا رأيي المتواضع .....
1- هذا سوق عرض وطلب
2- ما فيه شي إسمه بيع بالمزايده يبدأ من سعر معين , بيوع المزايده تبدأ من الصفر وصاحب السلعه بيده متى يقبل بالسعر أو يسحب السلعه المعروضه خصوصا إذا ما عجبته الأسعار المطروحه أو حتى تراجع عن البيع ، أما إذا كان يبي يبيع السلعه بسعر يبدأ من مبلغ معين يحط السعر اللي يبيه وأول واحد يقبل بالسعر هذا مفروض تتم البيعه وفي الحاله هذي لا يسمى مزاد
3- بيوع المزايده علنيه شاهر يا ظاهر ما فيه شي إسمه راجع الخاص حتى وإن كان صاحب السلعه محل ثقه ، موضوع راجع الخاص راح يفقده مصداقيته .
4 - موضوع السوم واصل سعر كذا في منتدى ثاني ... التكنولوجيا هنيه تخدم البائع فقط ... ما ينطبق على المنتدى الآخر ليس بالضرورة ينطبق على المنتدى هذا ... التوقيت ... أشخاص المزايدين ... حتى السلعه ممكن جدا تكون هي نفس السلعه لكن طريقة عرضها تختلف .
5 - الكل يبي يربح البائع والوسيط والمتسوق العادي وإذا ما فيه تنازل من الطرفين لا يمكن يتم البيع يعني البائع يحاول يقبل بالربح المعقول ولا يحاول يستغل حاجة الناس والشاري مفروض يتقي الله في البائع محد يدري شنو سبب البيع .
ما فيه شك أنه فيه ممارسات تتم في المنتدى بعضها مقصود والبعض الآخر تصدر عن طيب نيه بكل بساطه و المفروض الجميع يوسع صدره ويتقبل حتى لو كان متأكد من نية التخريب عند الشخص المقابل يبقى المنتدى حافل بالناس العقلاء والطيبين والجاديين وراح يلقى الشخص المخرب ضاع بين الناس هذولا .
مع أنني لا أبيع ولا عمري إشتريت من المنتدى لكني متابع جيد وأكثر شي يحزنني لما يختفي البائع بعد الإتفاق ولما يدش واحد للموضوع ويكتب أنه عنده نفس البضاعه للبيع والشغله الثالثة لما يدش واحد ويكتب سطر واحد أنه البضاعه موجوده في المكان الفلاني بنص السعر والآخيرة هذي الصراحه ما أدري شنو حكمها شرعا بس شكلها كلش مو حلو.
يا جماعه لحد يفهم كلامي على أنه كلام الشرع في البيوع و ممكن أنه يكون فيه أخطاء في اللي كتبته وإذا فيه يا جماعه تكفون صححوا لي ... أنا هنيه مجرد أقول رأيي .
تم بحمدالله والسلام عليكم ورحمة الله وبركاته
